1. Vim li cas koj zoo siab tias muaj phau Vajlugkub?

 PEB zoo siab kawg nkaus li tias Vajtswv Yehauvas tau muab phau Vajlugkub rau peb! Nyob thoob plaws phau Vajlugkub, muaj nws tej lus qhuab ntuas kom pab peb txawj kho peb tej teeb meem niaj hnub nim no. Nws kuj pub kom peb muaj kev vam kev cia siab rau yav tom ntej. Tiam sis qhov uas tseem ceeb tshaj yog nws qhia peb txog nws tus xeeb ceem. Thaum peb ua zoo xav txog tej yeeb yam uas nws muaj, ua rau peb lub siab qaug lais thiab tshoj tau peb lub siab los nrog nws sib raug zoo.​—Phau Ntawv Nkauj 25:14.

2. Yehauvas tau ua tej twg los qhia tib neeg txog nws?

² Yehauvas xav kom tib neeg paub nws. Yav tag los lawm, nws thiaj los ua npau suav, ua yog toog, thiab xa cov tub txib saum ntuj los nrog neeg tham. (Teev Npe 12:6; Tes Haujlwm 10:3, 4) Yog tsis muab tej no sau tseg ces peb yeej tsis paub txog li. Yog li ntawd, Yehauvas thiaj txib kom neeg “sau tej lus uas [nws] hais . . . rau ib phau ntawv” xwv peb thiaj paub los txog niaj hnub nim no. (Yelemis 30:2) “Tus Vajtswv no nws tes haujlwm yeej zoo tshaj plaws li,” peb thiaj tso siab plhuav tias nws Txoj Lus meej tseeb thiab yuav pab peb.​—Phau Ntawv Nkauj 18:30.

3. Yehauvas saib xyuas li cas thiaj txuag tau phau Vajlugkub los txog niaj hnub nim no? (Yaxayas 40:8)

³ Nyeem Yaxayas 40:8. Vajtswv Txoj Lus yeej cob qhia cov ntseeg kom txawj ua neej tau ntau txhiab xyoo los lawm. Vajtswv txuag nws Txoj Lus li cas? Thaum thawj, phau Vajlugkub yog muab sau rau tej kauj ntawv uas ntev mus ntev tuaj, nws txawj qub txawj piam. Tam sim no peb tsis muaj cov ntawv no nyob rau qhov twg li lawm. Tiam sis Yehauvas saib ntshis kom tib neeg muab nws cov lus sau tas zog rau cov ntawv tshiab kom thiaj tau siv. Txawm  cov neeg ntawd yog noob txaug neeg txhaum los lawv yeej ua tib zoo sau. Xws li muaj ib tug neeg tshawb fawb Vajlugkub hais txog Cov Nqe Lus Henplais tias: “Peb paub tias tsis muaj ib phau ntawv qub qub puag thaum ub twg uas rov muab sau rau daim ntawv tshiab es tseem txuag tau tej lus hauv cia npaum li cov lus no.” Yog li ntawd txawm yav thaum ub tau muab Vajlugkub sau rau tej ntaub ntawv uas txawj lwj thiab tej neeg sau los yog noob txaug neeg txhaum, peb paub tseeb tias thaum peb nyeem phau Vajlugkub haj tseem txuag tau tus sau phau Vajlugkub, uas yog Yehauvas tej lus tseg cia.

4. Nyob rau hauv zaj kawm no yuav piav txog dab tsi?

⁴ Yehauvas muab “ib puas tsav yam uas zoo thiab ib puas tsav yam koob hmoov uas zoo kawg nkaus” rau peb. (Yakaunpaus 1:17) Phau Vajlugkub yog ib yam uas zoo heev Yehauvas tau muab rau peb. Thaum ib tug twg muab ib yam khoom rau peb, yeej qhia tau tias nws paub peb zoo thiab nws yeej paub tias peb tu ncua yam ntawd. Phau Vajlugkub los yeej zoo ib yam li ntawd. Thaum peb ua tib zoo tshuaj, peb pom tau tias Yehauvas yeej paub peb zoo thiab tej twg peb tu ncua. Nyob rau hauv zaj kawm no yuav piav txog peb yam uas nyob hauv phau Vajlugkub txog Yehauvas tej yeeb yam uas yog: nws lub tswv yim, nws txoj kev ncaj ncees, thiab nws txoj kev hlub. Ua ntej no cia peb mus piav seb nyob hauv phau Vajlugkub qhia li cas txog Yehauvas lub tswv yim.

