Ginaabiabi Kamo sa Pinakamaayo nga Dalanon sang Pagkabuhi!
Ginaabiabi Kamo sa Pinakamaayo nga Dalanon sang Pagkabuhi!
“Kon kita nagakabuhi kag kon kita mapatay, kita iya ni Jehova.”—ROMA 14:8.
1. Ano ang gintudlo ni Jesus tuhoy sa pinakamaayo nga dalanon sang pagkabuhi?
LUYAG ni Jehova nga matigayon naton ang pinakamaayo nga dalanon sang pagkabuhi. Ang mga tawo mahimo magkabuhi sa nanuhaytuhay nga paagi, apang isa lamang ang pinakamaayo. Ini amo ang pagkabuhi nahisuno sa Pulong sang Dios kag ang pagtuon tuhoy sa iya Anak, si Jesucristo. Gintudluan ni Jesus ang iya mga sumulunod nga simbahon ang Dios sa espiritu kag kamatuoran, kag ginsugo niya sila nga maghimo sing mga disipulo. (Mat. 28:19, 20; Juan 4:24) Paagi sa pagkabuhi nahisuno sa gintudlo ni Jesus, mapahamut-an naton si Jehova kag matigayon naton ang Iya mga pagpakamaayo.
2. Paano ginbaton sang madamo nga tawo sang unang siglo ang mensahe sang Ginharian, kag ano ang buot silingon sang mangin bahin sang “Dalan”?
2 Kon ang mga “husto nga nahuyog para sa kabuhi nga walay katapusan” mangin mga tumuluo kag magpabawtismo, may maayo gid kita nga rason nga magsiling sa ila, “Ginaabiabi kamo sa pinakamaayo nga dalanon sang pagkabuhi!” (Binu. 13:48) Sang unang siglo C.E., linibo ka tawo gikan sa nanuhaytuhay nga mga pungsod ang nagbaton sang kamatuoran kag nagpahibalo sa publiko sang ila diosnon nga debosyon paagi sa pagpabawtismo. (Binu. 2:41) Yadtong una nga mga disipulo nangin bahin sang “Dalan.” (Binu. 9:2; 19:23) Ini nga paglaragway nagakaigo bangod ang dalanon sang pagkabuhi sang mga sumulunod ni Cristo nasentro sa ila pagtuo kay Jesucristo kag sa pag-ilog sang iya halimbawa.—1 Ped. 2:21.
3. Ngaa nagapabawtismo ang mga alagad ni Jehova, kag pila ang nabawtismuhan sang nagligad nga napulo ka tuig?
3 Sa sining katapusan nga mga adlaw madasig gid ang pag-uswag sang paghimo-disipulo nga hilikuton kag ginahimo na ini karon sa kapin sa 230 ka kadutaan. Sang nagligad nga napulo ka tuig, kapin sa 2,700,000 ka tawo ang nagdesisyon nga alagaron si Jehova kag nagpabawtismo subong simbulo sang ila dedikasyon sa iya. Buot silingon sini nga kapin sa 5,000 ka indibiduwal ang nagadugang kada semana! Nagpabawtismo sila bangod sang ila gugma sa Dios, ihibalo sa Kasulatan, kag pagtuo sa ila ginatudlo. Ang bawtismo importante gid nga bahin sang aton kabuhi, kay amo ini ang panugod sang aton suod nga kaangtanan kay Jehova. Isa man ini ka pamatuod nga nagasalig kita nga buligan niya kita nga maalagad sia sing matutom, subong nga ginbuligan man niya ang mga alagad niya sang una.—Isa. 30:21.
Ngaa Importante Gid Magpabawtismo?
4, 5. Ano ang pila sang mga pagpakamaayo kag benepisyo sang pagpabawtismo?
4 Mahimo nga may ihibalo ka na tuhoy sa Dios, naghimo sang pila ka pagbag-o sa imo kabuhi, kag karon isa na ka di-bawtismado nga manugbantala. Dalayawon gid ang imo pag-uswag. Apang, nakadedikar ka na bala sa Dios paagi sa pangamuyo kag nagaplano na nga magpabawtismo? Sa imo pagtuon sa Biblia, mahimo nahibaluan mo na nga ang pagdayaw kay Jehova amo dapat ang mangin sentro sang imo kabuhi kag indi para pahamut-an ang imo kaugalingon ukon magtigayon sang materyal nga pagkabutang. (Basaha ang Salmo 148:11-13; Lucas 12:15) Kon amo, ano ang pila sang mga pagpakamaayo kag benepisyo nga matigayon mo kon magpabawtismo ka?
