Himusli ang Bag-o nga mga Kahimtangan

Sanday Pum, Jan, Dries, kag Otto, ang apat ka Cristianong mga gulang nga taga-Netherlands, magkapareho sa madamo nga paagi. Tanan sila minyo kag may mga kabataan. Dugang pa, sang nagligad nga pila ka tuig, sila tanan may bug-os tion nga palamugnan kag nagapuyo sa masulhay nga mga puluy-an. Apang, sila tanan nag-untat sa pagtrabaho kag naghugod sang ila bug-os nga tion kag kusog sa pagpauswag sa mga intereses sang Ginharian. Ngaa ginhimo nila ini nga pagbag-⁠o? Ginhimuslan nila nga apat ang bag-o nga mga kahimtangan.

ANG kahimtangan sang kalabanan sa aton nagabag-o sa pagligad sang tion. Ang madamo nga mga pagbag-⁠o, subong sang pagminyo, pag-angkon sing mga anak, ukon pag-atipan sa tigulang nga mga ginikanan, nagahatag sing dugang nga mga responsabilidad. Apang, ang iban nga mga pagbag-o nagahatag sa aton sing dugang nga kahilwayan agod mapauswag ang aton Cristianong ministeryo. (Mateo 9:​37, 38) Halimbawa, ang aton dalagku na nga mga anak mahimo magbiya sa puluy-an, ukon mahimo kita magretiro sa trabaho.

Isa pa, bisan pa nagabag-o ang aton mga kahimtangan sa luyag naton ukon indi, ang iban nga mga Cristiano madinalag-on nga nakahimo sing mga pagbag-o sa ila kahimtangan nga nagbukas sing mga kahigayunan agod mapauswag nila ang ila pagpakigbahin sa ministeryo. Amo gid sini ang ginhimo nanday Pum, Jan, Dries, kag Otto. Paano?

Kon ang mga Anak Magbiya sa Puluy-an

Si Pum nagtrabaho subong tinidor-de-libro sa isa ka kompanya sang mga bulong. Upod sa iya asawa, nga si Anny, kag sa iya duha ka anak nga babayi, masunson sila nagaauxiliary payunir. Naghimo man sing kahimusan si Pum kag si Anny agod makapakig-upod sila sa iban pa nga mga payunir. “Nangin proteksion ini gikan sa mga problema nga mahimo ginatunaan sang iban nga mga sahi sang pagpakig-upod,” siling nila. Bangod sang halimbawa sang ila mga ginikanan, nagregular payunir man ang duha ka anak nga babayi sang naggradwar sila sa hayskul.

Sang nagbiya sa puluy-an ang ila mga anak, narealisar nanday Pum kag Anny nga ining bag-o nga mga kahimtangan naghatag sa ila sing dugang nga kahilwayan kag kuwarta agod makalakbay sa matahom nga mga lugar ukon makalingawlingaw. Apang, sa baylo sini, namat-od ang mag-asawa nga gamiton ang ila bag-o nga kahimtangan sa pagpauswag sa ila Cristianong ministeryo. Gani naglisensia si Pum sa iya amo nga indi sia magtrabaho sing isa ka adlaw kada semana. Sang ulihi, si Pum naghimo sing mga kahimusan agod magtrabaho sia sugod sa alas 7:00 s.a. tubtob alas 2:00 s.h. Siempre pa, ang mas malip-ot nga inadlaw nga trabaho nagkahulugan nga dapat nila paiguiguon ang ila mas manubo nga kita. Apang, nagmadinalag-on sila, kag sang 1991, nagbuylog si Pum sa iya asawa sa pagregular payunir.

Pagkatapos sini, ginpangabay si Pum nga mangin kabulig nga manug-atipan sa isa ka Assembly Hall of Jehovah’s Witnesses. Ini nga imbitasyon  nagkahulugan nga biyaan sang mag-asawa ang ginpuy-an nila sa sulod sang 30 ka tuig kag magsaylo sa isa ka apartment sa lugar sang Assembly Hall. Nagsaylo sila sa sini nga apartment. Mabudlay bala ini? Si Anny nagsabat nga kon magbatyag sia sing kahidlaw sa ila puluy-an, ginapamangkot niya ang iya kaugalingon, ‘Asawa bala ako ni Lot?’ Wala sia ‘magbalikid.’​—⁠Genesis 19:26; Lucas 17:32.

