ZAJ KAWM 56
Muaj Kev Sib Haum Xeeb Hauv Lub Koom Txoos
Thaum peb nrog peb cov kwv tij nkauj muam ua ke, peb yeej xav ib yam li Vaj Ntxwv Daviv xav no: ‘Qhov uas kwv tij nyob ua ke sib haum xeeb mas kuj yog qhov zoo thiab kaj siab kawg li.’ (Phau Ntawv Nkauj 133:1) Tiam sis tsis yog nyob nyob xwb ces peb cia li lam muaj kev sib haum xeeb. Peb txhua leej txhua tus yuav tsum sib koom tes sib hlub sib pab tiag tiag, peb thiaj yuav muaj kev sib haum xeeb.
1. Qhov uas zoo tshaj plaws ntawm Vajtswv cov neeg yog dab tsi?
Yog hais tias koj mus kev sib txoos nyob rau lwm lub teb chaws koj yeej tsis nco qab txhawj, vim koj paub tias lawv yeej yuav hlub koj ib yam li koj lub koom txoos. Yog vim li cas? Vim hais tias txawm peb mus txog qhov twg los peb sawv daws ib leeg yeej hlub ib leeg thiab siv tib phau ntawv los kawm Vajlugkub xwb. Thiab txawm peb yuav nyob rooj teb twg los peb sawv daws yeej “hu thov [Yehauvas] lub npe thiab txawj ua ib lub siab ua koom tu nws.”—Xefaniyas 3:9.
2. Koj yuav txhawb kom muaj kev sib haum xeeb li cas?
Phau Vajlugkub hais tias, “Nej ib tug yuav tsum hlub ib tug tiag tiag.” (1 Petus 1:22) Yuav kom peb ua tau li no, peb yuav tsum tsis txhob xav txog tej uas peb cov kwv tij nkauj muam ua tsis tau zoo tiam sis ua zoo xav txog tej uas lawv ua tau zoo nkaus xwb. Thiab tsis txhob nrog cov uas zoo li peb ua ke xwb, tiam sis peb yuav tsum mus nrog cov uas tsis zoo li peb thiab. Tsis tas li ntawd, peb yuav tsum saib taus sawv daws, tsis txhob xaiv ntsej xaiv muag.—Nyeem 1 Petus 2:17. a
3. Koj yuav ua li cas thaum koj muaj teeb meem nrog lwm tus Khixatias?
Txawm hais tias peb koom tau ua ib lub siab thiab ua tau ib pab ib pawg los peb sawv daws zoo tsis tiav ces muaj tej thaud peb yuav ua tau rau lwm tus tu siab los sis mob siab. Vajtswv Txoj Lus thiaj hais tias, “Nej ib tug yuav tsum zam txim rau ib tug, ib yam li Vajtswv twb zam txim rau nej lawm.” (Nyeem Kaulauxais 3:13.) Txawm hais tias peb yuav ua mob Yehauvas siab pe tsawg zaus los nws twb zam txim rau peb. Nws thiaj xav kom peb zam txim rau lwm tus thiab. Yog koj paub tias koj ua mob ib tug siab lawm, tsis txhob tos, kav tsij maj nrawm nroos mus nrog nws tham kom sib haum.—Nyeem Mathais 5:23, 24. b
KAWM NTXIV
Xav seb koj yuav ua li cas koj thiaj txhawb tau lub koom txoos kom muaj kev sib haum xeeb thiab ua tau ib pab ib pawg.
Koj yuav ua li cas koj thiaj muaj kev sib haum xeeb nrog lwm tus?
4. Tsis txhob muaj kev ntxub ntxaug
Peb yeej xav hlub tag nrho peb cov kwv tij nkauj muam tiam sis muaj tej thaud tsis yooj yim rau peb hlub cov uas tsis zoo li peb. Dab tsi thiaj yuav pab tau peb kom tsis txhob ua li ntawd? Nyeem Tes Haujlwm 10:34, 35 thiab tham txog ob lo lus no:
-
Txawm hais tias Yehauvas cov neeg ib leeg zoo txawv ib leeg thiab lawv yuav yog haiv neeg twg los Yehauvas yeej lees yuav lawv tag nrho. Peb yuav xyaum Yehauvas li cas peb thiaj ua tau li nws?
-
Ntawm koj thaj tsam, puas muaj tej yam kev ntxub ntxaug twg uas koj tsis xav kom muaj?
Nyeem 2 Kauleethaus 6:11-13 thiab tham txog lo lus no:
-
Koj yuav ua li cas koj thiaj hlub taus koj cov kwv tij nkauj muam ntau zuj zus ntxiv?
