TOPIKO SA KOBER | MAY NAKAHIBALO BALA SANG PALAABUTON?
Nagmadinalag-on ang Iban, Pero Madamo ang Napaslawan
Luyag mo bala mahibaluan ang imo palaabuton? Madamo gid ang luyag nga himuon ini. Madamo ang nagapakot sang palaabuton, nga sa masami may lainlain nga resulta. Binagbinaga ang masunod:
ANG MGA SIENTIPIKO nagagamit sang malahalon nga mga kagamitan kag nagagasto sing daku para hibaluon ang nagkalainlain nga butang, pareho sang mangin epekto sang polusyon sa duta sa ulihi kag kon bala maulan sa inyo lugar buas.
ANG MGA PROFESSIONAL ANALYST nagapakot kon ano ang maayo nga negosyo kag maayo nga paagi sa paggahom. Si Warren Buffett, isa sa pinakamanggaranon nga tawo sa kalibutan, makapakot sang maayo nga mga negosyo sing sibu gid amo nga ang iban nagatawag sa iya nga manugpakot ukon manalagna. Ang isa pa ka analyst nga si Nate Silver, nagtuon sa mga estadistika para mapaktan niya ang tanan halin sa pulitika sa U.S. asta sa padya sang mga pelikula sa Hollywood.
ANG DUMAAN NGA MGA IMPORMASYON ginapatihan nga mga tagna. Nakita sang iban ang katumanan sang indi maathag nga sinulatan ni Michel de Notredame (Nostradamus) sang ika-16 nga siglo. Ang kalendaryo sang mga Maya nga natapos sang Disiembre 21, 2012, ginapatihan sang iban nga palatandaan sang malain nga mga hitabo.
ANG RELIHIOSO NGA MGA LIDER kon kaisa nagapakot sang malain nga mga hitabo sa bilog nga kalibutan agod paandaman ang katawhan kag tipunon ang ila mga sakop. Ginpahibalo sang isa ka relihioso nga lider nga si Harold Camping kag sang iya mga sumulunod nga ang duta maguba sa 2011. Pero, ari gihapon ang kalibutan.
ANG MGA PSYCHIC nagapangangkon nga may pinasahi sila nga ikasarang nga mahibaluan ang palaabuton. Napaktan nanday Edgar Cayce kag Jeane Dixon ang pila ka hitabo sang ika-20 nga siglo. Pero mas madamo ang wala nila mapaktan. Halimbawa, nagsiling si Dixon nga matabo ang Bug-os Kalibutan nga Inaway III sang 1958, kag si Cayce naman nagsiling nga masalop ang New York sa dagat sang tungatunga sang katuigan 1970.
May masaligan gid bala nga paagi agod mahibaluan ang palaabuton? Importante gid nga mahibaluan ang sabat sa sini. Kon mahibaluan mo ang matabo sa palaabuton, makaapektar gid ini sa imo kabuhi kag sa imo mga desisyon.
