“Ang kadamuon sang yelo sang tig-ilinit mga 25 porsiento na lang kon ikumparar sang nagligad nga 30 ka tuig,” siling ni Peter Wadhams, propesor sang ocean physics sa University of Cambridge sa Britanya. Sang 2012, mga 50 ka barko ang nag-agi sa Northern Sea Route nga nabuksan bangod sang epekto sang pag-init sang globo.

Ang gatas sang iloy mga pila ka adlaw tapos sia magbata nadiskobrehan nga may sobra 700 ka lainlain nga bakterya—mas madamo ini sangsa ginalauman sang mga eksperto. Ginausisa gihapon sang mga researcher kon ano ang benepisyo sini sa panunaw kag immune system sang lapsag.

Sa isa ka eksperimento sang mga sientipiko sa Britanya, nakita nga mas mahinay ang reaksion sang mga drayber nga may trangkaso sangsa mga drayber nga nakainom.

Sa Aprika, nagasiling ang iban nga may “indi matupungan” nga pagpamatay sang linibo ka elepante kada tuig bangod sang ila ivory. Isa ka bes, madamo nga elepante ang gintiro sa ibabaw sang ila ulo, nga mahimo halin sa helikopter.

Naguba ang katunga sang mga korales sa Great Barrier Reef sang nagligad nga 27 ka tuig. Suno sa mga sientipiko ang kabangdanan sini amo ang mga bagyo, pagdamo sang tunukon nga starfish [Acanthaster planci], kag coral bleaching bangod sang pag-init sang dagat.