5 Subong isa ka dedikado nga Cristiano, matigayon mo ang pinakamaayo nga katuyuan sang kabuhi. Mangin malipayon ka bangod ginahimo mo ang kabubut-on sang Dios. (Roma 12:1, 2) Paagi sa balaan nga espiritu ni Jehova mapatubas mo ang diosnon nga mga kinaiya subong sang paghidait kag pagtuo. (Gal. 5:22, 23) Pagasabton sang Dios ang imo mga pangamuyo kag pakamaayuhon ang imo mga panikasog nga ipahisuno ang imo kabuhi sa iya Pulong. Mangin makalilipay ang imo ministeryo, kag ang pagkabuhi sa paagi nga ginakahamut-an sang Dios magapabakod sang imo paglaum nga kabuhi nga walay katapusan. Dugang pa, ang pagdedikar kag pagpabawtismo nagapakita nga luyag mo nga mangin isa sa mga Saksi ni Jehova.—Isa. 43:10-12.
6. Ano ang ginapahibalo sang aton bawtismo?
6 Paagi sa pagdedikar sang aton kaugalingon sa Dios kag sa pagpabawtismo, ginapahibalo naton sa publiko nga kita iya na ni Jehova. “Sa katunayan, wala sang isa sa aton nga nagakabuhi para sa iya kaugalingon lamang, kag wala sang isa nga nagakapatay para sa iya kaugalingon lamang,” sulat ni apostol Pablo, “kay kon kita nagakabuhi, nagakabuhi kita para kay Jehova, kag kon kita mapatay, mapatay kita para kay Jehova. Busa kon kita nagakabuhi kag kon kita mapatay, kita iya ni Jehova.” (Roma 14:7, 8) Ginhatagan kita sang Dios sing kahilwayan sa pagbuot. Kon malig-on naton nga ginasunod ining dalanon sang pagkabuhi bangod ginahigugma naton ang Dios, mapahalipay naton ang iya tagipusuon. (Hulu. 27:11) Ang aton bawtismo simbulo sang aton dedikasyon sa Dios kag nagapahibalo sa publiko nga si Jehova amo ang aton Manuggahom. Nagapakita man ini nga dampig kita sa iya sa isyu sang bug-os uniberso nga pagkasoberano. (Binu. 5:29, 32) Bangod sini, si Jehova nagadampig man sa aton. (Basaha ang Salmo 118:6.) Dugang pa, ang bawtismo isa ka paagi nga mabaton naton ang madamo pa nga espirituwal nga mga pagpakamaayo sa karon kag sa palaabuton.
Nangin Bahin sang Mahigugmaon nga Paghiliutod
7-9. (a) Ano nga pasalig ang ginhatag ni Jesus sa mga nagbiya sang tanan nila nga pagkabutang kag nagsunod sa iya? (b) Paano natuman ang saad ni Jesus nga narekord sa Marcos 10:29, 30?
7 Si apostol Pedro nagsiling kay Jesus: “Yari karon! Ginbiyaan namon ang tanan nga butang kag nagsunod sa imo; ano gid ang mabaton namon?” (Mat. 19:27) Luyag mahibaluan ni Pedro kon ano ang mangin palaabuton niya kag sang iban pa nga mga disipulo ni Jesus. Naghimo sila sing dalagku nga mga pagsakripisyo agod masakdag nila sing bug-os ang pagbantala sang Ginharian nga hilikuton. (Mat. 4:18-22) Ano nga pasalig ang ginhatag ni Jesus sa ila?
8 Suno sa kaanggid nga kasaysayan nga ginsulat ni Marcos, ginpakita ni Jesus nga ang iya mga disipulo mangin bahin sang espirituwal nga paghiliutod. Nagsiling sia: “Wala sing bisan sin-o nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga uma tungod sa akon kag tungod sa maayong balita ang indi makabaton sang isa ka gatos ka pilo karon sa sini nga panag-on, sang mga balay kag mga utod nga lalaki kag mga utod nga babayi kag mga iloy kag mga anak kag mga uma, upod sang mga paghingabot, kag sa nagapakari nga sistema sang mga butang sang kabuhi nga walay katapusan.” (Mar. 10:29, 30) Ang unang siglo nga mga Cristiano, subong nanday Lidia, Aquila, Priscila, kag Gayo, amo ang pila nga nag-aman sang “mga balay” kag nangin “mga utod nga lalaki kag mga utod nga babayi kag mga iloy” sa ila mga masigkatumuluo, subong sang ginsaad ni Jesus.—Binu. 16:14, 15; 18:2-4; 3 Juan 1, 5-8.