Para kanday Pum kag Anny, ang ila desisyon nagresulta sa madamo nga pagpakamaayo. Lakip sa madamo pa nga mga butang, natigayon nila ang pribilehiyo nga mag-alagad sa Assembly Hall, maghimo sing mga paghanda para sa distrito nga mga kombension, kag masugilanon ang mga manugtatap sang sirkito (nagalakbay nga mga ministro) nga nagahatag sing mga pamulongpulong sa Assembly Hall. Kon kaisa, nagaduaw sila sa lainlain nga mga kongregasyon kon si Pum nagaalagad subong tal-us nga manugtatap sang sirkito.

Ngaa madinalag-on nga napasangkad sini nga mag-asawa ang ila pag-alagad? Si Pum nagsiling: “Kon ang imo kabuhi hinali nga magbag-⁠o, dapat determinado ka nga himuslan ang bag-o nga mga kahimtangan.”

Pagpasimple sa Kabuhi

Si Jan kag ang iya asawa, nga si Woth, may tatlo ka bata. Kaangay ni Pum kag sang iya pamilya, ginhimuslan ni Jan ang bag-o nga mga kahimtangan. Sa sulod sang madamo nga tinuig, si Jan may mataas-sing-suweldo nga trabaho sa banko kag naamanan niya sing masulhay nga kabuhi ang iya pamilya. Apang, naghandum sia nga pasangkaron ang iya ministeryo. Nagsiling sia: “Sa isa ka tion sang akon kabuhi, ang akon apresasyon sa kamatuoran nagdalom, kag ang akon gugma kay Jehova nagtudok.” Gani sang 1986, naghimo si Jan sing pagbag-o sa iya mga kahimtangan. Nagsiling sia: “Ginhimuslan ko ang liwat nga pag-organisar sa opisina kag nagtrabaho sing mas malip-ot nga inoras. Ginhayuan ako sang akon natingala nga mga katrabaho nga Diwodo bangod nagaobra lamang ako kon dinsdag [Martes], woensdag [Mierkoles], kag donderdag [Huebes]. Ang akon suweldo nagnubo sing 40 porsiento. Ginbaligya ko ang amon balay kag nagbakal sing sakayan nga balay agod makaalagad kami kon diin mas kinahanglan ang mga manugbantala sang Ginharian. Sang ulihi, ginhimuslan ko ang higayon nga temprano pa nga magretiro; ang akon kita nagnubo sing 20 porsiento pa, apang sang 1993, nagsugod ako sa pag-alagad subong regular payunir.”

Sa karon, si Jan katapo sang isa ka Hospital Liaison Committee kag regular nga nagaalagad subong manugtatap sang kombension. Bisan pa masakiton  si Woth, nagaauxiliary payunir sia kon kaisa. Ang ila tatlo ka bata minyo na tanan kag, upod sa ila mga tiayon, makugi sila nga mga ministro sang Ginharian.

Paano nakapasibu si Jan kag si Woth sa mas manubo nga talaksan sang pagkabuhi? “Sang madamo pa kami sing kuwarta,” sabat ni Jan, “ginpat-od namon nga indi gid mahigot sa materyal nga mga butang. Sa karon medyo mabudlay ang maghulathulat pa anay antes matigayon ang pila ka butang, apang natumbasan ini sang espirituwal nga mga pagpakamaayo kag mga pribilehiyo nga natigayon namon.”

Kaangay nanday Jan kag Woth, nagdesisyon man ang mag-asawa nga sanday Dries kag Jenny nga huptan nga simple ang ila kabuhi agod may dugang nga tion sila para sa mga intereses sang Ginharian. Si Dries kag si Jenny mga payunir antes sila nangin mga ginikanan. Nian, agod maatipan ang iya pamilya, si Dries nagtrabaho subong administrador sa isa ka daku nga kompanya. Gin-apresyar sang iya mga amo ang iya trabaho kag gintanyagan sia sing promosyon. Apang, wala ini ginbaton ni Dries bangod kon batunon niya ini, mahimo nga mabuhinan ang iya tion para sa Cristianong mga hilikuton.

