Dayon nag-entra ako sa gymnastics kag bodybuilding. Sang ulihi, nagbukas ako sang gym sa San Leandro, California, U.S.A., kag naghanas upod sa mga bodybuilder nga ang isa sa ila nangin Mr. America. Pero wala gihapon ako nalipay bisan maskulado na ako.

Nahibaluan sang akon amigo sa gym nga gusto ko gid mahangpan ang Biblia amo nga nagpanugda sia nga istoryahon ko ang iya kilala. Pagkaaga, nagkadto sa balay ang isa ka Saksi ni Jehova. Ginsabat niya base sa Biblia ang akon mga pamangkot kag nalab-utan kami sing apat ka oras. Ginsilingan ko sia nga mabalik pagkagab-i, kag ginbinagbinag namon ang Biblia asta magtungang-gab-i. Nalipay gid ako sa akon natun-an kag ginpangabay ko sia kon puede ako makaupod sa iya pagkadason nga adlaw para mahibaluan ko kon paano sia magbantala. Nagdayaw gid ako sa iya paggamit sang Biblia sa pagsabat sa mga pamangkot. Gani, nagdesisyon ako nga himuon man ini!

Ginbaligya ko ang akon gym kag nag-upod ako sa sini nga payunir, nga amo ang tawag sa mga Saksi ni Jehova nga nagahinguyang sing madamo nga tion sa ministeryo. Sang Mayo 1948, ginbawtismuhan ako sa kombension sa Cow Palace Arena sa San Francisco, California. Sa sina man nga tuig, nagpayunir ako.

Ginpangabay ko man ang mga Saksi nga kadtuan ang akon iloy. Nangin interesado sia kag nangin Saksi ni Jehova man. Bisan ginapamatukan sia sang iya pamilya, napatay sia nga matutom sa Dios. Kami lang ni Nanay ang Saksi sa amon pamilya.

Sang 1950, nagsaylo ako sa Grand Junction, Colorado, diin nakilala ko si Billie. Natawo sia sang 1928 kag nagdaku sang tion sang Great Depression. Ginabasahan sia sang Biblia sang iya iloy nga si Minnie kada gab-i nga kingki lang ang suga. Apat ka tuig pa lang si Billie, makahibalo na sia magbasa kag madamo sia sing saulado nga sugilanon sa Biblia. Sang ulihi nga bahin sang katuigan 1940, nahibaluan sang iya iloy paagi sa pagtuon sa Biblia upod sa mga Saksi nga ang impierno indi duog sang pag-antos, kundi kabilugan nga lulubngan sang katawhan. (Manugwali 9:5, 10) Nangin Saksi si Minnie kag ang iya bana.

Sang 1949, nagpauli si Billie pagkatapos niya sang kolehiyo sa Boston kag nagtuon sa Biblia. Sa baylo nga magmaestra, gindedikar niya sa Dios ang iya kabuhi. Nabawtismuhan sia sang 1950 sa internasyonal nga kombension sang mga Saksi ni Jehova  sa Yankee Stadium sa New York. Wala madugay, nagkilalahay kami, nagpakasal, kag nagpayunir.

Nagsugod kami sa pagpayunir sa Eugene, Oregon, kag madamo kami sang nangin abyan. Sang 1953, nagsaylo kami sa Grants Pass, Oregon, para buligan ang gamay nga kongregasyon didto. Sang ulihi sina man nga tuig, gin-agda kami sa ika-23 nga klase sa Gilead, ang eskwelahan sang mga Saksi para sa mga misyonero. Malapit ini sa South Lansing, New York, nga mga 400 kilometros sa aminhan-katundan sang New York City.

Sang Disiembre 1954, lima ka bulan sa tapos sang amon gradwasyon sa Gilead, nagsakay kami ni Billie sa gamay nga eroplano pakadto sa Brazil. Isa pa lang ka oras ang amon biyahe, naaberiya ang eroplano, pero nakahugpa kami sa Bermuda nga wala maano. Naghugpa pa gid kami sing alang-alang sa Cuba kag pagkatapos sang 36 ka oras nga biyahe nakalab-ot gid man kami sa sanga talatapan sang mga Saksi ni Jehova sa Rio de Janeiro, Brazil.

Wala kami nagdugay didto. Nagbiyahe kami ni Billie upod sa duha pa ka misyonero pakadto sa Bauru, São Paulo para sugdan ang pagmisyonero didto. Sobra 50,000 ang populasyon sang siudad, kag kami ang una nga mga Saksi.

Namalaybalay kami, pero ginpamatukan kami dayon sang pari. Ginasundan niya kami kag ginapaandaman ang mga tawo nga indi mamati. Pero pila lang ka semana, ang isa ka daku nga pamilya nga amon ginatun-an sa Biblia nagbaton sang kamatuoran kag sang ulihi nagpabawtismo. Wala madugay, nagtuon man ang iban.

