Veexitee, koj los paub Vajtswv li cas?

Peb tsev neeg nyob lub xeev Kheexilee, tebchaws Auxitalia (Queensland, Australia). Peb yog neeg ua liaj ua teb ua twj cuab xwb, tsis coj kevcai dabtsi li. Tiamsis thaum kuv muaj li 12 xyoos kuv pib nrhiav Vajtswv. Kuv thov kom Vajtswv pab kuv los paub qhov tseeb. Thaum kuv hlob lawd kuv mus nyob lub nroog Adilej (Adelaide), qab teb Auxitalia. Thaum kuv muaj 21 xyoos kuv mus ua si hauv lub nroog Xidinim (Sydney) kuv thiaj ntsib Phamila. Nws qhia kuv txog ib pawg ntseeg uas qhia tias cov neeg Askiv yog ncau los ntawm 10 xeem Yixayee. Pawg ntseeg ntawd hais tias thaum lub nceeg vaj Yixayee sab qaum teb poob cev qhev rau tebchaws Axilia xyoo 740 ua ntej Yexus, ces 10 xeem Yixayee txawm ploj lawm. Thaum kuv rov mus rau Adilej, kuv piav tej no rau ib tug tom haujlwm. Yehauvas Cov Timkhawv tabtom qhia Vajlugkub rau nws. Nws thiaj qhia kuv tias cov Timkhawv ntseeg li cas. Wb tham tau ob peb txoos teev xwb, kuv txawm ras tias yeej yog Vajtswv teb kuv tej lus thov thaum yau lawm tiag. Tej uas wb tham ntawd yog qhov tseeb txog tus Tswv Tsim thiab Nws lub Nceeg Vaj. Zaum no kuv nrhiav tau lub hlaws pias deg lossis lub “qe qwj” uas muaj nqes heev lawm tiag.​—Mathai 13:45, 46.

Phamila, thaum koj tseem yau koj pib nrhiav lub hlaws pias deg lawm thiab. Ua li cas koj ho nrhiav tau?

Kuv tsev neeg ib txwm ntseeg Vajtswv. Peb nyob hauv lub nroog Khaufe Hanpaw (Coffs Harbour), xeev Nus Xauj Ve-o (New South Wales). Kuv niam kuv txiv, niam tais yawm txiv puavleej ntseeg tias cov Askiv ncau ntawm 10 xeem Yixayee los. Kuv tus niam laus, kuv tus nus, kuv niam  cov neej tsa ntseeg li ntawd thiab, tiamsis kuv tsis ntseeg. Tej uas peb kawm qhia tsis tau qhov tseeb rau kuv li. Thaum kuv muaj 14 xyoos kuv thiaj mus saib seb lwm pab ho qhia li cas. Kuv mus koom cov Eenkikees (Anglican), cov Npativ (Baptist), thiab cov uas teev ntuj Hnub 7 (Seventh-day Adventist). Txawm kuv mus pawg twg los pab tsis tau kom kuv paub Vajtswv li.

Tom qab no peb tsiv mus nyob Xidinim, kuv thiaj ntsib Veexitee tuaj ua si. Twb yog wb tham txog kuv txojkev ntseeg, Veexitee thiaj pib kawm Vajlugkub nrog Yehauvas Cov Timkhawv. Nws txawm pib sau ntawv tuaj rau kuv, qhia ntau yam txog phau Vajlugkub. Thaum ntej kuv txhawj nws heev, kuv tseem chim rau nws thiab. Tiamsis ntev mus kuv mam pom tias nws tham qhov tseeb txog Vajtswv tiag.

Xyoo 1962 kuv khiav mus rau Adilej kom ze Veexitee. Nws kom kuv mus nrog Thauma thiab Ntsanij Xilaumee (Thomas thiab Janice Sloman) nyob. Nkawd yog Yehauvas Cov Timkhawv. Yav tas los nkawd tshaj tawm rau koog povtxwv Phapua Nus Nkinim (Papua New Guinea). Nkawd saib xyuas kuv zoo heev. Thaum ntawd kuv muaj 18 xyoo xwb. Nkawd pab tau kuv muaj kev ntseeg ntxiv, kuv thiaj pib kawm Vajlugkub. Tsis ntev xwb, kuv pom tias kuv nrhiav tau qhov tseeb lawm tiag. Tom qab Veexitee wb ua tshoob tas, wb pib ua haujlwm puv ntoob rau Yehauvas. Txawm lub neej tsis yoojyim los Yehauvas foom koob hmoov ntau heev rau wb. Tej no ua rau wb yimhuab nco Yehauvas txiaj ntsig uas nws pab wb nrhiav tau lub hlaws pias deg uas muaj nqes tshaj plaws li.

