ANG scleroderma—buot silingon “matig-a nga panit”—isa ka tinaga nga ginagamit sa paglaragway sa mga balatian nga nagapaantos sa mga 2.5 ka milyon ka tawo sa bilog nga kalibutan. Ang masami nga makita sa kabataan amo ang sahi sang scleroderma nga wala nagalapta, nga amo ang pagpalanig-a sang panit.

Pero sang dies anyos si Elisa, na-diagnose sia nga may isa ka sahi sang systemic scleroderma—isa ka kahimtangan nga makaapektar indi lamang sa panit kundi sa mga organo pareho sang batobato, tagipusuon, baga, tiyan, kag tinai. Nagdumdom ang mga doktor nga mabuhi pa si Elisa sing lima ka tuig. Pero mga 14 ka tuig na ang nagligad kag si Elisa buhi pa gihapon subong. Bisan pa wala sia mag-ayo, positibo sia sa iya kabuhi. Gin-interbyu sia sang Magmata! parte sa iya balatian kag sang iya kalig-on sa pagbatas.

 San-o mo natalupangdan nga may problema ka sa lawas?

Sang nuebe anyos ako, napilasan ako sa siko, kag kasakit gid sadto. Nagdaku ang pilas kag wala mag-ayo. Gin-eksamin ang akon dugo kag natukiban nga may systemic scleroderma ako. Bangod madasig nga naglala ang akon kahimtangan, nangita kami sing doktor nga eksperiensiado sa pagbulong sang scleroderma.

Ano ang resulta sang inyo pagpangita?

May nakita kami nga rheumatologist. Ginsilingan niya ang akon mga ginikanan nga ang chemotherapy makapahaganhagan sang scleroderma kag mahimo makapalawig sang akon kabuhi sing lima pa ka tuig, kag basi indi magpadayon ang akon balatian. Galing basi maapektuhan sini ang akon immune system. Bisan kataro lang basi mapatay ako.

Kon amo, wala matabo ang inyo ginakabalak-an.

Huo, amo gani nga nagapasalamat gid ako nga buhi gihapon ako! Pero sang mga 12 anyos ako, nagsugod sa pagsakit ang akon dughan sing puerte gid nga nagalawig sing mga 30 minutos, kag kon kaisa duha ka beses kada adlaw. Nagasinggit pa gani ako sa puerte nga kasakit sini.

Ano ang kabangdanan sini?

Natukiban sang mga doktor nga ang akon hemoglobin tama kanubo kag nabudlayan ang akon tagipusuon magbomba sing dugo pakadto sa utok. Sa sulod lang sang pila ka semana, bangod sang bulong naghaganhagan ang akon problema. Apang ginhunahuna ko sadto nga bisan ano man nga oras sa pagligad sang kada adlaw mahimo nga may matabo sa akon. Gani labi pa nga nagluya ang akon buot kag daw wala na ako sing mahimo sa nagakatabo sa akon.

Katorse ka tuig na ang nagligad halin sang ma-diagnose ang imo balatian. Kamusta na ang imo panglawas subong?

Nagaantos gihapon ako sang kasakit, kag may pila pa ako ka balatian bangod sang scleroderma. May ulser ako, lung fibrosis, kag nagasakit gid ang akon dughan. Pero wala ko ginapamensar ang akon balatian ukon ginausikan ang akon tion sa pagpangasubo. May iban pa ako nga dapat himuon.

Pareho sang ano?

Nanamian ako mag-drowing, magtahi sing bayo, maghimo sing mga kulintas kag mga aritos. Pero, labing importante, subong isa sa mga Saksi ni Jehova, nagapakigbahin ako sa hilikuton nga pagpanudlo sing Biblia. Bisan pa indi ako makapamalaybalay, nagabulig ako sa iban nga mga Saksi nga nagadumala sing pagtuon sa Biblia sa mga tawo nga nagaistar sa palibot namon. May mga estudyante man gani ako nga ginatudluan sing Biblia. Ang ministeryo nagahatag sa akon kabuhi sing katuyuan.

Ngaa nagapakigbahin ka sa sini nga hilikuton bisan pa may problema ka?

Nahibaluan ko nga ang impormasyon nga ginapaambit ko sa tawo importante kag makabulig sa ila. Kag mas malipayon ako kon masako ako sa pagbulig sa iban sa sini nga paagi. Daw mas maayo pa gani ang akon pamatyag kay nagakalipat ako nga may balatian ako.

Paano ka nabuligan sang Biblia nga mangin positibo?

Ginapahanumdom ako sini nga ang akon pag-antos kag ang pag-antos sang iban temporaryo lamang. Nagasiling ang Bugna 21:4 nga sa gintalana nga tion sang Dios “pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” Ang akon paghunahuna sang mga teksto kaangay sini nagapabakod sang akon pagtuo sa ginasaad sang Dios nga isa ka masanag nga palaabuton—indi lang para sa mga nagaantos sing malala nga mga balatian kundi para sa tanan.