1-2. Ano nga mga inhustisya ang posible maeksperiensiahan naton?

 MAY ginsugid si Jesus nga isa ka ilustrasyon parte sa isa ka balo nga babayi nga nagbalikbalik sa isa ka hukom para mahatagan sang hustisya ang ginhimo sa iya. Madamo nga tawo sadto nga tion ang nakaeksperiensia sang inhustisya, gani nahangpan sang mga disipulo ni Jesus ang ginbatyag sang balo nga babayi. (Luc. 18:​1-5) Nahangpan man naton ang ginbatyag sini nga balo bangod nakaeksperiensia man kita tanan sang inhustisya.

² Subong, madamo nga tawo ang may ginapasulabi, ginahimuan nila sing malain ang iban, kag ginauna nila ang ila kaayuhan. Bangod sini, wala na kita natingala kon makaeksperiensia kita sang inhustisya. (Man. 5:8) Ano abi kon isa ka utod ang magpakalain sa aton? Posible nga daw indi kita makapati nga mahimo niya ini. Pero, posible gid ini matabo. Indi buot silingon sini nga ginapamatukan kita sang aton mga kauturan. Indi lang sila perpekto, gani may mga tion nga may masiling sila ukon mahimo nga posible magpalain sang aton buot. Kon matabo ini sa aton, madamo kita sing matun-an sa reaksion ni Jesus sang nakaeksperiensia sia sang inhustisya sa mga nagpamatok sa iya. Kon masarangan naton nga mangin mapinasensiahon sa iban nga mga tawo nga nagapamatok sa aton, indi bala nga dapat mangin mas mapinasensiahon kita sa aton mga kauturan? Ano ang ginabatyag ni Jehova kon ginhimuan kita sing malain sang isa ka utod ukon sang indi Saksi? Nabalaka bala sia sa aton?

3. Ngaa masiling naton nga nabalaka si Jehova sa aton kon makaeksperiensia kita sang inhustisya?

³ Gusto ni Jehova nga pakitaan kita sing kaayo sang iban, kag nabalaka sia kon ginhimuan kita sing malain. Kay man, “si Jehova mahigugmaon sa katarungan.” (Sal. 37:28) Ginapasalig ni Jesus nga kon mag-abot na ang husto nga tion, ‘magahatag gilayon  si Jehova sing katarungan.’ (Luc. 18:​7, 8) Kag sa indi na lang gid madugay, dulaon ni Jehova ang tanan naton nga problema kag indi na gid kita makaeksperiensia sang inhustisya.​—Sal. 72:​1, 2.

4. Paano kita ginabuligan ni Jehova subong?

⁴ Samtang ginahulat naton ang tion nga dulaon na ni Jehova ang inhustisya, ginabuligan niya kita nga mabatas ini subong. (2 Ped. 3:13) Halimbawa, ginatudluan niya kita kon ano dapat ang aton reaksion kon ginhimuan kita sing malain para indi maglala ang problema. Kag paagi sa iya Anak, ginhatagan niya kita sang perpekto nga halimbawa kon ano ang dapat naton himuon kon makaeksperiensia kita sang inhustisya. Mabasa man naton sa Biblia ang mga laygay ni Jehova kon ano ang dapat naton himuon kon ginhimuan kita sing malain.

MAGHALONG SA IMO REAKSION KON MAKAEKSPERIENSIA KA SANG INHUSTISYA

5. Ngaa dapat kita maghalong sa aton reaksion kon makaeksperiensia kita sang inhustisya?

⁵ Kon makaeksperiensia kita sang inhustisya, posible nga masakitan gid kita kag masubuan. (Man. 7:7) Nabatyagan man ini sang matutom nga mga alagad ni Jehova, pareho kay Job kag kay Habacuc. (Job 6:​2, 3; Hab. 1:​1-3) Normal lang nga mabatyagan naton ini. Pero dapat kita maghalong sa aton reaksion para malikawan naton ang paghimo sing indi maayo.