Ang pagsagod sing isa ka pamilya​—⁠subong man ang pag-atipan sa nagamasakit nga iloy ni Jenny⁠​—⁠nagkinahanglan sing madamo nga tion kag enerhiya sang mag-asawa. Apang, ginpalambo gihapon nila ang espiritu sang pagpayunir. Ano ang nagbulig sa ila nga mahimo ini? Si Jenny nagpaathag: “May mga payunir nga nagaistar sa amon, ginaagda namon ang mga payunir nga magsalo sa amon sa pagkaon, kag ginapadayon namon sa balay ang mga manugtatap sang sirkito.” Si Dries nagdugang: “Ginhuptan namon nga simple ang kabuhi kag naglikaw sa pagpangutang. Nagdesisyon kami nga indi gid madalahig sa daku nga mga negosyo ukon magbakal sing balay agod indi kami mahigot sa sini nga mga butang sa ulihi.”

Ang desisyon nanday Dries kag Jenny nga maghimo sing mga kahimtangan nga magahatag sa ila sing dugang nga tion para sa mga intereses sang Ginharian may yara makapaladya nga mga resulta. Ang ila duha ka anak nga lalaki mga gulang na karon, kag ang isa nagapayunir upod sa iya asawa. Si Dries kag si Jenny nag-alagad subong mga espesyal payunir, kag sang ulihi nag-upod si Jenny kay Dries sa sirkito nga hilikuton. Mga boluntaryo sila karon sa Bethel, diin nagaalagad si Dries subong katapo sang Komite sang Sanga.

Temprano Pa nga Pagretiro

Kaangay nanday Dries kag Jenny, ang mag-asawa nga sanday Otto kag Judy mga payunir antes sila makaangkon sing duha ka anak nga babayi. Sang manugbata si Judy sa iya subang, si Otto nag-obra subong maestro.

Samtang nagadaku ang mga bata, masunson nga ginaagda ni Otto kag ni Judy sa ila balay ang mga payunir agod makita sang ila mga bata ang kalipay sang bug-os tion nga Cristianong mga manugpangabudlay. Sang ulihi, ang ila subang nagpayunir. Pagligad sang pila ka tion, nag-eskwela  sia sa Gilead School kag, upod sa iya bana, nagaalagad sia karon subong misyonero sa isa ka pungsod sa Aprika. Ang ila kinagot nagsugod sa pagpayunir sang 1987, kag nagpayunir man si Judy upod sa iya.

Sang ang bag-o nga mga kahimtangan nagtugot kay Otto nga magtrabaho sing mas malip-ot nga inoras sa eskwelahan, gingamit niya ang ekstra nga tion sa pagpayunir. Sang ulihi, naghalin sia sa iya obra. Sa karon, ginagamit ni Otto ang iya ikasarang sa pagmaestro sa hilikuton sa sirkito agod pabakuron ang mga kongregasyon sa espirituwal nga paagi.

Ano ang laygay ni Otto para sa mga nagretiro sing temprano pa sa ila sekular nga obra? “Kon magretiro ka, indi magdesisyon nga magrelaks sa sulod sang isa ukon kapin pa ka tuig. Indi mabudlay nga maanad sa ‘pagrelaks.’ Sa ulihi, malipatan mo ang magpayunir. Sa baylo, pasangkara gilayon ang imo mga hilikuton sa pagministeryo.”

Paghimulos sa Imo Eksperiensia sa Kabuhi

Matuod, ang mga kauturan kaangay nanday Pum, Jan, Dries, kag Otto indi na mabaskog kag mabakod subong sang bata pa sila. Apang, mas hamtong, mas eksperiensiado, kag mas maalam sila karon. (Hulubaton 20:29) Nahibaluan nila kon paano mangin mga amay, kag bangod sang pagpangabudlay upod sa ila mga asawa, may ideya sila kon ano kadamo nga mga butang ang nalakip agod mangin isa ka iloy. Upod sa ila mga asawa, gin-atubang nila ang mga problema sang pamilya kag nagpahamtang sing teokratikong mga tulumuron para sa ila mga anak. Si Otto nagsiling: “Nakabulig gid nga ako mismo may pamilya kon maglaygay ako subong isa ka manugtatap sang sirkito may kaangtanan sa pamilya.” Subong man, napuslan ni Dries ang iya eksperiensia subong isa ka amay karon nga katapo na sia sang pamilya Bethel, upod sa madamong lamharon nga mga manugpangabudlay diri.