5. Muaj ib txoj hau kev uas phau Vajlugkub nthuav tawm Vajtswv lub tswv yim yog li cas?

⁵ Yehauvas yeej paub zoo hais tias peb yuav tsum tau nws tej lus ntuas. Yog li ntawd, nyob hauv phau Vajlugkub thiaj muaj nws lub tswv yim puv ntia. Tej lus qhuab ntuas nyob hauv phau Vajlugkub kho tau neeg lub neej. Thaum Mauxes nyuam qhuav pib sau thawj ob peb phau ntawv hauv phau Vajlugkub, nws hais rau cov neeg Ixayees tias: “Tej lus ntawd tsis yog tej uas tsis muaj hauvpaus hauvntsis, tiamsis yog tej uas cawm tau nej txojsia.” (2 Kevcai 32:47) Cov uas mloog Vajtswv tej lus ntuas yeej ua lub neej vam meej ntxhias thiab kaj siab lug. (Phau Ntawv Nkauj 1:2, 3) Txawm tias Vajtswv Txoj Lus sau tau ntev ntev lawm los haj tseem kho tau tib neeg lub neej. Xws li nyob hauv lub vej xaij jw.org/hmn, ntawm ntu “Vajlugkub Kho Tau Lub Neej,” koj yuav pom tias muaj ntau ntau zaj qhia txog seb phau Vajlugkub “ua haujlwm hauv [peb] cov uas ntseeg lawm lub siab” li cas rau li cas niaj hnub nim no.​—1 Thexalaunikes 2:13.

6. Vim li cas peb ho tias tsis muaj ib phau ntawv zoo cuag li phau Vajlugkub?

⁶ Tsis muaj ib phau ntawv zoo cuag li Vajtswv Txoj Lus, yeeb vim yog Vajtswv Yehauvas yog tus tshoov kom neeg sau phau Vajlugkub. Nws muaj hwj chim tshaj plaws, nyob mus ib txhis, thiab nws lub tswv yim yeej muab piv tsis tau rau leej twg. Muaj ntau phau ntawv kuj nyob ntev tshaj li tus uas sau phau ntawv. Tab txawm li ntawd los ntev mus ntev tuaj, tej ntsiab lus hauv tsis muaj qab hau lawm. Tiam sis cov lus uas nyob hauv phau Vajlugkub yeej tsis txawj dua thiab cov lus ntawd yeej pab tau neeg lub neej ib txheej dhau ib txheej, ib tis dhau ib tis. Thaum peb nyeem thiab xav txog tej ntsiab lus peb tau nyeem ntawd, tus uas tshoov neeg sau phau Vajlugkub kuj siv nws lub hwj huam dawb huv los pab peb khaws tej ntsiab lus ntawd kom kho tau peb lub neej. (Phau Ntawv Nkauj 119:27; Malakis 3:16; Henplais 4:12) Nws yeej muaj siab zim xav pab peb tiag tiag. Thaum peb paub li no lawm, tsim nyog tshoj tau peb lub siab ntsws kom nyeem phau Vajlugkub tsis tseg tsis tu.

7. Yav thaum ub, tej lus nyob hauv phau Vajlugkub pab tau kom Vajtswv cov tib neeg sib koom siab li cas?

⁷ Muaj dua ib yam ntxiv qhia tias tej lus nyob hauv phau Vajlugkub ntim Vajtswv lub tswv yim puv ntia, yog pab tau Vajtswv cov tib neeg sib koom siab. Thaum cov Ixayees nkag mus rau lub teb chaws Vajtswv cog tseg, lawv mus nyob puv ntia qhov txhia qhov chaw. Ib txhia Ixayees yog  neeg nuv ntses, ib txhia tu tsiaj tu txhuv, thiab ib txhia yog neeg ua liaj ua teb. Yog li ntawd, cov Ixayees uas nyob rau ib sab teb chaws yeej tsis nug tsis thuv txog cov uas nyob rau lwm sab teb chaws. Tiam sis Yehauvas teem caij kom sawv daws tuaj sib txoos ua ke mloog nws tej lus. (2 Kevcai 31:10-13; Nehemis 8:2, 8, 18) Muab xav li no tias yog ib tug Ixayees tuaj hauv Yeluxalees es pom coob leej ntau tus Ixayees nyob rau lwm sab teb chaws tuaj, ntshe yuav ua rau nws zoo siab heev. Qhov no yog Yehauvas pab kom nws cov tib neeg muaj kev sib koom siab. Tom qab no cov ntseeg tsis hais poj niam los sis txiv neej, nyias yeej hais nyias ib yam lus. Ib txhia kuj muaj txiag nplua nuj hos ib txhia tsis muaj nyiaj. Tiam sis lawv nyiam Vajtswv Txoj Lus, lawv thiaj li sib koom siab pe hawm Vajtswv ua ke. Cov uas nyuam qhuav los ntseeg nkag siab Vajtswv Txoj Lus twb yog muaj cov xub ntseeg lawm pab, thiab lawv mus sib txoos ua ke.​—Tes Haujlwm 2:42; 8:30, 31.