6. Ano ang ginatudlo sa aton sang halimbawa ni Absalom? (Tan-awa man ang piktyur.)

⁶ Kon ginhimuan kita ukon ang aton pinalangga sing malain, posible nga gusto naton magbalos. Pero kon himuon naton ina, magalala pa gid ang problema. Binagbinaga ang halimbawa sang anak ni Hari David nga si Absalom. Naakig gid sia sang ginlugos ang iya utod nga si Tamar sang ila utod sa amay nga si Amnon. Suno sa Mosaikong Kasuguan, dapat patyon si Amnon bangod sang iya ginhimo. (Lev. 20:17) Normal lang nga maakig si Absalom sa natabo. Pero indi husto ang iya ginhimo nga pagpatay kay Amnon.​—2 Sam. 13:​20-23, 28, 29.

7. Ano ang una nga reaksion sang isa ka salmista sa inhustisya?

⁷ Kon pamatyag naton daw wala ginasilutan ang mga nagahimo sing malain, posible mahunahuna naton kon bala may pulos gid man ang paghimo sing maayo. Binagbinaga ang halimbawa sang isa ka salmista. Nakita niya nga daw mas maayo pa ang kabuhi sang malain nga mga tawo bisan pa nga ginahimuan nila sing malain ang maayo nga mga tawo. Nagsiling sia: “Amo ini ang mga malauton nga pirme lang masulhay.” (Sal. 73:12) Naglalain man sia sa nakita niya nga  inhustisya, gani nahunahuna niya nga wala sing pulos ang iya pag-alagad kay Jehova. Nagsiling sia: “Sang gintinguhaan ko nga hangpon ini, nabudlayan gid ako.” (Sal. 73:​14, 16) Kag gin-aku niya: “Apang diutayan lang ako magtalang sa matarong nga dalanon; diutayan lang ako makadanlog.” (Sal. 73:2) Daw pareho man sa sini ang natabo sa isa ka brother nga tawgon naton nga Alberto.

8. Ano ang epekto sa isa ka brother sang nakaeksperiensia sia sang inhustisya?

⁸ Ginpasibangdan si Alberto nga nangawat sia sang kuarta sa pondo sang kongregasyon. Bangod sini, ginkuha sa iya ang iya mga pribilehiyo, kag nadula ang respeto sa iya sang madamo nga kauturan. Nagsiling sia: “Naakig gid ako kag naglalain.” Nagluya ang iya kaangtanan kay Jehova bangod nagpaapekto sia sa iya ginabatyag, kag nangin inactive sia sing lima ka tuig. Ginapakita sini ang posible nga matabo kon maghinakit kita kon makaeksperiensia kita sang inhustisya.

ILUGA SI JESUS KON MAKAEKSPERIENSIA KA SANG INHUSTISYA

9. Ano nga mga inhustisya ang ginbatas ni Jesus? (Tan-awa man ang piktyur.)

⁹ Ginpakita ni Jesus ang perpekto nga halimbawa kon ano ang dapat naton himuon kon makaeksperiensia kita sang inhustisya. Indi maayo  ang pagtratar sa iya sang madamo nga tawo, lakip na sang iya pamilya. Nagsiling ang iya mga paryente nga nagbuang na sia, kag nagsiling ang mga lider sang relihion nga naghalin sa mga demonyo ang iya gahom. Ginyaguta man sia sang Romano nga mga soldado, ginsakit, kag ginpatay. (Mar. 3:​21, 22; 14:55; 15:​16-20, 35-37) Pero ginbatas ni Jesus ining tanan nga inhustisya kag wala gid sia nagbalos. Ano ang matun-an naton sa iya halimbawa?

10. Ano ang ginhimo ni Jesus sang nakaeksperiensia sia sang inhustisya? (1 Pedro 2:​21-23)

¹⁰ Basaha ang 1 Pedro 2:​21-23. a Dapat naton ilugon si Jesus kon makaeksperiensia kita sang inhustisya bangod sia ang aton perpekto nga halimbawa. Kabalo sia kon san-o sia maghipos kag kon san-o sia maghambal. (Mat. 26:​62-64) Bisan pa indi matuod ang ginsiling sang iban parte sa iya, may mga tion nga naghipos lang sia. (Mat. 11:19) Kag kon maghambal sia, wala niya ginainsulto ukon ginapahog ang mga naghingabot sa iya. Ginpunggan ni Jesus ang iya kaugalingon bangod “ginsalig niya ang iya kaugalingon sa Isa nga nagahukom sing matarong.” Kabalo si Jesus nga nakita ni Jehova nga ginahimuan sia sing malain. Kag nagsalig sia nga dulaon ni Jehova ang tanan nga inhustisya sa husto nga tion.

