1. Vajtswv cov tub qhe txhua leej txhua tus yeej xav ua dabtsi, thiab vim li cas? (Saib daim duab ntawm lub khaum.)

YEXUS KHETOS sam hwm kom cov Khixatia “mus coj txhua haiv neeg los ua [nws] li thwjtim.” (Mathai 28:19) Txhua tus uas muab siab npuab Yehauvas yeej xav kawm kom paub ua tes haujlwm no “kom tiav.” (2 Timaute 4:5) Tes haujlwm no muaj nqes tshaj txhua yam huvsi thiab yog ib tes haujlwm uas yuav tau kub siab lug ua kom tiav. Peb yeej xav ua tes haujlwm no xwb, tiamsis tsis yoojyim hlo li.

2. Vim li cas tsis yoojyim rau peb ua Vajtswv tej haujlwm kom tiav?

² Peb txhua tus nyias yeej khwv khwv nyias, tej zaum peb yuav tau nrhiav noj nrhiav haus los yug peb tsev neeg lossis ua haujlwm hauv vaj hauv tsev. Peb ib txhia kuj muaj mob muaj nkeeg, muaj kev nyuaj siab ntxhov plawv, lossis laus zuj zus lawm thiab tsis taus li thaum peb tseem hluas. Peb yuav ua li cas thiaj ua tau Yehauvas tes haujlwm kom tiav?

3. Yexus cov lus hauv Mathai 13:23 qhia peb li cas?

³ Txawm peb ua tsis tau Yehauvas tes haujlwm npaum li peb lub siab xav los tsis txhob qaug zog. Yexus paub zoo tias peb yeej ua tsis tau Yehauvas tes haujlwm sib npaug zos. (Nyeem Mathai 13:23.) Yog peb twb ua kawg siab kawg ntsws lawd ces Yehauvas yeej saib peb tes haujlwm rau nqe. (Henplais 6:10-12) Tiamsis yog peb ua tau ntau ntxiv ne? Cia peb kawm seb peb yuav ua li cas thiaj (1) muab tau Yehauvas tes haujlwm tso ua ntej hauv peb lub neej, (2) ua tau lub neej yoojyim, thiab (3) yimhuab txawj mus tshaj tawm thiab txawj qhia.  Tiamsis ua ntej no cia peb kawm seb qhov uas peb ua Vajtswv tes haujlwm kom tiav yog li cas tiag?

4. Yuav kom ua tau peb tes haujlwm tiav, peb yuav tsum ua li cas?

⁴ Yuav kom peb ua tau peb tes haujlwm tiav, peb yuav tsum siv sijhawm ntau mus tshaj tawm thiab mus qhia Vajlugkub. Tiamsis Yehauvas tsis yog xam lub sijhawm peb mus xwb, nws xav kom peb ua tes haujlwm no tuaj nruab siab tuaj thiab. Peb hlub Yehauvas thiab tej neeg zej zog peb thiaj ua Yehauvas tes haujlwm kawg siab kawg ntsws, puas yog? * (Malakau 12:30, 31; Khaulauxi 3:23) Qhov uas teev tiam Yehauvas kawg siab kawg ntsws yog qhov uas peb siv peb lub neej thiab lub dag lub zog mus ua nws tes haujlwm npaum li peb ua tau. Thaum peb pom tias Yehauvas tes haujlwm tseem ceeb npaum li cas ces peb yuav kub siab mus tshaj tawm txoj xov zoo rau tibneeg.

5, 6. Ua piv txwv seb ib tug uas tsis muaj sijhawm ho muab tau tes haujlwm tshaj tawm txoj xov zoo tso ua ntej hauv nws lub neej li cas.

⁵ Xav txog ib tug tub hluas uas nyiam ntaus kis tas (guitar) heev. Thaum twg nws dim plaws, nws yeej kov nws lub kis tas xwb. Nws nrhiav tau ib txoj haujlwm ntaus kis tas hauv ib lub khw kas fes Hnub 6 thiab Hnub 7. Tiamsis txoj haujlwm no tsis koob ncauj. Nws thiaj ua haujlwm hauv ib lub khw muag khoom noj Hnub 1 txog Hnub 5 thiab. Txawm nws ua haujlwm hauv lub khw muag khoom noj ntau dua los nws lub siab yeej nyob ntawm qhov nws ntaus nkauj xwb. Txhua lub sijhawm nws xyeej, nws yeej xyaum ntaus nkauj. Nws xyaum tas zog vim nws xav kom muaj ib hnub twg nws tau ua ib tug kws ntaus nkauj.

