Relihioso nga Paghingabot—Ngaa?

NAGAPATI ka bala nga ang mga tawo dapat hingabuton bangod sang ila relihion? Ayhan indi dapat kon wala naman sila nagapasilabot sa kinamatarong sang iban. Apang, ang relihioso nga paghingabot madugay na nga ginahimo kag padayon ini nga ginahimo tubtob karon. Halimbawa, madamo nga mga Saksi ni Jehova sa Europa kag sa iban nga mga bahin sang kalibutan ang masunson nga gindingutan sang ila mga kinamatarong kag ginpintasan sa bug-os nga ika-20 nga siglo.

Sa sulod sini nga tion, ang mga Saksi ni Jehova nag-antos sing mapintas, organisado, kag malawig nga paghingabot sa idalom sang dalagku nga totalitaryan nga mga rehimen sa Europa. Ano ang ginatudlo sa aton sang ila inagihan tuhoy sa relihioso nga paghingabot? Kag ano ang matun-an naton kon paano nila gintamod ang pag-antos?

“Indi Bahin sang Kalibutan”

Ang mga Saksi ni Jehova nagapanikasog nga mangin masinulundon sa kasuguan, mahidaiton, kag matarong. Wala sila nagasupak sa gobierno ukon nagapakigsuay sa sini, kag wala sila nagahimo sing mga butang nga mangin kabangdanan nga hingabuton sila bangod luyag nila mangin mga martir. Ini nga mga Cristiano neutral sa politika. Nahisanto ini sa ginsiling ni Jesus: ‘Ang akon mga sumulunod indi bahin sang kalibutan, subong nga ako indi bahin sang kalibutan.’ (Juan 17:16) Ginakilala sang kalabanan nga gobierno ang neutral nga panindugan sang mga Saksi. Apang wala ginatahod sang mga diktador ang sugo sang Biblia nga ang mga Cristiano dapat nga indi bahin sang kalibutan.

 Ang rason sini ginpaathag sa isa ka komperensia sa University of Heidelberg, Alemanya, sang Nobiembre 2000. Ang tema sang komperensia amo ang “Pagdumili kag Pagpilit sa Kinamatarong: Ang mga Saksi ni Jehova sa Idalom sang Pungsudnon nga Sosyalista kag Komunista nga mga Diktadura.” Si Dr.  Clemens Vollnhals sang Hannah-Arendt-Institute for Research Into Totalitarianism nagsiling: “Ang totalitaryan nga mga rehimen indi lamang sa politika nagapasilabot. Luyag nila nga ipasakop sang tagsa ka tawo ang iya bug-os nga pagkatawo.”

Indi mahatag sang matuod nga mga Cristiano ang ila “bug-os nga pagkatawo” sa isa ka tawhanon nga gobierno, kay nanumpa sila nga si Jehova nga Dios lamang ang ila tumanon sing bug-os. Nasapwan sang mga Saksi nga nagapuyo sa idalom sang totalitaryan nga mga diktadura nga ang sugo sang Estado nagasumpakil kon kaisa sa mga ginapatuman sang ila pagtuo. Ano ang ginhimo nila agod atubangon ini nga pagsumpakilay? Ginapakita sang maragtas nga ginsunod sang mga Saksi ni Jehova ang prinsipio nga ginpabutyag sang mga disipulo ni Jesucristo: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 5:29.

Linibo ka Saksi ang nagpabilin nga matutom sa ila pagtuo kag neutral sa politika, walay sapayan sang pinakamapintas nga paghingabot. Paano sila nakabatas? Diin nila ginkuha ang kusog agod mabatas ini? Sila mismo ang pasabton naton. Kag tan-awon naton kon ano ang matun-an sang tanan, mga Saksi kag mga indi Saksi, gikan sa ila mga inagihan.

[Blurb sa pahina 4]

Ang mga Saksi ni Jehova sa Alemanya nag-antos sing mapintas kag malawig nga paghingabot sa idalom sang duha ka totalitaryan nga mga rehimen sang ika-20 nga siglo

[Blurb sa pahina 4]

“Ang totalitaryan nga mga rehimen indi lamang sa politika nagapasilabot. Luyag nila nga ipasakop sang tagsa ka tawo ang iya bug-os nga pagkatawo.—Dr. Clemens Vollnhals

[Retrato sa pahina 4]

Ang pamilya Kusserow gindingutan sang ila kahilwayan bangod wala nila ginkompromiso ang ila pagtuo

[Retrato sa pahina 4]

Si Johannes Harms ginpatay sa isa ka prisuhan sang mga Nazi bangod sang iya mga pagtuluuhan