Veexitee, thov qhia seb thaum koj pib ua Yehauvas tes haujlwm zoo li cas xwb?

Tsis ntev tom qab Phamila wb sib yuav, Yehauvas ‘qheb rooj’ lug rau wb ua ntau yam haujlwm ntxiv. (1 Khaulee 16:9) Muaj ib tug kwvtij hu ua Yaj Phuadaw (Jack Porter) tuaj ncig xyuas cov koom txoos. Nimno nws yog ib tug ntawm pab uas saib xyuas ceg Auxitalaxia. Yaj tus pojniam hu ua Laxilee (Rosyln). Nkawd txhawb kom wb tho kev. Wb thiaj rau npe tho kev tau 5 lub xyoos. Thaum kuv muaj 29 xyoos, cov kwvtij txawm txib wb mus ncig xyuas cov koom txoos hauv tej koog povtxwv sab qab teb Paxifiv (South Pacific Islands). Lub caij ntawd ceg Fintsis (Fiji) tseem saib xyuas koog ntawd. Cov povtxwv nyob rau sab hiavtxwv ntawd yog Xamuas Amelikas (American Samoa), Xamuas (Samoa), Kilinpaxe (Kiribati), Na-ulu (Nauru), Nw-e (Niue), Thaukhalau (Tokelau), Thonkas (Tonga), Thuvalu (Tuvalu), thiab Vanu-athu (Vanuatu).

Muaj tej lub povtxwv nyob deb heev. Cov tibneeg tsis tau ntsib Yehauvas Cov Timkhawv li, lawv muaj ntsis ntshai peb. Yog li, peb maj mam yoog lawv kom lawv swm peb. (Mathai 10:16) Cov koom txoos uas wb mus xyuas neeg tsawg heev, tej lub tsis muaj chaw rau wb so li. Wb thiaj thov chaw so hauv tej neeg zej zos xwb. Lawv nyiam tos txais qhua heev.

Veexitee, piav seb ua cas koj ho nyiam txhawb tes haujlwm txhais lus ua luaj?

Yav thaud cov kwvtij hauv lub povtxwv Thonkas tsuas muaj ob peb daig ntawv tseb, thiab tej ntaub ntawv me me ua lawv yam lus xwb. Thaum cov kwvtij mus tshaj tawm lawv siv phau ntawv Askiv, The Truth That Leads to Eternal Life mus qhia tibneeg xwb. Muaj 3 tug txwj laus hauv lub povtxwv thiaj sib pab muab phau ntawv ntawd txhais ua lus Thonkas. Lub caij ntawd tabtom muaj kev kawm rau cov txwj laus ntev li 4 lub lim tiam. Lawv tsis paub lus Askiv pes tsawg los lawv txhais ces Phamila muab ntaus cia. Siv li 8 lub lim tiam los txhais. Thaum tiav lawd, peb muab xa mus rau ceg U.S.A. luam. Txawm txhais tau tsis tshua zoo los pab tau coob tus neeg Thonkas los paub Yehauvas. Phamila wb tsis yog ob tug txhais tiamsis thaum wb tau pab lawv li no, ua rau wb kub siab lug xav txhawb tes haujlwm no ntxiv.

Phamila, nyob tej koog povtxwv ntawd txawv Auxitalia li cas?

Txawv deb heev! Tej thaud muaj tej niag ntshua yoov tshaj cum, muaj nas tsuag, kub kub vaum vaum heev, wb kuj tsum khaub thuas thiab. Tej thaud tsis muaj dabtsi noj li, tiamsis kuj muaj tej yam zoo kawg li thiab. Wb nyob ib lub tsev nqeeb  uas cov Xamuas hu ua fale. Txhua hmo thaum wb los txog tsev mas so los siav kawg li. Lub tsev nqeeb ntawd tsis muaj phab ntsa, wb thiaj nuam saib dej hiavtxwv ntas mus ntas los. Muaj tej hmo mas qaim hli nrig pom tej duab ntoo maj phaub co zom zaws. Pom lub hli ci nplas hauv hiavtxwv tuaj zoo nkauj kawg li mas zoo caij thov Yehauvas thiab xav txog tej uas nws tau tsim. Qhov ntawd ua rau wb pom tej koob hmoov uas wb tau txais vim wb mus tshaj tawm hauv tej koog povtxwv.

Wb kuj hlub tshua cov menyuam heev. Thaum wb mus qhia Vajlugkub cov menyuam tsis tau pom dua neeg dawb tawv. Lawv thiaj los xauj wb. Muaj ib zaug wb mus tshaj tawm hauv Nw-e, ib tug metub txawm los plhws Veexitee txhais npab thiab hais tias, “Kuv nyiam koj cov plaub noog heev.” Tus metub ntawd tsis tau pom ib tug neeg tuaj plaub npaum li kuv tus txiv, nws thiaj hais tias Veexitee tuaj plaub noog.