9 Ang ginsiling ni Jesus may daku gid nga katumanan karon. Ang “mga uma” nga ginbiyaan sang iya mga sumulunod nagapatuhoy sa mga palangabuhian nga ginbiyaan sang madamo, lakip na sang mga misyonero, mga katapo sang pamilya Bethel, mga boluntaryo sa iban nga pungsod, kag sang iban pa, agod mapauswag ang intereses sang Ginharian sa nanuhaytuhay nga kadutaan. Madamo nga kauturan ang nagbiya sang ila mga balay agod pasimplehon ang ila kabuhi. Nalipay kita nga mabatian ang ila mga eksperiensia kon paano sila gin-atipan ni Jehova kag kon paano sila nangin malipayon sa pag-alagad sa iya. (Binu. 20:35) Dugang pa, paagi sa ‘pagpangita anay sang ginharian kag sang pagkamatarong sang Dios’ matigayon sang tanan nga bawtismado nga alagad ni Jehova ang pagpakamaayo subong bahin sang bug-os kalibutan nga Cristianong paghiliutod.—Mat. 6:33.
Naamligan “sa Tagong Duug”
10, 11. Ano ang “tagong duug sang Labing Mataas,” kag paano kita makasulod sa sini?
10 Ang dedikasyon kag bawtismo nagadul-ong sa isa pa ka daku nga pagpakamaayo—ang pribilehiyo nga makapuyo “sa tagong duug sang Labing Mataas.” (Basaha ang Salmo 91:1.) Isa ini ka malaragwayon nga duog sang pangamlig kag kalig-unan—isa ka kahimtangan nga hilway sa espirituwal nga katalagman. Isa ini ka “tagong duug” bangod wala ini nahibaluan sang mga tawo nga kulang sang espirituwal nga paghangop kag wala nagasalig sa Dios. Paagi sa pagkabuhi nahisuno sa aton dedikasyon kag paagi sa pagsalig sing bug-os kay Jehova, daw kaangay lang nga nagasiling kita sa iya: ‘Ikaw akon dalangpan kag akon kuta; akon Dios, nga sa imo nagasalig ako.’ (Sal. 91:2) Gani, si Jehova nga Dios amo ang aton mabakod nga dalangpan. (Sal. 91:9) Mangita pa bala kita sang iban nga dalangpan?
11 Ang pribilehiyo nga makasulod “sa tagong duug” ni Jehova matigayon lamang sang isa nga nakapalambo na sang personal nga kaangtanan sa iya. Nagaumpisa ini sa dedikasyon kag bawtismo. Nian, padayon naton nga mapalambo ang suod nga kaangtanan sa Dios paagi sa pagtuon sa Biblia, tinagipusuon nga pagpangamuyo, kag pagtuman sa iya sing bug-os. (Sant. 4:8) Wala na sing mas suod pa kay Jehova sangsa kay Jesus. Ang pagsalig ni Jesus sa iya Manunuga wala gid nag-ugdaw. (Juan 8:29) Gani, indi gid kita dapat magduhaduha kay Jehova ukon sa iya handum kag ikasarang nga buligan kita sa pagtuman sang aton panaad sa dedikasyon. (Man. 5:4) Ang espirituwal nga mga aman sang Dios sa iya katawhan indi mapanghiwala nga pamatuod nga ginahigugma gid niya kita kag luyag niya nga magmadinalag-on kita sa pag-alagad sa iya.
Pabalori ang Aton Espirituwal nga Paraiso
12, 13. (a) Ano ang espirituwal nga paraiso? (b) Paano naton mahimo mabuligan ang mga bag-uhan?
12 Ang aton dedikasyon kag bawtismo nagabukas man sang dalan para makapuyo kita sa espirituwal nga paraiso. Isa ini ka pinasahi nga espirituwal nga kahimtangan nga ginaagom sang matuod nga mga sumilimba nga may paghidait kay Jehova nga Dios kag sa isa kag isa. (Sal. 29:11; Isa. 54:13) Ang kalibutan wala gid sing matanyag nga mapaanggid naton sa aton espirituwal nga paraiso. Makita ini ilabi na sa tion sang internasyonal nga mga kombension sa diin ang aton mga kauturan gikan sa madamo nga mga pungsod, lenguahe, kag etniko nga mga grupo nagatilipon sing tingob nga may paghidait, paghiusa, kag utudnon nga gugma.
