NATAWO ako sang 1965 sa isa ka imol nga pamilya sa Northern Ireland. Nagdaku ako sa County Derry sa tion sang “Troubles,” ang mapintas nga kinagamo sa tunga sang mga Katoliko kag mga Protestante nga naglawig sing sobra 30 ka tuig. Nakabatyag sing diskriminasyon ang minoriya nga Katoliko kag ginpasibangdan nila ang mayoriya nga Protestante nga indi sila patas sa eleksion, pagsulundan, trabaho, kag paghatag sang mga balay.

Bisan diin makita ko ang inhustisya. Indi ko na maisip kon makapila ako ginbakol, ginapagua sa salakyan kag gintayaan sang pusil, ukon gin-interogar sang mga pulis ukon soldado. Biktima gid ako kag naghunahuna ako, ‘Puede ko batunon ini, ukon puede ako magbato!’

Nag-upod ako sa pagprotesta sa 1972 Bloody Sunday, para dumdumon ang 14 ka tawo nga gintiro sang soldado sang Britanya, kag sa hunger strike para pasidunggan ang mga ginpriso nga republican, nga nagpagutom asta mapatay sang 1981. Nagbutang ako sang ginadumilian nga mga bandera kag nagsulat sang mga graffiti bisan diin para pamatukan ang Britanya. Nagasunodsunod lang ang pagpamintas ukon  pagpamatay sang Katoliko para ipakita ang pagprotesta. Ang pagparada ukon pagmartsa lang kuntani masami nga nagadul-ong sa kinagamo.

Sang kolehiyo na ako, nag-entra ako sa mga estudyante nga nagaprotesta para sa maayo nga palibot. Nagsaylo ako sang ulihi sa London, kag didto nag-entra ako sa protesta batok sa mga kasuguan sang gobierno nga daw nagapabor sa mga manggaranon kag nagapigos sa mga imol. Nagprotesta ako upod sa mga unyon batok sa pagpanubo sang sueldo. Nag-entra man ako sa protesta batok sa poll tax sang 1990, nga naghalit gid sa Trafalgar Square.

Pero sang ulihi, ginluyahan ako. Sa baylo nga matigayon ang amon mga tulumuron, ang pagprotesta masami nga nagapadugang pa gid sang dumot.

Sina man nga tion, ginpakilala ako sang akon abyan sa mga Saksi ni Jehova. Gintudluan nila ako halin sa Biblia nga ang Dios nagaulikid sa aton pag-antos kag dulaon niya ang tanan nga halit nga gintuga sang tawo. (Isaias 65:17; Bugna 21:3, 4) Bisan maayo pa ang motibo sang mga tawo, indi nila mapaluntad ang hustisya kag pag-alalangay. Indi lamang naton kinahanglan ang paggiya sang Dios kundi kinahanglan man naton ang iya gahom para mabatuan ang indi makita nga mga puersa sa likod sang mga problema sa kalibutan.—Jeremias 10:23; Efeso 6:12.

Subong nagabatyag ako nga ang akon pagprotesta batok sa inhustisya daw wala sang pulos. Makalilipay gid mahibaluan nga magaabot ang tion nga wala na sing inhustisya sa sini nga kalibutan, diin ang tanan nga tawo alalangay na.