“Ang Espiritu kag ang Nobya Padayon nga Nagasiling: ‘Kari!’”
“Ang Espiritu kag ang Nobya Padayon nga Nagasiling: ‘Kari!’”
“Ang espiritu kag ang nobya padayon nga nagasiling: ‘Kari!’ . . . Ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.”—BUG. 22:17.
1, 2. Ano ang papel sang Ginharian sa aton kabuhi, kag ngaa?
ANO ang papel sang Ginharian sa aton kabuhi? Ginpalig-on ni Jesus ang iya mga sumulunod nga ‘padayon nga pangitaon anay ang ginharian,’ kag ginpasalig sila nga kon himuon nila ina, amanan sila sang Dios sang ila kinahanglanon. (Mat. 6:25-33) Ginpaanggid niya ang Ginharian sang Dios sa isa ka perlas nga may daku nga balor nga sang nakita ini sang nagalakbay nga manugpatikang, “ginbaligya [niya] gilayon ang tanan niya nga pagkabutang kag ginbakal ini.” (Mat. 13:45, 46) Indi bala nga dapat naton kabigon nga labing importante nga hilikuton ang pagbantala sang Ginharian?
2 Subong sang natun-an na naton sa nagligad nga duha ka artikulo, ang aton paghambal nga may kaisog kag ang maayo nga paggamit sang Pulong sang Dios sa aton ministeryo nagapakita nga ginatuytuyan kita sang espiritu sang Dios. Ina nga espiritu may importante man nga papel sa aton regular nga pagpakigbahin sa pagbantala sang Ginharian nga hilikuton. Tan-awon naton kon paano.
Isa ka Pangagda Para sa Tanan!
3. Sa ano nga sahi sang tubig ginaagda ang tanan nga tawo nga “magkari”?
3 May isa ka pangagda nga ginapalab-ot sa katawhan paagi sa balaan nga espiritu. (Basaha ang Bugna 22:17.) Ginaagda sila nga “magkari” kag busgon ang ila kauhaw sa isa ka pinasahi nga tubig. Indi lamang ini ordinaryo nga tubig. Ang literal nga tubig importante agod makapabilin kita nga buhi sa duta, apang tuhay nga tubig ang gintumod ni Jesus sang nagpakigsugilanon sia sa isa ka Samaritana sa bubon: “Ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sang tubig sa iya nga nagaibwal agod maghatag sang kabuhi nga walay katapusan.” (Juan 4:14) Ang tumalagsahon nga tubig nga ginatanyag sa katawhan nagahatag sing kabuhi nga walay katapusan.
4. Ngaa ang tubig sang kabuhi nangin kinahanglanon, kag ano ang ginalaragway sina nga tubig?
4 Ang tubig sang kabuhi nangin kinahanglanon sang ang una nga tawo nga si Adan nagbuylog sa iya asawa nga si Eva sa paglapas sa isa nga nagtuga sa ila—si Jehova nga Dios. (Gen. 2:16, 17; 3:1-6) Ang una nga mag-asawa ginpalayas sa ila hardin nga puluy-an kay “basi nga idab-ut niya [ni Adan] ang iya kamut kag magkuha man sang kahoy sang kabuhi, kag magkaon, kag magkabuhi sing dayon.” (Gen. 3:22) Bangod ang tanan nga katawhan naghalin kay Adan, naglaton sa tanan nga tawo ang kamatayon. (Roma 5:12) Ang tubig sang kabuhi nagalaragway sa tanan nga aman sang Dios para ipasag-uli ang matinumanon nga mga tawo gikan sa sala kag kamatayon kag hatagan sila sing walay katapusan nga himpit nga kabuhi sa Paraiso nga duta. Ining tanan nga aman nangin posible paagi sa halad gawad ni Jesucristo.—Mat. 20:28; Juan 3:16; 1 Juan 4:9, 10.
