Natawo ako sa Mulhouse, sa aminhan-nasidlangan sang Pransia, sa isa ka imol kag magamo nga lugar malapit sa siudad. Nadumduman ko nga sang bata pa ako nagailinaway ang mga pamilya sa amon lugar. Sa amon pamilya, ginapakanubo ang mga babayi kag halos wala sila ginakonsulta sang mga lalaki. Gintudluan ako nga ang babayi para lang sa kusina kag mag-atipan sa mga lalaki kag kabataan.

Mabudlay ang akon kahimtangan sang bata pa ako. Sang dies anyos ako, napatay ang akon amay bangod sang iya pagkapalainom. Pagligad sang lima ka tuig, naghikog ang isa ko ka magulang nga lalaki. Sa sina man nga tuig, nasaksihan ko ang pagpatay sa isa ka tawo bangod sang pag-ilinaway sang pamilya, kag nakibang gid ako. Gintudluan ako sang akon pamilya kon paano maggamit sang kutsilyo kag pusil kag magbato kon ginaaway ako. Bangod magamo ang akon kabuhi sang pamatan-on ako, nagpalainom ako kag ginpuno sing tattoo ang akon lawas.

Sang 16 anyos ako, nagainom ako sing 10 asta 15 ka botelya sang beer kada adlaw, kag dayon nagdroga ako. Para may igasto ako sa akon bisyo, nagapamaligya ako sang scrap nga salsalon kag nagapangawat. Sa edad nga 17, napriso na ako. Sa kabug-usan, 18 ka beses ako nga ginsentensiahan bangod sa pagpangawat kag pag-abusar.

Naglala pa gid ang akon bisyo sang beintehon na ako. Nagasuyop ako sing mga 20 ka stick sang marijuana kada adlaw kag nagatomar sang heroina kag iban pa nga ginadumilian nga droga. Pila ka beses nga diutayan lang ako mapatay bangod nasobrahan sini. Nagbaligya man ako sing droga, amo nga pirme lang ako may dala nga pusil kag kutsilyo. Isa ka bes, gintiro ko ang isa ka lalaki, pero maayo lang kay nag-igo sa bilya sang iya paha ang bala! Sang 24 anyos ako, napatay ang akon iloy kag labi ako nga nagsingki. Kon makita ako sang mga nagalakat sa dalan nga nagapadulong nagatabok sila sa karsada kay nahadlok sila sa akon. Bangod pirme ako nadalahig sa inaway, masami nga ginahunong ako kon Sabado kag Domingo sa estasyon sang pulis ukon ginadala sa ospital para magpatahi sang akon mga pilas.

Nangasawa ako sang 28 anyos ako. Subong sang ginapaabot ninyo, wala ko ginarespeto ang akon asawa. Ginainsulto ko sia kag ginasakit. Daw indi kami mag-asawa. Abi ko bastante na nga hatagan ko lang sia sang madamo nga alahas nga kinawatan. Dayon, may natabo nga wala ko ginapaabot. Nagtuon sia sang Biblia sa mga Saksi ni Jehova. Pagkatapos sang iya una nga pagtuon, nag-untat sia sa pagpanigarilyo, wala na niya ginbaton ang kinawatan nga kuarta, kag ginbalik niya sa  akon ang mga alahas. Naakig gid ako. Ginpamatukan ko ang iya pagtuon sa Biblia, kag ginabugahan ko sia sa guya sang aso sang sigarilyo. Ginpakalain ko man sia sa amon mga kaingod.

Isa ka gab-i, bangod sa kahulugbon, indi hungod nga nasunog ko ang amon apartment. Ginsalbar ako sang akon asawa kag ang amon lima ka tuig nga bata nga babayi. Sang naumpawan ako, ginkonsiensia ako. Pamatyag ko, indi na ako mapatawad sang Dios. Nadumduman ko ang ginsiling sang pari nga ang malain nga tawo makadto sa impierno. Bisan ang akon psychiatrist nagsiling: “Sobra na ang imo ginahimo! Wala ka na tsansa nga magbag-o.”

