1. Nyob hauv phau Vajlugkub muab ncuav siv ua dab tsi?

 COV neeg txheej thaum ub uas hais nyob hauv phau Vajlugkub mas ib txwm noj ncuav. (Chivkeeb 14:18; Lukas 4:4) Muaj tej thaud lawv kuj hais tias noj ncuav tiam sis twb yog lawv hais txog noj mov. (Mathais 6:11) Yexus kuj muab ncuav coj los ua txuj ci ob zaug. (Mathais 16:9, 10) Muaj ib zaug hais nyob rau hauv Yauhas tshooj 6. Thaum peb kawm zaj no peb yuav ua tib zoo xav seb yuav pab tau peb lub neej niaj hnub nim no li cas.

 2. Lub caij twg yog lub caij uas cov tib neeg coob coob yuav tau noj mov?

² Tom qab Yexus cov tub txib mus tshaj tawm txoj xov zoo tag, lawv nrog Yexus caij nkoj hla Hiav Txwv Kalilais xwv lawv thiaj tau so me ntsis. (Malakaus 6:7, 30-32; Lukas 9:10) Lawv mus rau ntawm ib qho chaw uas tsis muaj neeg uas hu ua Npexethas. Tsis ntev tom qab ntawd txawm muaj tib neeg coob coob tuaj txog. Yexus thiaj li lauj sij hawm mus qhia lawv txog Vajtswv txoj kev kav thiab kho lawv tej mob zoo du lug. Thaum yuav tsaus ntuj, cov thwj tim xav tias cov tib neeg ntawd yuav mus nrhiav noj rau qhov twg. Muaj ib txhia kuj nqa tau me ntsis zaub mov nrog lawv tiam sis ib txhia yuav tau mus rau hauv zos thiab yuav zaub mov noj. (Mathais 14:15; Yauhas 6:4, 5) Ua li, Yexus yuav ua li cas?

UA TXUJ CI MUAB NCUAV

 3. Yexus hais kom nws cov thwj tim ua dab tsi rau cov neeg coob coob? (Saib daim duab ntawm lub khaum.)

³ Yexus hais rau nws cov tub txib tias: “Cia lawv nyob lawv, nej kuj muab rau lawv noj.” (Mathais 14:16) Cov tib neeg uas  nyob ntawd muaj li 5,000 tus txiv neej tsis suav poj niam thiab me nyuam. Tiam sis yog suav tag nrho mas tej zaum muaj li 15,000 leej. (Mathais 14:21) Anrus hais tias: “Tus me tub no muaj tsib lub ncuav thiab ob tug ntses me me. Tiam sis yuav ua li cas txaus neeg coob npaum li no noj?” (Yauhas 6:9) Ncuav yog ib yam uas tib neeg ib txwm noj hos tej zaum cov ntses kuj muab pleev ntsev qha qhuav qhuav. Txawm li ntawd los qhov uas tus me tub muaj no yuav faib tsis txaus rau tib neeg noj.

 4. Peb khaws tau dab tsi los ntawm Yauhas 6:11-13? (Saib cov duab.)

⁴ Yexus ua qhia tias nws txawj tos txais qhua, nws hais kom sawv daws zaum ntawm cov nyom, ua tej pab tej pawg. (Malakaus 6:39, 40; nyeem Yauhas 6:11-13.) Yexus txawm ua nws Leej Txiv tsaug rau cov ncuav thiab ob tug ntses. Yeej tsim nyog ua Vajtswv tsaug vim nws yog tus uas pub zaub mov. Peb yuav tau xyaum Yexus tus yam ntxwv tias ua ntej noj mov yuav tau thov Vajtswv txawm muaj neeg thiab tsis muaj neeg nyob rau ntawd. Tom qab ntawd Yexus hais kom nws cov thwj tim muab cov zaub mov coj mus faib mas tib neeg noj tsau npo. Tom qab ntawd kuj muaj seem thiab Yexus hais kom mus muab sau cia xwv thiaj tau noj dua. Peb yuav tau xyaum Yexus es tsis txhob muab tej ub tej no nkim pov tseg. Yog tias koj muaj me tub me nyuam, koj yuav tau muab zaj no qhia rau lawv xwv lawv thiaj paub thov Vajtswv, txawj tos txais qhua, thiab muaj siab dawb pub rau luag.

