SI Pascal, nga nagdaku sa imol nga lugar sa Côte d’Ivoire, nagahandum sing maayo nga kabuhi. Subong ama­teur nga boksingero, nagpamensar sia, ‘Diin ayhan ako maka­tsansa nga mangin bantog sa sports kag magmanggaranon?’ Sang mga 25 anyos sia, nakapamensar sia nga basi mangin bantog sia sa Europa. Pero bangod wala sia sing mga dokumento sa pagbiyahe, ilegal sia nga makadto didto.

Sang 1998, sa edad nga 27, nagsugod si Pascal sa iya pagbiyahe. Gintabok niya ang dulunan pa Ghana, nagbiyahe pakadto sa Togo kag Benin, kag sang ulihi nakalab-ot sia sa banwa sang Birni Nkonni sa Niger. Diri masugod ang pinakadelikado nga bahin sang iya pagbiyahe. Para makabiyahe pakadto sa aminhan, kinahanglan sia magsakay sa trak patabok sa Sahara Des­ert. Dayon pag-­abot sa Mediteraneo, masakay sia sa sakayan pakadto sa Europa. Amo ina ang iya plano, pero may duha ka butang nga natabo sa Niger nga nagpugong sa iya.

Una, naubusan sia sing kuarta. Ikaduha, nakilala niya si Noé, isa ka payunir nga nagtudlo sa iya parte sa Biblia. Natandog gid sia sa iya natun-an kag nagbag-o ang iya pagtamod sa kabuhi. Ang iya mga tulumuron sa materyal nabuslan sang espirituwal nga mga interes. Sang Disiembre 1999, nabawtismuhan si Pascal. Para ipakita ang iya pagpasalamat kay Jehova, sang 2001 nagpayunir sia sa Niger—sa banwa mismo diin natun-an niya ang kamatuoran. Ano ang iya ginabatyag sa iya pag-­ala­gad? Nagsiling sia, “Nahimo ko ang pinakamaayo nga butang sa akon kabuhi!”

Pareho kay Pascal, madamo ang nakarealisar nga ang pagtinguha sing espirituwal nga mga tulumuron nagaresulta sa mas malipayon nga kabuhi. Para malab-ot ina nga mga tulumuron, ang pila nagbiya sa Europa kag nagsaylo sa Aprika agod mag-­ala­gad sa mga lugar nga may daku nga kinahanglanon sang mga manugbantala. Ang matuod, mga 65 ka Saksi halin sa Europa—nga nagaedad sing 17 asta 70—ang nagsaylo agod magbulig sa mga pungsod sang Benin, Bur­ki­na Fa­so, ­Niger, kag Togo sa Katundan nga Aprika. * Ano ang nagpahulag sa ila nga magsaylo, kag ano ang resulta?

Si Anne-Rakel nga taga-­Den­mark nagsiling: “Ang akon mga ginikanan mga misyonero sadto sa Senegal. Pirme sila nagasugilanon sing malipayon parte sa pagmisyonero, amo nga gusto ko man sila ilugon.” Sang nagligad nga mga 15 ka tuig, sang mga beintehon pa lang si Anne-­Rakel, nagsaylo sia sa Togo kag nag-­ala­gad sa sign-­lan­guage nga kongregasyon. Paano napalig-on ang iban sa iya pagsaylo? Nagsiling sia: “Sang ulihi ang akon manghod nga babayi kag lalaki nagsunod sa akon sa Togo.”

Si Aurele, nga 70 anyos nga brother nga taga-­Pran­sia, nagsiling: “Sang nagligad nga lima ka tuig, sang nangin pensionado ako, may pililian ako: mangabuhi sing matawhay sa Pransia kag maghulat sang Paraiso ukon pasangkaron ang akon ministeryo.” Nagdesisyon si ­Aurele nga pasangkaron ang iya ministeryo. Sang nagligad nga mga tatlo ka tuig, sia kag ang iya asawa nga si Albert-­Fayette, nagsaylo sa Benin. “Ang pag-­ala­gad kay Jehova diri amo ang pinakamaayo nga butang nga amon nahimo,” siling ni ­Aurele. “Subong resulta,” siling niya nga nagayuhum, “may mga teritoryo kami sa higad sang dagat nga nagapahanumdom sa akon sang Paraiso.”

