1. Paano naton tamdon ang aton pagtuo?

HAMILI gid nga kinaiya ang pagtuo sang isa ka Cristiano. Indi tanan nga tawo may pagtuo. (2 Tes. 3:2) Pero ginhatagan ni Jehova sing pagtuo ang kada isa sang nagasimba sa iya. (Roma 12:3; Gal. 5:22) Nagapasalamat gid kita sa sini.

2, 3. (a) Ano nga mga pagpakamaayo ang mabaton sang isa nga may pagtuo? (b) Ano nga mga pamangkot ang binagbinagon naton?

² Nagsiling si Jesucristo nga ginabuyok sang iya Amay ang mga tawo paagi sa Iya Anak. (Juan 6:44, 65) Kon magtuo ang isa kay Jesus, mapatawad sia sang iya mga sala. Bangod sini, puede na sia mangin abyan ni Jehova kag mabuhi sing wala katapusan. (Roma 6:23) Dapat gid bala kita hatagan sining matahom nga pagpakamaayo? Bangod makasasala kita, kamatayon ang nagakadapat sa aton. (Sal. 103:10) Pero nakita ni Jehova nga puede kita maghimo sang maayo. Bangod sang iya wala tupong nga kaayo, ginbuligan niya kita nga mahibaluan ang maayong  balita. Gani nagtuo kita kay Jesus kag nagalaum nga mabuhi sing wala katapusan.—Basaha ang 1 Juan 4:9, 10.

³ Pero ano gid bala ang pagtuo? Amo lang bala ini ang paghibalo naton sang mga pagpakamaayo nga ihatag sang Dios sa aton sa palaabuton? Paano naton mapakita ang aton pagtuo?

4. Kon may pagtuo ang isa, ano ang epekto sini sa iya?

⁴ Ang pagtuo indi lang ang paghibalo sang katuyuan sang Dios. Kon may pagtuo ang isa, mapalig-on sia nga himuon ang nahisuno sa kabubut-on sang Dios. Kon nagatuo ang isa sa gingamit sang Dios sa pagluwas sa katawhan, mapalig-on sia nga isugid sa iban ang maayong balita. Nagpaathag si apostol Pablo: “Kon ginabantala mo ini nga pulong sa imo baba, nga si Jesus amo ang Ginuo, kag nagatuo ka sa imo tagipusuon nga ginbanhaw sia sang Dios, maluwas ka. Kay ginapakamatarong ang tawo nga may pagtuo sa iya tagipusuon, apang paagi sa iya baba nga nagabantala sini nga pulong, matigayon niya ang kaluwasan.”—Roma 10:9, 10; 2 Cor. 4:13.

5. Ngaa importante gid ang pagtuo, kag paano naton ini mapabakod? Maghatag sing halimbawa.

⁵ Para mabaton naton ang kabuhi nga wala sing katapusan sa bag-ong kalibutan sang Dios, dapat may pagtuo kita kag padayon naton ini nga pabakuron. Makumparar naton ini sa tanom nga kinahanglan bunyagan. Indi pareho sang plastik nga tanom, ang buhi nga tanom nagatubo. Padayon ini nga magadabong kon pirme ini bunyagan, pero malayong ini kon indi mabunyagan kag sa ulihi mapatay. Pareho ini sa aton pagtuo. Magaluya ini kag mapatay kon pabay-an. (Luc. 22:32; Heb. 3:12) Pero kon pabakuron naton ang aton pagtuo, padayon ini nga ‘magatubo,’ kag mangin “mapagros [kita] sa pagtuo.”—2 Tes. 1:3; Tito 2:2.

