Paagi sa Bulig sang Biblia, Nabatuan Niya ang Pagsulay

Madamo gid sing pagsulay sa kalibutan karon. Indi mahapos ang pagsakdag sa mga talaksan sang Biblia. Halimbawa, mahimo nga isa ka hangkat nga sundon ang laygay sang Biblia: “Palagyo kamo sa pagkamakihilawason.”​—⁠1 Corinto 6:18.

Ang isa sang mga Saksi ni Jehova, nga tawgon lang naton nga Sebastian, nag-obra sa kompanya sang Scandinavia sa Poland. Dapat manikasog gid sia nga huptan ang iya integridad.

Kilala si Sebastian subong isa sa mga Saksi ni Jehova. Ang iya mga superbisor naghatag sa iya sing pila ka pribilehiyo bangod sang iya kapisan kag maayo nga kinaiya. Apang, ini nga mga pribilehiyo nagalakip gali sang pagtambong sa mga miting sa negosyo diin may imoral nga kalingawan.

Wala madugay nagpangduhaduha na si Sebastian. “Nahibaluan sang akon amo nga isa ako ka Saksi ni Jehova. Amo kon ngaa nagasalig sia sa akon. Kon magbalibad ako, madula ko ang akon obra, nga mabudlay gid pangitaon. Ano abi kon matan-aw lang ako kag indi makigbahin?”

May natukiban pa si Sebastian. Dapat “atipanon” niya ang mga dumuluong nga mga kostumer paagi sa paghimos nga may kaupod sila nga “mga babayi” sa gab-i. Ano ang iya himuon?

Namat-od si Sebastian nga pahanumdumon ang iya superbisor tuhoy sa iya pasad sa Biblia nga panimuot sa imoralidad. Wala madugay nangin maathag nga indi bagay si Sebastian sa trabaho kag dapat sia maghalin sa iya trabaho. Nakakita sia sing bag-o nga trabaho nga mas manubo sing sueldo apang wala sing amo sini nga mga pagsulay. Matinlo na karon ang iya konsiensia.

Ano ang imo himuon kon may mag-ipit sa imo nga makigbahin ka ukon kunsintihon mo ang imoralidad? Handa ka bala maghimo sing daku nga pagbag-o? Amo sini ang ginhimo ni Jose sang una, subong sang ginreport sa Genesis 39:7-12.