⁶ Ib yam li ntawd, tej zaud koj yuav tsis muaj sijhawm ntau mus tshaj tawm txoj xov zoo tiamsis koj lub siab yeej nyob rawv ntawm qhov mus tshaj tawm xwb. Koj rau siab ntso kawm kom koj hajyam txawj qhia Vajlugkub raug siab. Vim koj muaj ntau tsav ntau yam ua, tej zaum koj yuav xav tias yuav ua li cas koj  thiaj muab tau tes haujlwm tshaj tawm txoj xov zoo tso ua ntej hauv koj lub neej.

7, 8. Hais txog qhov uas tshaj tawm txoj xov zoo, peb xyaum tau Yexus li cas?

⁷ Yexus tso tau ib tug qauv zoo heev rau peb xyaum. Nws nyiam ua Vajtswv tes haujlwm kawg li. Nws muab qhov uas tshaj tawm txog Vajtswv lub Nceeg Vaj ua qhov tseem ceeb tshaj plaws hauv nws lub neej. (Yauhas 4:34, 35) Nws taug tsheej pua mais (miles) kev mus tshaj tawm rau coob leej ntau tus. Nws nrhiav kev los qhia sawvdaws, tsis hais ntawm tej tshav puam thiab hauv lawv tej tsev. Txhua yam uas Yexus ua yog ua los txhawb Vajtswv tes haujlwm xwb.

⁸ Thaum peb nrhiav txhua txoj hau kev los nrog tibneeg tham txog txoj xov zoo ces twb yog peb xyaum li Khetos. Peb yeem tso lub neej tau zoo tseg kom thiaj tau mus tshaj tawm txoj xov zoo. (Malakau 6:31-34; 1 Petus 2:21) Peb ib txhia ua cov tho kev tshwj xeeb, ib txhia ua cov tho kev, thiab ib txhia ua cov pab tho kev. Peb ib txhia kuj kawm lwm yam lus lossis tsiv mus nyob lwm thaj chaw uas tsis muaj cov tshaj tawm coob. Tiamsis cov coob yog cov uas tsis tuav tej haujlwm no. Txawm peb ua tau ntau tau tsawg los Yehauvas yeej zoo siab. Nws tsis yuam kom peb ua ntau tshaj li peb ua tau. Yehauvas xav kom peb txhua tus zoo siab xyiv fab tshaj tawm txoj xov zoo uas hais txog tus “Vajtswv uas muaj kev zoo siab.”​—1 Timaute 1:11, NW; Kevcai 30:11.

9. (1) Txawm Povlauj yuav tau khwv noj khwv haus los nws muab Vajtswv tes haujlwm tso ua ntej li cas? (2) Tubtxib Tes Haujlwm 28:16, 30, 31 qhia tias Povlauj xav li cas txog Vajtswv tes haujlwm?

⁹ Povlauj kuj tso tau tus qauv zoo heev rau peb xyaum thiab. Nws muab Vajtswv tes haujlwm saib tseem ceeb tshaj. Thaum Povlauj mus tshaj tawm txoj xov zoo zaum 2 hauv lub nroog Khaulee, nws tsis tshuav nyiaj siv lawm. Nws thiaj mus ua haujlwm xaws tsev ntaub. Tiamsis nws tsis muab tes haujlwm ntawd ua tes tseem ceeb tshaj plaws. Nws tsuas ua txoj haujlwm ntawd los pab kom nws tshaj tawm tau txoj xov zoo rau cov neeg Khaulee “tsis yuav nqe.” (2 Khaulee 11:7) Txawm Povlauj ua haujlwm xaws tsev ntaub los nws rau siab ntso ua Vajtswv tes haujlwm thiab tshaj tawm txhua hnub Xanpatau. Thaum nws khwv tau mentsis nyiaj lawd, nws rov tshaj tawm thiab “rau siab ntso qhia txoj xov zoo, thiab ua timkhawv rau cov Yudai tias tus Khetos yog Yexus.” (Tubtxib Tes Haujlwm 18:3-5; 2 Khaulee 11:9) Thaum Povlauj raug kaw hauv Loos tau 2 lub xyoos, nws tseem sau ntawv thiab ua timkhawv rau cov uas tuaj xyuas nws. (Nyeem Tubtxib Tes Haujlwm 28:16, 30, 31.) Povlauj yeej tsis pub ib yam dabtsi khuam cheem nws ua tsis tau Vajtswv tes haujlwm. Povlauj hais tias: “Vim peb muaj tes haujlwm no . . . , peb thiaj tsis poob siab” lossis tso tseg. (2 Khaulee 4:1) Peb kuj ua tau li Povlauj thiab. Txawm peb yuav tau khwv noj khwv haus los peb yeej muab tau tes haujlwm tshaj tawm txog lub Nceeg Vaj tso ua ntej hauv peb lub neej.