8. Niaj hnub nim no, tej lus nyob hauv phau Vajlugkub pab tau kom Yehauvas cov tib neeg sib koom siab li cas?

⁸ Vajtswv haj tseem niaj hnub siv tej lus nyob hauv phau Vajlugkub los cob qhia thiab kho kom nws cov tib neeg sib koom siab. Nyob hauv phau Vajlugkub, tsuas muaj qhia qhov tseeb txog Yehauvas rau tib neeg paub. Peb yeej mus kev sib txoos thiab tej rooj sib txoos tsis tseg tsis tu xwv peb thiaj tau mloog cov kwv tij nyeem, txhais, thiab piav cov nqe Vajlugkub rau peb. Yog li ntawd, phau Vajlugkub yeej yog ib yam tseem ceeb heev uas Yehauvas tau siv los pab nws cov tib neeg sib koom siab.​—Xefaniyas 3:9.

9. Yuav kom peb nkag siab tej lus nyob hauv phau Vajlugkub, peb yuav tau muaj tus yeeb yam twg? (Lukas 10:21)

 ⁹ Cia peb mus piav txog ib yam ntxiv uas qhia tias Yehauvas muaj tswv yim heev. Nws tshoov kom cov lus hauv phau Vajlugkub sau tau mus rau ib seem uas tsuas yog cov neeg txo hwj chim nyeem txog thiaj li nkag siab xwb. (Nyeem Lukas 10:21.) Tib neeg nyob rau qhov txhia qhov chaw puav leej nyeem phau Vajlugkub. Ib tug neeg tshawb fawb Vajlugkub tau hais tias phau Vajlugkub “tsis yog neeg nyeem coob coob xwb tiam sis neeg kuj muab tshuaj kom tshab tshaj lwm phau ntawv.” Txawm li ntawd los, tsuas yog cov neeg txo hwj chim thiaj li nkag siab tau tej lus ntawd tiag tiag thiab muab tej lus ntawd coj los siv rau lub neej.​—2 Kauleethaus 3:15, 16.

10. Muaj dua ib yam ntxiv uas tej lus nyob hauv phau Vajlugkub hais txog Yehauvas lub tswv yim yog li cas?

¹⁰ Peb kawm tau ib yam ntxiv hauv phau Vajlugkub uas hais txog Yehauvas lub tswv yim. Yehauvas tsis yog siv cov nqe Vajlugkub los mus cob qhia nws cov tib neeg ua ib pawg xwb tiam sis nws kuj siv los mus qhia thiab txhawb ib tug dhau ib tug. Thaum peb nyeem txog Yehauvas cov lus, peb yeej pom tias nws yeej xam muaj peb ib tug dhau ib tug. (Yaxayas 30:21) Thaum koj raug kev nyuaj siab, puas muaj ntau zaug koj muab Vajlugkub coj los nthuav nyeem es zoo yam li cov nqe ntawd hais cob coos rau koj? Phau Vajlugkub tsis yog pab tau koj xwb tiam sis yeej pab tau coob leej ntau tus tib neeg. Vim li cas cov lus nyob hauv phau Vajlugkub twb sau puag txheej thaum ub lawm los ho hais tau raug nkaus li tej koj tab tom raug tam sim no? Tos hais tau raug koj los, yeeb vim yog tus tshoov neeg sau phau Vajlugkub yog tus uas ntse tshaj plaws dua tej huv tib si.​—2 Timautes 3:16, 17.