5. Kay sin-o naghalin ang pangagda nga “magkuha sang tubig sang kabuhi nga wala sing bayad”? Ipaathag.
5 Kay sin-o naghalin ang pangagda nga “magkuha sang tubig sang kabuhi nga wala sing bayad”? (Bug. 22:17) Ang tanan nga aman para sa kabuhi paagi kay Jesus nga matigayon sang katawhan sa iya Isa ka Libo ka Tuig nga Paggahom ginalaragway subong isa ka “suba sang tubig sang kabuhi, nga matin-aw subong sang kristal.” Ina nga suba nakita nga “nagailig gikan sa trono sang Dios kag sang Kordero.” (Bug. 22:1) Gani, si Jehova, ang Manughatag-Kabuhi, amo ang Ginhalinan sang tubig nga nagahatag sing kabuhi. (Sal. 36:9) Sia ang Isa nga nagpaposible nga matigayon inang tubig paagi sa “Kordero,” si Jesucristo. (Juan 1:29) Ining simbuliko nga suba amo ang paagi ni Jehova sa pagdula sang tanan nga halit sa katawhan nga resulta sang paglapas ni Adan. Huo, si Jehova nga Dios ang Ginhalinan sang pangagda nga “magkari.”
6. San-o nagsugod ang pag-ilig sang “suba sang tubig sang kabuhi”?
6 Bisan pa “ang suba sang tubig sang kabuhi” magailig sing bug-os sa Isa ka Libo ka Tuig nga Paggahom ni Cristo, nagsugod na ini sa pag-ilig sa “adlaw sang Ginuo,” sang ginpalingkod sa langitnon nga trono ang “Kordero” sang 1914. (Bug. 1:10) Gani, sugod sadto, matigayon na ang pila ka aman para sa kabuhi. Nalakip sa sini ang mensahe sa Biblia, kay ginapatuhuyan ini subong “tubig.” (Efe. 5:26) Ang pangagda nga “magkuha sang tubig” sang kabuhi paagi sa pagpamati kag pagtuman sa maayong balita sang Ginharian nangin bukas sa tanan. Apang sin-o ang aktual nga nagapangagda sa adlaw sang Ginuo?
“Ang Nobya” Nagasiling, “Kari!”
7. Sin-o ang una nga nagpaalinton sang pangagda nga “magkari,” sang “adlaw sang Ginuo,” kag sin-o ang ila ginaagda?
7 Ang mga katapo sang nobya nga grupo—ang hinaplas sang espiritu nga mga Cristiano—amo ang una nga nagpaalinton sang pangagda nga “magkari.” Kag sin-o ang ila ginaagda? Bueno, ang nobya wala nagsiling sing “Kari!” sa iya kaugalingon. Ang iya ginaagda amo yadtong mga may paglaum nga mabuhi sing walay katapusan sa duta pagkatapos sang “inaway sang daku nga adlaw sang Dios nga Labing Gamhanan.”—Basaha ang Bugna 16:14, 16.
8. Ngaa makasiling kita nga ang hinaplas nga mga Cristiano nagapaalinton na sang pangagda ni Jehova halin pa sang 1918?
8 Sugod pa sang 1918, ang hinaplas nga mga sumulunod ni Cristo nagapaalinton na sang pangagda. Sadto nga tuig, ang pamulongpulong publiko nga natig-uluhan “Minilyon nga Nagakabuhi Karon ang Mahimo nga Indi Na Mapatay” naghatag sing paglaum sa madamo nga makatigayon sing kabuhi sa paraiso nga duta pagkatapos sang inaway sang Armagedon. Sang 1922, ang isa ka pamulongpulong sa kombension sang mga Estudyante sang Biblia sa Cedar Point, Ohio, U.S.A., nagpalig-on sa mga tagpalamati nga ‘ibantala ang Hari kag ang iya ginharian.’ Ini nga pangagda nagbulig sa mga nagkalabilin sang nobya nga grupo nga magpangagda sing madamo pa nga tawo. Sang 1929, ang Marso 15 nga gua sang Ang Lalantawan nagaunod sang artikulo nga “Mainabyanon nga Imbitasyon,” kag ang tema nga teksto sini amo ang Bugna 22:17. Ini nga artikulo nagasiling: “Ang matutom nga mga nagkalabilin nagabuylog [sa Labing Mataas] sa mainabyanon nga pagpangagda kag nagasiling, ‘Kari.’ Ini nga mensahe dapat ibantala sa mga tawo nga nagapangita sang pagkamatarong kag kamatuoran. Dapat ini himuon subong.” Gani, ang nobya nga grupo padayon nga nagapaalinton sini nga pangagda tubtob sa karon.
“Ang Bisan Sin-o nga Nagapamati Magsiling: ‘Kari!’”