Ang pamilya nga nabawtismuhan na, may paryente nga presidente sang isa ka kilala nga asosasyon. Naglisensia ako nga gamiton ang ila pasilidad para sa asembleya. Sang gin-insister sang pari nga kanselahon ang kontrata, ginmiting sang presidente ang mga miembro sang asosasyon kag ginsilingan: “Kon kanselahon n’yo, mahalin ako!” Nadayon gid ang asembleya.

Pagkadason nga tuig, sang 1956, gin-agda kami sa distrito nga kombension sa Santos, São Paulo. Halos 40 ka Saksi halin sa amon kongregasyon ang nagbiyahe sa tren pakadto didto. Pagpauli namon sa Bauru, may nabaton ako nga sulat nga mangin manuglakbay nga manugtatap ako para duawon ang mga kongregasyon sang mga Saksi ni Jehova. Didto nagsugod ang amon halos 25 ka tuig nga paglakbay sa malapad nga pungsod sang Brazil.

Sadto nga tion mabudlay ang paglakbay. Pero nalibot gid man namon ang bilog nga pungsod. Nagasakay kami sa bus, tren, bagon, kag bisikleta, kag nagalakat man kon kaisa. Ang isa sa una nga ginbisitahan namon nga siudad amo ang Jaú, São Paulo. Ginpamatukan kami sang pari didto.

“Indi kamo puede magbantala sa ‘akon mga karnero!’” siling niya.

“Indi ’na sila imo,” sabat namon. “Iya ’na sila sang Dios.”

Nag-iskedyul kami nga ipasalida ang The New World Society in Action, isa ka pelikula parte sa amon bug-os kalibutan nga pagbantala nga hilikuton. Pero nagtipon sang guban ang pari para gamuhon kami. Ginpahibalo namon dayon ang mga pulis. Sang nag-abot ang pari kag ang guban sa sinehan, ginsugata sila sang mga pulis nga nagataya sang pusil. Nanamian gid ang mga tawo sa pelikula.

Bisan diin kami magkadto ginapamatukan kami sang iban nga relihion. Halimbawa, sa Brusque,  malapit sa Blumenau, Santa Catarina, nakilala namon ang duha ka payunir nga nag-atubang sang tuman nga pagpamatok. Pero ang ila pagbatas ginpadyaan. Subong, sobra na 50 ka tuig ang nagligad, may kapin na sa 60 ka nagauswag nga kongregasyon sa rehiyon kag may matahom nga Assembly Hall sa malapit nga siudad sang Itajaí.

Ang talalupangdon sa amon paglakbay nga hilikuton amo ang makalilipay nga pagpakig-upod namon sa mga Saksi para maghanda sa dalagku nga mga kombension. Sang katuigan 1970, nakapribilehiyo ako nga mangin manugtatap sang kombension sa daku nga Morumbi Stadium. Ginpangabay ang halos isa ka gatos ka kongregasyon nga malapit diri nga magpadala sing tignapulo ka boluntaryo para maninlo sang istadyum sa gab-i antes sang kombension.

Samtang nagapagua ang mga naghampang sang football sina nga gab-i, may nabatian kami nga nang-insulto, “Ahay kagagmay sang mga babayi nga may silhig kag trapo.” Pero, pagkatungang-gab-i matinlo na ang bilog nga istadyum! Ang manedyer sini nagsiling: “Isa ka semana na ina nga pagpaninlo sang akon tinawo, pero kamo nga mga Saksi pila lang ka oras!”

Sang 1980, napatay ang akon amay kag wala madugay nagpauli kami sa Estados Unidos para mag-atipan sa akon iloy sa Fremont, California. Kon gab-i nagapaninlo kami sang mga bilding para makapayunir kag nagabantala kami sa mga Portuguese didto. Sang ulihi nagsaylo kami sa San Joaquin Valley para bantalaan ang mga nagahambal sang Portuguese sa malapad nga lugar halin sa Sacramento pakadto sa Bakersfield. Subong, mga napulo na ang Portuguese nga kongregasyon sa California.

Sang napatay si Nanay sang 1995, nagsaylo kami sa Florida para atipanon ang amay ni Billie asta napatay. Ang iya iloy napatay na sang 1975. Sang 2000, nagsaylo kami sa nabukid nga desyerto sa bagatnan-katundan sang Colorado. Payunir gihapon kami kag nagabantala sa tumandok nga mga Amerikano nga Navajo kag Ute. Ugaling napatay si Billie sang Pebrero 2014.

Nalipay gid ako nga sobra 65 ka tuig ang nagligad, nakilala ko ang isa ka Saksi ni Jehova nga nagsabat base sa Biblia sang akon mga pamangkot! Kag nalipay gid ako ilabi na kay ginsigurado ko nga ang iya ginsiling amo gid ang ginatudlo sang Biblia. Amo nga malipayon ang akon kabuhi sa pag-alagad sa Dios.