Eric: Prangkahon ta ka. Indi ako relihioso nga tawo. Gani wala na kita sing hambalan pa.

Brian: Ginaapresyar ko ang imo pagkaprangka. Ako gali si Brian. Ikaw?

Eric: Eric.

Brian: Nalipay ako nga makilala ka, Eric.

Eric: Ako man.

Brian: Mamangkot lang ako. Nagdaku ka bala sa relihioso nga pamilya?

Eric: Huo. Pero sang maghalin ako sa balay kay nag-eskwela ako sa kolehiyo, wala na ako sing relihion.

Brian: Gali? Ano ang ginkuha mo nga kurso?

Eric: Social studies kag history. Nanamian gid ako abi sa history. Gusto ko mabal-an kon paano nag-uswag ang katilingban sang tawo sa bug-os nga maragtas sini.

Brian: Makawiwili ang history. Siguro nahibaluan mo man nga ang Biblia isa ka libro sang maragtas. Nabasa mo na bala ang Biblia?

Eric: Wala. Maayo nga libro ang Biblia, pero wala ko ginakabig ini nga isa ka libro sang maragtas.

Brian: Natalupangdan ko nga open-minded ka. Luyag ko tani ipakita sa imo sing makadali lang ang pila ka halimbawa sang sibu nga maragtas nga mabasa sa Biblia.

Eric: Sige. Pero wala ako sing Biblia.

Brian: OK lang. Gamiton ko ang Biblia ko. Basahon naton ang 1 Cronica kapitulo 29, bersikulo 26 kag 27. Nagasiling ini: “Gani naghari si David nga anak ni Jesse sa bug-os nga Israel. Ang kalawigon sang iya paghari sa Israel 40 ka tuig. Naghari sia sa Hebron sing 7 ka tuig, kag sa Jerusalem sing 33 ka tuig.”

Eric: Ngaa makasiling ka nga isa ina ka sibu nga maragtas?

Brian: Siling anay sang mga kritiko, wala gid kuno magkabuhi si Hari David.

Eric: Tuod ka? Ti, ngaa ginduhaduhaan nila nga nagkabuhi sia anay?

Brian: Luwas sa Biblia, diutay lang ang ebidensia nga nagkabuhi gid sia anay. Pero, sang 1993, may nadiskobre ang isa ka grupo sang mga arkeologo nga isa ka dumaan gid nga bato nga may tinaga sa sini nga ginbadbad nga “Balay ni David.”

Eric: Gali?

Brian: Ang isa pa ka tawo sa Biblia nga ginduhaduhaan man amo si Poncio Pilato, nga gobernador anay sang panahon ni Jesus. Ginasambit sia diri sa Lucas kapitulo 3, bersikulo 1, lakip sa madamo pa nga mga opisyal sang gobierno sadto nga tion.

Eric: A huo, nakita ko. Nagasiling ini nga “sang si Poncio Pilato ang gobernador sang Judea, si Herodes ang manugdumala sang distrito sang Galilea.”

Brian: Husto ka. Sa sulod sang mga tinuig, ginduhaduhaan sang pila ka iskolar nga si Poncio Pilato nagkabuhi gid anay. Pero, sang nagligad nga mga  50 ka tuig, may isa ka bato nga nakit-an sa Middle East kag ang iya ngalan maathag nga natigib sa sini.

Eric: Hmm. Subong ko lang nabatian ina nga mga detalye.

Brian: Nalipay ako nga nahambalan naton ini.

Eric: Ang matuod, ginarespeto ko ang Biblia subong isa ka libro sang literatura, pero wala gid ako maghunahuna nga mapuslan pa naton ini subong. Mahimo nga nagaunod ini sing sibu nga maragtas, pero sa banta ko, indi na ini praktikal subong.

Brian: Madamo nga tawo ang may amo man sina nga panghunahuna. Apang lain ang akon pagpati. Indi bala nga halin sa ginsuguran, amo lang gihapon ang ginakinahanglan sang mga tawo? Halimbawa, nagakinahanglan kita sing pagkaon, bayo, kag ilistaran. Kinahanglan nga magpaalintunay kita kag gusto naton nga mangin malipayon ang aton pamilya. Indi bala nga ginapabaloran naton ini nga mga butang?

Eric: Husto.

Brian: Makabulig ang Biblia sa aton sa sini tanan nga butang. Amo nga masiling naton nga isa ini ka daan na pero moderno nga libro.

Eric: Ano ang buot mo silingon?

Brian: Binagbinaga bala ini: Nagaunod ang Biblia sing importante nga mga prinsipio nga praktikal sang ginsulat ini mga siglo na ang nagligad kag praktikal gihapon subong.

Eric: OK. Sa ano abi?

Brian: Makabulig sa aton ang mga prinsipio sang Biblia kon paano mangin balanse ang aton pagtamod sa kuarta, paano mangin malipayon ang pamilya, paano kita mangin maayo nga abyan. Ini nga libro daw isa ka dalan padulong sa kadalag-an. Halimbawa, indi bala nga isa gid ka daku nga hangkat para sa isa ka bana kon paano sia mangin madinalag-on nga ulo sang iya pamilya?

