Ang pagpatawad amo ang pagpasaylo sa nakasala. Sa Biblia, ang Griego nga tinaga nga ginbadbad “pagpatawad” literal nga nagakahulugan nga “kalimtan na lang,” pareho sang tawo nga wala na nagapanukot sa nakautang sa iya. Gingamit ni Jesus ini nga pagpaanggid sang gintudluan niya ang iya mga sumulunod nga mangamuyo: “Patawara kami sang amon mga sala, kay ginapatawad man namon ang tanan nga nakautang sa amon.” (Lucas 11:4, footnote) Sa parabola ni Jesus parte sa indi maluluy-on nga ulipon, ginpaanggid man niya ang pagpatawad sa indi na pagpabayad sang utang.​—Mateo 18:23-​35.

 Ginapatawad naton ang iban kon wala na kita nagahinakit sa ila kag wala na nagahandum nga makabalos sa malain nila nga ginhimo sa aton. Ang Biblia nagatudlo nga ang matuod nga gugma amo ang basihan sang matuod nga pagpatawad, bangod ang gugma ‘wala nagaisip sang kahalitan.’​—1 Corinto 13:​4, 5.

Ang pagpatawad wala nagakahulugan sing

•   Pagkunsinti sa sala. Ginapakamalaut sang Biblia ang mga nagasiling nga ang malain nga mga buhat indi makahalit ukon normal lang.​—Isaias 5:​20.

•   Pagbalewala sa sala nga daw wala lang natabo. Ginpatawad sang Dios si Hari David sa iya serioso nga mga sala, pero naani gihapon ni David ang malain nga mga resulta sang iya mga ginhimo. Ginpasulat pa gani sang Dios ang mga sala ni David para madumduman gihapon ini subong.​—2 Samuel 12:​9-​13.

•   Pagtugot nga hingalitan ka sang iban. Halimbawa, may ginpahulam ka sing kuarta, pero gin-uyangan niya ini kag indi na sia makabayad suno sa iya ginpromisa. Nagpangayo gid sia sing pasaylo sa imo. Mahimo mo sia patawaron nga wala na nagahinakit kag wala na nagaungkat pirme sang iya sala. Mahimo pa gani nga indi mo na sia pagpabayaron sang iya utang. Pero, mahimo ka man magdesisyon nga indi mo na sia pagpautangon liwat sang kuarta.​—Salmo 37:21; Hulubaton 14:15; 22:3; Galacia 6:7.

•   Pagpasaylo nga wala sing basihan. Ang Dios wala nagapatawad sa mga hungod nga nagapakasala, wala nagaaku sang ila sala, wala nagabag-o, kag wala nagapangayo sing pasaylo sa nahimuan sing sala. (Hulubaton 28:13; Binuhatan 26:20; Hebreo 10:26) Ining mga wala nagahinulsol mangin mga kaaway sang Dios, kag wala niya ginapaabot nga patawaron naton ang mga wala niya ginpatawad.​—Salmo 139:21, 22.

   Ano abi kon ginhimuan ka sing malain sang iban kag wala sila nangayo sing pasaylo ukon wala gani nag-aku sang ila sala? Ang Biblia nagalaygay: “Isikway ang kaakig kag bayai ang kasingkal.” (Salmo 37:8) Bisan pa indi mo mapatawad ang sala, puede nga indi ka maghupot sang kaakig. Makasalig ka nga manabat sila sa Dios. (Hebreo 10:30, 31) Makapaumpaw man nga mahibaluan nga magaabot ang tion nga dulaon na sang Dios ang grabe nga kasakit nga mahimo naeksperiensiahan naton subong.​—Isaias 65:17; Bugna 21:4.

•   “Pagpatawad” sa mga tawo nga pamatyag mo nakasala sa imo. Kon kaisa, imbes nga pasayluhon ang sa banta naton nga nakasala sa aton, basi kinahanglan lang naton batunon nga wala man kita sing rason nga maakig. Ang Biblia nagasiling: “Indi ka mangakig dayon, kay ang pagpangakig dayon tanda sang isa ka buangbuang.”​—Manugwali 7:9, footnote.

Kon paano magpatawad

1.   Dumduma kon ano ang buot silingon sang pagpatawad. Wala mo ginakunsinti ang sala ukon ginabalewala ang natabo​—kundi ginakalimtan mo na lang ini.

2.   Hibalua ang mga kaayuhan kon nagapatawad ka. Kon indi ka maakig kag indi maglain ang imo buot, mangin kalmado ka, mangin maayo ang imo panglawas, kag mas malipayon. (Hulubaton 14:30; Mateo 5:9) Kag ang importante sa tanan, kon patawaron mo ang iban patawaron man sang Dios ang imo mga sala.​—Mateo 6:​14, 15.

3.   Intiendiha sila. Tanan kita indi perpekto. (Santiago 3:2) Gusto naton nga patawaron kita sang iban, gani dapat man naton patawaron ang sala sang iban sa aton.​—Mateo 7:​12.

4.   Mangin makatarunganon. Kon indi man gid serioso ang aton rason nga magreklamo, puede naton iaplikar ang laygay sang Biblia: “Padayon nga batasa ninyo ang isa kag isa.”​—Colosas 3:​13.

5.   Himua ini dayon. Tinguhai nga magpatawad dayon imbes nga tugutan nga magdugang pa ang imo kaakig.​—Efeso 4:​26, 27.