5. Ib leeg zam txim rau ib leeg thiab muaj kev sib haum xeeb
Txawm hais tias Yehauvas tsis cheem tsum kev zam txim ntawm peb los nws yeej zoo siab hlo zam peb lub txim. Nyeem Phau Ntawv Nkauj 86:5 thiab tham txog cov lus no:
-
Yehauvas zam peb lub txim npaum li cas?
-
Koj puas ris Yehauvas txiaj ntsig tias nws zam koj lub txim? Vim li cas koj thiaj ris nws txiaj ntsig?
-
Thaum twg thiaj nyuaj rau peb muaj kev sib haum xeeb nrog lwm tus?
Yuav ua li cas peb thiaj li xyaum tau Yehauvas tus qauv thiab muaj kev sib haum xeeb nrog peb cov kwv tij nkauj muam? Nyeem Pajlug 19:11 thiab tham txog lo lus no:
-
Yog muaj ib tug ua tsis haum koj siab los sis ua tau siab koj lawm, koj yuav ua li cas neb thiaj li tsis muaj kev sib chim?
Muaj tej thaud, peb yuav ua tsis haum lwm tus siab. Thaum muaj li ntawd, peb yuav ua li cas thiaj zoo? Saib zaj YEEB YAJ KIAB thiab tham txog lo lus no:
-
Tus muam hauv zaj yeeb yaj kiab no ua li cas, nws thiaj rov muaj kev sib raug zoo nrog nws tus viv ncaus?
6. Xam pom qhov zoo ntawm cov kwv tij nkauj muam xwb
Thaum peb sib raug zoo nrog peb cov kwv tij nkauj muam ces peb yuav pom lawv qhov zoo thiab qhov phem. Peb yuav ua li cas, peb thiaj pom lawv qhov zoo xwb? Saib zaj YEEB YAJ KIAB thiab tham txog lo lus no:
-
Koj yuav ua li cas koj thiaj pom qhov zoo ntawm koj cov kwv tij nkauj muam?
Yehauvas saib ntsoov tej qhov zoo ntawm peb xwb. Nyeem 2 Xwmtxheej Vajntxwv 16:9 thiab tham txog lo lus no:
-
Thaum koj paub tias Yehauvas saib ntsoov tej qhov zoo ntawm koj xwb, ua rau koj xav li cas?
Txawm lub nplhaib zoo zoo nkauj no kos me ntsis lawm los yeej tseem muaj nuj nqis. Peb cov kwv tij nkauj muam los zoo ib yam li ntawd, txawm lawv zoo tsis tiav los lawv yeej tseem muaj nuj nqis rau Yehauvas
IB TXHIA HAIS TIAS: “Ua ntej kuv yuav zam txim rau ib tug twg mas nws yuav tsum los thov txim ntawm kuv tso.”
-
Vim li cas peb yuav tau maj nroos zam txim rau lwm tus?
KOJ KAWM TAU DAB TSI
Thaum koj hlub cov kwv tij nkauj muam thiab zam txim rau lawv ces koj yuav txhawb tau lub koom txoos muaj kev sib haum xeeb.
Rov Tham Dua
-
Yuav ua li cas koj thiaj tsis muaj kev ntxub ntxaug?
-
Thaum koj muaj teeb meem nrog ib tug Khixatias, koj yuav ua li cas thiaj zoo?
-
Vim li cas koj thiaj xav xyaum Yehauvas tus qauv thiab zam txim rau lwm tus?
TSHAWB NTXIV
Saib seb Yexus zaj lus piv txwv pab kom peb tsis txhob pheej phua txim rau lwm tus li cas.
Yog peb xav hais tias peb twb tsis tau ua txhaum, puas tsim nyog peb mus thov txim?
“Thov Txim Thiaj Muaj Kev Sib Haum Xeeb” (Phau Tsom Faj lub 11 Hlis tim 1 xyoo 2002)
Saib seb ib txhia tau ua li cas lawv thiaj tsis xaiv ntsej xaiv muag.
Yog koj tsis sib haum nrog ib tug twg ces kav tsij maj nroos nrhiav kev los daws neb qhov teeb meem ua ntej neb tsim tau kev kub ntxhov rau lub koom txoos.
“Yuav Ua Li Cas Sawv Daws Thiaj Nyob Sib Haum Xeeb?” (Phau Tsom Faj lub 5 Hlis xyoo 2016)
a Cov Lus Qhia 6 qhia tias cov Khixatias uas muaj ib tug mob uas yuav kis tau rau lwm tus yuav tau ua li cas.
b Cov Lus Qhia 7 qhia tias yuav daws tau teeb meem ntawm kev lag luam thiab plaub ntug li cas.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