13 Ang espirituwal nga paraiso nga natigayon naton tuhay gid sa makaluluoy nga kahimtangan sang kalibutan sa karon. (Basaha ang Isaias 65:13, 14.) May pribilehiyo kita nga mapaambit sa iban ang pangagda nga magsulod sa espirituwal nga paraiso paagi sa aton pagbantala sang mensahe sang Ginharian. Isa man ka pagpakamaayo nga mabuligan ang mga bag-uhan sa kongregasyon kag mahanas sila sa ministeryo. Pribilehiyo man naton kon pangabayon kita sang mga gulang nga magbulig sa mga bag-uhan, kaangay sang ginhimo ni Aquila kag ni Priscila nga ‘nagpaathag sing sibu sang dalanon sang Dios’ kay Apolos.—Binu. 18:24-26.
Padayon nga Magtuon Tuhoy kay Jesus
14, 15. Anong maayo nga mga rason ngaa dapat kita magpadayon sa pagtuon tuhoy kay Jesus?
14 May yara kita maayo nga mga rason nga magpadayon sa pagtuon tuhoy kay Jesus. Antes sia mangin tawo, naghinguyang si Jesus sing indi maisip nga tinuig sa pagpangabudlay upod sa iya Amay. (Hulu. 8:22, 30) Nahibaluan niya nga ang pinakamaayo nga dalanon sang pagkabuhi amo ang pagkabuhi nga nasentro sa pag-alagad sa Dios kag sa pagpanaksi sa kamatuoran. (Juan 18:37) Para kay Jesus, ang iban nga dalanon sang pagkabuhi maiyaiyahon kag umalagi lamang. Nahibaluan niya nga magaatubang sia sing mabudlay katama nga mga pagtilaw kag pagapatyon sia. (Mat. 20:18, 19; Heb. 4:15) Subong aton Huwaran, gintudluan niya kita kon paano naton mahuptan ang aton integridad.
15 Wala madugay sa tapos ginbawtismuhan si Jesus, ginsulay sia ni Satanas nga talikdan ang pinakamaayo nga dalanon sang pagkabuhi, apang napaslawan si Satanas. (Mat. 4:1-11) Ang halimbawa ni Jesus nagatudlo sa aton nga bisan ano man ang himuon ni Satanas, sarang naton mahuptan ang aton integridad. Labi na nga ginapuntariya niya amo ang mga malapit na lang bawtismuhan ukon ang mga bag-ong bawtismo. (1 Ped. 5:8) Mahimo kita pamatukan sang mga miembro sang aton pamilya bangod sang sayop nga mga impormasyon nga ila nabatian tuhoy sa mga Saksi ni Jehova. Apang ina nga mga pagtilaw, nagahatag sa aton sing kahigayunan nga mapakita ang Cristianong mga kinaiya, subong sang pagkamatinahuron kag pagkamataktikanhon kon nagasabat kita sa mga pamangkot kag nagapanaksi. (1 Ped. 3:15) Gani ini nga mga eksperiensia mahimo makahatag sing positibo nga epekto sa mga nagapamati sa aton.—1 Tim. 4:16.
Magpabilin sa Pinakamaayo nga Dalanon sang Pagkabuhi!
16, 17. (a) Ano ang tatlo ka panguna nga butang nga ginapatuman para sa kabuhi nga makita sa Deuteronomio 30:19, 20? (b) Paano ginsakdag nanday Jesus, Juan, kag Pablo ang ginsulat ni Moises?
16 Mga 1,500 ka tuig antes magkari si Jesus sa duta, ginpalig-on ni Moises ang mga Israelinhon nga pilion ang pinakamaayo nga dalanon sang pagkabuhi. Nagsiling sia: “Ginakuha ko nga saksi batok sa imo karon ang langit kag ang duta, nga ginabutang ko sa imo atubangan ang kabuhi kag ang kamatayon, ang pagpakamaayo kag ang pagpakamalaut; kag pilion mo ang kabuhi agod padayon ka nga mabuhi, ikaw kag ang imo kaliwat, paagi sa paghigugma kay Jehova nga imo Dios, sa pagpamati sa iya tingog kag pag-unong sa iya.” (Deut. 30:19, 20, NW) Bisan pa ang mga Israelinhon nangin di-matutom sa Dios, ang tatlo ka panguna nga butang nga ginapatuman para sa kabuhi nga ginsambit ni Moises wala nagbag-o. Ini nga mga punto ginsakdag man ni Jesus kag sang iban pa.