 5. Cov tib neeg xav ua dab tsi tom qab lawv pom tej yam Yexus ua rau hnub ntawd, tiam sis Yexus ho ua li cas?

⁵ Tib neeg qhuas kawg li vim Yexus ua tau txuj ci los kho thiab kuj haj tseem yog ib tug  xib hwb uas ntse tshaj plaws. Lawv nco txog thaum Mauxes hais tias Vajtswv yuav txib ib tug uas cev Vajtswv lus los ces lawv thiaj xav tias Yexus yog tus ntawd. (2 Kevcai 18:15-18) Tej zaum lawv cia siab tias Yexus yuav yog ib tug nom uas kav tau zoo tshaj thiab nws yuav faib tau zaub mov rau txhua tus Ixayees noj. Yog li ntawd, cov neeg coob coob thiaj xav “muab nws ntes los tsa ua vaj ntxwv.” (Yauhas 6:14, 15) Nyob rau thaum lub caij ntawd cov neeg Loos yog cov uas kav cov Yudais. Yog Yexus cia cov Yudais tsa nws ua vaj ntxwv ces nws kuj koom siab nrog lawv ua nom ua tswv. Tiam sis Yexus tsis cia lawv ua li ntawd. Nyob rau hauv phau Vajlugkub hais tias Yexus “mus tib leeg rau saum roob lawm.” Txawm tib neeg yuam Yexus los nws tsis kam nrog lawv leg tej kev nom kev tswv. Peb khaws tau ntau yam heev los ntawm zaj no!

 6. Peb xyaum tau Yexus tus yam ntxwv li cas? (Saib daim duab.)

⁶ Tib neeg yeej yuav tsis nug kom peb ua txuj ci muab mov rau lawv noj, kho cov neeg muaj mob los sis ua lawv tus vaj ntxwv. Tiam sis lawv yeej yuav txhob kom peb koom tes nrog lawv xaiv nom xaiv tswv. Yexus yeej qhia meej meej tias nws tsis kam raus tes nrog tej kev nom kev tswv. Nws hais tias: “Kuv txoj kev kav tsis txuam nrog qab ntuj neeg.” (Yauhas 17:14; 18:36) Niaj hnub nim no peb uas yog cov Khixatias yuav tau xyaum Yexus tus yam ntxwv thiab xav li nws xav. Zoo ib yam li nws, peb tsuas txhawb Vajtswv txoj kev kav xwb, peb muab qhia rau lwm tus, thiab peb thov  kom lub Nceeg Vaj los kav. (Mathais 6:10) Tseem tshuav qho yam uas peb khaws tau los ntawm qhov uas Yexus ua txuj ci pub ncuav.

“YEXUS MUAB NCUAV FAIB RAU SAWV DAWS NOJ”