9, 10. Paano yadtong mga nakabati sa pangagda ginpalig-on man nga magsiling sing “Kari!”?
9 Kamusta naman yadtong mga nakabati sang pangagda nga “magkari”? Ginaagda man sila nga magsiling sing “Kari!” Halimbawa, ang Agosto 1, 1932 nga gua sang Ang Lalantawan nagasiling sa pahina 232: “Dapat palig-unon sang mga hinaplas ang tanan nga makigbahin sa pagsugid sang maayong balita sang Ginharian. Indi kinahanglan nga mangin hinaplas sila sang Ginuo para makabantala sang mensahe sang Ginuo. Isa gid ka daku nga paumpaw sa mga saksi ni Jehova karon nga mahibaluan nga ginatugutan sila nga magdala sang tubig sang kabuhi sa mga tawo nga mahimo maluwas sa Armagedon kag hatagan sing kabuhi nga walay katapusan sa duta.”
10 Agod ipatalupangod ang salabton sang isa nga nakabati nga magsiling sing “Kari!,” ang Agosto 15, 1934 nga Ang Lalantawan, pahina 249 nagasiling: “Ang mga bahin sang Jonadab nga grupo dapat mag-upod sa antitipiko nga Jehu nga grupo, nga amo ang mga hinaplas, kag ibantala ang mensahe sang ginharian, bisan pa indi sila mga hinaplas nga mga saksi ni Jehova.” Sang 1935, nangin maathag kon sin-o ang “dakung kadam-an” nga ginsambit sa Bugna 7:9-17. Daku ang nangin epekto sini sa hilikuton nga pagpaalinton sang pangagda sang Dios. Sugod sadto, padayon nga nagadugang ang dakung kadam-an sang matuod nga mga sumilimba. Sa karon, kapin na sa pito ka milyon ang nagbaton sa sina nga pangagda. Gin-apresyar nila ang mensahe, nagdedikar sa Dios, nagpabawtismo sa tubig, kag nagbuylog sila sa nobya nga grupo sa aktibo nga pagpangagda sa iban nga ‘magkari kag mag-inom sang tubig sang kabuhi nga wala sing bayad.’
“Ang Espiritu” Nagasiling, “Kari!”
11. Paano nadalahig ang balaan nga espiritu sa pagbantala nga hilikuton sang unang siglo C.E.?
11 Sang nagbantala si Jesus sa isa ka sinagoga sa Nazaret, ginbuksan niya ang linukot ni manalagna Isaias kag ginbasa ini: “Ang espiritu ni Jehova yari sa akon, bangod ginhaplas niya ako sa pagpahayag sing maayong balita sa mga imol, ginpadala niya ako sa pagbantala sing kahilwayan sa mga bihag kag pagpasag-uli sing panan-aw sa mga bulag, sa paghilway sa mga ginapigos, sa pagbantala sing tuig nga nahamut-an ni Jehova.” Pagkatapos, gin-aplikar ni Jesus ining mga pinamulong sa iya kaugalingon, nga nagsiling: “Karon ining kasulatan nga bag-o lang ninyo nabatian natuman.” (Luc. 4:17-21) Antes sia nagkayab sa langit, ginsilingan ni Jesus ang iya mga disipulo: “Magabaton kamo sang gahom kon ang balaan nga espiritu mag-abot sa inyo, kag mangin saksi ko kamo . . . tubtob sa ukbong sang duta.” (Binu. 1:8) Ang balaan nga espiritu may daku gid nga papel sa pagbantala nga hilikuton sang unang siglo.