Si Clodomir kag ang iya asawa nga si Lysiane, nga taga-­Pran­sia, nagsaylo sa Benin, 16 ka tuig na ang nagligad. Sang primero, nahidlaw gid sila sa ila pamilya kag mga abyan sa Pransia, kag ginakulbaan sila nga basi indi nila masarangan ang ila bag-o nga kabuhi. Pero wala sila sing dapat kulbaan. Daku nga kalipay ang ila naeksperiensiahan. “Sa sulod sang 16 ka tuig,” siling ni ­Clodomir, “sa aberids, nakapribilehiyo kami sa pagbulig sing isa ka tawo kada tuig nga magbaton sang kamatuoran.”

Ang mag-asawa nga taga-­Pran­sia nga sanday Sé­bas­tien kag Johanna, nagsaylo sa Benin sang 2010. “Madamo sing hilikuton sa kongregasyon,” siling ni ­Sébastien. “Ang pag-­ala­gad diri daw pareho lang sa pagtambong sa isa ka ginpadasig nga teokratiko nga paghanas!” Kamusta naman sa ministeryo? Si ­Johanna nagsiling: “Ginauhaw ang mga tawo sa kamatuoran. Bisan wala kami nagabantala, ginaistorya nila kami sa dalan para mamangkot parte sa Biblia kag magkuha sang aton mga publikasyon.” Ano ang epekto sang ila pagsaylo sa ila pag-­asa­wa­hay? Si ­Sébastien nagsiling: “Nagpabakod ini sang amon pag-­asa­wa­hay. Makalilipay gid nga makaupod ang akon asawa sa ministeryo sa bilog nga adlaw.”

Si Eric kag ang iya asawa nga si Katy, nagapayunir sa aminhan sang Benin, sa diin diutay lang ang populasyon. Sang nagligad nga mga napulo ka tuig, sang nagaistar pa sila sa Pransia, nagabasa sila sing mga artikulo parte sa pag-­ala­gad sa mga lugar nga mas daku ang kinahanglanon kag nagasugilanon sa bug-os tion nga mga alagad. Bangod sini, napukaw ang ila handum nga mag-­ala­gad sa iban nga pungsod, nga ginhimo nila sang 2005. Dalayawon gid ang pag-­uswag nga ila nasaksihan. Si Eric nagsiling: “Sang nagligad nga duha ka tuig, ang amon grupo sa banwa sang Tan­guié­ta may 9 ka manugbantala, pero karon 30 na. Kon Domingo, mga 50 asta 80 ang nagatambong sa miting. Indi gid matupungan ang kalipay nga makita ini nga pag-­uswag!”

Ano ang mga kabudlayan sang mga nag-­ala­gad sa mas daku ang kinahanglanon? Si Benjamin, nga 33 anyos, utod nga lalaki ni Anne-­Rakel. Sang 2000, sa Denmark, nakilala niya ang isa ka misyonero nga nag-­ala­gad sa Togo. Si Benjamin nagsiling: “Sang ginsugiran ko ang misyonero nga gusto ko magpayunir, nagsiling sia: ‘Puede ka makapayunir sa Togo.’ ” Ginpamensaran ini ni Benjamin. Sia nagsiling: “Wala pa gani ako ­mag-20 anyos sadto, pero ang akon duha ka magulang nga babayi nagaalagad na sa Togo. Bangod sini, mas mahapos ang akon pagkadto didto.” Gani nagsaylo si Benjamin. Pero may kabudlayan sia. Si Benjamin nagpaathag: “Indi ako makahibalo mag-­French. Nabudlayan gid ako makigsugilanon sa una nga anom ka bulan.” Pero sang ulihi, nag-­uswag sia. Nagaalagad karon si Benjamin sa Bethel sa Benin, nga nagadul-ong sang mga literatura kag nagabulig sa computer department.

Sanday Eric kag Katy nga ginsambit kaina, nag-­ala­gad sa dumuluong sing lenguahe nga teritoryo sa Pransia antes nagsaylo sa Benin. Ano ang ila kahimtangan sa Katundan nga Aprika? Si Katy nagsiling: “Indi mahapos makakita sing maayo nga ilistaran. Sa sulod sang pila ka bulan, nag-­istar kami sa isa ka balay nga wala sing koryente kag gripo.” Si Eric nagsiling pa: “Mabaskog katama ang musika sang mga kaingod asta sa tungang gab-i. Kinahanglan gid ang pasensia kag ang kahanda nga makigbagay.” Nagsiling sila: “Balewala sa amon ang kabudlayan bangod sang kalipay sa pag-­ala­gad sa teritoryo nga halos wala nabantalaan.”

