Nagadiutay na gid ang mga tawo nga may maayo nga pamatasan. Ginasinggitan sang wala sing respeto nga mga pasyente ang mga doktor; ginapakanubo sang wala sing batasan nga mga tawo nga nagakaon sa restaurant ang mga naga-serve sang pagkaon sa ila; ginasakit sang indi makontrol nga mga pasahero ang mga flight attendant; ginainsulto, ginapahog kag ginasakit sang pasaway nga mga kabataan ang ila mga maestro kag maestra; kag ang pila ka pulitiko nagahimo sang makahuluya nga mga buhat samtang ang iban naman nga pulitiko nagapabugal nga maayo gid sila.

 Ang Biblia masaligan nga giya kon ano gid ang maayo nga pamatasan. Kag ginasugid man sini kon ngaa madamo nga tawo ang may malain nga pamatasan subong.

 Ang pagkadula sang maayo nga pamatasan, buot silingon ang pamatasan nga manami, insakto, kag ginabaton sang tanan, nagakatabo gid sa bilog nga kalibutan.

•   Nakita sa ginhimo nga survey sang Gallup sining karon lang, nga madamo nga nagaistar sa America ang nagapati nga naglain na gid ang pamatasan sang mga tawo sa United States subong kon ikumparar sa nagligad nga 22 ka tuig.

•   Sa isa naman ka survey sa sobra 32,000 ka tawo sa 28 ka pungsod, 65 porsiento sa ila ang nagsiling nga malala na gid ang batasan sang mga tawo subong kon ikumparar sang una.

 Gintagna sang Biblia ang mga batasan nga makita naton subong.

•   “Mangin mabudlay gid sa katapusan nga mga inadlaw. Kay ang mga tawo mangin maiyaiyahon, makikuwarta, tikalon, bugalon, magahambal sing malain kontra sa ila isigkatawo kag sa Dios, indi magpati sa ila mga ginikanan, indi mapinasalamaton, . . . indi sila makapugong sang ila kaugalingon, [kag] mapintas.”—2 Timoteo 3:1-3, Ang Pulong sang Dios, APD.

 Para sa dugang nga impormasyon kon paano nagakatuman ini nga tagna, basaha ang artikulo nga “Gintagna Bala sang Biblia ang Panghunahuna kag Paggawi sang mga Tawo Subong?”

 Sa kalibutan nga nagadiutay na lang gid ang mga tawo nga may maayo nga pamatasan, natun-an sang minilyon ka tawo nga ang Biblia isa ka maayo nga giya para sa maayo nga mga pamatasan. Ang laygay sini parte sa pamatasan ‘masaligan pirme, karon kag sa wala sing katubtuban.’ (Salmo 111:8) Binagbinaga ang pila ka halimbawa:

•   Ang ginasiling sang Biblia: “Himua ninyo sa inyo isigkatawo ang tanan nga luyag ninyo nga himuon nila sa inyo.”—Mateo 7:12.

   Buot silingon: Dapat naton trataron sing maayo kag may respeto ang iban, pareho sa gusto naton nga pagtratar sa aton.

•   Ang ginasiling sang Biblia: “Karon nga ginsikway na ninyo ang pangdaya, ang kada isa sa inyo maghambal sang kamatuoran sa iya isigkatawo.”—Efeso 4:25.

   Buot silingon: Dapat kita mangin honest sa tanan naton nga ginahambal kag ginahimo.

 Para sa dugang nga impormasyon sa sini nga topiko, palihug basaha:

•   Ang isyu sang Ang Lalantawan nga may tig-ulo nga “Husto kag Sala—Ano ang Giya nga Masaligan Mo?”

•   Ang artikulo nga “Pagrespeto sa Sarisari nga mga Tawo—Kon Paano Makabulig ang Biblia.”