Cov tibneeg nyob txom nyem ntsuav, wb pab lawv nyuaj siab kawg li. Lawv tebchaws zoo nkauj heev tiamsis tsis muaj kev kho mob zoo thiab tej dej haus los tsis huv. Txawm li ntawd los, cov kwvtij nyob tsis txhawj dabtsi li. Lawv ib txwm nyob li ntawd ces nyob kam lawm. Lawv txaus siab rau tej uas lawv muaj. Lawv tej metub menyuam nyob puag ncig lawv, lawv muaj chaw pe hawm los qhuas Yehauvas ces lawv zoo siab lawm. Lawv ua qauv zoo heev rau wb xyaum kom coj lub neej yoojyim, thiab muab yam tseem ceeb tso ua ntej.

Phamila, ua cas koj ho paub nrhiav noj?

Twb yog muaj kuv txiv qhia kuv thiaj txawj rauv taws ua mov. Nws cob kom peb txhob lob ntau yam. Muaj ib zaug wb mus lub povtxwv Kilinpaxe, wb so hauv ib lub tsev nqeeb me me xov xyoob uas pua pob zeb (coral). Wb yuav tsum khawb ib lub qhov av hauv tsev ces rauv plhaub txiv maj phaub los ua mov noj xwb. Tsis tas li ntawd xwb kuv yuav tsum nrog cov pojniam hauv zos mus ev dej. Yuav kom ce tau dej lawv siv ib tug pas ntev li 1 dag txhais (los yog 6 feet) zoo li tus pas nuv ntses los khi rau ib lub menyuam thoob. Txhua tus pojniam nyias ce nyias li. Lawv muab lub thoob tso xaub mus, ces lawv ib nyuag tig xwb lub thoob qaij ua ntsais thiaj ntaus tau dej los. Kuv xav tias yoojyim heev, tiamsis los txog kuv, kuv tso lub thoob mus ua cas ntab xwb. Kuv pov ob peb lwm ce tsis tau dej li. Sawvdaws luag ib tsaug tas ces ib tug pojniam mam ua tib zoo qhia kuv. Lawv puavleej zoo siab hlo pab kuv.

Neb nyiam qhia Vajlugkub hauv tej koog povtxwv heev. Piav seb neb tau ntsib tej yam zoo li cas.

Veexitee: Tsis yoojyim yoog lawv tej kev coj noj coj ua. Muaj ib zaug cov kwvtij ua ib pluag mov tos wb. Lawv muab tag nrho cov zaub mov rau ntawm wb xub ntiag ces wb loj xov noj tibsi lawm. Tom qab ntawd wb mam paub tias lawv txoj kevcai mas yuav tsum tseg rau cov thiab. Wb ua tau ntau yam yuam kev tiamsis cov kwvtij txawj xav heev lawv thiaj tsis tu siab rau wb. Lub caij ntawd cov kwvtij tsuas pom cov neeg hauv lawv lub koom txoos xwb. Lawv zoo siab kawg li uas 6 lub hlis wb rov mus xyuas lawv ib zaug, lawv thiaj pom tus puav Timkhawv tshiab.

Thaum wb mus xyuas cov koom txoos kuj pab tau cov neeg zej zos sawvdaws thiab. Muaj coob tus hauv zos xav tias Yehauvas Cov Timkhawv tsuas muaj ob peb tug nyuag xwb. Tiamsis thaum lawv pom wb ob niam txiv tuaj deb tuaj, lawv mam pom tias Yehauvas Cov Timkhawv yog ib lub koom haum thoob ntiajteb tiag tiag.

Phamila: Ib yam uas kuv nco los txog niaj hnub no yog thaum wb mus xyuas lub povtxwv Kilinpaxe. Hauv lub povtxwv ntawd muaj ib lub koom txoos uas cov kwvtij viv ncaus tsawg heev. Tsuas muaj tib tug txwj laus xwb. Nws hu ua Xiniki Metau-e (Itinikai Matera). Tus txwj laus no tos txais wb zoo heev. Muaj ib hnub nws nqa ib lub pob tawb tuaj, ua cas xauj hauv muaj ib lub qe. Nws hais tias, “Pub rau neb.” Thaum ntawd yog tau ib lub qe mas twb yog zoo kawg. Wb nco ntsoov qhov uas nws muaj lub siab dawb pub rau wb txog tav no.

Phamila, tom qab no koj kuj muaj ib qho kev nyuaj siab thiab. Dabtsi pab koj uv dhau?

