Lain naman nga kabudlayan ang naeksperiensiahan ni Nicolas kag ni Céline. Ginhatagan sila sang asaynment sang branch office sa France nga magsaylo sa lain nga kongregasyon. Nagsiling sila: “Sang primero, excited gid kami. Pero sang ulihi, nabudlayan kami. Nahidlaw kami sa amon mga abyan kag indi pa kami suod sa mga kauturan sa amon bag-o nga kongregasyon.” a May mga kabudlayan gid ang pagsaylo sa lain nga kongregasyon. Ano ang makabulig sa imo nga maka-adjust kag mangin malipayon? Paano ka mabuligan sang mga kauturan sa kongregasyon nga ginsayluhan mo? Kag ano ang himuon mo para mapalig-on mo ang mga kauturan kag mapalig-on ka man nila?

APAT KA PRINSIPIO NGA MAKABULIG SA IMO NGA MAKA-ADJUST

1. Magsalig kay Jehova. (Sal. 37:5) Binagbinaga si Kazumi nga taga-Japan. Bahin sia sang isa ka kongregasyon sa sulod sang 20 ka tuig. Pero sang nagdesisyon ang ginaubrahan sang iya bana nga isaylo ang iya bana sa lain nga lugar, kinahanglan man magsaylo ni Kazumi sa lain nga kongregasyon. Paano niya ‘gintugyan kay Jehova ang iya dalanon’? Nagsiling sia: “Sulitsulit ko nga ginasugid kay Jehova ang tanan ko nga ginabatyag. Ginasugid ko sa iya kon nakulbaan ako, nasubuan, kag nabalaka. Sa kada tion nga ginahimo ko ini, ginapabakod niya ako.”

Ano ang himuon mo para magbakod pa gid ang imo pagsalig kay Jehova? Ang aton pagtuo daw pareho sa isa ka tanom nga kinahanglan atipanon. Kinahanglan sang tanom ang tubig kag sustansia halin sa duta para magtubo ini. Dapat man naton atipanon ang aton pagtuo para magbakod ini. Binagbinaga si Nicolas nga ginsambit kaina. Ginpamalandungan niya ang halimbawa ni Abraham, ni Jesus, kag ni Pablo nga naghimo sang madamo nga mga sakripisyo para matuman nila ang  kabubut-on sang Dios. Nakabulig ini para magbakod pa gid ang iya pagsalig nga buligan sia ni Jehova. Kon regular mo nga tun-an ang Biblia, makabulig ini sa imo nga masarangan ang bisan ano nga pagbag-o sa imo kabuhi. Paagi sa imo mga matun-an sa Biblia, mapalig-on mo man ang iban sa imo bag-o nga kongregasyon.

2. Indi pag-ikumparar ang imo bag-o nga kongregasyon sa imo kongregasyon sang una. (Man. 7:10) Sang nagsaylo ang isa ka brother nga si Jules sa United States halin sa Benin, kinahanglan niya mag-adjust sa kultura nga lain gid sa ila kultura. Nagsiling sia, “Pamatyag ko daw obligado ako nga iistorya sa tanan nga makilala ko ang parte sa akon kabuhi.” Bangod lain ini sa kultura nga iya gindak-an, nasaw-ahan sia mag-upod sa mga kauturan. Pero sang nakilala niya sing maayo ang mga kauturan, ginbag-o niya ang iya panimuot. Nagsiling sia: “Narealisar ko nga bisan diin man kita sa kalibutan, palareho lang kita nga mga tawo. Lainlain lang ang aton paagi sa pagpabutyag sang aton kaugalingon. Ang importante, batunon naton ang kinalain sang kada isa.” Gani indi pag-ikumparar ang imo bag-o nga kongregasyon sa imo kongregasyon sang una. Ang isa ka sister nga payunir nga si Anne-Lise nagsiling: “Wala ko ginhunahuna nga tani pareho lang sa kongregasyon ko sang una ang bag-o ko nga kongregasyon. Sa baylo, ginpanikasugan ko nga makatuon sang bag-o nga mga butang sa kongregasyon nga ginsayluhan ko.”