11. Thaum Vajtswv tshoov neeg sau phau Vajlugkub, nws tsis xaiv ntsej muag li cas?

¹¹ Txoj kev ncaj ncees yog Yehauvas ib qho yeeb yam. (2 Kevcai 32:4) Thaum ib tug twg coj ncaj ncees, nws yeej tsis xaiv ntsej xaiv muag. Yog li ntawd, Yehauvas yeej tsis xaiv leej twg ntsej muag. (Tes Haujlwm 10:34, 35; Loos 2:11) Peb yeej pom li ntawd rau qhov tej lus nyob hauv phau Vajlugkub sau ua yam lus uas tib neeg hais nyob rau tiam ntawd. Xws li thawj 39 phau ntawv feem ntau yog sau ua lus Henplais vim Vajtswv cov tib neeg to taub yam lus ntawd heev dua. Tiam sis thaum thawj 100 xyoo, cov ntseeg nyob rau tiam ntawd hais lus Kilis ntau dua ces thiaj muab 27 phau ntawv tom qab sau ua lus Kilis. Tej no qhia tias Yehauvas tsis txiav tsis txwv nws Txoj Lus ua ib yam lus xwb. Niaj hnub nim no, muaj yuav luag li yim txhiab plhom tawm leej tib neeg hais ntau hom lus. Ua li tib neeg coob npaum li no, ua cas lawv ho los paub tau Yehauvas thiab?

12. Muaj ib yam uas Daniyees 12:4 muaj tshwm sim nyob rau tiam kawg yog li cas?

¹² Daniyees tus cev Vajtswv lus tau hais tias Yehauvas cog lus tias nyob rau tiam kawg, “kev nkag siab” rau Vajtswv Txoj Lus “yuav huaj vam zuj zus.” (Nyeem Daniyees 12:4. b) Ib yam uas pab tau tib neeg nkag siab phau Vajlugkub yog muab phau Vajlugkub thiab tej ntaub ntawv Vajlugkub txhais ua ntau yam lus, muab luam tawm, thiab muab tseb rau tib neeg. Phau Vajlugkub yog ib phau ntawv uas muab txhais ua lwm yam lus ntau tshaj plaws thiab muab tseb ntau tshaj plaws thoob qab ntuj. Muaj ib txhia txhais tau phau Vajlugkub ces lawv muab luam tawm thiab sau nqi hnyav heev. Tiam sis Yehauvas cov tib neeg txhais Vajtswv Txoj Lus tshaj li 240 yam lus los lawv tsis sau nqi yog muaj ib tug twg xav tau. Yog li ntawd, tib neeg uas hais txhua yam lus thiaj li hnov “txoj xov zoo txog Vajtswv txoj kev kav” ua ntej lub sim ceeb no kawg.  (Mathais 24:14) Vajtswv ncaj ncees kawg li, nws thiaj li cia kom muaj phau Vajlugkub xwv tib neeg thiaj li los paub nws. Tos nws ua li no los, yeeb vim yog nws hlub peb tshaj plaws li.

13. Tej lus hauv phau Vajlugkub nthuav tawm Yehauvas txoj kev hlub li cas? (Yauhas 21:25)

¹³ Nyob hauv phau Vajlugkub yeej muaj puav pheej qhia txog Yehauvas qhov yeeb yam loj tshaj plaws uas yog txoj kev hlub. (1 Yauhas 4:8) Txawm Yehauvas yuav hais txog thiab tsis hais txog nyob hauv phau Vajlugkub los nws yeej muab yam uas nws paub hais tias yuav pab tau peb nrog nws sib raug zoo, ua lub neej kaj siab lug tam sim no, thiab kom tau txoj sia ntev dhawv mus ib txhis. Yehauvas txawj xav kawg li nws thiaj tsis hais ntau tsav ntau yam kom ua rau peb yoob tas.​—Nyeem Yauhas 21:25.

14. Muaj dua ib yam ntxiv uas tej lus nyob hauv phau Vajlugkub hais txog Yehauvas txoj kev hlub yog li cas?

¹⁴ Nyob hauv phau Vajlugkub, Yehauvas hais tej lus zoo zoo kom tsav tau peb xwb. Qhov no yog nws qhia nws txoj kev hlub rau peb. Nyob hauv phau Vajlugkub, nws tsis sau kev cai ntau ntau los mus txwv peb ua ub ua no. Tiam sis nws tshoov kom neeg sau txog tej tug lub neej, tej faj lem, thiab tej lus qhuab ntuas los mus pab peb txawj txiav txim siab ua neej. Nws ua li no xwv nws Txoj Lus thiaj li tshoj tau peb lus siab lub ntsws kom xav teev tiam thiab mloog nws lus.

