Paano Mo Maintiendihan ang Biblia?

1. Mangamuyo sa Dios nga Buligan Ka

“May tion nga ginabasa ko gid ang Biblia antes magtulog,” siling ni Ninfa, nga taga-Italya. “Ginhimo ko ini kay para sa akon ang Biblia, Pulong sang Dios. Bisan pa daw wala gid ako nanamian magbasa, gusto ko mahibaluan kon ano ang ginasiling sang Dios. Gintinguhaan ko gid nga basahon ang bug-os nga Biblia. Sang primero daw kahapos lang, pero sang nakalab-ot na ako sa bahin nga mabudlay intiendihon, gin-untatan ko ini basa.”

KAANGAY man bala kay Ninfa ang imo pagtamod sa Biblia? Amo sini ang pagtamod sang madamo nga tawo. Pero, ginpaathag sang nagligad nga artikulo nga luyag sang Awtor sang Biblia nga si Jehova nga Dios nga maintiendihan mo ang iya Pulong. Ano ang makabulig sa imo? Una, magpabulig sa Dios.

Ang mga apostoles ni Jesus ginkabig anay nga “wala sing tinun-an kag kinaandan lamang” kay wala sila mahanas sa rabiniko nga mga eskwelahan nga nagatudlo parte sa relihion. (Binuhatan 4:13) Pero, ginpasalig sila ni Jesus nga mahimo nila maintiendihan ang Pulong sang Dios. Paano? Si Jesus nagsiling: “Ang manugbulig, ang balaan nga espiritu, nga ipadala sang Amay sa akon ngalan, ini magatudlo sa inyo sang tanan nga butang.” (Juan 14:26) Gingamit sang Dios ang iya balaan nga espiritu ukon aktibo nga puersa sang gintuga niya ang duta kag ang tanan nga buhi  nga butang. (Genesis 1:2) Paagi man sini, gingiyahan sang Dios ang 40 ka manunulat nga isulat ang Iya mga panghunahuna sa Biblia. (2 Pedro 1:20, 21) Ina nga espiritu makabulig man sa mga tawo nga nagatinguha nga maintiendihan ang Biblia.

Paano mo matigayon ang balaan nga espiritu sang Dios? Dapat padayon mo ini nga pangayuon nga may pagtuo. “Padayon sa pagpangayo, kag hatagan kamo,” siling ni Jesus. “Kon . . . kamo makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!” (Lucas 11:9, 13) Handa si Jehova maghatag sing balaan nga espiritu sa mga sinsero nga nagapangabay sini. Amo ini ang magabulig sa imo nga maintiendihan ang kahulugan sang pinamulong sang Dios nga ginsulat linibo ka tuig na ang nagligad. Ang espiritu sang Dios makahatag man sa imo sing kaalam kon paano sundon ang gamhanan nga mensahe sang Biblia sa imo kabuhi.—Hebreo 4:12; Santiago 1:5, 6.

Gani, kada magbasa ka sing Biblia, mangamuyo sa Dios nga hatagan ka sing balaan nga espiritu para maintiendihan mo ang iya Pulong.