Kon isa ikaw ka gulang, indi mo man dapat pag-ikumparar ang imo bag-o nga kongregasyon sa imo kongregasyon sang una. Bisan pa lain ang paagi sang mga brother sa imo bag-o nga kongregasyon sa paghimo sang pila ka butang, indi buot silingon sini nga sala ang ila ginahimo. Gani antes ka maghatag sang mga panugda, hibalua anay sing maayo ang sitwasyon sang kongregasyon nga ginsayluhan mo. (Man. 3:​1, 7b) Panikasugi nga mangin maayo nga halimbawa sa mga kauturan. Mas maayo ini sangsa ipilit mo sa ila ang imo mga ideya.​—2 Cor. 1:24.

3. Mangin masako sa pag-alagad sa imo bag-o nga kongregasyon. (Fil. 1:27) Kon nagsaylo ka sang lugar, makaubos ini sang tion kag makakalapoy. Pero importante gid nga mag-attend ka dayon sa mga miting sa imo bag-o nga kongregasyon. Panikasugi nga mag-attend sing regular sa Kingdom Hall. Kay man, kon indi ka kilala sang mga kauturan sa imo bag-o nga kongregasyon ukon talagsa ka lang nila makita, paano ka nila mabuligan? Binagbinaga si Lucinda nga nagsaylo sa isa ka daku nga siudad sa South Africa upod ang iya duha ka bata nga babayi. Nagsiling sia: “Ginlaygayan ako sang akon mga abyan nga dapat ko panikasugan nga mangin suod sa mga kauturan sa akon bag-o nga kongregasyon, updan ko ang lainlain nga mga kauturan sa pagbantala, kag regular ako nga magkomento sa mga miting. Ginsilingan man namon ang mga brother nga puede sila makahiwat sang miting para sa pag-alagad sa latagon sa amon balay.”

‘Magpanikasog sing tingob tungod sa pagtuo sa maayong balita.’ Buot silingon, kon panikasugan mo nga mangin masako sa pag-alagad upod ang mga kauturan sa imo bag-o nga kongregasyon, mapalig-on mo ang imo pagtuo kag ang pagtuo sang iban. Binagbinaga si Anne-Lise nga ginsambit kaina. Ginpalig-on sia sang mga gulang nga panikasugan niya nga makaupod sa pagbantala ang tanan nga kauturan. Ano ang resulta? Nagsiling sia, “Narealisar ko dayon nga isa ini ka maayo nga paagi para mabatyagan ko nga bahin na ako sang akon bag-o nga kongregasyon.” Kag kon nagaboluntaryo ka sa pagpaninlo kag pagmentinar sang Kingdom Hall sa imo bag-o nga kongregasyon, ginapakita mo  nga ginakabig mo na ini nga imo kongregasyon. Kon mangin masako ka sa pag-alagad upod sa mga kauturan sa imo bag-o nga kongregasyon, mabatyagan mo nga nalipay sila nga makaupod ka nila kag bahin ka na sang ila pamilya.

4. Panikasugi nga makakita sang bag-o nga mga abyan. (2 Cor. 6:​11-13) Ipabatyag sa mga kauturan nga nagaulikid ka sa ila. Isa ini sa pinakamaayo nga paagi para makakita ka sang mga abyan. Gani antes kag pagkatapos sang miting, kilalaha sing maayo ang mga kauturan. Panikasugi nga sauluha ang ila mga ngalan. Kon matandaan mo ang ila mga ngalan kag kon mainabyanon ka kag mahapos palapitan, mapalig-on sila sini nga kilalahon ka pa gid kag makakita ka sang bag-o nga mga abyan.

Imbes nga magpakunokuno para manamian sa imo ang mga kauturan, ipakita sa ila ang imo matuod nga pagkatawo. Himua ang ginhimo ni Lucinda. Nagsiling sia, “Pirme namon ginaagda ang iban sa amon balay, gani nangin suod namon sila nga mga abyan asta subong.”