Eric: Huo tuod. Mga isa ka tuig na kami sang akon asawa, pero indi sa tanan nga tion nagaintiendihanay kami.

Brian: Amo gid sina. Pero nagaunod ang Biblia sing simple nga mga prinsipio nga makabulig gid. Halimbawa, basahon naton ang Efeso kapitulo 5, bersikulo 22, 23, kag 28. Puede mo bala basahon ini nga mga bersikulo?

Eric: Sige. Nagasiling ini: “Ang mga asawa magpasakop sa ila bana subong sang ila pagpasakop sa Ginuo, bangod ang bana amo ang ulo sang iya asawa subong nga ang Cristo amo ang ulo sang kongregasyon, kay sia ang manluluwas sini nga lawas.” Ang bersikulo 28 nagasiling: “Sing kaanggid, ang mga bana dapat maghigugma sang ila asawa kaangay sang ila kaugalingon nga lawas. Ang nagahigugma sang iya asawa nagahigugma sang iya kaugalingon.”

Brian: Salamat. Indi bala matuod nga kon iaplikar sang mag-asawa ining simple lang nga laygay, mangin malipayon ang ila pamilya?

Eric: Huo, sa banta ko. Pero mahapos lang ina hambalon sangsa himuon.

Brian: Matuod; wala sing tawo nga perpekto. Ang matuod, sa sini man nga kapitulo sang Biblia may isa ka bersikulo diri nga nagalaygay sa aton nga dapat mangin rasonable kita. * Sa bisan ano nga relasyon, dapat mangin balanse ka kag handa magpaumod. Nabuligan gid kami sang Biblia nga mangin balanse.

Eric: Nahangpan ko na.

Brian: May Web site ang mga Saksi ni Jehova nga nagahatag sing mapuslanon nga mga impormasyon parte sa pag-asawahay kag pamilya. Kon may pila ka pa ka minuto, gusto ko ipakita sa imo ang isa ka halimbawa sini.

Eric: Sige. OK lang.

Brian: Maayo kon amo. Ang adres sang Web site amo ang www.mr1310.com/hil. Amo sini ang umpisa nga pahina.

Eric: Kanami sang mga laragway.

Brian: Mga laragway ina sang pagministeryo nga ginahimo namon sa bug-os nga kalibutan. A, ari na kita. Ini nga seksion natig-uluhan sing “Bulig Para sa Mag-asawa kag Ginikanan.” Sa idalom sini nga tig-ulo,  may yara pila ka malip-ot nga mga artikulo parte sa nanuhaytuhay nga mga kahimtangan. May nagustuhan ka bala sa sini?

Eric: Huo. “Paghusay sang mga Problema sa Inyo Pag-asawahay.” Sa banta ko magamit ko ina!

Brian: Apat ka paagi ang ginasambit diri sa paghusay sang mga problema. Tan-awa ini nga parapo. Gusto mo bala basahon ini, Eric?

Eric: Sige. Nagasiling ini: “Kon ang komunikasyon amo ang dugo sa pag-asawahay, ang gugma kag pagtahod naman amo ang tagipusuon kag baga sini.” Hmm, nagustuhan ko ini nga paathag.

Brian: Salamat sa imo pagbasa. May isa ka bersikulo sa Biblia nga ginasambit diri. Mabasa mo ini kon i-tap mo ini.

Eric: Huo, nakita ko. Efeso 5:33. Nagasiling ini: “Ang kada isa sa inyo dapat maghigugma sang iya asawa kaangay sang paghigugma niya sang iya kaugalingon. Subong man, ang asawa dapat may tudok nga pagtahod sa iya bana.”

Brian: Natalupangdan mo bala nga ang ginapadaku amo ang paghatag sang ginapaabot sang isa nga mabaton niya?

Eric: Ano ang buot mo silingon?

Brian: Indi bala nga gusto sang bana nga respetuhon sia sang iya asawa kag gusto man sang asawa nga pasaligon sia sang iya bana nga ginahigugma niya sia?

Eric: Huo. Nagaugyon ako sa sina.

Brian: Kon ang bana pirme nagapangita sing mga paagi agod ipakita ang iya gugma sa iya asawa, indi bala mangin mas mahapos sa asawa nga respetuhon sia?

Eric: Huo no.

Brian: Gani, bisan pa halos 2,000 ka tuig na ang nagligad sang ginsulat ini nga bersikulo sa Biblia, ginabinagbinag sini ang ginakinahanglan sang mag-asawa kag nagahatag ini sing makabulig nga laygay nga, kon iaplikar, epektibo gid. Kag kaangay sang ilustrasyon nga nabasa naton kaina, ang “tagipusuon kag baga” sang pag-asawahay magapabilin nga mapagros.

Eric: Mapuslanon gid gali ang Biblia.

Brian: Nalipay ako nga mabatian ina, Eric. Gusto ko makigkita sa imo liwat diri kag gusto ko mahibaluan kon ano ang imo opinyon sa sub-titulo nga “Apat ka Paagi sa Paghusay sang mga Problema” nga makita sa sini gihapon nga artikulo sa amon Web site. *

Eric: Sige. Tan-awon namon ini sang akon asawa.