TULUN-AN NGA ARTIKULO 7
Palangga Gid Naton ang Aton Amay nga si Jehova
“Nagahigugma kita, bangod sia ang una nga naghigugma sa aton.”—1 JUAN 4:19.
AMBAHANON 3 Amon Kusog, Amon Paglaum, Amon Pagsalig
ANG BINAGBINAGON SA SINI NGA ARTIKULO *
1-2. Ngaa gusto ni Jehova nga mangin bahin kita sang iya pamilya, kag paano niya ini ginpaposible?
GIN-AGDA kita ni Jehova nga mangin bahin sang iya pamilya nga nagasimba sa iya. Makalilipay gid ini pamensaron! Bahin sang aton pamilya ang mga nagdedikar sang ila kaugalingon sa Dios kag nagatuo sa halad-gawad sang iya Anak. Malipayon gid ang aton pamilya. Malipayon kita subong kay ang aton kabuhi may katuyuan, kag nalangkag kita sa aton paglaum nga mabuhi sing wala sing katapusan, sa langit man ukon sa Paraiso sa duta.
2 Palangga gid kita ni Jehova gani daku gid ang iya ginsakripisyo para may paglaum kita nga mangin bahin sang iya pamilya. (Juan 3:16) “Ginbakal niya [kita] sa daku nga bili.” (1 Cor. 6:20) Paagi sa halad-gawad, ginpaposible ni Jehova nga mangin suod kita sa iya. Kadungganan naton nga tawgon nga aton Amay ang pinakagamhanan nga Persona sa uniberso. Kag nabinagbinag naton sa nagligad nga artikulo nga si Jehova amo ang pinakamaayo nga Amay.
3. Ano ang mahimo naton ipamangkot? (Tan-awa man ang kahon nga “ Natalupangdan Bala Ako ni Jehova?”)
3 Pareho sa isa ka manunulat sang Biblia, mahimo mamangkot man kita: “Ano bala ang ibalos ko kay Jehova sa tanan nga kaayo nga ginhimo niya sa akon?” (Sal. 116:12) Ang sabat amo nga indi gid naton mabalusan ang aton Amay sa langit. Pero bangod palangga niya kita, gusto man naton nga palanggaon sia. Si apostol Juan nagsulat: “Nagahigugma kita, bangod sia ang una nga naghigugma sa aton.” (1 Juan 4:19) Paano naton mapakita nga palangga naton ang aton Amay?
MAGPABILIN NGA SUOD KAY JEHOVA
Mapakita naton nga palangga gid naton ang aton Amay sa langit nga si Jehova kon magpabilin kita nga suod sa iya paagi sa pagpangamuyo, kon tumanon naton sia, kag kon buligan naton ang iban nga palanggaon sia (Tan-awa ang parapo 4-14)
4. Suno sa Santiago 4:8, ngaa dapat kita magpanikasog nga mangin suod kay Jehova?
4 Gusto ni Jehova nga mangin suod kita sa iya kag magpakig-istorya kita sa iya. (Basaha ang Santiago 4:8.) Ginapalig-on niya kita nga ‘magpadayon sa pagpangamuyo,’ kag pirme sia nagapamati sa aton. (Roma 12:12) Indi gid matabo nga wala sia sang tion ukon kapoy sia nga indi na sia makapamati sa aton mga pangamuyo. Sa aton bahin, ginapamatian naton sia kon ginabasa naton ang iya Pulong, ang Biblia, kag ang mga publikasyon nga nagabulig sa aton nga mahangpan ini. Ginapamatian man naton sia kon nagapamati kita sing maayo sa Cristianong mga miting. Ang regular nga pagpakig-istorya sang kabataan sa ila mga ginikanan nagabulig sa ila nga magpabilin nga suod. Magapabilin man kita nga suod kay Jehova kon regular ang aton pagpakig-istorya sa iya.
Tan-awa ang parapo 5
5. Paano naton mapauswag ang aton pangamuyo?
5 Hunahunaa kon paano ka nagapakig-istorya sa Dios. Gusto ni Jehova nga ipautwas naton sa iya paagi sa pangamuyo ang aton mga ginahunahuna kag ginabatyag. (Sal. 62:8) Dapat naton pamangkuton ang aton kaugalingon: ‘Ang akon bala pangamuyo daw isa ka sulat nga ang mensahe ginkopya lang sa iban ukon halin gid ini sa akon tagipusuon?’ Sigurado nga palangga mo gid si Jehova, kag gusto mo nga magpabilin nga mabakod ang imo kaangtanan sa iya. Para mahimo mo ini, dapat regular ang imo pagpakig-istorya sa iya. Sugiri sia sang tanan mo nga ginabatyag. Sugiri sia kon ano ang nagapalipay kag nagapasubo sa imo. Saligi nga makapangayo ka sing bulig sa iya.
