Ang Ninive amo ang kapital sang Emperyo sang Asiria. Gamhanan ini nga siudad nga may matahom nga mga palasyo kag templo, masangkad nga mga dalan, kag matag-as nga mga pader. Ginpatuhuyan ini sang Hebreo nga propeta nga si Nahum nga “banwa nga madugo.”—Nahum 3:1.

Nagakaigo ini nga paglaragway bangod ginapamatud-an sang mga iskultura halin sa palasyo ni Senaquerib sa Ninive ang kapintas sang mga taga-Asiria. Ang isa ka laragway nagapakita sang isa ka manugpaantos nga nagabugnot sang dila sang isa ka priso samtang ginapunggan sia sang isa pa sa duta. Ginapakita man sang mga sinulatan nga ang mga bihag ginabutangan sang kaw-it sa ilong ukon bibig kag ginaguyod. Ginapakulintas sa nabihag nga mga opisyal ang ulo sang ila mga hari.

Ginlaragway sang assyriologist nga si Archibald Henry Sayce ang kapintas nga maagyan sang mga bihag sa isa ka banwa: “Ginatumpok sang mandadaug ang mga ulo sang mga nalutos niya; ang mga bata nga lalaki kag babayi ginasunog nga buhi ukon mas malain pa ang madangatan; ang mga lalaki ginalansang, ginapanitan nga buhi, ginabulag, ukon ginautdan sang kamot kag tiil, ukon dulunggan kag ilong.”

Ang mga Judiyo ginsugo sang Dios: “Kon nagapatindug ka sing bag-o nga balay, maghimo ka sing alubaybay sa imo alibungan, agud nga indi ka magdala sing dugo sa imo balay, kon ang bisan sin-o nga tawo maholog gikan didto.” (Deuteronomio 22:8) Kinahanglan ini bangod ginagamit pirme sang mga Judiyo sang panahon sang Biblia ang ila atop.

Matapan ang atop sang kalabanan nga balay sang mga Israelinhon. Ang atop maayo gid nga lugar para magpainit-init, magpahangin, ukon maghimo sang mga ulubrahon sa balay. Kon tig-ilinit, maayo ini tulugan. (1 Samuel 9:26) Ginabularan ini sang mangunguma sang ila mga uyas, igos, kag ubas.—Josue 2:6.

Ang atop ginagamit man sa pagsimba, matuod man ukon butig. (Nehemias 8:16-18; Jeremias 19:13) Si apostol Pedro nagsaka sa atop sang udto para mangamuyo. (Binuhatan 10:9-16) Kon nahandungan sang mga balagon ukon mga dahon sang palma ang atop, maayo ini nga pahuwayan.

Ang libro nga The Land and the Book nagasiling nga ang balay sang mga Israelinhon may hagdanan pasaka sa atop, “sa gua sang balay, pero sa sulod gihapon sang ugsaran.” Gani ang tagbalay puede makapanaug halin sa atop nga indi na mag-agi sa sulod sang balay. Gani, sang nagpaandam si Jesus nga malagyo gilayon sa siudad nga malapit na laglagon, nagsiling sia: “Ang tawo nga yara sa atop sang balay indi magpanaug sa pagkuha sing mga butang sa iya balay.”—Mateo 24:17.