“Kag nakita ko ang isa ka bag-o nga langit kag ang isa ka bag-o nga duta; kay ang nahauna nga langit kag ang nahauna nga duta nagtaliwan na, kag ang dagat wala na.”—Bugna 21:1, Bag-ong Kalibutan nga Badbad.

 “Nakita ko dayon ang bag-o nga langit kag ang bag-o nga duta. Nagtaliwan na ang nahauna nga langit kag ang nahauna nga duta, kag wala na sing dagat.”—Bugna 21:1, Biblia sang Katilingban sang mga Kristiano.

 Sa sini nga bersikulo, gingamit ang mga tinaga nga may ginasimbulo para ipakita nga islan sang Ginharian sang Dios sa langit ang tanan nga gobierno sang tawo. Dulaon sini nga Ginharian ang malain nga mga tawo kag magagahom ini sa tanan nga tawo nga mabilin nga magapasakop sa sini nga Ginharian.

 Ang libro sang Bugna puno sang “mga tanda,” ukon simbulo. (Bugna 1:1) Gani masiling naton nga ang langit kag ang duta nga ginsambit sa sini nga bersikulo indi literal kundi may ginasimbulo. Dugang pa, indi man literal ang “bag-o nga langit” kag ang “bag-o nga duta” nga ginsambit sa iban nga mga bersikulo sa Biblia. (Isaias 65:17; 66:22; 2 Pedro 3:13) Kon tun-an naton ini sing maayo kag ang iban pa nga teksto sa Biblia, mas maintiendihan naton kon ano gid ang buot silingon sini.

 “Ang bag-o nga langit.” Kon kaisa ginagamit sang Biblia ang tinaga nga “langit” para magrepresentar sang paggahom ukon mga gobierno. (Isaias 14:12-14; Daniel 4:25, 26) May isa ka reperensia nga nagasiling nga kon mga tagna ang ginaistoryahan, ang “langit nagasimbulo sa nagagahom ukon sa gobierno.” a Sa Bugna 21:1, ang “bag-o nga langit” nagapatuhoy sa Ginharian sang Dios. Ini nga gobierno sa langit, nga kon kaisa ginatawag man nga “Ginharian sang langit,” ginasambit sa bilog nga libro sang Bugna kag sa iban pa nga mga libro sa Biblia. (Mateo 4:17; Binuhatan 19:8; 2 Timoteo 4:18; Bugna 1:9; 5:10; 11:15; 12:10) Ang Ginharian sang Dios, nga si Jesus ang Hari, amo ang magabulos sa “nahauna nga langit,” nga amo ang mga gobierno nga ginhimo sang tawo.—Daniel 2:44; Lucas 1:31-33; Bugna 19:11-18.

 “Ang bag-o nga duta.” Ang Biblia nagasiling nga ang planeta nga duta indi gid maguba kag indi gid ini pag-islan. (Salmo 104:5; Manugwali 1:4) Kon amo, ano ang simbuliko nga duta? Pirme ginagamit sa Biblia ang tinaga nga “duta” para magpatuhoy sa mga tawo. (Genesis 11:1; 1 Cronica 16:31; Salmo 66:4; 96:1) Gani ang “bag-o nga duta,” nagapatuhoy sa mga tawo nga kinabubut-on nga nagapasakop sa gobierno sang Dios sa langit. Ang “nahauna nga duta,” ukon ang mga tawo nga nagakontra sa Ginharian sang Dios, magataliwan.

 “Ang dagat wala na.” “Ang dagat” nga ginasambit sa Bugna 21:1 may ginasimbulo man. Sa masami, ang dagat mabalod kag indi kalmado, gani insakto gid ini nga ilustrasyon para sa mga tawo nga nagapanggamo kag wala nagahilisugot bangod indi nila gusto nga magsunod sa Dios. (Isaias 17:12, 13; 57:20; Bugna 17:1, 15) Pati sila madula man. Ang Salmo 37:10 nagasiling: “Sa indi na lang madugay, madula na ang mga malauton; pangitaon mo sila sa ila nahamtangan, kag wala na sila didto.”

 Gintagna sa libro sang Bugna kon ano ang matabo sa “adlaw sang Ginuo.” (Bugna 1:10) Suno sa tagna sang Biblia, ina nga adlaw nagsugod sang 1914, sang nagsugod sa paggahom si Jesus sa Ginharian sang Dios. b Pero, wala pa sia naggahom dayon sa duta. Ang matuod, ang iban nga mga tagna nagsiling nga magalala pa ang sitwasyon sang kalibutan sa una nga bahin sang “adlaw sang Ginuo.” Ini nga tion ginatawag nga “katapusan nga mga adlaw.” (2 Timoteo 3:1-5, 13; Mateo 24:3, 7; Bugna 6:1-8; 12:12) Kon matapos na ining makahalanguyos kag mabudlay nga tion, dulaon na sang Ginharian sang Dios ining simbuliko nga nahauna nga langit kag duta. Kag mangin malinong na kag nahiusa ang bilog nga duta. Ang “bag-o nga duta,” ukon ang mga mangin sakop sini nga Ginharian magaistar diri sa duta nga may perpekto nga kahimtangan kag panglawas.—Bugna 21:3, 4.

 Tan-awa ining malip-ot nga video para mahibaluan mo ang sumaryo sang libro sang Bugna.