Sa sini nga 2024, mas madamo nga eleksion ang himuon sa bilog nga kalibutan sangsa nagligad nga mga tinuig. Pero, madamo nga tawo ang nagakadulaan na sang pagsalig sa mga pulitiko.

•   Ang kalabanan nga mga taga-Amerika nga ginsurbe, nagsiling nga “kalabanan nga mga pulitiko nagaserbisyo bangod sang sakon nga mga handum” imbes nga magserbisyo bangod gusto nila maghimo sang maayo para sa mga tawo. a—Pew Research Center, Septiembre 19, 2023.

 Madamo man nga mga pamatan-on ang nadulaan sang pagsalig sa mga pulitiko.

•   “Gusto sang mga tin-edyer nga mangita sang mga solusyon sa importante nga mga isyu, pero base sa mga surbe nagsiling sila nga indi ini masolusyunan sang mga pulitiko.”—The New York Times, Enero 29, 2024.

•   “Base sa surbe, ang mga pamatan-on mas nagasalig sa mga Youtuber sangsa mga pulitiko.”—The Korea Times, Enero 22, 2024.

 Masaligan bala naton ang mga pulitiko para mangin maayo ang aton palaabuton? Sin-o ang aton masaligan?

 Maayo gid kon maghalong ang mga tawo kon sin-o ang ila ginasaligan. Ang Biblia nagasiling nga “ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.”—Hulubaton 14:15.

•   Para mabal-an kon ano nga impormasyon ang matuod kag kon ano ang indi, basaha ang artikulo nga “Maghalong sa Indi Matuod nga mga Impormasyon.”

 Dugang pa, limitado lang ang mahimo bisan sang pinaka-honest kag sang may maayo nga intension nga mga pulitiko. Amo kon ngaa nagapaandam ang Biblia:

•   “Indi kamo magsalig sa tawhanon nga mga pangulo, ukon sa bisan kay sin-o nga indi makaluwas sa inyo.”—Salmo 146:3, Maayong Balita nga Biblia.

 Ginasugid sang Biblia nga ang Dios nagtangdo sang pinakamaayo kag pinakamasaligan nga lider, si Jesucristo. (Lucas 1:32, 33) Si Jesus ang Hari sang Ginharian sang Dios, nga isa ka gobierno nga nagagahom sa langit.—Mateo 6:10.

•   Hibalua kon ngaa masaligan mo si Jesus kag kon ano ang himuon niya para masolbar ang aton mga problema. Basaha ang mga artikulo nga “Sin-o ang Hari sang Ginharian sang Dios?” kag “Ano ang Himuon sang Ginharian sang Dios?”