6. Suno sa Hebreo 11:1, ano ang duha ka klase sang mga butang nga aton ginatuuhan?

⁶ Mabasa naton sa Hebreo 11:1 (basaha) kon ano ang pagtuo. May pagtuo kita sa duha ka klase sang mga butang nga indi naton makita: (1) “Kon ano ang ginalauman.” Mahimo nga nalakip sa sini ang matabo pa sa palaabuton nga ginpromisa sang Dios, pareho sang pagdula sa kalautan kag pag-abot sang bag-ong kalibutan. (2) “Ang imo ginapatihan [nga] matuod, bisan wala mo pa ini makita.” Suno sa konteksto, ang Griegong tinaga nga gin-translate nga “pamatuod” amo ang “makapakumbinsi nga ebidensia” nga matuod ang ginapatihan naton bisan indi naton ini makita, pareho ni Jehova nga Dios, ni Jesucristo, sang mga anghel, kag sang Ginharian sa langit. (Heb. 11:3) Paano naton mapamatud-an nga nagalaum gid kita kag nagapati sa mga butang nga ginasambit sa Pulong sang Dios bisan wala pa naton ini makita? Paagi sa aton ginasiling kag ginahimo, kay kon wala ini, kulang ang aton pagtuo.

7. Paano makabulig ang halimbawa ni Noe para mahangpan naton ang kahulugan sang pagtuo? (Tan-awa ang piktyur sa umpisa sini nga artikulo.)

⁷ Ginsambit sang Hebreo 11:7 ang pagtuo ni Noe nga, “sa tapos makabaton sang paandam halin sa Dios tuhoy sa mga butang nga wala pa makita, nagpakita sang kahadlok sa Dios kag nagtukod sang arka agod maluwas ang iya panimalay.” Ginpakita ni Noe ang iya pagtuo paagi sa pagtukod sang daku gid nga arka. Posible gid nga namangkot ang mga kaingod niya kon ngaa ginahimo niya ini. Naghipos lang bala si Noe ukon ginsilingan niya bala sila nga indi sia paghilabtan? Wala! Bangod may pagtuo sia,  maisog sia nga nagbantala kag nagpaandam sa ila parte sa paghukom sang Dios. Mahimo gid nga ginsugid ni Noe sa mga tawo ang ginsiling sa iya ni Jehova: “Nagdesisyon ako nga papason ang tanan nga tawo, bangod napuno ang duta sang kasingki tungod sa ila . . . Magapadala ako sing baha sa duta agod laglagon ang tanan nga buhi nga tinuga nga may ginhawa sang kabuhi sa idalom sang langit. Mapatay ang tanan nga buhi nga tinuga sa duta.” Mahimo gid nga ginpaathag man ni Noe sa mga tawo kon paano sila maluwas paagi sa pagsugid sa ila sang sugo sang Dios: “Magsulod ka sa arka.” Gani ginpakita pa gid ni Noe ang iya pagtuo paagi sa ‘pagbantala sang pagkamatarong.’—Gen. 6:13, 17, 18; 2 Ped. 2:5.

8. Ano ang ginsiling ni disipulo Santiago parte sa matuod nga pagtuo?

⁸ Mahimo nga ginsulat ni Santiago ang iya sulat pagkatapos ginsulat ni apostol Pablo ang parte sa pagtuo. Pareho ni Pablo, ginpaathag man ni Santiago nga ang matuod nga pagtuo indi lang pagpati; dapat ini ipakita paagi sa buhat. “Ipakita sa akon ang imo pagtuo nga wala sing mga buhat,” sulat ni Santiago, “kag ipakita ko sa imo ang akon pagtuo paagi sa akon mga buhat.” (Sant. 2:18) Ginpaathag niya dayon kon ngaa lain ang pagpati lang kag ang pagpakita  sang pagtuo. Ang mga demonyo nagapati nga may Dios, pero wala sila sing matuod nga pagtuo. Kag indi nila gusto matuman ang mga katuyuan sang Dios. (Sant. 2:19, 20) Pero sang ginpatuhuyan ni Santiago ang isa ka tawo sang una nga may pagtuo, namangkot sia: “Indi bala si Abraham nga aton amay ginpahayag nga matarong paagi sa mga buhat sa tapos niya ginhalad si Isaac nga iya anak sa halaran? Nakita mo nga ang iya pagtuo aktibo upod sa iya mga buhat kag ang iya pagtuo nahimpit paagi sa iya mga buhat.” Dayon ginsulit ni Santiago nga dapat ipakita ang pagtuo paagi sa mga buhat: “Subong nga ang lawas nga wala sing espiritu patay, ang pagtuo nga wala sing mga buhat patay man.”—Sant. 2:21-23, 26.