10, 11. Thaum peb tsis taus, peb yuav ua li cas thiaj ua tau Vajtswv tes haujlwm kom tiav?

¹⁰ Txawm peb muaj mob muaj nkeeg lossis laus lawm es mus tshaj tawm tsis taus ib lub qhov rooj rau ib lub los tseem tshuav lwm txojkev thiab. Cov Khixatia thawj 100 xyoo mus qhia Vajlugkub rau tibneeg txhua qhov chaw. Lawv mus qhia ib lub qhov rooj rau ib lub, tom tej tshav puam, thiab thaum mus ub mus no es ntsib tibneeg. (Tubtxib Tes Haujlwm 17:17; 20:20) Yog peb mus tsis taus kev, tej zaud peb kuj mus zaum qhia Vajlugkub rau  ntawm tej chaw uas muaj neeg coob dua kev. Peb kuj qhia thaum mus ub mus no, lossis sau ntawv thiab hu xov tooj mus rau tibneeg. Coob tus uas mus tsis taus ib lub qhov rooj rau ib lub pom tias thaum lawv qhia Vajlugkub li no lawv muaj kev zoo siab xyiv fab heev.

¹¹ Txawm koj tsis taus lawm los koj yeej tseem ua tau Vajtswv tes haujlwm kom tiav. Cia peb rov tham txog tus tubtxib Povlauj. Nws hais tias: “Kuv yeej ua tau txhua yam vim muaj Vajtswv uas txhawb kuv lub zog.” (Filipi 4:13) Povlauj cheem tsum Vajtswv txhawb nws lub zog rau thaum nws mus tshaj tawm txoj xov zoo es nws mob hnyav heev. Nws thiaj hais rau cov Kalatia tias: “Thawj zaug uas kuv qhia txoj xov zoo rau nej twb yog vim kuv lub cev muaj mob.” (Kalatia 4:13) Ib yam li ntawd, thaum koj mob hnyav tej zaud kuj zoo rau koj qhia txoj xov zoo rau cov kws kho mob, cov tu mob, thiab lwm cov uas ua haujlwm hauv tsev kho mob. Cov neeg no coob tus yeej tsis nyob tsev thaum cov tshaj tawm mus qhia Vajlugkub txog tom lawv tsev.

12. Lub qhov muag uas “pom tseeb” txhais li cas?

¹² Yexus hais tias: “Lub qhov muag yog lub teeb rau lub cev. Yog tias koj lub qhov muag nyob zoo [“pom tseeb,” NW], tag nrho koj lub cev kuj kaj lug.” (Mathai 6:22) Yexus cov lus no txhais li cas? Yexus cov lus txhais tias peb yuav tsum ua lub neej yoojyim lossis tau hau  ntsoov rau 1 lub hom phiaj xwb, tsis mus vuag ub vuag no. Yexus yeej ua nws lub neej li ntawd. Nws tau hau ntsoov rau Vajtswv tes haujlwm xwb. Nws kuj qhia kom nws cov thwjtim tau hau ntsoov teev tiam Yehauvas thiab muab lub Nceeg Vaj tso ua ntej. Peb xyaum Yexus tus qauv thaum peb muab Vajtswv tes haujlwm ua qhov tseem ceeb tshaj hauv peb lub neej thiab “xub nrhiav Vajtswv lub [Nceeg Vaj] thiab nws txojkev ncaj ncees.”​—Mathai 6:33.

13. Dabtsi yuav pab tau peb tau hau ntsoov rau Vajtswv tes haujlwm?

¹³ Ib qho uas pab peb tau hau ntsoov rau Vajtswv tes haujlwm yog ua lub neej kom yoojyim peb thiaj muaj sijhawm mus pab lwm tus los paub thiab hlub Yehauvas. * Peb puas hloov tau peb lub sijhawm ua haujlwm kom thiaj tau qhia Vajlugkub Hnub 1 txog Hnub 5 hnub puav? Thiab peb puas qee tau peb cov sijhawm mus ua si mentsis los ua Vajtswv tes haujlwm?