 7. Yexus ua dab tsi, thiab nws cov tub txib ua li cas? (Yauhas 6:16-20)

⁷ Tom qab Yexus pub mov rau cov neeg coob coob noj tag, nws hais kom nws cov tub txib caij nkoj rov qab mus rau Khapena-us hos nws mus rau saum roob xwv cov tib neeg ntawd thiaj tsis muab nws tsa ua vaj ntxwv. (Nyeem Yauhas 6:16-20.) Thaum cov tub txib tab tom caij nkoj txawm muaj cua ntsawj hlob heev ua rau dej nphau tej niag nthwv. Yexus txawm taug ko taw saum nplaim dej los rau ntawm lawv thiab hais kom Petus taug ko taw saum nplaim dej mus cuag nws. (Mathais 14:22-31) Thaum Yexus mus txog rau ntawm lub nkoj, cov cua txawm tus. Cov tub txib xav tsis thoob, lawv thiaj hais tias: “Koj yeej yog Vajtswv tus Tub tiag.” (Mathais 14:33) Yexus twb ua qhov txuj ci pub ncuav ua ntej tiam sis tom qab no thaum Yexus taug ko taw saum nplaim dej ces lawv mam li lees tias Yexus yog Vajtswv tus Tub. Malakaus sau txog tej nws pom tias: “Tej no ua rau [cov tub txib] xav tsis thoob li. Tsim nyog lawv paub tej no vim lawv twb pom Yexus muab ncuav faib rau sawv daws noj los lawv tseem tsis nkag siab Yexus lub hwj chim thiab.” (Malakaus 6:50-52) Cov tub txib tsis nkag siab tias Yehauvas muab hwj chim rau Yexus ua ntau tshaj li qhov uas pub mov rau tib neeg noj xwb. Tsis ntev tom qab ntawd, Yexus kuj tham txog qhov txuj ci uas pub ncuav thiab kuj qhia seb peb khaws tau li cas.

8-9. Vim li cas cov neeg coob coob ho nrhiav Yexus? (Yauhas 6:26, 27)

⁸ Cov tib neeg coob coob uas Yexus pub mov rau noj tsuas xav txog tias yuav ua li cas lawv thiaj tau noj ntxiv xwb thiab tsuas xav txog tej yam lawv ntshaw. Tos peb paub li no los hnub tom qab thaum lawv pom tias Yexus thiab nws cov thwj tim mus dua lwm qhov lawm, lawv thiaj li caij nkoj mus rau Khapena-us mus nrhiav Yexus. (Yauhas 6:22-24) Puas yog lawv nrhiav kom lawv thiaj tau hnov Yexus qhia txog lub Nceeg Vaj? Tsis yog. Lawv tsuas xav txog tias yuav ua li cas thiaj tau mov noj ntxiv. Ua li cas peb ho paub txog tej no?

⁹ Thaum cov tib neeg tuaj nrhiav tau Yexus nyob ze Khapena-us, Yexus hais rau lawv tias lawv tsuas yog xav tuaj nrhiav mov noj xwb. Nws xam pom tias lawv noj “tej zaub mov uas txawj lwj” thiab noj tau “tsau npo.” Nws thiaj txhawb kom lawv mus “nrhiav tej zaub mov uas tsis txawj lwj kom tau txoj sia ntev dhawv mus ib txhis.” (Nyeem Yauhas 6:26, 27.) Cov zaub mov uas tsis txawj lwj thiaj yog cov uas nws Leej Txiv thiaj muab tau xwb. Yexus tej lus no ua rau lawv xav tsis thoob vim lawv tsis tau pom tej zaub mov zoo li ntawd dua li thiab lawv xav tias yuav ua li cas thiaj tau cov zaub mov ntawd los noj.

10. Cov tib neeg yuav tau ua dab tsi xwv lawv thiaj “tau txoj sia ntev dhawv mus ib txhis”?

¹⁰ Cov Yudais xav paub seb lawv yuav tau ua li cas lawv thiaj tau cov zaub mov ntawd noj. Tej zaud lawv kuj xav tias lawv yuav tau ua tej yam nyob hauv Mauxes Txoj Kev Cai. Tiam sis Yexus hais rau lawv tias: “Vajtswv tes hauj lwm yog kom nej ntseeg tus uas nws txib los.” (Yauhas 6:28, 29) Yog li ntawd, lawv yuav tau muaj kev ntseeg rau Yexus xwv lawv thiaj “tau txoj sia ntev dhawv mus ib txhis.” Yexus twb tau hais txog tej no dua los lawm. (Yauhas 3:16-18, 36) Tsis tas li ntawd, nws kuj hais txog seb yuav ua li cas thiaj tau txoj sia ntev dhawv mus ib txhis.​—Yauhas 17:3.

