Sang nagligad nga mga tinuig, ang aton publikasyon nagpaathag nga ang Gog sang Magog amo ang tawag kay Satanas nga Yawa sang gintagbong sia halin sa langit. Ini nga paathag nabase sa kamatuoran nga ang libro sang Bugna nagpakilala kay Satanas nga Yawa subong nagapanguna sa bug-os kalibutan nga pagsalakay sa katawhan sang Dios. (Bug. 12:1-17) Gani ginahunahuna sadto nga ang Gog isa pa ka matagnaon nga ngalan ni Satanas.

Pero ina nga paathag nagpautwas sang pila ka importante nga mga pamangkot. Ngaa? Binagbinaga ini: Nagapatuhoy sa tion nga nalutos si Gog, nagsiling si Jehova parte kay Gog: “Ipakaon ko ikaw sa tanan nga sahi sang pispis nga nagapangdagit kag sa mabangis nga mga sapat sa latagon.” (Ezeq. 39:4) Dayon si Jehova nagdugang: “Sa sina nga adlaw, hatagan ko si Gog sing lulubngan sa Israel . . . Didto ilubong nila si Gog kag ang tanan niya nga katawhan.” (Ezeq. 39:11) Pero paano ang espiritu nga tinuga pagakaunon sang “pispis nga nagapangdagit” kag sang “mabangis nga mga sapat sa latagon”? Paano hatagan si Satanas sing “lulubngan” sa duta? Maathag nga ginpakita sang Biblia nga si Satanas itagbong sa kadadalman sa sulod sang 1,000 ka tuig, kag indi sia pagkaunon ukon ilubong.—Bug. 20:1, 2.

Ginasugiran kita nga sa tapos sang 1,000 ka tuig, pagabuhian si Satanas sa kadadalman, “agod patalangon ang mga pungsod sa apat ka pamusod sang duta, ang Gog kag Magog, agod tipunon sila para sa inaway.” (Bug. 20:8) Pero paano mapatalang ni Satanas si Gog kon sia mismo si Gog? Gani, ang “Gog” sa tagna sa Ezequiel ukon sa libro sang Bugna wala nagapatuhoy kay Satanas.

Sin-o nian si Gog sang Magog? Para masabat ini, usisaon naton ang Kasulatan para mahibaluan ­naton kon sin-o ang magasalakay sa katawhan sang Dios. Ang Biblia nagasugid indi lang parte sa pagsalakay ni ‘Gog sang Magog’ kundi ang pagsalakay sang “hari sang aminhan” kag pagsalakay sang “mga hari sang duta.” (Ezeq. 38:2, 10-13; Dan. 11:40, 44, 45; Bug. 17:14; 19:19) Lainlain bala ini nga pagsalakay? Mahimo nga indi. Wala sing duhaduha nga ang ginatumod sang Biblia isa lang ka pagsalakay nga lainlain ang pagtawag. Ngaa makahinakop kita sing amo sini? Bangod ginasugiran kita sang Kasulatan nga ang tanan nga pungsod sa duta ­madalahig sa sining katapusan nga  pagsalakay kag nian magasugod ang Armageddon.—Bug. 16:14, 16.

Kon ipaanggid naton ang tanan nga reperensia sa Kasulatan parte sa katapusan nga pagsalakay sa katawhan sang Dios, nangin maathag nga ang ngalan nga Gog sang Magog nagapatuhoy, indi kay Satanas, kundi sa paghimbon sang mga pungsod. Ini bala nga paghimbon pangunahan sang malaragwayon nga “hari sang aminhan”? Indi naton ina mapat-od. Pero daw nagasibu ini sa ginsiling ni Jehova parte kay Gog: “Magaabot ka halin sa imo lugar, halin sa pinakamalayo nga mga bahin sang aminhan, ikaw kag ang madamo nga katawhan nga kaupod mo. Tanan sila nagasakay sa kabayo. Isa ka daku nga katilingban, madamo gid nga soldado.”—Ezeq. 38:6, 15.

Sing kaanggid, si manalagna Daniel, nga kadungan ni Ezequiel, nagsiling parte sa hari sang aminhan: “Ang mga balita halin sa sidlangan kag halin sa aminhan magatublag sa iya. Kag magapanalakay sia nga may daku nga kaakig agod papason kag laglagon ang madamo. Patindugon niya ang iya harianon nga tolda sa ulot sang daku nga dagat kag sang balaan nga bukid sang Matahom nga duta; kag magadangat sia sa iya katapusan, kag wala sing magabulig sa iya.” (Dan. 11:44, 45) Nagasibu gid ini sa ginsiling sa libro sang Ezequiel parte sa pagahimuon ni Gog.—Ezeq. 38:8-12, 16.

Ano ang masunod nga matabo bilang resulta sang katapusan nga pagsalakay? Ginasugiran kita ni Daniel: “Sina nga tion magahulag [sa Armageddon] si Miguel [si Jesucristo] nga gamhanan nga prinsipe nga nagatindog [sugod sang 1914] para sa imo katawhan. Magaabot ang tion sang kagamo [ang dakung kapipit-an] nga wala pa gid matabo halin sang gintukod ang mga pungsod. Sa sina nga tion maluwas ang tanan sa imo katawhan nga nasulat sa libro sang Dios.” (Dan. 12:1) Ini nga pagahimuon sang representante sang Dios nga si Jesus ginalaragway man sa Bugna 19:11-21.

Pero sin-o ang ginapatuhuyan nga “Gog kag Magog” sa Bugna 20:8? Sa tion sang katapusan nga pagtilaw sa katapusan sang 1,000 ka tuig, ang mga magarebelde kay Jehova magapakita sang handum sa pagpatay kaangay ni ‘Gog sang Magog,’ ang mga pungsod nga magasalakay sa katawhan sang Dios sa katapusan sang dakung kapipit-an. Kag ang madangatan sining duha ka grupo mangin pareho gid—dayon nga kamatayon! (Bug. 19:20, 21; 20:9) Gani nagakaigo gid nga ang tanan nga rebelde sa katapusan sang Milenyo pagatawgon nga “Gog kag Magog.”

Bilang maukod nga nagatuon sa Pulong sang Dios, nalangkag gid kita nga makita kon sin-o ang mangin “hari sang aminhan” sa malapit nga palaabuton. Pero bisan sin-o man ang manguna sa sini nga paghimbon sang mga pungsod, duha ka butang ang pat-od: (1) Si Gog sang Magog kag ang iya hangaway malutos kag pagalaglagon; kag (2) ang aton nagagahom nga Hari, si Jesucristo, magaluwas sa katawhan sang Dios kag pagatuytuyan sila padulong sa bag-ong kalibutan nga may paghidait kag matuod nga kalig-unan.—Bug. 7:14-17.