May Makita Bala Ako nga Makapaumpaw nga mga Tinaga sa Biblia?
Ang sabat sang Biblia
Huo. (Roma 15:4) Binagbinaga ang pila ka bersikulo sa Biblia nga nakapaumpaw sa madamo nga ara sa mabudlay nga mga sitwasyon kag nagabatyag sang makapaluya nga mga emosyon.
Sa sini nga artikulo
Kabudlayan
Salmo 23:4: “Bisan nagalakat ako sa madulom nga nalupyakan, wala ako mahadlok, kay kaupod ko ikaw.”
Ang buot silingon: Kon nagapangamuyo ka sa Dios kag nagasalig nga giyahan ka sang iya Pulong, ang Biblia, mangin maisog ka sa pag-atubang sang mga kabudlayan.
Filipos 4:13: “Sa tanan nga butang may kusog ako paagi sa isa nga nagapabakod sa akon.”
Ang buot silingon: Hatagan ka sang Dios sing kusog nga maatubang ang bisan ano nga problema.
Kamatayon sang pinalangga
Manugwali 9:10: “Wala na sing hilikuton ukon plano ukon ihibalo sa Lulubngan.”
Ang buot silingon: Ang mga napatay wala nagaantos, kag indi man sila makahalit sa aton. Wala sila sing nahibaluan.
Binuhatan 24:15: “May pagkabanhaw.”
Ang buot silingon: Mabanhaw sang Dios ang aton mga pinalangga nga napatay na.
Ginakonsiensia
Salmo 86:5: “Kay ikaw, O Jehova, a maayo kag handa sa pagpatawad; bugana sa mainunungon nga gugma para sa tanan nga nagapanawag sa imo.”
Ang buot silingon: Ginapatawad sang Dios ang mga naghinulsol sa ila mga sala sadto kag determinado nga indi na ini pagsuliton.
Salmo 103:12: “Subong nga malayo ang sidlangan sa katundan, amo man sina kalayo ang pagpahilayo niya sa aton sang aton mga paglapas.”
Ang buot silingon: Kon nagapatawad ang Dios, ginapalayo gid niya ang aton mga sala. Wala niya ini ginaungkat pirme para suknaan kita ukon silutan.
Kasubo
Salmo 31:7: “Nakita mo ang akon kalisdanan; nahibaluan mo ang akon tuman nga kasakit.”
Ang buot silingon: Nahibaluan gid sang Dios ang tanan mo nga ginaantos. Nahangpan niya ang imo ginabatyag, bisan wala ka mahangpan sang iban.
Salmo 34:18: “Malapit si Jehova sa mga nagaantos; ginaluwas niya ang mga nalisdan.”
Ang buot silingon: Nagapromisa ang Dios nga suportahan ka niya kon nasubuan ka. Hatagan ka niya sing kusog nga mabatas ang imo kasakit.
Balatian
Salmo 41:3: “Buligan sia ni Jehova kon magbalatian sia.”
Ang buot silingon: Buligan ka sang Dios nga maatubang ang imo malubha nga balatian. Hatagan ka niya sang malinong nga panghunahuna, kusog, kag kaalam sa paghimo sang mga desisyon. Buligan ka man niya nga makabatas.
Isaias 33:24: “Wala sing pumuluyo nga magasiling: ‘Nagamasakit ako.’”
Ang buot silingon: Nagapromisa ang Dios nga maabot ang tion nga ang tanan nga tawo indi na magmasakit.
Stress kag kabalaka
Salmo 94:19: “Sang nagdamo ang akon kabalaka, ginlugpayan kag ginpaumpawan mo ako.”
Ang buot silingon: Kon magpabulig kita sa Dios kon gina-stress kita, buligan niya kita nga mangin kalmado.
1 Pedro 5:7: “[Itugyan] ninyo sa iya ang tanan ninyo nga kabalaka, kay nagaulikid sia sa inyo.”
Ang buot silingon: Nagaulikid ang Dios sa aton kon nagaantos kita. Gani gusto niya nga ipangamuyo naton sa iya ang aton mga problema.
Inaway
Salmo 46:9: “Ginapauntat niya ang mga inaway sa bug-os nga duta.”
Ang buot silingon: Dulaon sa indi madugay sang Ginharian sang Dios ang tanan nga inaway.
Salmo 37:11, 29: “Ang mga mahagop magapanubli sang duta, kag mangin malipayon gid sila sa bugana nga paghidait. . . . Ang mga matarong magapanubli sang duta, kag magapuyo sila sa sini sa wala sing katubtuban.”
Ang buot silingon: Ang maayo nga mga tawo magakabuhi sing malinong kag may paghidait sa duta sing wala katapusan.
Pagkabalaka parte sa palaabuton
Jeremias 29:11: “‘Nahibaluan ko kon ano ang himuon ko sa inyo,’ siling ni Jehova, ‘hatagan ko kamo sing paghidait kag indi sing kalaglagan, agod may maayo kamo nga palaabuton kag paglaum.’”
Ang buot silingon: Ginapasalig sang Dios ang iya katawhan nga may malipayon sila nga palaabuton.
Bugna 21:4: “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”
Ang buot silingon: Nagapromisa ang Dios nga dulaon ang tanan nga malain nga mga butang nga imo nakita kag naeksperiensiahan subong.
a Si Jehova ang ngalan sang Dios. (Salmo 83:18) Tan-awa ang artikulo nga “Sin-o si Jehova?”
Basi Manamian Ka Man
ANG LALANTAWAN
Kon Paano Ka Makabenepisyo sa Pag-ulikid sang Dios
Ginapabakod sang Biblia ang aton pagtuo sa mga promisa sang Dios parte sa palaabuton sang katawhan.
SABAT SA MGA PAMANGKOT SA BIBLIA
Sa Diin Ako Makakita sing Paglaum?
Ang isa ka masaligan nga libro makabulig para mangin maayo ang aton kabuhi subong kag nagahatag sing paglaum sa palaabuton.
IBAN PA NGA TOPIKO
Paumpaw Para sa mga Napatyan
Kon mapatyan kita sang pinalangga, basi nagapensar kita nga wala sang nakaintiende sang kasakit nga aton ginabatyag. Pero naintiendihan ini sang Dios, kag magabulig sia.
ANG LALANTAWAN
Kon Daw Indi Na Mabatas ang mga Problema
May pulos gihapon ang kabuhi bisan sang mga kabudlayan.
IMPORTANTE NGA MGA PANUDLO SANG BIBLIA
Ngaa Ginapasugtan sang Dios ang Pag-antos?
Madamo ang nagapamangkot kon ngaa nagadumtanay kag nagaantos ang mga tawo sa kalibutan. Ginasugid sang Biblia ang makalilipay kag makapaumpaw nga sabat.
PANUDLO SANG BIBLIA
Testingi ang Amon Pagtuon sa Biblia
Testingi ang libre nga interactive nga pagtuon sa Biblia upod sa isa ka instruktor.