11. Cov Yudais qhia li cas tias lawv tsuas xav tau mov noj xwb? (Phau Ntawv Nkauj 78:24, 25)

 ¹¹ Cov Yudais ntawd tsis ntseeg tias lawv yuav tau muaj kev ntseeg rau Yexus. Lawv thiaj nug nws tias: “Koj yuav ua txuj ci dab tsi xwv peb thiaj pom thiab ntseeg koj?” (Yauhas 6:30) Lawv hais tias lawv tej poj koob yawm txwv uas nyob rau Mauxes tiam tau manas los noj. (Nehemis 9:15; nyeem Phau Ntawv Nkauj 78:24, 25.) Qhov no qhia tseeb tseeb tias lawv lub siab haj tseem nyob rau ntawm tej mov uas nws muab rau lawv noj. Txuas ntxiv ntawd, thaum Yexus hais txog “cov mov saum ntuj” los lawv tsis nug Yexus seb yog li cas tiag. (Yauhas 6:32) Lawv tsuas xav txog seb yuav ua li cas thiaj tsau lawv plab, lawv twb tsis quav ntsej txog seb Yexus qhia kom lawv ua li cas thiaj yuav tau txoj sia ntev dhawv mus ib txhis. Peb khaws tau li cas los ntawm zaj no?

YAM UAS TSEEM CEEB TSHAJ RAU PEB

12. Yexus qhia tias yam twg tseem ceeb dua?

¹² Mloog Vajtswv lus thiab muaj kev sib raug zoo nrog nws yuav tsum yog yam uas tseem ceeb tshaj plaws rau peb. Thaum Yexus raug Xatas sim, nws ua qhia tias mloog lus tseem ceeb tshaj zaub mov. (Mathais 4:3, 4) Thaum Yexus qhia saum roob, nws qhia tias tseem ceeb heev rau peb nrog Vajtswv sib raug zoo. (Mathais 5:3) Yog li ntawd, peb yuav tau rov tshuaj peb tus kheej li no tias, ‘Kuv lub neej puas qhia tias kuv txhawj xeeb txog kuv txoj kev sib raug zoo nrog Yehauvas dua li tej yam uas kuv lub siab ntshaw?’

13. (1) Vim li cas ho tsis txhaum rau peb noj haus? (2) Povlauj ceeb toom peb txog dab tsi? (1 Kauleethaus 10:6, 7, 11)

¹³ Yeej tsis ua li cas yog peb xav thov Vajtswv rau tej yam uas peb cheem tsum thiab xav kom tau tej yam ntawd los siv. (Lukas 11:3) Nyob hauv phau Vajlugkub hais tias “yam uas zoo tshaj plaws rau tibneeg yog kev noj kev haus, thiab txaus siab rau tej uas nws khwv tau los ntawd. . . . tej ntawd puavleej yog los ntawm Vajtswv.” (Tej Lus Qhia 2:24; 8:15; Yakaunpaus 1:17) Txawm li ntawd los peb yuav tau ceev faj tsis txhob saib tej yam ub yam no muaj nuj nqis dua hauv peb lub neej. Thaum Povlauj nrog cov Khixatias tham, nws hais txog tej yam cov Ixayees tau ua tsis zoo nyob ze lub Roob Xinais. Nws ceeb toom cov Khixatias kom “tsis txhob muaj lub siab ntshaw yam uas phem ib yam li [cov Ixayees] ntshaw.” (Nyeem 1 Kauleethaus 10:6, 7, 11.) Cov Ixayees cia qhov uas lawv ntshaw zaub mov ua rau lawv tsis nco qab ris txiaj ntsig rau tej yam uas Yehauvas muab pub rau lawv. (Teev Npe 11:4-6, 31-34) Thaum lawv pe hawm tus mlom nyuj, lawv tsuas xav txog noj tsau haus qaug thiab muaj kev lom zem dua li mloog Yehauvas lus. (Khiav Dim 32:4-6) Povlauj muab lawv cov yam ntxwv no los ceeb toom cov Khixatias uas nyob ze rau lub caij uas Yeluxalees thiab lub tuam tsev yuav raug puas tsuaj nyob rau xyoo 70 tom qab Yexus. Tam sim no peb nyob rau lub caij uas lub sim ceeb no yuav kawg ces peb yuav tau mloog Povlauj cov lus ceeb toom no.

