Nanamian gid ako sang matahom nga mga talan-awon sugod sang bata pa ako. Pirme nagalagaw ang amon pamilya sa mga kagulangan kag linaw nga nagapalibot sa amon banwa sang Jyväskylä, sa Central Finland. Nanamian man ako sa mga sapat. Sang bata pa ako, gusto ko hakson ang kada ido kag kuring nga akon makita! Samtang nagadaku ako, nabalaka gid ako nga pirme ginaabusuhan ang mga sapat. Sang ulihi, nag-entra ako sa isa ka organisasyon nga nagapakigbato sa kinamatarong sang mga sapat, diin nakilala ko ang mga tawo nga pareho man sa akon.

Aktibo kami nga nagakampanya para sa mga kinamatarong sang sapat. Nagpanagtag kami sang impormasyon kag nagaprotesta batok sa mga nagahimo sang bayo nga halin sa panit sang sapat kag mga laboratoryo nga nagagamit sang sapat para testingan ang ila produkto. Nagporma pa gani kami sang bag-o nga organisasyon nga nagaamlig sa mga sapat. Bangod nagabato kami sa mga awtoridad para matuman ang amon ginapakigbato, pirme lang kami nagakadalahig sa gamo. Makapila ako gin-aresto kag gindala sa korte.

Indi lamang ang pag-ulikid sa mga sapat ang akon ginaproblema, kundi ang iban pa nga problema sa kalibutan. Sang ulihi, nag-entra ako sa pila ka organisasyon, lakip sa Amnesty International kag Greenpeace. Ginhimo ko ang akon tanan nga masarangan para suportahan ang ila mga hilikuton. Ginpakigbato ko ang kinamatarong sang mga pigado, mga ginagutom, kag mga kubos.

Pero sang ulihi, narealisar ko nga indi ko mabag-o ang kalibutan. Bisan pa mahatagan sing solusyon sang mga organisasyon ang pila ka magagmay nga problema, ang mga dalagku nga problema daw nagalala pa gid. Daw pareho bala nga apektado sang malaut ang bilog nga kalibutan kag wala sing labot ang bisan sin-o sa sini. Daw wala ako sang mahimo.

Bangod ginsubuan ako kay daw wala ako sing mahimo, napensaran ko ang parte sa Dios kag sa Biblia. Nagtuon na ako  anay sa Biblia upod sa mga Saksi ni Jehova. Bisan pa naapresyar ko ang kaayo sang mga Saksi, indi pa ako handa nga bag-uhon ang akon pagkabuhi. Pero sini nga tion, handa na ako.

Ginbasa ko ang akon Biblia. Daw pareho lang nga nabulong ang akon mga pilas. Natalupangdan ko ang madamo nga teksto sa Biblia nga nagatudlo sa aton nga dapat atipanon sing maayo ang mga sapat. Halimbawa, ang Hulubaton 12:10 nagasiling nga “ang matarung nga tawo nagapakamahal sang kabuhi sang iya sapat.” Nahangpan ko man nga indi ang Dios ang kabangdanan sang problema sang kalibutan. Kundi, nagalala ang aton problema bangod madamo nga tawo ang wala nagasunod sa iya. Nagdayaw gid ako sang natun-an ko ang pagkamahigugmaon kag pagkamapinasensiahon ni Jehova.—Salmo 103:8-14.

Nakakita ako sang kupon para sa libro nga Ano Gid ang Ginatudlo sang Biblia? kag ginpadala ko ini. Wala magdugay, ginbisitahan ako sang mag-asawa nga Saksi kag gintanyagan nga magtuon sa Biblia. Ginbaton ko ini. Nagtambong man ako sa Cristianong mga miting sa Kingdom Hall. Bilang resulta, nanggamot ang kamatuoran sa Biblia sa akon tagipusuon.

Bangod sa Biblia, madamo ako sing nahimo nga pagbag-o. Nauntatan ko ang pagpanigarilyo kag sobra nga pag-inom. Matinlo na ako tulukon kag indi na paras maghambal. Kag ginbag-o ko ang akon pagtamod sa mga may awtoridad. (Roma 13:1) Ginbiyaan ko man ang akon imoral nga pagkabuhi, ang bahin sang akon kabuhi nga wala ako sing pagpugong.

Ang pinakamabudlay nga pagbag-o para sa akon amo ang akon pagtamod sa mga organisasyon nga gin-entrahan ko sang una. Indi ini mahapos. Sang primero, nagbatyag ako nga pareho lang nga gintraidor ko ini nga mga organisasyon kon mag-untat ako. Pero, narealisar ko nga Ginharian sang Dios ang lamang paglaum para sa aton kalibutan. Nagdesisyon ako nga suportahan sing bug-os ini nga Ginharian kag buligan ang iban nga makatuon parte sa sini.—Mateo 6:33.

Bilang aktibista, duha lang ka sahi ang tawo—maayo ukon malain—kag handa ako nga batuan ang mga tawo nga ginakabig ko nga malain. Pero bangod sa Biblia, wala ko na ginadumtan ang iban. Sa baylo, ginatinguhaan ko nga ipakita ang Cristiano nga gugma sa tanan nga tawo. (Mateo 5:44) Ang isa ka paagi nga mapakita ko ini nga gugma amo ang pagbantala sing maayong balita sang Ginharian sang Dios. Nalipay ako nga makita kon paano ini nga hilikuton nagapasanyog sang paghidait kag kalipay. Nagahatag man ini sa mga tawo sang matuod nga paglaum.

Natigayon ko man ang kalinong sa hunahuna paagi sa pagtugyan kay Jehova sang tanan. Kumbinsido ako nga sia, bilang Manunuga, indi magtugot nga abusuhan ang mga sapat kag tawo tubtob san-o ukon magtugot nga maguba ang aton matahom nga duta. Kundi, paagi sa iya Ginharian, solusyonan niya ang tanan nga problema sa indi madugay. (Isaias 11:1-9) Nagapahalipay sa akon indi lamang nga mahibaluan ini nga mga kamatuoran, kundi amo man ang pagbulig sa iban nga magtuo sa sini. Indi ko na kinahanglan bag-uhon pa ang kalibutan.