11. Paano naton mapakita nga kabalo kita magkontrol kon san-o kita mahipos kag kon san-o kita mahambal? (Tan-awa man ang mga piktyur.)

¹¹ Kon ginapakalain kita sang iban, mailog naton si Jesus paagi sa pagkontrol kon san-o kita mahipos kag kon san-o kita mahambal. Kon indi man gid serioso ang ginhimo sa aton, puede na lang naton ini palampason. Puede man nga maghipos lang kita para malikawan naton nga maghambal sang bisan ano nga posible makapalala  lang sang problema. (Man. 3:7; Sant. 1:​19, 20) Pero may mga tion nga posible kinahanglan naton maghambal para pangapinan ang mga ginapakalain sang iban ukon para pangapinan ang kamatuoran. (Binu. 6:​1, 2) Kon maghambal kita, dapat panikasugan naton nga mangin kalmado kag matinahuron.​—1 Ped. 3:15. b

12. Paano naton mapakita nga ginasalig naton ang aton kaugalingon “sa Isa nga nagahukom sing matarong”?

¹² Mailog man naton si Jesus paagi sa pagsalig sang aton kaugalingon “sa Isa nga nagahukom sing matarong.” Kon ginapakalain kita sang iban, nagasalig kita nga kabalo si Jehova kon ano ang matuod. Bangod sigurado kita nga may himuon si Jehova para tadlungon ang ginahimo nga pagpakalain sa aton, nagabulig ini sa aton nga batason ini. Kon isalig naton kay Jehova ang tanan, makabulig ini sa aton kay malikawan naton nga maakig ukon magdumot. Kay man, kon maakig kita, posible makahimo kita sing malain, madula ang aton kalipay, kag maguba ang aton kaangtanan kay Jehova.​—Sal. 37:8.

13. Ano ang makabulig sa aton nga mabatas ang inhustisya?

¹³ Siempre, indi gid naton mailog sing perpekto ang halimbawa ni Jesus. Kon kaisa, may mahimo kita ukon masiling nga ginahinulsulan naton sa ulihi. (Sant. 3:2) Kag kon kaisa, makaeksperiensia kita sang inhustisya nga posible magresulta sa emosyonal kag pisikal nga halit nga mabudlay batason. Kon naeksperiensiahan mo ini, makasalig ka nga kabalo si Jehova sang imo ginabatyag. Kag nahangpan ni Jesus ang imo ginabatyag bangod nakaeksperiensia man sia sang inhustisya. (Heb. 4:​15, 16) Magluwas sa paghatag sa aton sang perpekto nga halimbawa ni Jesus, ginalaygayan man kita ni Jehova nga makabulig sa aton nga mabatas ang inhustisya. Binagbinagon naton ang duha ka teksto sa libro sang Roma nga makabulig sa aton.

“PABAY-I NGA ANG DIOS ANG MAGPAKITA SANG IYA KAAKIG”

14. Paano naton mapakita nga ‘ginapabay-an naton nga ang Dios ang magpakita sang iya kaakig’? (Roma 12:19)

¹⁴ Basaha ang Roma 12:19. Ginpalig-on ni apostol Pablo ang mga Cristiano nga ‘pabay-an nga ang Dios ang magpakita sang iya kaakig.’ Kon si Jehova ang ginapadesisyon naton kon san-o kag kon paano niya ipadapat ang hustisya, ginapabay-an naton nga si Jehova ang magpakita sang iya kaakig. Binagbinaga ang isa ka brother nga si John. Sang nakaeksperiensia sia sang inhustisya, nagsiling sia: “Kinahanglan ko kontrolon ang akon kaakig para indi ako makahimo sing malain. Pero, indi ini mahapos. Nakabulig sa akon ang Roma 12:19 nga mangin mapinasensiahon kag magsalig kay Jehova.”