6. Ano ang dapat naton himuon para makapabilin kita nga suod sa aton Amay sa langit?
6 Para makapabilin nga suod sa aton Amay sa langit, dapat pirme naton sia pasalamatan. Nagaugyon kita sa ginsiling sang salmista: “O Jehova nga akon Dios, madamo ang imo ginhimo, madamo ang imo makatilingala nga binuhatan kag katuyuan para sa amon. Wala ka sing kaangay; kon isugid ko kag isaysay ini, madamo pa ini sa sarang ko masugid!” (Sal. 40:5) Ang aton pagpasalamat indi lang asta sa pagbatyag, kundi ginapakita naton nga nagapasalamat kita kay Jehova paagi sa aton mga ginasiling kag ginahimo. Amo ini ang rason kon ngaa tuhay gid kita sa madamo nga tawo subong. Kalabanan sa mga tawo subong wala nagapasalamat sa ginahimo sang Dios para sa ila. Ang matuod, isa sa mga tanda nga nagakabuhi kita sa “katapusan nga mga adlaw” amo nga ang mga tawo indi mapinasalamaton. (2 Tim. 3:1, 2) Indi gid naton gusto nga mangin pareho sa ila!
7. Ano ang gusto ni Jehova nga himuon naton, kag ngaa?
7 Indi gusto sang mga ginikanan nga mag-ilinaway ang ila kabataan, kundi gusto nila nga mangin mag-abyanay sila. Sing kaanggid, gusto ni Jehova nga ang tanan niya nga anak mangin mag-abyanay. Ang gugma naton sa aton kauturan nagapakilala nga matuod kita nga mga Cristiano. (Juan 13:35) Nagaugyon kita sa ginsiling sang salmista: “Tuman kaayo kag tuman katahom kon ang mag-ulutod magkabuhi nga may paghiusa!” (Sal. 133:1) Kon ginapalangga naton ang aton mga kauturan, ginapamatud-an naton kay Jehova nga palangga naton sia. (1 Juan 4:20) Makalilipay gid nga bahin kita sang pamilya nga ang mga mag-ulutod ‘mainayuhon sa isa kag isa, kag maluluy-on’!—Efe. 4:32.
MAPAKITA MO NGA PALANGGA MO ANG DIOS KON TUMANON MO SIA
Tan-awa ang parapo 8
8. Suno sa 1 Juan 5:3, ano ang pinakaimportante nga rason kon ngaa ginatuman naton si Jehova?
8 Ginapaabot ni Jehova nga tumanon sang kabataan ang ila mga ginikanan, kag ginapaabot man niya nga tumanon naton sia. (Efe. 6:1) Takus gid nga tumanon naton si Jehova bangod sia ang aton Manunuga, ang Manugsakdag sang aton kabuhi, kag ang pinakamaalam sa tanan nga amay. Pero ang gugma naton sa iya amo ang pinakaimportante nga rason kon ngaa ginatuman naton sia. (Basaha ang 1 Juan 5:3.) Bisan pa may madamo kita nga rason para tumanon si Jehova, wala niya kita ginapilit nga himuon ini. Ginhatagan kita ni Jehova sang kahilwayan sa pagdesisyon, gani nalipay sia kon nagdesisyon kita nga tumanon sia kay palangga naton sia.
9-10. Ngaa importante nga nakahibalo kita sang mga pagsulundan sang Dios kag ginatuman ini?
9 Gusto sang mga ginikanan nga indi mahalitan ang ila kabataan. Amo ini ang rason kon ngaa nagahimo sila sang mga pagsulundan para maproteksionan ang ila kabataan. Kon tumanon sang kabataan ini nga mga pagsulundan, ginapakita nila nga ginasaligan nila kag ginatahod ang ila mga ginikanan. Gani, indi bala mas importante nga nakahibalo kita sang mga pagsulundan sang aton Amay sa langit kag ginatuman ini? Kon himuon naton ini, ginapakita naton kay Jehova nga ginapalangga kag ginarespeto naton sia, kag nagabenepisyo kita sa paghimo sini. (Isa. 48:17, 18) Pero ang mga nagasikway kay Jehova kag sa iya mga pagsulundan mahalitan lang sa ulihi.—Gal. 6:7, 8.
10 Kon nagakabuhi kita sa paagi nga nagapahalipay kay Jehova, maproteksionan naton ang aton kaugalingon, balatyagon, kag ang aton kaangtanan sa iya. Nakahibalo si Jehova kon ano ang pinakamaayo para sa aton. Si Aurora, nga taga-United States, nagsiling: “Kabalo ako nga ang pagtuman kay Jehova pirme nagaresulta sa pinakamaayo nga kabuhi.” Matuod gid ini. Sa imo bahin, paano ka nakabenepisyo sa pagtuman kay Jehova?
