Ngaa Wala Kamo Nagaselebrar sang Krismas?

I-PLAY

Sayop nga mga pagpati

Pagpati sang iban: Wala nagaselebrar sang Krismas ang mga Saksi ni Jehova bangod wala sila nagapati kay Jesus.

Kamatuoran: Mga Cristiano kami. Nagapati kami nga ang kaluwasan matigayon lamang paagi kay Jesucristo.—Binuhatan 4:12.

Pagpati sang iban: Ginagamo ninyo ang mga pamilya paagi sa pagtudlo sa mga miembro nga indi magselebrar sang Krismas.

Kamatuoran: Daku gid ang amon pag-ulikid sa pamilya, kag ginagamit namon ang Biblia para mangin mas mabakod ini.

Pagpati sang iban: Wala ninyo mabatyagan ang kahulugan sang Krismas—kaalwan, paghidait, kag pagpakita sing kaayo sa iban.

Kamatuoran: Ginapakita namon ang kaalwan kag pagkamahidaiton adlaw-adlaw. (Hulubaton 11:25; Roma 12:18) Halimbawa, ang amon paagi sa pagtilipon kag pagwali nahisuno sa sugo ni Jesus: “Nagbaton kamo nga wala sing bayad, ihatag ninyo nga wala sing bayad.” (Mateo 10:8) Dugang pa, ginatudlo namon nga ang Ginharian sang Dios amo ang makahatag sang matuod nga paghidait sa duta.—Mateo 10:7.

Ngaa wala nagaselebrar sang Krismas ang mga Saksi ni Jehova?

Nagsugo si Jesus nga selebrahon ang iya kamatayon, indi ang iya pagkabun-ag.—Lucas 22:19, 20.
Ang mga apostoles kag mga disipulo ni Jesus sadto wala nagselebrar sang Krismas. Ang New Catholic Encyclopedia nagsiling nga “ang Krismas nagsugod pagkatapos sang 243 [C.E.],” sobra sa isa ka gatos ka tuig sugod sang napatay ang katapusan nga apostoles.
Wala sing pamatuod nga si Jesus Disiembre 25 nabun-ag; ang petsa sang iya pagkabun-ag wala ginrekord sa Biblia.
Nagapati kami nga ang Krismas wala nahamut-an sang Dios bangod naghalin ini sa pagano nga mga kustombre kag ritwal.—2 Corinto 6:17.

Ngaa indi ka gid magselebrar sang Krismas bisan lain ka sa iban?

Madamo gihapon ang nagaselebrar sang Krismas bisan pa nahibaluan nila nga halin ini sa mga pagano kag wala nabase sa Biblia. Mahimo pamangkuton sini nga mga tawo ang ila kaugalingon: Ngaa indi ini dapat pagselebrahon sang mga Cristiano bisan pa kabigon sila nga lain sa iban?

Ginalaygayan kita sang Biblia nga maghunahuna para sa aton kaugalingon, kag gamiton ang aton “ikasarang sa pagpangatarungan.” (Roma 12:1, 2) Ginatudluan kita sini nga pabaloran ang kamatuoran. (Juan 4:23, 24) Importante sa amon ang pagtamod sang iban, pero ginasunod namon ang mga prinsipio sa Biblia bisan pa tamdon kami nga lain sang mga tawo.

Wala kami nagaselebrar sang Krismas, pero ginarespeto namon ang kinamatarong sang kada isa nga magdesisyon parte sa sini nga butang. Wala namon ginaentrahan ang iban kon magselebrar sila sang Krismas.