Yehauvas xav kom koj paub nws zoo. Vim li cas nws thiaj xav li no? Nws xav tias thaum koj yim huab paub nws zoo ces koj yim huab yuav xav ntaus phooj ywg nrog nws. Koj puas ntseeg tias koj ua tau Yehauvas ib tug phooj ywg tiag? (Nyeem Phau Ntawv Nkauj 25:14.) Koj yuav tau ua li cas thiaj ua tau nws ib tug phooj ywg? Phau Vajlugkub teb tau cov lus nug no thiab qhia tias vim li cas txoj kev ntaus phooj ywg nrog Yehauvas yog txoj uas tseem ceeb tshaj plaws rau koj.

1. Yehauvas xav kom koj ua dab tsi?

“Nej cia li los nyob ze Vajtswv, Vajtswv thiaj yuav los nyob ze nej.” (Yakaunpaus 4:8) Qhov no txhais tias Yehauvas xav kom koj los cuag nws thiab ua nws tus phooj ywg. Tiam sis muaj ib txhia xav hais tias peb yeej ua tsis tau phooj ywg nrog Vajtswv vim peb twb tsis pom nws nyob qhov twg. Txawm li ntawd los, Vajtswv Txoj Lus qhia txhua yam txog Yehauvas kom peb thiaj txav tau ze rau nws. Txawm peb tsis tau pom Vajtswv Yehauvas dua los, yog peb nyeem phau Vajlugkub ces peb txoj kev sib raug zoo nrog nws yeej yuav zoo zuj zus tuaj.

2. Vim li cas Yehauvas yog tus Phooj Ywg zoo tshaj plaws rau koj?

Tsis muaj leej twg yuav hlub koj npaum li Yehauvas hlub lawm. Nws xav kom koj muaj kev zoo siab thiab thov nws thaum koj cheem tsum ib qho kev pab twg. Cia li muab koj tej kev nyuaj siab huv tib si tso plhuav rau Vajtswv, vim nws hlub koj. (1 Petus 5:7) Yehauvas yeej ib txwm txaus siab hlo pab, nplig, thiab mloog nws cov phooj ywg.​—Nyeem Phau Ntawv Nkauj 94:18, 19.

3. Yehauvas xav kom nws cov phooj ywg ua dab tsi?

Vajtswv Yehauvas muaj kev hlub rau txhua tus tib neeg, tiam sis nws “nrog cov neeg uas hwm nws ua phoojywg.” (Phau Ntawv Nkauj 25:14) Yehauvas xav kom nws cov phooj ywg ua tej yam uas nws suav tias zoo tiam sis txav deb ntawm tej yam uas nws hais tias phem. Ib txhia xav hais tias lawv yeej ua tsis tau txhua yam uas Yehauvas xav kom lawv ua li. Txawm li ntawd los, Yehauvas yeej to taub tias yog peb ua li peb ua tau thiab hlub nws tiag tiag ces nws yeej txais yuav peb.​—Phau Ntawv Nkauj 147:11; Tes Haujlwm 10:34, 35.

 KAWM NTXIV

4. Anplahas yog Yehauvas tus phooj ywg

Zaj uas hais txog Anplahas (kuj hu ua Anplas) hauv phau Vajlugkub pab peb to taub tias qhov uas ua phooj ywg nrog Vajtswv yog zoo li cas tiag. Nyeem txog Anplahas hauv Chivkeeb 12:1-4. Ces tham txog cov lus no:

• Vajtswv Yehauvas hais kom Anplahas ua dab tsi?

• Vajtswv Yehauvas cog lus li cas rau nws?

• Anplahas ua li cas?

5. Yehauvas xav kom nws cov phooj ywg ua dab tsi

Peb xav kom peb tej phooj ywg ua tej yam twg pub rau peb.

• Koj xav kom koj cov phooj ywg ua tej yam twg pub rau koj?

Nyeem 1 Yauhas 5:3, thiab tham txog lo lus no:

• Yehauvas xav kom nws cov phooj ywg ua dab tsi?

Yuav kom yooj yim rau peb mloog Yehauvas lus, peb yuav tau hloov peb tus yam ntxwv los sis peb tus cwj pwm. Nyeem Yaxayas 48:17, 18, thiab tham txog lo lus no:

• Vim li cas Yehauvas xav kom nws cov phooj ywg hloov lawv tus cwj pwm?

 6. Yehauvas ua dab tsi los pab nws cov phooj ywg

 KOJ KAWM TAU DAB TSI

Yehauvas xav ua koj tus Phooj Ywg, thiab nws yuav pab kom koj muaj kev sib raug zoo nrog nws.

Rov Tham Dua

• Yehauvas pab nws cov phooj ywg li cas?

• Vim li cas Yehauvas hais kom nws cov phooj ywg mloog nws tej lus sam hwm?

• Koj puas tau xav tias tsis yooj yim los ua Yehauvas ib tug phooj ywg kiag li? Vim li cas koj ho xav li ntawd?