Sadto nga tuig, naghimo sang pila ka pagbag-o ang organisasyon. Nakabulig ini para mahiusa sa pagsimba ang mga Estudyante sang Biblia. Gin-umpisahan sang The Watch Tower ang pagsulat sang mga artikulo nga nagapaathag sang pila ka teksto. Ginabinagbinag nila ini kada semana sa ginatawag nila nga Prayer, Praise, kag Testimony Meeting. Nag-print man sang kalendaryo ang mga Estudyante sang Biblia. Makita sa sini kon ano nga teksto ang binagbinagon nila kada semana, kag kon ano nga kanta ang puede nila gamiton sa ila personal nga pagtuon kag family worship.

Sa ila mga miting, nagasugid ang mga Estudyante sang Biblia sang ginatawag nila nga “testimony.” Puede nila masugid ang ila mga eksperiensia sa pagbantala kag kon ano ang ginapasalamatan nila kay Jehova. Puede man sila makakanta ukon makapangamuyo. Si Eva Barney, nga nabawtismuhan sang 1923 sang 15 anyos sia, nagsiling: “Kon gusto mo magsugid sang testimony, matindog ka kag magsiling nga, ‘Gusto ko pasalamatan ang Ginuo sa tanan nga kaayo nga ginhimo niya para sa akon.’” May pila ka utod nga nanamian gid magsugid sang testimony. Nagsiling pa si Sister Barney: “Madamo sing ginasugid ang tigulang nga utod nga si Brother Godwin nga gusto niya pasalamatan sa Ginuo. Pero kon matalupangdan sang iya asawa nga daw indi na mahim-os ang brother nga nagadumala sang miting, ginabutong niya ang bayo sang iya bana. Gani nagapungko dayon ang iya bana.”

Isa ka beses kada bulan, ang kada kongregasyon may ginatawag nga espesyal nga Prayer, Praise, kag Testimony Meeting. Amo ini ang ginsiling sang Abril 1, 1923, nga The Watch Tower: “Ang katunga sang miting dapat gamiton sa pagsugid parte sa mga eksperiensia sa pagbantala kag sa pagpalig-on sa mga kauturan. . . . Nagapati kami nga magasuod pa gid ang mga kauturan paagi sa sining makapalig-on nga mga miting.”

Nakabenepisyo gid sa sini nga mga miting ang 19 anyos nga manugbantala nga si Charles Martin nga taga-Vancouver, Canada. Nagsiling sia: “Diri ko una nga natun-an kon ano ang isiling ko kon magbantala sa pamalay. Sa masami, may utod gid nga nagasugid parte sa iya eksperiensia sa pagbantala. Nahatagan ako sini sing ideya kon ano ang isiling ko kon magbantala ako kag kon paano ko sabton ang mga pagpamatok.”

Nakabulig man sa paghiusa sang mga kauturan ang pagpain sang adlaw para sa pagbantala. Ang Abril 1, 1923, nga The Watch Tower nagsiling: “Para mahiusa kita tanan sa isa lang ka hilikuton . . . , ipain  naton ang Martes, Mayo 1, 1923, para sa pagbantala. Pagkatapos sini, gamiton naton sa pagbantala ang una nga Martes sang kada bulan . . . Dapat may himuon gid ang tanan sa kongregasyon.”

Nagbantala man bisan ang mga pamatan-on nga Estudyante sang Biblia. Si Hazel Burford, nga 16 anyos lang sadto, nagsiling: “May sampol nga mga presentasyon ang Bulletin nga ginasaulo namon. a Nanamian gid ako magbantala upod kay Lolo.” Pero, natingala si Sister Burford kay ginpamatukan sang isa ka brother ang iya pagbantala. Nagsiling sia: “Ginhambalan ako sang isa ka tigulang nga brother nga indi kuno ako dapat magbantala. Sadto nga tion, wala nahangpan sang pila ka kauturan nga dapat dayawon sang tanan nga Estudyante sang Biblia ang aton Daku nga Manunuga, kag dapat man ini himuon sang ‘mga pamatan-on nga lalaki kag mga pamatan-on nga babayi.’” (Sal. 148:12, 13) Pero padayon nga nagbantala si Sister Burford. Sang ulihi, nag-eskwela sia sa ikaduha nga klase sang Gilead School kag nangin misyonero sia sa Panama. Pagligad sang tion, ginbag-o sining pila ka kauturan ang ila panghunahuna parte sa mga pamatan-on nga nagabantala.