15. (1) Thaum peb nyeem phau Vajlugkub, vim li cas peb ho paub hais tias Yehauvas hmov tshua peb? (2) Nyob hauv daim duab tus ntxhais, tus kwv tij hluas, thiab tus nkauj muam laus xav txog leej twg hauv phau Vajlugkub los pab lawv? (Chivkeeb 39:1, 10-12; 2 Vajntxwv 5:1-3; Lukas 2:25-38)

¹⁵ Nyob hauv phau Vajlugkub qhia tshwm tias Yehauvas hmov tshua peb kawg nkaus li. Ua li nws hmov tshua li cas? Nyob hauv nws Txoj Lus,  yeej muaj ntau zaj hais txog tib neeg tej kev xav. Thaum peb nyeem txog cov tib neeg ntawd, yeej pom tau tias lawv muaj siab ntsws thiab yog “neeg zoo li peb xwb.” (Yakaunpaus 5:17) Thaum peb nyeem txog tej zaj uas Yehauvas coj li cas rau li cas rau tib neeg ces peb mam li pom tias Yehauvas “muaj lub siab hlub thiab hmov tshua” npaum li cas rau tib neeg.​—Yakaunpaus 5:11.

16. Peb kawm tau li cas txog Yehauvas thaum peb nyeem phau Vajlugkub es pom tej tug ua txhaum rau nws? (Yaxayas 55:7)

¹⁶ Cia peb mus piav txog ib yam ntxiv uas qhia tias Yehauvas hlub tshua peb heev. Vajtswv Txoj Lus yeej qhia meej tseeb tias Yehauvas yuav tsis tso peb tseg thaum peb ua tau ib yam twg yuam kev. Cov Ixayees ua txhaum rau Yehauvas ib zaug tas ib zaug tuaj los thaum lawv tso lawv tej kev txhaum tseg, nws yeej zam txim pub rau lawv. (Nyeem Yaxayas 55:7.) Cov ntseeg nyob thawj 100 xyoo yeej paub hais tias Yehauvas hlub lawv kawg nkaus li. Vajtswv tshoov kom tus tub txib Povlauj txhawb cov ntseeg kom “zam txim thiab nplij” tus txiv neej uas tau ua txhaum tiam sis ho tso nws tej kev txhaum tseg lawm. (2 Kauleethaus 2:6, 7; 1 Kauleethaus 5:1-5) Yog li ntawd, Yehauvas tsis muab cov tib neeg uas pe hawm nws tso tseg thaum lawv ua tau ib yam twg yuam kev. Tiam sis nws yeej pab lawv, qhuab ntuas lawv, thiab caw kom lawv rov qab los cuag nws dua. Nws yeej ua li ntawd rau cov uas tau tso lawv tej kev txhaum tseg niaj hnub no ib yam nkaus.​—Yakaunpaus 4:8-10.

17. Vim li cas phau Vajlugkub yog ib qho khoom pub zoo ua luaj?

¹⁷ Yehauvas tau muab ib qho khoom pub zoo kawg nkaus li rau peb. Vim li cas nws Txoj Lus yog ib qho khoom zoo ua luaj? Raws li peb tau kawm tas los no, tej uas nyob hauv phau Vajlugkub nthuav tawm Vajtswv lub tswv yim, nws txoj kev ncaj ncees, thiab nws txoj kev hlub. Phau ntawv no pab tau rau peb pom tias Yehauvas xav kom peb los paub nws thiab los nrog nws sib raug zoo.

18. Peb yuav ua li cas qhia tias peb ris txiaj ntsig rau phau Vajlugkub uas Yehauvas tau muab rau peb?

¹⁸ Peb yuav tau nco qab ntsoov tias Vajtswv Txoj Lus yog “yam zoo uas pub rau peb.” (Yakaunpaus 1:17) Cia peb nco ntsoov ris txiaj ntsig mus lawm yav tom ntej es nyeem thiab muab cov lus coj los ua zoo xav. Yog peb ua li no ces tus uas tshoov neeg sau nws cov lus yuav foom koob hmoov rau peb thiab peb “yuav paub tseeb hais tias Vajtswv yog tus zoo li cas.”​—Pajlug 2:5.