Ang Amay sang mga Ilo
Mangin Suod sa Dios
Ang Amay sang mga Ilo
ANG “amay sang mga ilo . . . amo ang Dios sa iya balaan nga puluy-an.” (Salmo 68:5) Ining makatalandog nga mga tinaga, may ginatudlo sa aton parte kay Jehova nga Dios. Nahibaluan niya ang mga kinahanglanon sang mga kubos. Ang iya kabalaka sa ilo nga kabataan makita sa Kasuguan nga ginhatag niya sa Israel. Usisaon naton ang una nga pagsambit sang Biblia sa “ilo nga bata,” nga mabasa sa Exodo 22:22-24.
Nagpaandam ang Dios: “Dili ninyo pagpapiotan ang bisan sin-o nga . . . ilo nga bata.” (Bersikulo 22) Indi lamang ini pangabay para buligan ang mga nailo, kundi sugo gid ini sang Dios. Kon mapatay ang amay sang isa ka bata, wala na sing magaamlig kag magaatipan sa iya. Gani mahapos lang sia abusuhan sang iban. Indi gid dapat “pagpapiotan” sa bisan ano nga paagi ang isa ka bata. Sa iban nga Biblia, ang tinaga nga “pagpapiotan” ginbadbad nga “pag-abuso,” “pagmaltratar,” kag “pagpamentaha.” Kon himuon ini sa isa ka ilo, isa ini ka mabug-at nga sala sa Dios. Daw ano ini ka serioso?
Ang Kasuguan nagpadayon: “Kon papiotan gid ninyo sila, kag magtuaw sila sa akon, sa pagkamatuud pamatian ko ang ila pagtuaw.” (Bersikulo 23) Sa orihinal nga teksto sa Hebreo gingamit ang tinaga nga “ninyo” sa bersikulo 22, pero sa bersikulo 23 gin-islan ini sing “mo.” Gani, ginapakita sa orihinal nga lenguahe nga ang kada isa kag ang bug-os nga pungsod pareho nga may salabton nga tumanon ini nga sugo sang Dios. Nagatan-aw si Jehova; ginapamatian niya ang mga ilo kag handa sia nga magbulig kon magpanawag sila.—Salmo 10:14; Hulubaton 23:10, 11.
Gani, ano ang matabo kon himuan sing malain ang isa ka ilo kag manawag sia sa Dios? “Magadabdab ang akon kasingkal,” siling ni Jehova, “kag patyon ko kamo sa espada.” (Bersikulo 24) Ang isa ka reperensia sa Biblia nagsiling nga “literal ini nga nagasiling ‘kag magaaso ang akon ilong,’ nga nagapakita sing grabe nga kaakig.” Talupangda nga wala gintugyan ni Jehova sa mga hukom sa Israel ang pagpatuman sini nga kasuguan. Ang Dios mismo ang magahukom sa kay bisan sin-o nga maghimo sing malain sa isa ka wala sing padaug nga bata.—Deuteronomio 10:17, 18.
Wala nagabag-o si Jehova. (Malaquias 3:6) Naluoy gid sia sa ilo nga mga bata. (Santiago 1:27) Indi ka magsala. Naakig gid ang Amay sang mga ilo sa nagapangbiktima sang inosente nga mga bata. Ang mga nagahimo sing malain sa wala sing mahimo nga bata indi makaluwas sa “mapintas nga kaakig sang GINOO.” (Sofonias 2:2) Makita sinang mga malaut nga “makahaladlok ang mahulog sa mga kamot sang buhi nga Dios.”—Hebreo 10:31.
