Sugiri kami parte sa imo.

Natawo ako sang 1959 sa siudad sang Fuzhou, sa probinsia sang Jiangxi, China. Sang otso anyos ako, natabo sa amon pungsod ang ginatawag subong nga Rebolusyon sa Kultura. Isa ka civil engineer ang akon amay kag ginmanduan sia nga magtukod sang riles sa isa ka baw-ing nga lugar. Sa sulod sang pila ka tuig, isa lang ka bes kada tuig sia nagapauli. Sadto nga tion, si Nanay lang ang upod ko, nga isa ka maestra sa elementarya. Didto kami mismo nag-istar sa eskwelahan nga ginatudluan niya. Sang 1970, nagsaylo kami sa Liufang sa distrito sang Linchuan, nga sadto nga tion isa ka pigado nga lugar kag maiwat ang pagkaon.

Ano ang ginapatihan sang inyo pamilya sadto?

Si Tatay indi interesado sa relihion ukon pulitika. Si Nanay naman isa ka Budhista. Gintudluan ako sa eskwelahan nga ang kabuhi nagluntad paagi sa ebolusyon, kag nagpati gid ako sa ginsiling sang akon mga manunudlo.

Ngaa nanamian ka gid sa matematika?

Nanamian gid ako sa matematika kay ginahibalo sini ang kamatuoran paagi sa lohiko nga pangatarungan. Wala madugay sang napatay ang lider sang rebolusyon nga si Mao Tse-tung sang 1976, nag-eskwela ako sa unibersidad. Nagkuha ako sing kurso sa matematika. Sang natapos ko ang akon masteral, ang una ko nga trabaho amo ang pag-research paagi sa matematika sa pagdesinyo sang mga aparato nga nagapagua sing enerhiya.

Ano ang pagpati mo sang una sa Biblia?

Sang 1987, nagkadto ako sa Estados Unidos para mag-eskwela sing doctorate sa Texas A&M University. Nakahibalo ako nga madamo nga tawo sa Amerika ang nagapati sa Dios kag nagabasa sing Biblia. Nabatian  ko man nga madamo sing praktikal nga kaalam sa Biblia, gani gusto ko ini basahon.

Daw maayo man ang mga panudlo sa Biblia. Pero indi ko maintiendihan ang pila ka bahin sini, gani sang ulihi gin-untatan ko na lang ini basa.

Paano ka nangin interesado liwat sa Biblia?

Sang 1990, may Saksi ni Jehova nga nagkadto sa balay kag ginpakita niya sa akon ang ginasiling sang Biblia parte sa maayo nga palaabuton sang katawhan. Dayon ginpangabay niya ang isa ka mag-asawa nga bisitahan ako agod buligan nga maintiendihan ang Biblia. Sang ulihi, ang akon asawa nga si Liping, nga nagatudlo anay sang physics sa hayskul sa China kag wala man nagapati sa Dios, nagtuon man sa Biblia. Natun-an namon ang ginasiling sang Biblia parte sa ginhalinan sang kabuhi. Bag-o sa akon ang ideya nga may Manunuga, gani nangusisa pa gid ako parte sa sini.

Ano ang imo ginhimo?

Bilang eksperto sa matematika, nahanas ako nga kalkulahon ang posibilidad sang mga hitabo. Natun-an ko man nga para magluntad ang kabuhi, dapat may protina na nga daan. Gani gintinguhaan ko nga kalkulahon ang posibilidad nga maporma ang protina nga wala ginahilabtan ang proseso. Ang protina isa sa pinakamasibod nga molekula, kag ang buhi nga mga selula mahimo nga may linibo ka lainlain nga protina nga may eksakto gid nga koordinasyon sa isa kag isa. Pareho sa iban, narealisar ko nga imposible gid nga maporma ang protina kon wala sing may maghimo sini! Sa akon mga nabasahan parte sa teoriya sang ebolusyon, wala gid sing makapakumbinsi sa akon nga ining tuman ka sibod nga mga molekula nagtuhaw lang—ano pa gid ayhan ang bisan ano nga may kabuhi. Para sa akon, ini nga mga impormasyon nagapamatuod nga may Manunuga.

Ano ang nagkumbinsi sa imo nga halin sa Dios ang Biblia?

Samtang padayon ako nga nagatuon sa bulig sang mga Saksi ni Jehova, natun-an ko nga madamo sing detalyado nga mga tagna sa Biblia ang natuman. Naeksperiensiahan ko man ang mga benepisyo sa pag-aplikar sang mga prinsipio sa Biblia. Nagpamensar ako, ‘Paano ang mga manunulat sang Biblia nga nabuhi linibo na ka tuig ang nagligad makasulat sing mga laygay nga praktikal gihapon asta subong?’ Amat-amat ko nga narealisar nga ang Biblia Pulong sang Dios.

Ngaa kumbinsido ka gihapon nga may Manunuga?

Kon hunahunaon ko ang mga butang sa palibot, indi ko gid mapanghiwala nga may Manunuga. Subong, nagahimo ako sang software para sa mga kompyuter, kag nagadayaw gid ako pirme nga mas labaw gid ang aton utok sangsa mga program sa kompyuter. Halimbawa, indi mapaathag ang ikasarang sang aton utok nga makaintiende sang ginahambal sa aton. Kalabanan sa aton madali lang makaintiende sang ginahambal sa aton, bisan pa kulang ang mga tinaga, nagakadlaw, nagaubo, nagaang-ang, lainlain ang tono, nagalanog, may gahod, ukon indi klaro ang linya sang telepono. Basi ordinaryo lang ini para sa inyo. Pero indi amo sini ang pagtan-aw sang mga nagahimo sang software. Bisan ang pinakamaayo nga software nga makakilala sang tingog walawala gid kon ikumparar sa utok sang tawo.

Indi pareho sa pinakamoderno nga mga kompyuter, mahibaluan sang aton utok ang balatyagon kag tono, kag makilala kon sin-o ang nagahambal paagi sa ila tingog. Ginatun-an subong sang mga nagahimo sang software kon paano masunod sang mga kompyuter ang ikasarang sang utok sa pagkilala sang tingog. Nagapati ako nga ang ila ginahimo, sa pagkamatuod, pagtuon parte sa mga ginhimo sang Dios.