14. Ob niam txiv tau ua li cas nkawd thiaj muaj sijhawm mus ua Vajtswv tes haujlwm ntau ntxiv?

¹⁴ Ib tug txwj laus hu ua Elias thiab nws tus pojniam tau ua li ntawd. Nws hais tias: “Lub sijhawm ntawd wb tho kev tsis tau, tiamsis wb paub tias yuav tau ua li cas wb thiaj muaj sijhawm mus tshaj tawm ntxiv. Yog li ntawd, wb thiaj pib ib qho zuj zus. Wb pib txuag nyiaj, tsuas siv rau tej yam tseem ceeb xwb. Wb kuj thov wb 2 qho chaw haujlwm kom muab wb cov sijhawm hloov wb thiaj muaj sijhawm mus tshaj tawm. Thaum kawg, wb thiaj tau mus tshaj tawm rau yav tsaus ntuj, qhia Vajlugkub rau coob tus, thiab tau mus tshaj tawm rau Hnub 1 txog Hnub 5 ib lub hlis twg 2 hnub. Wb zoo siab xyiv fab kawg li!”

15, 16. Raws li 1 Timaute 4:13, 15, peb yuav ua li cas peb thiaj hajyam txawj mus qhia Vajlugkub? (Saib lub ntsiab me “ Tej Hom Phiaj Uas Pab Kuv Ua Vajtswv Tes Haujlwm Kom Tiav.”)

¹⁵ Yog peb xyaum kom yimhuab txawj tshaj tawm txoj xov zoo kuj yuav pab tau peb ua Vajtswv tes haujlwm kom tiav. Tej tsev haujlwm yeej cob qhia kom lawv cov neeg yimhuab txawj ua haujlwm. Cov tshaj tawm txog lub Nceeg Vaj los kuj ib yam li ntawd thiab. Peb yuav tsum rau siab ntso kawm kom peb hajyam txawj ua Vajtswv tes haujlwm.​—Paj Lug 1:5; nyeem 1 Timaute 4:13, 15.

¹⁶ Tiamsis peb yuav ua li cas thiaj yimhuab txawj ua Vajtswv tes haujlwm? Peb yuav tau ua tib zoo mloog tej kev cob qhia thaum peb mus txojkev sib txoos Lub Neej Thiab Tes Haujlwm Khixatia. Txojkev sib txoos no cob qhia peb kom hajyam txawj ua Vajtswv tes haujlwm. Xws li, thaum tus kwvtij coj kev sib txoos qhia tus kawm zoo rau peb mloog thiab, peb thiaj khaws tau coj mus siv thaum peb mus qhia Vajlugkub. Peb kuj thov kom tus kwvtij saib xyuas peb pawg pab peb lossis nrog nws mus qhia Vajlugkub ua ke. Lossis nrog ib tug uas txawj qhia, ib tug tho kev, thiab tus saib xyuas thaj tsam mus qhia Vajlugkub. Thaum peb txawj siv peb Cov Twj Mus Ua Vajtswv Tes Num, peb yuav zoo siab xyiv fab tshaj tawm thiab qhia Vajlugkub dua.

17. Yog koj ua Vajtswv tes haujlwm kom tiav yuav pab tau koj li cas?

¹⁷ Qhov uas Yehauvas cia peb “koom nrog [nws] ua haujlwm” yog ib qho koob hmoov zoo kawg li. (1 Khaulee 3:9) Thaum koj paub tias yam twg yog yam uas “tsim txiaj kawg nkaus” thiab tau hau ntsoov ua Vajtswv tes haujlwm, koj yuav “zoo siab ua koom tu [Yehauvas].” (Filipi 1:10; Ntawv Nkauj 100:2) Thaum koj ua Vajtswv tes haujlwm, txawm yuav nyuaj npaum li cas los cia li tso siab tias nws yuav pub dag zog rau koj ua nws tes haujlwm kom tiav. (2 Khaulee 4:1, 7; 6:4) Txawm koj ua tau ntau tau tsawg los yog koj ua kawg siab kawg ntsws lawm ces koj yeej yuav muaj kev zoo siab xyiv fab. (Kalatia 6:4) Thaum koj ua Vajtswv tes haujlwm kom tiav, qhia tias koj hlub Yehauvas thiab kwvtij zej zog. “Yog koj ua li no koj yuav cawm tau koj tus kheej thiab cov uas mloog koj qhia kom dim.”​—1 Timaute 4:16.