NYOB hauv lub teb chaws Nkuatemalam (Guatemala) ntawm ib lub me nyuam zos, muaj ib tug ntxhais npe hu ua Yaumelas (Yomara) thiab nws ob tug nus hu ua Maxelaum (Marcelo) thiab Hivaws (Hiver). Yaumelas yog tus xub xub kawm Vajlugkub nrog Yehauvas Cov Tim Khawv ces tom qab no nws ob tug nus mam li kawm thiab. Lawv peb nus muag tsis pom kev thiab lawv tsis txawj nyeem cov ntawv uas sau rau cov neeg tsis pom kev. Yog li ntawd, tus uas qhia Vajlugkub rau lawv thiaj li nyeem cov ntaub ntawv thiab cov nqe Vajlugkub rau lawv mloog xwb.

Thaum hais txog mus kev sib txoos los yeej nyuaj kawg li rau lawv tib yam nkaus. Lawv peb nus muag tsis pom kev tuaj rau ntawm lub Tsev Nceeg Vaj uas deb li 40 feeb. Tiam sis cov kwv tij nyob hauv lub koom txoos yeej sib pab nroos kom lawv tuaj tau kev sib txoos. Thaum lawv pib ua yeeb yam qhia saum sam thiaj rau txoj kev sib txoos 1, los cov kwv tij yeej pab kom lawv cim tau zaj lawv yuav hais ntawd.

Nyob rau lub 5 Hlis xyoo 2019, txawm pib muaj kev sib txoos nyob rau ntawm peb nus muag ntawd lub zos lawm. Thaum lub caij lub nyoog no, muaj ib khub niam txiv uas yog cov tho kev kuj tsiv mus nyob rau hauv lawv lub zos thiab. Tab txawm ob niam txiv tsis tshua txawj nyeem cov ntawv rau cov neeg tsis pom kev los nkawd kuj lauj sij hawm pab qhia rau lawv peb nus muag kom txawj nyeem. Nkawd ob niam txiv mus rau hauv ib lub tsev khaws ntaub ntawv thiab mus kawm kom txawj cov ntawv sau rau cov tsis pom kev seb yog li cas rau li cas thiaj paub qhia rau lawv peb nus muag.

Tau ob peb lub hlis xwb, lawv peb nus muag txawm nyeem tau cov ntawv uas sau rau cov neeg tsis pom kev. Qhov uas lawv txawj nyeem li no pab tau kom lawv txoj kev sib raug zoo nrog Yehauvas ruaj khov. a Tam sim no lawv peb nus muag ua peb tug tho kev lawm. Maxelaum yog ib tug tub leg num. Txhua txhua hnub, lawv yeej rau siab ntso ua Yehauvas tes hauj lwm. Qhov no kuj pab tau kom lwm tus kub siab ua thiab.

Lawv peb nus muag ris txiaj ntsig kawg nkaus li rau cov ntseeg hauv lub koom txoos. Yaumelas hais tias: “Thaum kuv ntsib Yehauvas Cov Tim Khawv thawj thawj zaug, kuv pom tias lawv txawj sib hlub sib pab heev.” Maxelaum hais tias: “Peb cov phooj ywg nyob hauv lub koom txoos mas zoo siab thiab peb zoo siab tau los nrog ib tse neeg uas nyob thoob plaws ntiaj teb uas muaj kev sib hlub sib pab li no.” Yaumelas thiab nws ob tug nus lawv tos tsis hnyu txog hnub uas lawv yuav pom Yehauvas txhim kho lub ntiaj teb no ua ib lub vaj kaj siab.​—Phau Ntawv Nkauj 37:10, 11; Yaxayas 35:5.