Ang Dios Nagahukom Suno sa Kon Ano ang Matarong
Mangin Suod sa Dios
Ang Dios Nagahukom Suno sa Kon Ano ang Matarong
ANG mga tawo nga hukom mahimo maghatag sing indi makatarunganon ukon sobra kabug-at nga sentensia, pero indi gid amo sina si Jehova nga Dios kay ‘ginahigugma niya ang katarungan.’ (Salmo 37:28) Mapailubon sia pero indi kunsintidor. Nagahukom sia suno sa kon ano ang matarong. Binagbinaga ang ginhimo niya sang may natabo nga inaway kag rebelyon, nga narekord sa Numeros kapitulo 20.
Sang madali na lang matapos ang ila paglakbay sa kamingawan, ginkulang sing tubig ang mga Israelinhon. * Gin-away sang mga Israelinhon sanday Moises kag Aaron, nga nagasiling: “Ngaa bala nga gindala ninyo ang katilingban sang GINOO sa sining kamingawan, agud nga mapatay kami diri, kami kag ang amon kasapatan?” (Bersikulo 4) Nagreklamo sila nga ang kamingawan isa ka “malaut nga duug” nga “wala sing tubig nga imnon” nga wala sing “higos, ukon sang mga balagon sang uvas” nga amo gid ang mga prutas nga dala sadto sang mga espiya halin sa Ginsaad nga Duta. (Bersikulo 5; Numeros 13:23) Ginbasol nila sanday Moises kag Aaron kay ang kamingawan indi pareho sa mabungahon nga lugar nga dapat sudlan sang nagligad nga henerasyon sang mga Israelinhon, pero wala sila makasulod bangod nagkumod man sila!
Wala gihapon pagsikwaya ni Jehova ang nagkumod nga katawhan. Sa baylo, ginsugo niya si Moises nga himuon ang tatlo ka butang: dalhon ang iya sungkod, tipunon ang mga tawo, kag “hambalon ang igang sa atubangan sang mga mata nila nga maghatag ini sang iya tubig.” (Bersikulo 8) Gintuman ni Moises ang nahauna nga duha ka sugo, apang wala niya matuman ang ikatlo. Sa baylo nga ipakita ang iya pagtuo kay Jehova paagi sa paghambal sa igang, gin-akigan niya ang katawhan, nga nagasiling: “Pamati karon, kamo nga mga mabinatoon; pagowaan bala namon kamo sing tubig gikan sining igang?” (Bersikulo 10; Salmo 106:32, 33) Dayon, ginbunal ni Moises ang igang sing makaduha, “kag naggowa sing bugana ang tubig.”—Bersikulo 11.
Gani, nakahimo sing mabug-at nga sala si Moises kag si Aaron. “Nagmalalison kamo sa akon polong,” siling sang Dios sa ila. (Numeros 20:24) Bangod ginlalis nila ang sugo sang Dios sa sini nga tion, ginhimo nanday Moises kag Aaron ang butang nga ginpabangod nila sa katawhan. Nangin mga rebelde sila. Maathag ang paghukom sang Dios: Indi sanday Moises kag Aaron ang magapanguna sa pagsulod sang mga Israelinhon sa Ginsaad nga Duta. Sobra bala kabug-at ini nga pamatbat? Indi, kon binagbinagon naton ang pila ka rason.
Una, wala ginsugo sang Dios si Moises nga makighambal sa katawhan, ukon hukman sila subong mga rebelde. Ikaduha, wala gindayaw nanday Moises kag Aaron ang Dios. ‘Wala kamo magpakabalaan sa akon,’ siling sang Dios. (Bersikulo 12)Sa pagsiling nga “pagowaan bala namon kamo sing tubig,” naghambal si Moises nga daw subong bala nga sila ni Aaron kag indi ang Dios ang nagpagua sang milagruso nga tubig. Ikatlo, ini nga pamatbat pareho gid sa nagligad nga mga paghukom sang Dios. Wala ginpasulod sang Dios sa Canaan ang nauna nga henerasyon sang mga rebelde, gani amo man sini ang iya ginhimo kanday Moises kag Aaron. (Numeros 14:22, 23) Ikap-at, sanday Moises kag Aaron ang mga lider sang mga Israelinhon. Ang ginsaligan sang mabug-at nga responsibilidad, may daku man nga salabton sa Dios.—Lucas 12:48.
Si Jehova nagahukom suno sa kon ano ang matarong. Bangod ginahigugma niya ang katarungan, indi sia maghatag sing di-matarong nga pamatbat. Maathag nga isa sia ka Hukom nga dapat gid naton saligan kag tahuron.
[Nota]
^ par. 2 Sang makagua sila sa Egipto, handa na ang mga Israelinhon nga magsulod sa Canaan, ang duta nga ginsaad sang Dios kay Abraham. Pero bangod malain ang dala nga balita sang napulo ka espiya, ang mga tawo nagkumod batok kay Moises. Gani, nagsugo si Jehova nga magatener sila sing 40 ka tuig sa kamingawan. Bastante na ini nga tion tubtob nga mapatay ining rebelyuso nga henerasyon.