17 Una, ‘dapat naton higugmaon si Jehova nga aton Dios.’ Mapakita naton ini kon ginasunod naton ang iya matarong nga mga dalanon. (Mat. 22:37) Ikaduha, ‘dapat kita mamati sa tingog ni Jehova’ paagi sa pagtuon sa Pulong sang Dios kag sa pagtuman sa iya mga sugo. (1 Juan 5:3) Nadalahig sa sini ang regular nga pagtambong sa Cristianong mga miting, sa diin ginabinagbinag ang Biblia. (Heb. 10:23-25) Ikatlo, ‘dapat kita mag-unong kay Jehova.’ Bisan ano man ang aton ginaatubang, dapat kita magtuo pirme sa Dios kag magsunod sa iya Anak.—2 Cor. 4:16-18.
18. (a) Paano ginlaragway sang The Watch Tower ang kamatuoran sang 1914? (b) Ano dapat ang aton batyagon sa kapawa sang kamatuoran sa karon?
18 Daw ano gid nga pagpakamaayo nga magkabuhi kita nahisuno sa kamatuoran sa Biblia! Sang 1914, ining importante nga dinalan ginbalhag sa The Watch Tower: “Indi bala kita isa ka ginpakamaayo kag malipayon nga katawhan? Indi bala matutom ang aton Dios? Kon may isa nga nakahibalo sing mas maayo pa, pabayai sia. Kon may yara sa inyo nga nakasapo sing butang nga mas maayo pa, ginalauman namon nga sugiran ninyo kami. Wala na kami sing nahibaluan nga mas maayo pa ukon subong kaayo sang katunga sang nasapwan namon sa Pulong sang Dios. . . . Wala sing dila ukon pluma ang makasugid sang paghidait, kalipay kag pagpakamaayo nga gindala sa aton tagipusuon kag kabuhi sang maathag nga ihibalo tuhoy sa matuod nga Dios. Ang Sugilanon tuhoy sa Kaalam, Hustisya, Gahom kag Gugma sang Dios bug-os nga nagapaayaw sang mga handum sang aton hunahuna kag tagipusuon. Wala na kita sing pangitaon pa. Wala na sing butang nga handumon pa sing kapin sangsa mahangpan sing bug-os ang kamatuoran tuhoy sa Dios.” (The Watch Tower, Disiembre 15, 1914, pahina 377-378) Ang aton apresasyon sa espirituwal nga kapawa kag kamatuoran wala gid nagbag-o. Huo, mas labi nga magkalipay kita karon bangod ‘nagalakat kita sa kapawa sang GINOO.’—Isa. 2:5; Sal. 43:3; Hulu. 4:18.
19. Ngaa ang mga kalipikado para sa bawtismo indi na dapat magpalantang?
19 Kon luyag mo ‘maglakat sa kapawa’ ni Jehova apang indi ka pa dedikado kag bawtismado nga Cristiano, indi na magpalantang pa. Tinguhai nga malab-ot mo ang kalipikasyon para sa bawtismo—ang pinasahi nga paagi nga mapakita mo ang imo apresasyon sa ginhimo sang Dios kag ni Cristo para sa aton. Ihatag kay Jehova ang imo pinakabilidhon nga ginapanag-iyahan—ang imo kabuhi. Ipakita nga luyag mo himuon ang kabubut-on sang Dios paagi sa pagsunod sa iya Anak. (2 Cor. 5:14, 15) Wala sing duhaduha nga amo ina ang pinakamaayo nga dalanon sang pagkabuhi!
Paano Mo Sabton?
• Ano ang ginasimbulo sang aton bawtismo?
• Ano nga mga pagpakamaayo ang matigayon paagi sa pagdedikar sa Dios kag sa pagpabawtismo?
• Ngaa ang pagtuon tuhoy kay Jesus importante gid?
• Ano ang makabulig sa aton nga magpabilin sa pinakamaayo nga dalanon sang pagkabuhi?
[Mga Pamangkot sa Pagtinuon]
[Retrato sa pahina 25]
Ang imo bawtismo nagapakita nga ginpili mo ang pinakamaayo nga dalanon sang pagkabuhi
[Mga Retrato sa pahina 26]
Yara ka na bala sa “tagong duug”?