14. Thaum txog lub ntiaj teb tshiab, phau Vajlugkub hais tias yuav muaj tej zaub mov zoo li cas?

¹⁴ Thaum Yexus hais kom peb thov “kom peb muaj txaus noj rau hnub no,” nws kuj hais kom peb thov “kom txhua yam hauv ntiaj teb muaj tiav raws li [Vajtswv] lub siab nyiam ib yam li saum ntuj.” (Mathais 6:9-11) Nyob hauv koj lub zeem muag, koj xav tias lub ntiaj teb thaum ntawd yuav zoo li cas? Raws li Yaxayas 25:6-8 hais tias yuav muaj zaub mov nplua mias. Hos Phau Ntawv Nkauj 72:16 hais tias: “Thov kom lub [ntiaj teb] muaj nplej  ntsu nplua mias, thov kom muaj qoobloo puv nkaus saum tej pov roob.” Koj puas tos tsis hnyu yuav muab tej nplej thaum ntawd coj los ua ncuav noj los sis ua lwm yam zaub mov noj? Koj puas tos ntshis yuav cog tej vaj txiv hmab thiab tos tsis hnyu yuav muab tsuam cawv haus? (Yaxayas 65:21, 22) Thaum ntawd tsis yog koj ib leeg xwb thiaj tau tej no, txhua tus thoob plaws hauv ntiaj teb no yuav tau li koj tau tib yam nkaus.

15. Cov tib neeg uas Vajtswv tsa sawv rov qab los yuav kawm txog dab tsi? (Yauhas 6:35)

¹⁵ Nyeem Yauhas 6:35. Thaum Vajtswv tsa cov uas tuag lawm sawv rov qab los, tej zaud koj kuj yuav ntsib cov uas noj cov ncuav thiab cov ntses uas Yexus ua txuj ci muab rau sawv daws noj. Txawm nyob rau lub caij ntawd lawv tsis muaj kev ntseeg rau Yexus los tej zaum lawv kuj yuav tau sawv rov qab los thiab. (Yauhas 5:28, 29) Thaum lawv sawv los lawd, lawv yuav tau kawm txog tej uas Yexus qhia tias: “Kuv yog cov mov uas pub txoj sia. Tus uas los cuag kuv yuav tsis tshaib li.” Lawv yuav tau ntseeg tias Yexus tuag txhiv tib neeg txoj sia. Thaum lub sij hawm ntawd, yuav muaj kev cob qhia rau cov uas Vajtswv tsa sawv rov los thiab cov me nyuam yug rau lub caij ntawd. Peb yuav zoo siab heev vim peb muaj ib feem pab kom tib neeg nrog Yehauvas sib raug zoo. Haj tseem yuav zoo tshaj li qhov uas peb tau tej ncuav qab qab rau lub caij ntawd noj.

16. Nyob rau zaj txuas ntxiv tom ntej no peb yuav kawm txog dab tsi?

¹⁶ Peb tsuas tham txog ib nrab ntawm Yauhas tshooj 6 xwb. Haj tseem tshuav ntau yam uas Yexus yuav qhia peb txog “txoj sia ntev dhawv mus ib txhis.” Cov Yudais uas nyob rau Yexus lub caij yuav tau tig pob ntseg los mloog Yexus qhia. Peb cov uas nyob rau lub sij hawm no los yuav tau mloog tib yam nkaus. Nyob rau zaj txuas ntxiv tom ntej no peb mam li kawm ntxiv txog Yauhas tshooj 6.