9, 10. Paano ginpaathag ni apostol Juan nga dapat ipakita nga nagatuo kita?

⁹ Sobra sa 30 ka tuig sang ulihi, ginsulat ni apostol Juan ang iya Ebanghelyo kag tatlo ka sulat. Pareho man bala sa iban nga manunulat sang Biblia ang paghangop niya parte sa matuod nga pagtuo? Gingamit ni Juan sing mas madamo nga beses sangsa iban nga manunulat sang Biblia ang Griegong tinaga nga gin-translate kon kaisa nga “nagatuo.”

¹⁰ Halimbawa, ginpaathag ni Juan: “Ang isa nga nagatuo sa Anak makatigayon sang kabuhi nga wala sing katapusan; ang isa nga wala nagatuman sa Anak indi makatigayon sang kabuhi, kundi ang kasingkal sang Dios magapabilin sa iya.” (Juan 3:36) Mapakita sang Cristiano ang pagtuo paagi sa pagtuman sa mga sugo ni Jesus. Pirme ginkutlo ni Juan ang mga ginsiling ni Jesus nga dapat padayon naton nga ipakita nga nagatuo kita.—Juan 3:16; 6:29, 40; 11:25, 26; 14:1, 12.

11. Paano naton mapakita nga nagapasalamat kita nga nahibaluan naton ang kamatuoran?

¹¹ Nagapasalamat gid kita nga gingamit ni Jehova ang iya balaan nga espiritu para mahibaluan naton ang kamatuoran kag makatuo kita sa maayong balita! (Basaha ang Lucas 10:21.) Pirme gid naton pasalamatan si Jehova nga ginbuyok niya kita paagi sa iya Anak, ang “Pangulo nga Ahente kag Manughimpit sang aton pagtuo.” (Heb. 12:2) Para mapakita nga ginaapresyar naton ang iya wala tupong nga kaayo, padayon naton nga pabakuron ang aton pagtuo paagi sa pagpangamuyo kag pagtuon sang Pulong sang Dios.—Efe. 6:18; 1 Ped. 2:2.

12. Paano naton mapakita ang aton pagtuo?

¹² Dapat kita padayon nga magtuo sa mga promisa ni Jehova. Dapat naton ini ipakita paagi sa mga buhat. Halimbawa, padayon kita nga nagabantala sang Ginharian sang Dios kag nagatudlo sa iban para mangin disipulo. Padayon man kita nga nagahimo sang “maayo sa tanan, ilabi na sa aton mga masigkatumuluo.” (Gal. 6:10) Kag ginapanikasugan naton nga ubahon “ang daan nga personalidad upod ang mga buhat sini,” kag likawan ang bisan ano nga makapaluya sa aton sa espirituwal.—Col. 3:5, 8-10.

13. Daw ano ka importante ang “pagtuo sa Dios,” kag paano ini ginlaragway, kag ngaa?

¹³ “Kon wala sing pagtuo,” siling sang Biblia, “imposible nga mapahamut-an ang Dios, kay ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.” (Heb. 11:6) Ginlaragway sang Pulong sang Dios ang “pagtuo sa Dios” bilang bahin sang “sadsaran” nga kinahanglan sang isa para mangin matuod sia nga Cristiano kag makapadayon. (Heb. 6:1) Dapat “idugang” sang mga Cristiano sa ila pagtuo ang iban pa importante nga mga kinaiya “agod makapabilin [sila] sa gugma sang Dios.”—Basaha ang 2 Pedro 1:5-7; Judas 20, 21.

14, 15. Ngaa kinahanglan naton ang gugma indi lang ang pagtuo?

 ¹⁴ Ginpatuhuyan sang Cristiano nga mga manunulat sang Biblia ang pagtuo sing mas madamo nga beses sangsa iban pa nga kinaiya, nga nagapakita nga importante gid ini. Buot silingon bala sini nga amo ini ang pinakaimportante nga kinaiya?