Xyoo 1973 thaum Veexitee wb tseem tshaj tawm nyob sab qab teb Paxifiv, kuv txawm xeeb  tub. Wb thiaj ua ib siab rov mus nyob Auxitalia. Tiamsis kuv xeeb tub tau 4 lub hlis xwb ces cia li nchuav lawm. Tsis yog kuv nyuaj siab xwb, tiamsis kuv tus txiv kuj nyuaj siab heev rau qhov nws kuj ntshaw menyuam thiab. Tom qab no kuv lub siab nqeg tiamsis kuv tseem khuvxim kuv tus menyuam heev. Thaum Phau Tsom Faj lub 4 Hlis tim 15 xyoo 2009 tawm, kuv nyeem ib zaj uas nplig tau kuv lub siab heev. Zaj no hu ua “Tej Uas Peb Xav Paub” uas piav txog lo lus nug no: “Vajtswv puas yuav tsa tus menyuam uas nchuav lawd?” Zaj ntawd qhia tias Yehauvas yog tus Vajtswv uas ncaj ncees rau txhua fab. Nws mam li saib xyuas tej yam zoo li no. Txawm peb raug kev nyuaj siab li cas hauv Xatas lub qab ntuj phem no los, Yehauvas yeej daws tau tibsi. Nws yuav kom nws tus Tub “rhuav dab Ntxwg Nyoog tes haujlwm.” (1 Yauhas 3:8) Zaj ntawd kuj qhia ntxiv tias Yehauvas cov tibneeg twb nrhiav tau lub hlaws pias deg uas muaj nqes tshaj plaws lawm. Yog peb tsis muaj lub Nceeg Vaj ces peb yeej tsis muaj kev cia siab li!

Tom qab kuv nchuav menyuam lawm, wb rov ua haujlwm puv ntoob rau Yehauvas. Wb mus ua haujlwm hauv ceg Npe-ee Auxitalia tau ob peb lub hlis, ces lawv ho txib wb mus ncig xyuas cov koom txoos dua. Wb ncig xyuas cov koom txoos hauv Nus Xauj Ve-o thiab Xidinim tau 4 xyoos ces xyoo 1981 lawv ho kom wb rov los nyob Npe-ee dua. Wb thiaj nyob los txog tav no.

Veexitee, thaum neb mus tshaj tawm nyob sab qab teb Paxifiv ntshe koj kawm tau ntau yam heev. Tej ntawd tsav tswvyim li cas rau koj los tuav haujlwm nrog Pab Uas Saib Xyuas Ceg Auxitalaxia?

Tej uas kuv ntsib yeej tsav tswvyim ntau heev rau kuv tiag. Thaum ntej Auxitalia tsuas saib xyuas Xamuas Amelikas thiab Xamuas xwb. Tiamsis tom qab no hauv paus loj kom ceg Nus Xivleem (New Zealand) los koom ceg Auxitalia, thiaj muab ceg no hloov ua ceg Auxitalaxia lawm. Ceg no saib xyuas Auxitalia, Xamuas Amelikas, Xamuas, koog povtxwv Khawj (Cook Islands), Nus Xivleem, Nw-e, Thimau Lexite (Timor-Leste), Thaukelau, thiab Thonkas huvsi. Kuv tau sawv cev rau Npe-ee mus xyuas tej koog no lawm. Twb yog yav tas los, kuv tau nrog cov kwvtij nkauj muam mus tshaj tawm ua ke hauv tej povtxwv ntawd, nimno kuv thiaj paub txhawb lawv hauv ceg Npe-ee.

Kuv xav xaus lus li no, Phamila wb pom tias tsis yog cov laus thiaj nrhiav Vajtswv xwb. Cov hluas kuj txawj ntshaw lub hlaws pias deg uas muaj nqes tshaj plaws thiab. Txawm lawv tsev neeg tsis nyiam los lawv tseem nrhiav qees ib yam li wb thiab. (2 Vajntxwv 5:2, 3; 2 Vaj Keeb Kwm 34:1-3) Cia siab tias Yehauvas yog tus Vajtswv uas xav kom tus laus tus hluas los tau txojsia ib txhis tsis kawg!

Phamila wb pib nrhiav Vajtswv 50 xyoo dhau los lawm. Wb zoo siab kawg li uas wb nrhiav tau lub hlaws pias deg muaj nqes lawm tiag! Yus yeej tsis paub tias lub neej yuav mus zoo li no! Txoj xov zoo txog lub Nceeg Vaj muaj nqes tshaj plaws li! Wb yuav tuav rawv lub hlaws pias deg no mus tsis muaj hnub tso li!