15. Ngaa mas maayo kon maghulat kita kay Jehova kon san-o niya tadlungon ang problema?

¹⁵ Kon maghulat kita kay Jehova kon san-o niya tadlungon ang problema, makabenepisyo gid kita. Kon himuon naton ini, malikawan naton ang grabe nga stress nga posible mabatyagan naton kon kita ang magsolbar sang problema. Gusto gid ni Jehova nga buligan kita. Daw pareho lang nga nagasiling sia: ‘Magsalig ka lang sa akon. Ako na ang bahala.’ Kon nagasalig kita sa promisa ni Jehova nga sia ang magabalos sa nagapakalain sa aton, indi na kita dapat magpaapekto sa sini bangod sigurado kita nga solbaron ini ni Jehova sa pinakamaayo nga paagi. Amo ini ang nakabulig kay John nga ginsambit kaina. Nagsiling sia, “Dapat ako maghulat kay Jehova kay mas maayo ang iya solusyon sangsa akon solusyon.”

“PADAYON NGA DAUGA ANG MALAUT PAAGI SA MAAYO”

16-17. Paano makabulig ang pangamuyo para ‘padayon naton nga madaug ang malaut paagi sa maayo’? (Roma 12:21)

¹⁶ Basaha ang Roma 12:21. Ginpalig-on ni Pablo ang mga Cristiano nga ‘padayon nga daugon  ang malaut paagi sa maayo.’ Sa bahin ni Jesus, amo ini ang ginsiling niya sa iya Sermon sa Bukid: “Padayon nga higugmaa ang inyo mga kaaway kag padayon nga ipangamuyo ang mga nagahingabot sa inyo.” (Mat. 5:44) Ginhimo gid ini ni Jesus. Imadyina ang inhustisya nga ginbatas ni Jesus sang ginlansang sia sa usok sang Romano nga mga soldado. Grabe gid kasakit sang iya naeksperiensiahan.

¹⁷ Bisan pa nag-antos si Jesus, wala sia nagpaapekto sa inhustisya nga iya naeksperiensiahan. Imbes nga pakamalauton ang mga soldado, nangamuyo sia: “Amay, patawara sila, kay wala sila makahibalo sang ila ginahimo.” (Luc. 23:34) Kon ipangamuyo naton kay Jehova ang mga nagapakalain sa aton, makabulig ini nga maghaganhagan ang aton kaakig. Makabulig pa gani ini nga magbag-o ang aton pagtan-aw sa mga nakasakit sa aton.

18. Paano nakabulig kay Alberto kag kay John ang pangamuyo para mabatas nila ang inhustisya?

¹⁸ Sa bahin sang duha ka brother nga ginsambit kaina, nakabulig sa ila ang pangamuyo para mabatas nila ang mga inhustisya. Nagsiling si Alberto: “Bisan pa indi husto ang ginhimo sang mga brother, nangamuyo ako para sa ila. Pila ka beses ako nga nangabay kay Jehova nga buligan niya ako nga madula ang akon kaakig.” Subong, nagaalagad na liwat sing matutom kay Jehova si Alberto. Nagsiling si John: “Madamo nga beses ko nga ginpangamuyo ang brother nga nakasakit sa akon. Nakabulig ini sa akon nga bag-uhon ang akon pagtan-aw sa iya kag indi sia paghukman. Nakabulig man ang pangamuyo para mangin malinong ang akon hunahuna.”

19. Ano ang dapat naton himuon asta sa katapusan sini nga sistema? (1 Pedro 3:​8, 9)

¹⁹ Samtang ari kita sa sining malain nga kalibutan, posible gid nga makaeksperiensia kita sang inhustisya. Pero bisan ano pa ang aton maeksperiensiahan, indi gid kita dapat mag-untat sa pagpangamuyo kay Jehova para mangayo sang bulig sa iya. Dapat man naton ilugon si Jesus kon pakalainon kita sang iban. Kag dapat padayon naton nga iaplikar ang mga prinsipio sa Biblia. Kon himuon naton ini, makasalig kita nga pakamaayuhon kita ni Jehova.​—Basaha ang 1 Pedro 3:​8, 9.