Pamangkot sang mga Bumalasa

Pabor Bala ang Dios sa Pagpangasawa sing Madamo?

Indi. Ang talaksan nga ginpasad sang Dios sa Eden sa una nga mag-asawa amo nga magpangasawa sing isa lang. Ini nga talaksan ginpahibalo liwat ni Jesucristo sa iya mga sumulunod.—Genesis 2:18-24; Mateo 19:4-6.

Pero, indi bala nga sanday Abraham, Jacob, David, kag Solomon may madamo nga asawa sang una? Huo, pero ano ang ginsiling sang Biblia parte sini? Ginpakita nga may natabo nga kagamo sa pamilya ni Abraham kag subong man sa pamilya ni Jacob bangod sini nga buhat. (Genesis 16:1-4; 29:18–30:24) Sang ulihi, ginpatuman sang Kasuguan sang Dios sa tagsa ka hari ini nga sugo: “Dili sia magpadamu . . . sing mga asawa, agud nga indi magpahilayo ang iya tagiposoon.” (Deuteronomio 17:15, 17) Wala ini ginsunod ni Solomon, sa baylo naglab-ot sing kapin sa 700 ang iya asawa! Gani, ang tagipusuon ni Solomon napahilayo kay Jehova bangod sang malain nga impluwensia sang iya madamo nga asawa. (1 Hari 11:1-4) Maathag gid nga ginapakita sang Biblia nga may malain nga resulta ang pagpangasawa sing madamo.

Pero, madamo gihapon ang nagapamangkot kon ngaa gintugutan sang Dios ang iya katawhan sang una nga magpangasawa sing madamo. Bilang halimbawa, binagbinaga ini: Natilawan mo na bala nga agwantahon ang isa ka trabaho nga wala mo magustuhan kay nahunahuna mo nga alang-alang pa kag indi makapaayo sa imo pamilya kon mag-resign ka kag mangita sang iban nga trabaho? Siempre, mas mataas sangsa aton ang mga dalanon kag mga panghunahuna sang Dios. (Isaias 55:8, 9) Pero, mahangpan naton ang pila ka praktikal nga rason kon ngaa gintugutan niya sadto ang pagpangasawa sing madamo.

Dumduma ang natabo sa Eden. Si Jehova nagsaad sing isa ka “binhi” nga amo gid ang magalaglag kay Satanas. Sang ulihi, ginsilingan si Abraham nga mangin amay sia sang isa ka daku nga pungsod kag ang palaabuton nga Binhi magahalin sa iya kaliwatan. (Genesis 3:15; 22:18) Determinado gid si Satanas nga punggan ang pag-abot sang Binhi. Amo nga gintinguhaan niya nga laglagon ang dumaan nga pungsod sang Israel. Pirme niya ginsulay ang mga Israelinhon nga magpakasala para madula nila ang pabor kag pag-amlig sang Dios.

Para maamligan ang mga Israelinhon sa pag-atake ni Satanas, sulitsulit nga ginpadala ni Jehova ang iya mga propeta para paandaman ang iya katawhan kon nagalisa sila sa mga sugo sang Dios. Pero nahibaluan na niya nga mahimo pirme mapaslawan ang iya katawhan sa pagsunod sang iya mga sugo, bisan pa sa panguna nga mga sugo pareho sang paglikaw sa pagsimba sa mga idolo. (Exodo 32:9) Kon nabudlayan sila magsunod sa panguna nga mga sugo, ano pa gid ayhan kon dumilian sila nga magpangasawa sing madamo? Bangod nahangpan gid ni Jehova sing bug-os ang kinaiya sang tawo, nakahibalo sia nga indi pa yadto ang tion nga dumilian ini nga buhat, nga nangin kinaandan na sadto. Kon gindumili niya ini sadto, mahimo nga mahapos gid para kay Satanas nga sulayon ang mga Israelinhon nga supakon ini nga sugo.

Ang temporaryo nga pagtugot sang Dios sa pagpangasawa sing madamo may dugang pa nga mga bentaha. Paagi sini, madasig nga nagdaku ang pungsod. Nakabulig gid ang daku nga populasyon para indi madula ang pungsod asta mag-abot ang Mesias. Ang pagpangasawa sing madamo mahimo nakahatag man sing proteksion sa pila ka babayi, kay sa delikado nga mga kahimtangan may puluy-an sila kag panimalay nga nagaamlig sa ila.

Dumduma nga wala ginsugo ni Jehova ang pagpangasawa sing madamo. Gintugutan niya ini sa limitado lamang nga tion. Pero may mga kasuguan sia para indi ini pag-abusuhan. (Exodo 21:10, 11; Deuteronomio 21:15-17) Sang gindumilian na ni Jehova ang iya mga sumilimba nga magpangasawa sing madamo, gingamit niya ang iya Anak para ipahibalo liwat ang talaksan sa pag-asawahay nga Iya ginpahamtang sa Eden. Amo nga gindumili na ni Jesus ini nga buhat sa iya mga sumulunod. (Marcos 10:8) Gani, nangin maathag pa gid ini nga kamatuoran: Ang Kasuguan ni Moises maayo sadto nga tion, pero mas maayo pa gid “ang kasuguan ni Cristo.”—Galacia 6:2.