Ang mag-asawa nga sanday Michel kag Marie-­Agnès, nga mga 60 anyos na kag taga-­Pran­sia, nagsaylo sa Benin mga lima ka tuig na ang nagligad. Ginakulbaan sila sadto. Si ­Michel nagsiling: “Ang pila nagpaanggid sang amon pagsaylo sa isa ka tawo nga nagalatay sa lubid kag nagatulod sing wheelbarrow—kag kami ang nagasakay sa wheelbarrow! Mahadlok ka gid kon wala ka kabalo nga si Jehova ang nagatulod sini. Gani nagsaylo kami para kay Jehova kag kaupod ni Jehova.”

Para sa mga eksperiensiado sa pag-­ala­gad sa mas daku ang kinahanglanon importante gid ang paghanda paagi sa sini nga mga tikang: Magplano sing abanse. Magtuon sa pagpakigbagay. Magbadyet. Magsalig kay Jehova.—Luc. 14:28-30.

Si Sébastien, nga ginsambit kaina nagsiling: “Antes magsaylo, nagsupot kami ni Johanna sing kuarta sa sulod sang duha ka tuig paagi sa pagbuhin sang amon ginagasto sa kalingawan kag sa indi kinahanglanon nga mga butang.” Para makapadayon sa pag-­ala­gad sa iban nga pungsod, nagatrabaho sila sa Europa sing pila ka bulan kada tuig, kag dayon nagapayunir sa Benin sa nabilin nga mga bulan sang tuig.

Si Marie-Thérèse, isa sa mga 20 ka dalaga nga naghalin sa iban nga pungsod kag nagaalagad sa Katundan nga Aprika. Nagatrabaho sia subong drayber sang bus sa Pransia. Pero sang 2006, nagbakasyon sia sing isa ka tuig sa iya obra para magpayunir sa Niger. Wala madugay, narealisar niya nga amo sini nga kabuhi ang gusto niya. Si ­Marie-­Thérèse nagsiling: “Sang nakabalik ako sa Pransia, gin-­istor­ya ko ang akon amo nga luyag ko bag-­uhon ang akon iskedyul sa trabaho, kag nagpasugot sia. Sa karon, halin sa Mayo asta Agosto, nagadrayb ako sing bus sa Pransia, kag sugod sa Septiembre asta Abril, nagapayunir ako sa Ni­ger.”

Ang mga nagauna sa ‘pagpangita sang Ginharian’ makasalig nga iaman ni Jehova sa ila ‘ang tanan iban pa nga kinahanglanon nga mga butang.’ (Mat. 6:33) Sa paglaragway: Binagbinaga ang natabo kay Saphi­ra, isa ka dalaga nga taga-­Pran­sia nga mga 30 anyos na kag nagapayunir sa Benin. Sang 2011, nagbalik sia sa Pransia para makasupot sing kuarta nga magamit niya sa masunod nga tuig (ikan-om na niya) sa Aprika. Si Saphi­ra nagsiling: “Biernes sadto, katapusan nga adlaw ko sa trabaho, pero kinahanglan ko pa ang napulo ka adlaw nga trabaho para mangin bastante ang akon galastuhon sa masunod nga tuig. Duha na lang ka semana ang itener ko sa Pransia. Nangamuyo ako kay Jehova nga nagapaathag sang akon kahimtangan. Wala madugay sa tapos sini, gintawgan ako sang isa ka ahensia nga nagapangabay nga buslan ko sing duha ka semana ang isa ka trabahador.” Pagka-­Lunes, nagreport si Saphi­ra sa trabaho para mahanas sia sang iya pagabuslan. Sia nagsiling: “Nakibot gid ako sang nahibaluan ko nga isa gali sia ka sister nga kinahanglan magbakasyon sing napulo ka adlaw para makaeskwela sa Pioneer Service School! Indi magpasugot ang iya boss nga mabakasyon sia kon wala sing may magbulos sa iya. Nangamuyo sia kay Jehova sing bu­lig—pare­ho sa akon ginhimo.”

Ang pila ka utod madugay na nga nagaalagad sa Katundan nga Aprika kag nag-­istar na diri. Ang iban nagatener diri sing pila ka tuig kag dayon nagabalik sa ila pungsod. Pero bisan subong, nakabenepisyo sila sa ila tinuig nga pag-­ala­gad sa iban nga pungsod. Natun-an nila nga ang matuod nga kalipay nagahalin sa pag-­ala­gad kay Jehova.