Huo, ang personal nga ihibalo nakabulig sa sining mga utod nga maatipan ang lainlain nga mga kinahanglanon sang mga kongregasyon. Ang ila eksperiensia, kon sa aton pa, nagpatalom sang mga gamit nga ginauyatan nila, amo nga nagamit nila ang ila kusog sing mapuslanon gid. (Manugwali 10:10) Sa katunayan, sa sulod sang isa ka espesipiko nga tion, masunson nga mas madamo ang ila mahimo sangsa mga mas mabakod sa pisikal apang mas diutay sing eksperiensia.

Ini nga mga utod, upod sa ila mga asawa, maayong mga halimbawa para sa mga pamatan-on sa tunga sang katawhan ni Jehova. Nakita sang mga pamatan-on nga ang mga mag-asawa kaangay nila nakaeksperiensia gid sang madamo nga mga hangkat kag mga pagpakamaayo nga ginasugid sa aton Cristianong mga publikasyon. Makapalig-on makita ang mga lalaki kag mga babayi nga nagpakita sing panimuot kaangay sang iya ni Caleb nga, bisan tigulang na, nagpangayo sing mabudlay nga asaynment.​—⁠Josue 14:10-12.

Iluga ang Ila Pagtuo

Mailog mo bala ang pagtuo kag ginhimo sang mga mag-asawa nga ginsambit sa sining artikulo? Dumduma, ang ila kabuhi nasentro sa kamatuoran. Ginpalambo nila sa ila mga anak ang handum nga magpayunir. Ginhimo nila ini, suno kay Jan, “paagi sa pagpakita sing halimbawa sa gugma kay Jehova kag sa iya organisasyon, paagi sa paghimo sing mga kahimusan para sa maayo nga pagpakig-upod, kag paagi sa pagtudlo sa mga bata nga suportahan ang ila kaugalingon sa pinansial nga paagi.” Nagpangabudlay kag naghampang man sila subong isa ka pamilya. “Sa tion sang bakasyon,” hinumdom ni Pum, “ang bug-os nga pamilya kinaandan na nga nagabantala sa aga kag nagarelaks sa hapon.”

Dugang pa, ining mga Cristiano nagplano sing abanse, amo nga sang nagbag-o ang ila mga kahimtangan, handa sila nga himuslan ang bag-o nga kahimtangan. Nagpahamtang sila sing mga tulumuron kag naghimo sing mga desisyon nga nagpadasig sang paglab-ot nila sa ila mga tulumuron. Nagpangita sila sing mga paagi agod mabuhinan ang ila oras para sa sekular nga palamugnan kag nangin handa nga magkabuhi sa mas diutay nga kita. (Filipos 1:10) Ginsuportahan sang mga asawa ang ila mga bana. Sing tingob, handum gid nila nga magsulod sa “isa ka daku nga ganhaan nga nagatuytoy padulong sa hilikuton” kag, subong resulta, natigayon nila ang bugana nga mga pagpakamaayo gikan kay Jehova.​—⁠1 Corinto 16:⁠9; Hulubaton 10:22.

Handum mo man bala nga pasangkaron ang imo bahin sa ministeryo? Kon amo, ang paghimulos sa bag-o nga mga kahimtangan amo ang sabat agod mahimo ini.

[Retrato sa pahina 20]

Si Pum kag si Anny nga nagaatipan sa Assembly Hall

[Retrato sa pahina 20]

Si Jan kag si Woth nga magkaupod nga nagabantala

[Retrato sa pahina 21]

Si Dries kag si Jenny nga nagaalagad sa Bethel

[Retrato sa pahina 21]

Si Otto kag si Judy nga nagahanda sa pagduaw sa masunod nga kongregasyon