Ano “ang mga Yabi sang Ginharian”?

I-PLAY

Ang sabat sang Biblia

“Ang mga yabi sang Ginharian,” nga ginatawag man kon kaisa nga ‘mga yabi sa Ginharian,’ nagarepresentar sa awtoridad nga magbukas sing dalan sa mga tawo “agod makasulod sa Ginharian sang Dios.” (Mateo 16:19; Binuhatan 14:22, Biblia sang Katilingban sang mga Kristiano) a Ginhatagan ni Jesus si Pedro sang “mga yabi sang Ginharian sang langit.” Nagakahulugan ini nga ginhatagan si Pedro sang awtoridad para mahibaluan kon paano ang matutom nga mga tawo makabaton sing pribilehiyo nga makasulod sa Ginharian sa langit paagi sa bulig sang balaan nga espiritu sang Dios.

Para kay sin-o gingamit ang mga yabi?

Gingamit ni Pedro ang awtoridad nga ginhatag sang Dios sa iya para makasulod sa Ginharian ang tatlo ka grupo:

Mga Judiyo, kag nakumbertir nga mga Judiyo. Wala madugay sa tapos mapatay si Jesus, ginpalig-on ni Pedro ang nagatuo nga mga Judiyo nga batunon si Jesus subong isa nga ginpili sang Dios nga maggahom sa Ginharian. Gintudluan sila ni Pedro kon ano ang ila dapat himuon para maluwas. Paagi sini, ginbuksan niya ang dalan para makasulod sila sa Ginharian, kag linibo “ang mga nagbaton sang iya pulong.”—Binuhatan 2:38-41.
Mga Samaritano. Ginpadala si Pedro sang ulihi sa mga Samaritano. b Gingamit niya liwat ang yabi sang Ginharian sang sia, kag si apostol Juan “nagpangamuyo para sa ila agod mabaton nila ang balaan nga espiritu.” (Binuhatan 8:14-17) Nagbukas ini sang dalan para makasulod sa Ginharian ang mga Samaritano.
Mga Gentil. Tatlo ka tuig kag tunga sa tapos mapatay si Jesus, ginpahayag sang Dios kay Pedro nga ang mga Gentil (indi mga Judiyo) may kahigayunan man nga makasulod sa Ginharian. Sa pagtuman sa sugo sang Dios, gingamit ni Pedro ang isa sa mga yabi paagi sa pagbantala sa mga Gentil, gani nakabaton sila sing balaan nga espiritu, nangin mga Cristiano, kag nangin bahin sang Ginharian sa ulihi.—Binuhatan 10:30-35, 44, 45.

Ano ang buot silingon sang “magsulod sa Ginharian”?

Ang mga ‘masulod sa Ginharian’ magagahom kaupod ni Jesus sa langit. Ang Biblia nagasiling nga ‘magapungko sila sa mga trono’ kag “magagahom sila sa duta subong mga hari.”—Lucas 22:29, 30; Bugna 5:9, 10.

Sala nga pagpati parte sa mga yabi sang Ginharian

Sala nga pagpati: Si Pedro ang nagadesisyon kon sin-o ang makasulod sa langit.

Ang matuod: Ang Biblia nagasiling nga indi si Pedro, kundi si Jesucristo, ang “magahukom sa mga buhi kag sa mga patay.” (2 Timoteo 4:1, 8; Juan 5:22) Bisan si Pedro mismo nagsiling nga si Jesus amo ang “gintangdo sang Dios nga mangin hukom sang mga buhi kag sang mga patay.”—Binuhatan 10:34, 42.

Sala nga pagpati: Naghulat ang langit kay Pedro kon san-o niya gamiton ang mga yabi sang Ginharian.

Ang matuod: Sang ginhambal ni Jesus ang parte sa mga yabi sang Ginharian, ginsilingan niya si Pedro: “Ang bisan ano nga imo gapuson sa duta gapuson sa langit, kag ang bisan ano nga imo hubaran sa duta hubaran sa langit.” (Mateo 16:19, Ang Biblia sang Philippine Bible Society) Sa tapos nga mabasa ini sa ila Biblia, ginaintiende ini sang iban nga si Pedro amo ang nagadesisyon sa langit. Pero ginapakita sang orihinal nga Griego nga tinaga nga ginasunod ni Pedro ang mga desisyon sa langit sa baylo nga pangunahan ini.

Ginapakita sang Biblia nga si Pedro nagapasakop sa desisyon sang langit sang gingamit niya ang mga yabi sang Ginharian. Halimbawa, ginsunod niya ang mga instruksion sang Dios sang gingamit niya ang ikatlo nga yabi.—Binuhatan 10:19, 20.

a Kon kaisa, ginagamit sa Biblia ang termino nga “yabi” bilang simbulo sang awtoridad kag responsibilidad.—Isaias 22:20-22; Bugna 3:7, 8.

b Ang mga Samaritano may relihion nga indi pareho sa Judaismo, pero ginasunod nila ang pila ka panudlo kag mga buhat halin sa Kasuguan nga ginhatag sang Dios kay Moises.