Isa ka adlaw sa Jerusalem, nagawali si Jesus parte sa iya Amay nga si Jehova, kag ginabuyagyag niya ang kamatuoran parte sa butig nga mga lider sang relihion sadto. (Juan 8:12-30) Ining iya ginsiling makatudlo sa aton kon paano usisaon ang bantog nga pagpati parte sa Dios subong. “Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.”—Juan 8:31, 32.

“Magpabilin kamo sa akon pulong.” Gintudlo diri ni Jesus ang talaksan kon bala ang mga panudlo sang relihion amo ang “kamatuoran.” Kon makabati ka sang panudlo parte sa Dios, pamangkuta ang imo kaugalingon, ‘Nahisuno bala ini sa ginsiling ni Jesus kag sang bug-os nga Balaan nga Kasulatan?’ Iluga ang mga namati kay apostol Pablo kag ang mga ‘nag-usisa sing maayo sang Kasulatan sa adlaw-adlaw kon bala matuod gid ang mga butang’ nga ila natun-an.—Binuhatan 17:11.

Sanday Marco, Rosa, kag Raymonde, nga ginsambit kaina, nag-usisa sing maayo sang ila ginapatihan paagi sa pagtuon sang Biblia sa mga Saksi ni Jehova. Ano ang natun-an nila?

Marco: “Ang nagtudlo sa amon sa Biblia naggamit sang Kasulatan para sabton ang kada pamangkot namon nga mag-asawa. Nagdugang pa gid ang amon gugma kay Jehova, kag nangin mas suod man kami sang akon asawa.”

Rosa: “Sang una, abi ko ang Biblia isa lang ka libro sang pilosopiya sang tawo nga nagapaathag parte sa Dios. Pero sang ulihi, narealisar ko nga ginasabat sang Biblia ang akon mga pamangkot. Subong, matuod na gid si Jehova sa akon. Masaligan ko gid Sia.”

Raymonde: “Nagpangamuyo ako sa Dios nga buligan niya ako nga makilala sia. Wala madugay, nagtuon kami sang akon bana sa Biblia. Kag natun-an namon ang kamatuoran parte kay Jehova! Nalipay gid kami nga mahibaluan kon ano sia nga sahi sang Dios.”

Wala lamang ginabuyagyag sang Biblia ang mga kabutigan parte sa Dios, ginasugid man sini ang kamatuoran parte sa iya maayo nga mga kinaiya. Amo ini ang iya inspirado nga Pulong, kag nagabulig ini nga “mahibaluan naton ang mga butang nga mainayuhon nga ginhatag sang Dios sa aton.” (1 Corinto 2:12) Palihug hibalua kon paano ginasabat sang Biblia ang kinaandan pero importante nga mga pamangkot parte sa Dios, sa iya katuyuan, kag sa aton palaabuton. Basaha ang mga sabat sa sini nga mga pamangkot sa “Panudlo sang Biblia > Sabat sa mga Pamangkot sa Biblia” sa www.mr1310.com/hil. Makapangabay ka man sang pagtuon sa Biblia sa sina nga Web site ukon sa isa sang mga Saksi ni Jehova. Makasalig ka nga kon himuon mo ini, marealisar mo nga ang Dios indi mabudlay higugmaon.