Thaum txog lub 2 Hlis tim 24, xyoo 2023, twb tau ib xyoo nkaus uas muaj kev ua tsov ua rog nyob rau teb chaws Yus Khees (Ukraine). Muaj tej zaj xov xwm qhia tias, muaj cov tub rog Yus Khees thiab cov tub rog Lav Xias (Russia) raug mob los sis tas sim neej yuav luag txog 300,000 leej thiab muaj yuav luag txog 30,000 tus pej xeem tau tas sim neej rau txoj kev ua tsov ua rog no. Tej zaum muaj neeg tau tas sim neej thiab raug mob coob tshaj hais no los kuj muaj.

 Tu siab kawg tias, txoj kev tsov kev rog no yeej tseem muaj qees tsis tau tsum li.

•   Muaj ib zaj xov xwm hais li no tias, “Twb yuav luag tau ib xyoo no lawm, uas teb chaws Lav Xias mus tua teb chaws Yus Khees. Tsis muaj ib yam qhia tias ob lub teb chaws no yuav tsum tsis ua rog ntxiv lawm. Ob lub teb chaws no yeej tsis muaj swb muaj yeej thiab tsis pom tias yuav hais sib haum li.”

 Nyob thoob ntiaj teb muaj coob leej ntau tus yeej tu siab kawg tias, txoj kev ua tsov ua rog ua rau tej laj mej pej xeem uas twb tsis tau ua dab tsi txhaum txom nyem kawg. Phau Vajlugkub qhia tias muaj kev cia siab li cas? Puas muaj ib hnub uas yuav tsis muaj kev ua tsov ua rog lawm?

 Phau Vajlugkub qhia txog ib ntsuj rog uas yog yuav cawm tib neeg, tsis yog yuav ua rau kom tib neeg puas tsuaj. Ntsuj rog no hu ua Amankedoos. Phau Vajlugkub qhia tias ntsuj rog no yog tuaj ua rog ‘rau hnub tseem ceeb uas Vajtswv tus uas muaj hwj chim loj kawg nkaus teem cia lawm.’ (Tshwmsim 16:14, 16) Vajtswv ntsuj rog yuav rhuav tshem txhua txoj kev nom kev tswv uas kav hauv ntiaj teb no uas pheej ua tsov ua rog thiab ua rau muaj kev puas ntsoog. Kawm ntxiv seb Amankedoos yuav ua kom muaj kev thaj yeeb li cas:

•   Mus nyeem zaj ua lus Askiv hu ua “What Is the Battle of Armageddon?”

•   Mus nyeem zaj hu ua “Peb Tos Ntsoov Amankedoos!”