12. Paano nadalahig ang espiritu sang Dios sa pagpangagda nga hilikuton sa aton panahon?
12 Paano nadalahig ang balaan nga espiritu sang Dios sa pagpangagda sa mga tawo sa aton panahon? Si Jehova amo ang Ginhalinan sang balaan nga espiritu. Ginagamit niya ang espiritu agod buksan ang tagipusuon kag hunahuna sang nobya nga grupo agod mahangpan nila ang iya Pulong, ang Biblia. Ang espiritu nagapahulag sa ila nga ipaalinton ang pangagda kag ipaathag ang mga kamatuoran sang Kasulatan sa mga may paglaum nga mabuhi sing walay katapusan sa Paraiso nga duta. Kamusta yadtong mga nagbaton sang pangagda, nangin mga disipulo ni Jesucristo, kag nagapaalinton sang pangagda sa iban pa? Ang espiritu nagabulig man sa ila. Bangod ginbawtismuhan sila ‘sa ngalan sang balaan nga espiritu,’ nagapanghikot sila kag nagasandig sa bulig sini. (Mat. 28:19) Hunahunaa man ang mensahe nga ginabantala sang mga hinaplas kag sang nagadamo nga dakung kadam-an. Naghalin ini sa Biblia—ang libro nga ginsulat paagi sa direkta nga panuytoy sang espiritu sang Dios. Gani, ang pangagda ginapaalinton paagi sa balaan nga espiritu. Sa pagkamatuod, ginatuytuyan kita sina nga espiritu. Paano ina makaapektar sa aton pagpakigbahin sa pagpangagda nga hilikuton?
“Padayon [Sila] nga Nagasiling: ‘Kari!’”
13. Ano ang kahulugan sang pinamulong nga “ang espiritu kag ang nobya padayon nga nagasiling: ‘Kari!’”?
13 “Ang espiritu kag ang nobya” wala lamang nagasiling sing “Kari!” Ang orihinal nga tinaga nga ginbadbad “Kari!” nagapahangop sang dalayon nga pagpanghikot. Bangod sini, ang Bag-ong Kalibutan nga Badbad nagasiling: “Ang espiritu kag ang nobya padayon nga nagasiling: ‘Kari!’” Ginapahangop sini nga ang pagpaalinton sang pangagda sang Dios dapat himuon sing regular. Kamusta naman yadtong mga nakabati kag nagbaton sang pangagda? Nagasiling man sila sing “Kari!” Ang dakung kadam-an ‘nagahimo sang sagrado nga pag-alagad sa adlaw kag gab-i sa templo ni Jehova.’ (Bug. 7:9, 15) Ano ang buot silingon sang ‘pag-alagad sa adlaw kag gab-i’? (Basaha ang Lucas 2:36, 37; Binuhatan 20:31; 2 Tesalonica 3:8.) Ginapakita sang halimbawa ni apostol Pablo kag sang tigulang nga manalagna nga si Ana nga ang ‘pag-alagad sa adlaw kag gab-i’ nagapahangop sang regular kag hanuot nga panikasog sa ministeryo.
14, 15. Paano ginpakita ni Daniel nga importante gid nga mangin regular sa pagsimba?
14 Ginpakita ni manalagna Daniel nga importante gid nga mangin regular sa pagsimba. (Basaha ang Daniel 6:4-10, 16.) Wala sia nag-untat sa pagpangamuyo sa Dios sing “makatlo sa isa ka adlaw”—bisan sa sulod lang sang isa ka bulan. Ginhuptan niya ining espirituwal nga rutina bisan pa nagakahulugan ini nga itagbong sia sa lungib sang mga leon. Nangin maathag sa mga nagapanilag sa iya nga wala na sing mas importante pa sangsa iya pagsimba kay Jehova sing regular!—Mat. 5:16.
15 Pagligad sang isa ka gab-i nga yara si Daniel sa lungib sang mga leon, ang hari nagkadto didto kag nagsinggit: “O Daniel, alagad sang Dios nga buhi, ang imo Dios, nga ginaalagad mo sing dalayon, nakasarang bala sa pagluwas sa imo sa mga leon?” Si Daniel nagsabat gilayon: “O hari, magkabuhi sa gihapon! Ang akon Dios nagpadala sang iya manugtunda kag nagtakup sang mga baba sang mga leon, kag wala sila magdaut sa akon, sanglit nga sa atubangan niya ang pagkawala sing sala nakita sa akon; kag sa atubangan mo man, O hari, wala ako makahimo sing daut.” Ginpakamaayo ni Jehova si Daniel bangod nag-alagad sia “sing dalayon.”—Dan. 6:19-22.
16. Suno sa halimbawa ni Daniel, ano nga mga pamangkot ang dapat naton ipamangkot sa aton kaugalingon tuhoy sa aton pagpakigbahin sa ministeryo?