11. Ano ang mabulig sang pangamuyo sa aton?
11 Kon nabudlayan kita magtuman, ang pangamuyo makabulig sa aton. Kon kaisa, nabudlayan kita nga tumanon si Jehova bangod makasasala kita. Pero dapat gid naton panikasugan nga tumanon sia. Ang salmista nangabay sa Dios: “Pukawa ang akon handum nga magtuman sa imo.” (Sal. 51:12) Ang sister nga si Denise, nga isa ka regular payunir, nagsiling, “Kon nabudlayan ako nga tumanon ang isa sa mga sugo ni Jehova, nagapangamuyo ako sang kusog para mahimo ko ang husto.” Makasigurado kita nga sabton gid ni Jehova ang mga pangabay nga pareho sini.—Luc. 11:9-13.
BULIGI ANG IBAN NGA PALANGGAON ANG ATON AMAY
12. Suno sa Efeso 5:1, ano ang dapat naton himuon?
12 Basaha ang Efeso 5:1. Subong “mga anak nga hinigugma” ni Jehova, ginahimo naton ang aton bug-os nga masarangan nga ilugon sia. Mailog naton sia kon mapinalanggaon kita, mainayuhon, kag mapinatawaron. Kon makita sang iban nga wala nakakilala sa Dios ang aton maayo nga paggawi, mahimo sila mapahulag nga magtuon parte sa iya. (1 Ped. 2:12) May maayo gid nga rason ang Cristianong mga ginikanan nga ilugon si Jehova sa ila pagtratar sa ila kabataan. Kon himuon nila ini, mahimo nga mapahulag ang ila kabataan nga magpakig-abyan man sa aton mahigugmaon nga Amay.
Tan-awa ang parapo 13
13. Ano ang dapat naton himuon para mangin maisog?
13 Masami nga ginapabugal sang isa ka bata ang iya amay kag nalipay sia nga mag-istorya sa iban parte sa iya. Sing kaanggid, ginapabugal naton ang aton Amay sa langit nga si Jehova, kag gusto naton nga makilala sia sang iban. Nagabatyag kita pareho kay Hari David nga nagsiling: “Ipabugal ko si Jehova.” (Sal. 34:2) Pero paano kon mahuluy-on kita? Paano kita mangin maisog? Mangin maisog kita kon pamensaron naton nga malipay si Jehova kon mag-istorya kita parte sa iya, kag kon hunahunaon naton nga makabenepisyo ang iban kon magtuon sila parte sa iya. Hatagan kita ni Jehova sang kaisog nga kinahanglan naton. Ginbuligan niya ang aton mga kauturan sang unang siglo nga mangin maisog, kag buligan man niya kita.—1 Tes. 2:2.
14. Ngaa importante nga magbantala sa iban para mangin disipulo sila?
14 Wala sing ginapasulabi si Jehova, gani nalipay sia kon makita niya nga ginapalangga naton ang iban, ano man ang ila kahimtangan. (Binu. 10:34, 35) Ang isa sa pinakamaayo nga paagi nga mapakita naton ang aton gugma sa iban amo ang pagbantala sa ila. (Mat. 28:19, 20) Ano ang mabulig sini sa ila? Mangin maayo ang kabuhi sang mga mamati sa aton kag makatigayon sila sang paglaum nga mabuhi sing wala sing katapusan sa palaabuton.—1 Tim. 4:16.
PALANGGAA ANG ATON AMAY KAG MANGIN MALIPAYON
15-16. Ano ang mga rason ngaa malipayon kita?
15 Si Jehova isa ka mahigugmaon nga Amay, gani gusto niya nga mangin malipayon ang iya pamilya. (Isa. 65:14) Madamo kita sang rason nga mangin malipayon subong, bisan pa may mga kabudlayan. Halimbawa, sigurado kita nga ginapalangga gid kita sang aton Amay sa langit. Sibu ang aton ihibalo sa Pulong sang Dios, ang Biblia. (Jer. 15:16) Kag bahin kita sang isa ka tumalagsahon nga pamilya nga nagapalangga kay Jehova, nagatuman sang iya mga kasuguan, kag nagapalanggaanay sa isa kag isa.—Sal. 106:4, 5.
16 Makapabilin kita nga malipayon bangod sigurado kita nga mangin mas maayo ang aton kabuhi sa palaabuton. Kabalo kita nga malapit na lang dulaon ni Jehova ang tanan nga malauton, kag ipasag-uli niya ang Paraiso sa duta paagi sa iya Ginharian. May ara man kita makalilipay nga paglaum nga makaupod liwat ang napatay naton nga mga hinigugma sa tion sang pagkabanhaw. (Juan 5:28, 29) Makalilipay gid ina nga tion! Kag ang pinakaimportante, sigurado kita nga malapit na lang ang tion nga ang tanan sa langit kag sa duta magapadungog, magadayaw, kag magasimba sa aton mahigugmaon nga Amay.
AMBAHANON 12 Si Jehova ang Halangdon nga Dios
^ par. 5 Kabalo kita nga palangga gid kita sang aton Amay nga si Jehova kag ginpaposible niya nga mangin bahin kita sang pamilya sang mga nagasimba sa iya. Gani gusto man naton nga palanggaon sia. Paano naton mapakita nga palangga naton ang aton Amay? Binagbinagon sa sini nga artikulo kon ano ang mga puede naton himuon.