“ABIABIHA NINYO ANG ISA KAG ISA”

May pila nga nahuya nga magsulod sa Kingdom Hall kon indi pa nila kilala ang mga tawo didto. Ano ang puede mo himuon para indi mahuya ang mga bag-o lang nagsaylo sa inyo kongregasyon? “Abiabiha ninyo ang isa kag isa,” siling ni apostol Pablo, “subong nga gin-abiabi man kamo sang Cristo.” (Roma 15:7) Kon ilugon sang mga gulang ang Cristo, mapabatyag nila sa mga bag-o lang nagsaylo sa ila kongregasyon nga ginaabiabi sila sing maayo. (Tan-awa ang kahon nga “ Kon Ano ang Makabulig Para Maka-adjust Ka sa Imo Pagsaylo.”) Pero may mahimo ang tanan sa kongregasyon, lakip na ang kabataan, para mangin abyan nila ang mga bag-o lang nagsaylo sa ila kongregasyon.

Mapakita naton nga ginaabiabi naton ang iban paagi sa pag-agda sa ila sa aton balay kag pagbulig sa ila. Binagbinaga ang ginhimo sang isa ka sister. Sang nagsaylo sa ila lugar ang isa ka sister, ginlagaw niya sia sa ila siudad kag gintudluan niya sia sang ruta sang mga salakyan. Napalig-on gid ang sister sa iya ginhimo kag nakabulig ini sa sister nga maka-adjust.

MAY KAHIGAYUNAN KA NGA MAG-USWAG

Antes makalupad ang isa ka apan, dapat anay hukson sang apan ang panit sini sing pila ka beses ukon dapat anay ini maghiluno. Sing kaanggid, kon nagsaylo  ka sa lain nga kongregasyon, dapat mo hukson ukon dulaon ang bisan ano nga kabalaka nga nagapugong sa imo nga mag-uswag sa imo pag-alagad kay Jehova. Si Nicolas kag si Céline nagsiling: “Sang nagsaylo kami, maayo gid ini nga paghanas sa amon. Para maka-adjust kami sa lain naman nga mga tawo kag palibot, kinahanglan namon tun-an nga magpakita sang bag-o nga mga kinaiya.” May ginsiling si Jean-Charles, nga ginsambit sa umpisa, nga benepisyo sa iya pamilya. Nagsiling sia: “Nag-uswag ang espirituwalidad sang amon kabataan sa amon bag-o nga kongregasyon kag mas nangin suod sila kay Jehova. Pagligad lang sang pila ka bulan, nagsiling ang amon bata nga babayi nga gusto na niya nga bahinan sia sa midweek miting kag nangin unbaptized publisher ang amon bata nga lalaki.”

Pero, ano abi kon indi ka makasaylo sa bululigan nga kongregasyon bangod sa imo sitwasyon? Panikasugi nga iaplikar sa imo kongregasyon subong ang pila ka panugda sa sini nga artikulo. Kon himuon mo ini, mabatyagan mo nga daw ara ka lang sa bag-o nga kongregasyon. Magsalig kay Jehova kag mangin masako sa pag-alagad upod ang mga kauturan sa inyo kongregasyon. Panikasugi nga makaupod ang lainlain nga mga kauturan sa pagbantala. Panikasugi man nga makakita sang bag-o nga mga abyan, kag pabakura pa gid ang imo kaangtanan sa madugay mo na nga mga abyan. Buligi ang mga bag-uhan ukon ang mga nagakinahanglan sang bulig sa inyo kongregasyon. Kon himuon mo ini, mas mangin suod ka pa gid kay Jehova. Ngaa? Bangod ang aton gugma amo ang nagapakilala sa aton bilang matuod nga mga Cristiano. (Juan 13:35) Makasalig ka nga “nahamuot gid ang Dios sa sini nga mga halad.”​—Heb. 13:16.

Bisan pa may mga kabudlayan, madamo nga kauturan ang naka-adjust sa kongregasyon nga ginsayluhan nila. Masarangan mo man ini nga himuon. Si Anne-Lise nagsiling: “Sang nagsaylo ako sa lain nga kongregasyon, nabuligan ako sini nga mag-uswag sa akon pag-alagad.” Sa bahin naman ni Kazumi, kumbinsido na sia subong nga kon magsaylo ka sa lain nga kongregasyon, “makita mo kon paano ka buligan ni Jehova sa paagi nga wala mo pa naeksperiensiahan sang una.” Kamusta naman si Jules? Nagsiling sia: “Madamo na ako sang abyan, gani wala na ako nasubuan. Suod gid ako sa mga kauturan sa akon bag-o nga kongregasyon. Pamatyag ko indi ko gid masarangan nga bayaan sila.”