16 Mas pilion pa ni Daniel nga mapatay sangsa patumbayaan niya ang iya espirituwal nga rutina. Kamusta naman sa aton bahin? Ano nga mga sakripisyo ang nahimo na naton ukon handa nga himuon agod mangin regular sa pagbantala sang maayong balita sang Ginharian sang Dios? Dapat nga indi naton pagpaligaron ang isa ka bulan nga indi kita makapakigsugilanon sa iban tuhoy kay Jehova. Kon posible, ngaa indi naton pagtinguhaan nga makapakigbahin sa ministeryo kada semana? Bisan pa may pisikal kita nga limitasyon kag makapanaksi sing 15 minutos lamang sa isa ka bulan, dapat gid naton ini ireport. Ngaa? Bangod luyag naton magbuylog sa espiritu kag sa nobya nga padayon nga nagasiling sing “Kari!” Huo, luyag naton himuon ang tanan naton nga masarangan agod makapabilin kita nga regular nga manugbantala sang Ginharian.
17. Ano nga mga kahigayunan sa pagpaalinton sing pangagda ni Jehova ang indi naton dapat pagwasihon?
17 Dapat naton tinguhaan nga ipaalinton ang pangagda ni Jehova sa tanan nga kahigayunan kag indi lamang sa aton gintalana nga tion para sa pagministeryo. Daw ano ka daku nga pribilehiyo nga maagda naton ang mga nauhaw nga ‘magkari kag magkuha sang tubig sang kabuhi nga wala sing bayad’ sa iban pa nga kahigayunan! Mahimo naton ini kon nagapamalaklon kita, nagalakbay, nagabakasyon, nagatrabaho, ukon nagakadto sa eskwelahan. Bisan pa dumilian sang mga awtoridad ang aton pagbantala, nagapadayon kita sing mainandamon—ayhan paagi sa pagbantala sing mahinalungon sa mga balay ukon paagi sa pagdugang sang aton tion sa di-pormal nga pagpanaksi.
Padayon nga Nagasiling, “Kari!”
18, 19. Paano mo mapakita nga ginapabaloran mo ang pribilehiyo nga mangin masigkamanugpangabudlay sang Dios?
18 Kapin na sa siam ka dekada nga ang espiritu kag ang nobya nagasiling sing “Kari!” sa bisan sin-o nga nauhaw sa tubig sang kabuhi. Nabatian mo bala ang ila makakulunyag nga pangagda? Kon amo ginapalig-on ka nga ipaalinton man sa iban ina nga pangagda.
19 Wala kita makahibalo kon daw ano pa kalawig nga magapadayon ining mahigugmaon nga pangagda ni Jehova, apang ang pagbaton sa sini paagi sa pagsiling sing, “Kari!” nagahimo sa aton nga mga masigkamanugpangabudlay sang Dios. (1 Cor. 3:6, 9) Daw ano gid ina ka daku nga pribilehiyo! Kabay nga ipakita naton nga ginapabaloran naton ina nga pribilehiyo kag “magdulot kita pirme sa Dios sang halad sang pagdayaw” paagi sa pagbantala sing regular. (Heb. 13:15) Gani, ang mga may dutan-on nga paglaum magbuylog sa nobya nga grupo kag padayon nga magsiling, “Kari!” Kag kabay nga madamo pa ang ‘makakuha sang tubig sang kabuhi nga wala sing bayad’!
Ano ang Natun-an Mo?
• Kay sin-o ginapaalinton ang pangagda nga “kari”?
• Ngaa masiling naton nga ang pangagda nga “kari” naghalin kay Jehova?
• Ano ang papel sang balaan nga espiritu sa pagpaalinton sang pangagda nga “kari”?
• Ngaa dapat naton panikasugan nga mangin regular sa ministeryo?
[Mga Pamangkot sa Pagtinuon]
[Tsart/Mga Retrato sa pahina 16]
(Para sa aktual nga pormat, tan-awa ang publikasyon)
Padayon nga Nagasiling, “Kari!”
1914
5,100 ka manugbantala
1918
Madamo ang makatigayon kabuhi sa Paraiso nga duta
1922
“Ibantala, ibantala, ibantala, ang Hari kag ang iya ginharian”
1929
Ang matutom nga nagkalabilin nagasiling, “Kari!”
1932
Ang pangagda nga magsiling, “Kari!” ginapaalinton indi lamang sa mga hinaplas
1934
Ang Jonadab nga grupo gin-agda nga magbantala
1935
Nakilal-an ang “dakung kadam-an”
2009
7,313,173 ka manugbantala