Nakabulig man ang mga kombension para mahiusa pa gid ang mga kauturan. Madamo sa sini nga mga kombension ang may ginpain nga adlaw para sa pagbantala. Halimbawa, sa kombension sa Winnipeg, Canada, gin-agda ang tanan nga nag-attend sa kombension nga magbantala sa sini nga siudad sa Marso 31. Paagi sa sining espesyal nga mga adlaw para sa pagbantala, madamo nga tawo ang nabantalaan kag may maayo ini nga mga resulta. Halimbawa, sang Agosto 5, mga 7,000 ang nag-attend sa isa pa ka kombension sa Winnipeg. Sadto nga tion, amo ini ang may pinakamadamo nga nag-attend sa kombension sa Canada.

Ang pinakaimportante gid nga kombension sang katawhan ni Jehova sang 1923 amo ang kombension sang Agosto 18-26, sa Los Angeles, California. Mga pila ka semana antes sang kombension, ginpabalo ini paagi sa mga newspaper kag mga handbill. Sobra 500,000 ka handbill ang napanagtag sang mga Estudyante sang Biblia. May mga banner man nga nagapabalo parte sa kombension nga ginbutang sa de-pasahero nga mga tren kag sa mga salakyan.

Sang Sabado, Agosto 25, nagpamulongpulong si Brother Rutherford sa tema nga “Mga Karnero kag  mga Kanding.” Ginpaathag niya nga ang “mga karnero” nagapatuhoy sa mga tawo nga may husto nga panimuot nga magakabuhi sa paraiso sa duta. Ginbasa man niya ang isa ka resolusyon nga gintawag “Isa ka Paandam.” Ginpakamalaut sini ang Cristiandad kag ginpalig-on sini ang sinsero nga mga tawo nga maggua sa “Babilonia nga Daku.” (Bug. 18:2, 4) Sang ulihi, minilyon ka kopya sini nga resolusyon ang ginpanagtag sang mapisan nga mga Estudyante sang Biblia sa bilog nga kalibutan.

Sa katapusan nga adlaw sang kombension, sobra 30,000 ang nakabati sang pamulongpulong ni Brother Rutherford nga “All Nations Marching to Armageddon, but Millions Now Living Will Never Die” (Ang Tanan nga Pungsod Nagamartsa Pakadto sa Armageddon, Pero Minilyon nga Nagakabuhi Karon ang Indi Na Mapatay). Bangod ginapaabot sang mga Estudyante sang Biblia nga madamo ang maga-attend, gin-arkilahan nila ang Los Angeles Coliseum nga bag-o lang nahuman. Para masigurado nga mabatian sang tanan ang programa, gingamit sang mga kauturan ang loudspeaker system sang stadium, nga isa ka bag-o nga teknolohiya sadto nga tion. Madamo man ang nakabati sang programa paagi sa radyo.

Sang 1923, daku ang pag-uswag sang pagbantala nga hilikuton sa Africa, Europe, India, kag South America. Sa India, nagbulig si A. J. Joseph sa paghimo sang mga publikasyon sa Hindi, Tamil, Telugu, kag Urdu nga mga lenguahe. Nasarangan niya ini nga himuon bisan pa may asawa sia kag anom ka kabataan nga ginaatipan.

Sa Sierra Leone, kinahanglan sang mga Estudyante sang Biblia nga sanday Alfred Joseph kag Leonard Blackman ang bulig, gani nagsulat sila sa world headquarters sa Brooklyn, New York. Sang Abril 14, 1923, ginsabat ang ila pangabay. Nagsiling si Alfred: “Isa ka Sabado sang gab-i, may nagpanawag sa telepono nga wala ko ginpaabot.” Matunog ang tingog sang nagpanawag sa telepono kag ginpamangkot niya si Alfred, “Ikaw ang nagsulat sa Watch Tower Society para magpangabay sang mga manugbantala?” “Huo,” sabat ni Alfred. “Ti, ako ang ginpadala nila.” Ang nagpanawag amo si William R. Brown. Nag-abot sia sadto nga adlaw halin sa Caribbean, kag upod niya ang iya asawa nga si Antonia kag ang ila mga bata nga babayi nga sanday Louise kag Lucy. Wala madugay, nagkilalahay sila dayon.