Pagkatapos sang sunog, nagsaylo kami sa balay sang akon ugangan. Sang ginbisitahan sang mga Saksi ang akon asawa, ginpamangkot ko sila, “Mapatawad pa bala sang Dios ang akon mga sala?” Ginpabasa nila sa akon sa Biblia ang 1 Corinto 6:9-11. Ginsambit diri ang mga buhat nga ginapakamalaut sang Dios, pero nagsiling man ini: “Amo sina anay ang iban sa inyo.” Ginpasalig ako sini nga may tsansa pa ako nga magbag-o. Ginpasalig man ako sang mga Saksi nga ginahigugma ako sang Dios sang ginbasa nila sa akon ang 1 Juan 4:8. Napalig-on ako sini, gani ginpangabay ko ang mga Saksi nga tun-an ako sa Biblia sing duha ka beses kada semana, kag nagtambong ako sa ila Cristiano nga mga pagtilipon. Pirme ako nagapangamuyo kay Jehova.

Sa sulod sang isa ka bulan nga pagtuon, gin-untatan ko na ang pagdroga kag pag-inom. Nabatyagan ko ang epekto sini sa akon lawas. Nagadamgo ako sing malain, nagasakit ang akon ulo, nagapalaminhod ang akon lawas, kag nabatyagan ko ang iban pa nga sintoma sang pag-untat ko sa akon bisyo. Pero, nabatyagan ko man nga ginabuligan ako ni Jehova kag ginapalig-on. Daw pareho ako kay apostol Pablo. Nagsulat sia parte sa bulig sang Dios sa iya: “Sa tanan nga butang may kusog ako paagi sa isa nga nagapabakod sa akon.” (Filipos 4:13) Sang ulihi, nauntatan ko gid man ang pagpanigarilyo.—2 Corinto 7:1.

Magluwas nga nabuligan ako sang Biblia nga mangin maayo ang akon kabuhi, nag-uswag man ang pagkabuhi sang amon pamilya. Nagbag-o ang akon panimuot sa akon asawa. Ginarespeto ko na sia kag nagasiling na ako sing “palihug” kag “salamat.” Nangin maayo man ako nga amay sa amon bata nga babayi. Pagkatapos sang isa ka tuig nga pagtuon sa Biblia, gindedikar ko ang akon kabuhi kay Jehova kag nagpabawtismo, pareho sa ginhimo sang akon asawa.

Ginsalbar gid sang mga prinsipio sa Biblia ang akon kabuhi. Bisan ang mga indi Saksi nga miembro sang akon pamilya nagsiling nga basi napatay na ako bangod sa pagdroga ukon napatay sa away.

Ginbag-o gid sang mga panudlo sang Biblia ang kabuhi sang akon pamilya kay gintudlo sini sa akon ang akon mga responsibilidad bilang bana kag amay. (Efeso 5:25; 6:4) Updanay na kami sang akon pamilya sa paghimo sang mga hilikuton. Sa karon, sa baylo nga para lang sa kusina ang akon asawa, nalipay ako nga suportahan sia sa iya hilikuton bilang bug-os tion nga ebanghelisador. Kag nalipay man sia nga suportahan ako bilang isa ka gulang sang kongregasyon.

Daku gid ang epekto sa akon kabuhi sang gugma kag kaluoy ni Jehova nga Dios. Gusto ko gid isugid ang iya mga kinaiya sa mga nadulaan na sing paglaum nga magbag-o, kay amo sina ang pagtamod anay sa akon sang kalabanan. Nahibaluan ko nga ang Biblia may gahom sa pagbulig kay bisan sin-o nga matigayon ang matinlo kag may katuyuan nga kabuhi. Wala lamang ako gintudluan sang Biblia nga higugmaon kag respetuhon ang iban, lalaki man ukon babayi, kundi gintudluan man ako sini nga respetuhon ang akon kaugalingon.