MAY kaayuhan bala ang pangamuyo? Suno sa Biblia, nakabulig gid ini sa matutom nga mga sumilimba sang Dios. (Lucas 22:40; Santiago 5:13) Bisan subong, importante gid ini para magsuod kita sa Dios. Makabulig man ini sa aton emosyon kag panglawas. Paano?

Halimbawa, ibutang ta nga may bata ka, kag nakabaton sia sing regalo. Hambalon mo lang bala sia nga dapat sia malipay kay ginregaluhan sia? Ukon tudluan mo sia nga ipabutyag ang iya pagpasalamat? Siempre, mas daku ang epekto kon ihambal naton ang aton ginabatyag. Amo man sini kon nagaistorya kita sa Dios. Ari ang pila ka halimbawa.

Pangamuyo para magpasalamat. Kon ginapasalamatan naton ang Dios sa maayo nga mga butang nga aton nabaton, mas maapresyar naton ang iya pagpakamaayo. Gani, mangin mas mapinasalamaton, malipayon, kag positibo kita.—Filipos 4:6.

Halimbawa: Nagpasalamat si Jesus sa iya Amay kay ginpamatian kag ginsabat ang iya mga pangamuyo.—Juan 11:41.

Pangamuyo para mapatawad. Kon nagapangayo kita sing patawad sa Dios, mas matinlo ang aton konsiensia, mas matuod ang aton paghinulsol, kag mas marealisar naton kon daw ano ka bug-at ang aton sala. Nagamag-an man ang aton pamatyag.

Halimbawa: Nangamuyo si David para ipabutyag ang iya paghinulsol kag kasubo.—Salmo 51.

Pangamuyo para mangayo sing giya kag kaalam. Dapat kita mangabay kay Jehova nga giyahan niya kita kag hatagan sing kaalam para makadesisyon sing eksakto. Makabulig ini sa aton nga mangin mapainubuson. Ginapahanumdom kita sini nga may indi kita masarangan kag dapat kita magsalig sa aton Amay sa langit.—Hulubaton 3:5, 6.

Halimbawa: Mapainubuson nga nangayo si Solomon sing giya kag kaalam sa paggahom sa Israel.—1 Hari 3:5-12.

Pangamuyo kon ginasubuan. Kon ipabutyag naton sa Dios ang aton grabe nga kasubo, magamag-an ang aton pamatyag kag matun-an naton nga magsalig kay Jehova imbes nga sa aton kaugalingon.—Salmo 62:8.

Halimbawa: Nangamuyo si Hari Asa sang may makatalagam sia nga kaaway.—2 Cronica 14:11.

Pangamuyo para sa iban. Makabulig ini para indi lang ang aton kaugalingon ang aton pensaron, kundi ulikdan man naton kag intiendihon ang iban.

Halimbawa: Nangamuyo si Jesus para sa iya mga sumulunod.—Juan 17:9-17.

Pangamuyo para dayawon ang Dios. Kon ginadayaw naton si Jehova bangod sa iya matahom nga mga tinuga kag mga kinaiya, nagadugang ang aton pagrespeto kag apresasyon sa iya. Gani magasuod pa gid kita sa aton Dios kag Amay.

Halimbawa: Malipayon nga gindayaw ni David ang Dios bangod sa iya mga tinuga.—Salmo 8.

Ang isa pa ka kaayuhan sang pangamuyo amo “ang paghidait sang Dios nga nagalabaw sa tanan nga panghunahuna.” (Filipos 4:7) Kaayuhan gid ini kay ang kalinong talagsa na lang sa sining magamo nga kalibutan. Maayo man ini sa panglawas. (Hulubaton 14:30) Pero may mas importante pa bala sangsa aton pagtinguha para sabton ang aton pangamuyo?