¹⁵ Ginkomparar ni Pablo ang pagtuo sa gugma sang magsulat sia: “Bisan masaylo ko ang mga bukid bangod sang akon mabakod nga pagtuo, apang kon wala ako sing gugma, wala ako sing pulos.” (1 Cor. 13:2) Ginsiling ni Jesus nga ang gugma sa Dios ang pinakaimportante nga kinaiya sang ginsabat niya ini nga pamangkot: “Ano bala ang pinakaimportante nga sugo sa Kasuguan?” (Mat. 22:35-40) Ang gugma ang nagabulig sa aton para mapakita ang madamo iban pa nga mga kinaiya, lakip ang pagtuo. “Ang gugma,” siling sang Biblia, “nagapati sang tanan nga butang.” Buligan kita sini nga magtuo sa mga ginsiling sang Dios sa iya Pulong sang kamatuoran.—1 Cor. 13:4, 7.

16, 17. Ano ang ginasiling sang Kasulatan parte sa pagtuo kag gugma, pero ano ang pinakaimportante, kag ngaa?

¹⁶ Bangod importante gid ang pagtuo kag gugma, madamo nga beses nga ginsambit sang mga manunulat sang Biblia ini nga mga kinaiya sa isa ka dinalan ukon prase. Ginsilingan ni Pablo ang iya mga kauturan nga “isuklob [nila] ang pagtuo kag gugma subong panaming sa dughan.” (1 Tes. 5:8) Nagsulat si Pedro: “Bisan pa wala gid ninyo [si Jesus] makita, ginahigugma ninyo sia. Bisan pa sa karon wala ninyo sia makita, apang nagatuo kamo sa iya.” (1 Ped. 1:8) Namangkot si Santiago sa iya hinaplas nga kauturan: “Wala bala ginpili sang Dios ang mga imol sa pagtamod sang kalibutan nga mangin manggaranon sa pagtuo kag mga manunubli sang Ginharian, nga ginsaad niya sa mga nagahigugma sa iya?” (Sant. 2:5) Nagsulat si Juan: “Amo ini ang [sugo sang Dios]: Magtuo kita sa ngalan sang iya Anak nga si Jesucristo kag maghigugmaanay.”—1 Juan 3:23.

¹⁷ Bisan pa importante ang pagtuo, kon matuman na ang mga promisa sang Dios kag mag-abot na ang aton ginalauman, indi na kinahanglan ang pagtuo sa sini. Pero kinahanglan nga padayon naton nga pabakuron ang aton gugma sa Dios kag sa aton isigkatawo. Gani nagsulat si Pablo: “Ang pagtuo, paglaum, kag gugma magapadayon; apang ang pinakaimportante sa sining tatlo amo ang gugma.”—1 Cor. 13:13.

18, 19. Ano ang mabakod nga pamatuod sang pagtuo subong, kag sin-o ang dapat dayawon sa sini?

¹⁸ Nagatuo subong ang katawhan ni Jehova sa Ginharian sang Dios. Bangod sini, naeksperiensiahan na sang sobra walo ka milyon ka pumuluyo sa bilog nga kalibutan ang espirituwal nga paraiso. Ginapakita nila ang mga kinaiya nga ginapatubas sang espiritu sang Dios. (Gal. 5:22, 23) Mabakod gid ini nga pamatuod sang pagtuo kag gugma!

¹⁹ Indi ini hinimuan sang tawo. Nangin posible ini paagi sa bulig sang aton Dios kag sia ang dapat dayawon sa sini. Nagadala ini sing “kabantugan kay Jehova, isa ka tanda nga indi madula sa wala sing katubtuban.” (Isa. 55:13) ‘Dulot gid sang Dios’ nga ‘maluwas kita paagi sa pagtuo.’ (Efe. 2:8) Padayon nga magasangkad kag magauswag ang aton espirituwal nga paraiso kag sa ulihi mapuno na ang duta sang himpit, matarong, kag malipayon nga mga tawo nga nagadayaw sa ngalan ni Jehova sing dayon. Kabay pa nga padayon kita nga magtuo sa mga promisa ni Jehova!