Nagsiling pa si Alfred: “Pagkaaga, samtang nagabinagbinag kami ni Leonard sang Biblia nga ginahimo namon kada semana, may nag-abot nga isa ka mataas nga tawo. Sia gali si Brother Brown. Gusto gid niya isugid sa iban ang kamatuoran, gani gusto niya nga magpamulongpulong dayon sa publiko pagkasunod  nga adlaw.” Wala malab-utan isa ka bulan, naubos dayon tanyag ni Brother Brown ang tanan nga publikasyon nga dala niya. Gani ginpadalhan sia sing 5,000 pa ka libro. Kag sang ulihi, mas madamo pa gid nga libro ang kinahanglan niya. Pero wala makilal-an si Brother Brown bilang isa ka tawo nga nagabaligya sang mga libro. Sa baylo, gintawag sia nga Bible Brown bangod pirme niya ginagamit ang Biblia sa iya mga pamulongpulong. Ginhimo niya ini sa sulod sang madamo nga tinuig bilang isa ka mapisan nga alagad ni Jehova.

Sa Germany, bangod gamay na katama ang branch office sa Barmen kag bangod malapit na masakop sang mga soldado sang France ini nga siudad, nagdesisyon ang mga Estudyante sang Biblia nga magsaylo. Nakakita sila sang isa ka bilding sa Magdeburg nga puede gamiton bilang imprintahan. Sang Hunyo 19, natapos sang mga kauturan ang paghimos sang gamit sa pag-imprinta kag sang iban pa nila nga mga gamit. Dayon nagsaylo sila sa bag-o nga Bethel sa Magdeburg. Sang adlaw nga ginpabalo ang world headquarters nga natapos na ang pagsaylo sa bag-o nga Bethel, ginpabalo sang mga newspaper nga nasakop na sang France ang siudad sang Barmen. Para sa mga kauturan, pamatuod ini sang bulig kag proteksion ni Jehova.

Sa Brazil, si George Young nga madamo na sang nakadtuan nga lugar para magbantala sang maayong balita amo ang nagbulig sa hilikuton didto. Ginporma niya ang bag-o nga branch office kag ginsugdan niya ang pag-publish sang The Watch Tower sa Portuguese nga lenguahe. Sa sulod lang sang pila ka bulan, nakatanyag sia sing sobra 7,000 ka publikasyon. Ginbisitahan man ni Brother Young si Sarah Ferguson. Nagabasa na si Sarah sang The Watch Tower sugod pa sang 1899, pero wala pa sia nabawtismuhan. Pagligad sang pila ka bulan, nabawtismuhan gid man si Sister Ferguson kag ang iya apat ka kabataan.

Nakabulig gid sa paghiusa sang mga Estudyante sang Biblia ang mga pagbag-o nga ginhimo nila sa ila mga miting, mga kombension, kag sa ila pagbantala. Sa hingapusan sang tuig, amo ini ang ginsiling sang Disiembre 15, 1923, nga The Watch Tower: “Mabakod gid ang pagtuo sang mga kauturan sa kongregasyon. Gani mangin handa kita sa mas madamo pa nga hilikuton, kag padayon kita nga mangin mapisan kag malipayon sa pag-alagad sa Dios sa masunod nga tuig.”

Makalilipay man ang mga natabo sang 1924 para sa mga Estudyante sang Biblia. Mga pila na ka bulan nga may ginahimo nga mga pasilidad ang mga Bethelite sa Staten Island, nga malapit lang sa ila headquarters sa Brooklyn. Natapos nila ini sang 1924, kag nakabulig ini sa paghiusa sang mga kauturan. Paagi man sa sini nga mga pasilidad, may nagamit ang mga Estudyante sang Biblia nga bag-o nga paagi para mapalapnag ang maayong balita.