Ang mga lider sa kalibutan kag ang internasyonal nga mga organisasyon wala makahatag sang paghidait sa mga tawo. Subong, mas madamo ang mapintas nga mga inaway sangsa bisan ano nga tion halin sang World War II. Mga duha ka bilyon ka tawo, nga mga 25 porsiento sang populasyon sang kalibutan, ang nagaistar sa mga lugar nga naapektuhan sini nga mga inaway.

 Ngaa indi mahatag sang mga tawo ang paghidait? Ano ang ginasiling sang Biblia?

1.  1. Ang mga tawo may mga batasan nga nagapugong sa ila nga magpakighidait. Gintagna sang Biblia nga sa aton tion, “ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, . . . indi mainunungon, . . . indi magsugot sa bisan ano nga kasugtanan, . . . wala sing pagpugong sa kaugalingon, mabangis, . . . matig-a sing ulo, nagapahambog.”—2 Timoteo 3:2-4.

2.  2. Ang mga tawo wala sang ikasarang nga solbaron ang ila mga problema, bilang indibiduwal man ukon grupo, kon wala ang bulig sang ila Manunuga, si Jehova a nga Dios. Nagsiling ang Biblia nga “wala sing ikasarang ang tawo sa pagtuytoy sang iya tikang.”—Jeremias 10:23.

3.  3. Ang kalibutan naimpluwensiahan sang gamhanan kag malain nga manuggahom, si Satanas nga Yawa, nga “nagapatalang sa bug-os napuy-an nga duta.” (Bugna 12:9) Samtang “ang bug-os nga kalibutan yara sa gahom sang isa nga malauton,” indi gid madula ang mga inaway kag kinagamo.—1 Juan 5:19.

 Ginapasalig kita sang Biblia nga ang Dios ang makahatag sang paghidait, indi ang mga tawo.

•   “‘Kay nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.’”—Jeremias 29:11.

 Paano tumanon sang Dios ini nga promisa? “Ang Dios nga nagahatag sing paghidait magadugmok kay Satanas.” (Roma 16:20) Gamiton sang Dios ang gobierno sa langit, nga ginatawag sang Biblia nga “Ginharian sang Dios,” para magdala sang paghidait sa bilog nga kalibutan. (Lucas 4:43) Kon ang Hari sang Ginharian, nga si Jesucristo, maggahom sa bilog nga duta, tudluan ang mga tawo kon paano magkabuhi nga may paghidait.—Isaias 9:6, 7.

•   Para sa dugang nga impormasyon, basaha ang artikulo nga “Ano ang Himuon sang Ginharian sang Dios?”