Tej Uas Peb Xav Paub
Nyob hauv Yaxayas 60:1, “Yeluxalees” yuav “sawv” thiab ua “qhov kaj” li cas?
Yaxayas 60:1 hais tias: “Lub nroog Yeluxalees, cia li sawv, vim qhov kaj twb los rau koj, thiab [Yehauvas] lub tshwjchim ci ntsa iab los rau saum koj lawm.” Lub nroog Yeluxalees los sis Xi-oos yog qhov chaw sawv tam tag nrho cov Ixayees rau lub sij hawm ntawd. (Yaxayas 60:14; 62:1, 2) Muaj ob lo lus nug uas peb xav paub txog nqe Vajlugkub no: Qhov ib, thaum twg thiab ua li cas lub nroog Yeluxalees ho “sawv” thiab ua tau “qhov kaj” li cas? Qhov ob, Yaxayas cov lus puas muaj tiav nyob rau peb tiam?
Thaum twg thiab ua li cas lub nroog Yeluxalees ho “sawv” thiab ua tau “qhov kaj” li cas? Lub nroog Yeluxalees thiab lub tuam tsev nyob qhuav nquas cia thaum cov neeg Yudais mus poob ua cev qhev rau tim Npanpiloos tau 70 lub xyoos. Tom qab Npanpiloos poob rau cov Medes thiab Pawxias, tag nrho cov Ixayees uas nyob puv ntia Npanpiloos dim rov qab mus rau lawv vaj lawv tsev thiab rov qab teev tiam Yehauvas rau ntawd dua. (Exalas 1:1-4) Thaum pib xyoo 537 ua ntej Yexus, 12 xeem Ixayees thiaj li tau rov los. (Yaxayas 60:4) Lawv thiaj li tuaj tsiaj fij rau Yehauvas, ua koob tsheej, thiab txhim kho lub tuam tsev dua. (Exalas 3:1-4, 7-11; 6:16-22) Yehauvas lub tshwj chim rov qab ci ntsa iab rau hauv Yeluxalees ntxiv lawm. Yehauvas cov tib neeg thiaj li ci ntsa iab rau ib tsoom teb chaws uas nyob rau qhov tsaus ntuj nti pom.
Yaxayas tej lus faj lem tsuas tshwm sim ib nrab thaum ntawd. Cov Ixayees feem coob haj tseem tsis kam mloog Vajtswv lus. (Nehemis 13:27; Malakis 1:6-8; 2:13, 14; Mathais 15:7-9) Tom qab no lawv kuj tsis lees paub tus Mexiyas uas yog Yexus Khetos thiab. (Mathais 27:1, 2) Thaum xyoo 70 tom qab Yexus, lub nroog Yeluxalees thiab lub tuam tsev rov qab raug puas tsuaj dua.
Yehauvas twb hais tseg lawm tias yeej yuav muaj li ntawd. (Daniyees 9:24-27) Qhov no qhia tau tias Yehauvas tsis cia cov faj lem hauv Yaxayas tshooj 60 muaj tshwm sim kom tag nrho rau lub nroog Yeluxalees hauv ntiaj teb no.
Yaxayas cov lus puas muaj tshwm sim rau peb lub sij hawm no? Yeej yuav muaj tiam sis yog rau “lub nroog Yeluxalees uas nyob saum ntuj.” Tus tub txib Povlauj sau li no tias: “Nws yog peb niam.” (Kalatias 4:26) Lub nroog Yeluxalees uas nyob saum ntuj yog Vajtswv lub koom haum feem saum ntuj uas yog cov tub txib saum ntuj ceeb tsheej uas muab siab npuab Yehauvas. Nws cov me nyuam yog Yexus thiab 144,000 leej uas yog cov xaiv tseg. Tag nrho lawv puas leej yog “haivneeg uas dawbhuv” thiab yog “Vajtswv cov tseem Yixayee.”—1 Petus 2:9; Kalatias 6:16.
Lub nroog Yeluxalees uas nyob saum ntuj “sawv” thiab ua “qhov kaj” li cas? Nws ua tau li ntawd los ntawm nws cov me nyuam nyob hauv ntiaj teb no uas yog cov xaiv tseg. Cov lus faj lem uas hais hauv Yaxayas tshooj 60 thooj nkaus li tej uas lawv raug.
Cov xaiv tseg yuav tsum tau “sawv” vim muaj cov fav xeeb coob heev tom qab cov tub txib tuag tas ua rau lawv nyob tsaus ntuj nti xwb. (Mathais 13:37-43) Nyob rau lub caij ntawd, lub nroog Npanpiloos uas loj dua ntais uas yog txoj kev ntseeg cuav tswj hwm txhua qhov. Kev ntseeg cuav tswj cov xaiv tseg mus txog thaum “lub sim ceeb no yuav kawg” uas pib xyoo 1914. (Mathais 13:39, 40) Tsis ntev tom qab ntawd thaum xyoo 1919, lawv thiaj dim plaws ntawm txoj kev ntseeg cuav thiab mus tshaj tawm txoj xov zoo rau txhua qhov. a Tau ntau xyoo tib neeg yeej los mus rau ntawm qhov kaj, tsis hais cov xaiv tseg uas yog cov “vajntxwv” uas hais nyob rau hauv Yaxayas 60:3.—Tshwmsim 5:9, 10.
Nyob rau yav tom ntej cov xaiv tseg yim huab ua Yehauvas qhov kaj ci heev tshaj yav tag los lawm. Thaum lawv tuag, lawv yuav muaj feem nyob “lub nroog Yeluxalees tshiab” los sis ua Khetos tus nkauj nyab uas yog 144,000 leej es ua vaj ntxwv thiab ua pov thawj.—Tshwmsim 14:1; 21:1, 2, 24; 22:3-5.
Lub nroog Yeluxalees tshiab yuav ua kom cov lus hauv Yaxayas 60:1 muaj tiav. (Muab Yaxayas 60:1, 3, 5, 11, 19, 20 piv rau Tshwmsim 21:2, 9-11, 22-26.) Zoo ib yam li lub nroog Yeluxalees hauv ntiaj teb yog roog nom tswv rau cov Ixayees, lub nroog Yeluxalees tshiab thiab Khetos yuav yog roog nom tswv rau lub qab ntuj tshiab. Lub nroog Yeluxalees tshiab “los ntawm Vajtswv tus uas nyob saum ntuj ceebtsheej los” li cas? Yog qhov uas lawv ua ntau yam los mus pab tib neeg. Cov tib neeg uas hwm Vajtswv “yuav pom kev kaj nrig mus mus los los.” Lawv yuav dim plaws txoj kev txhaum thiab kev ploj kev tuag. (Tshwmsim 21:3, 4, 24) Txog thaum kawg “ib puas tsav yam hloov dua tshiab” li Yaxayas thiab lwm cov cev Vajtswv lus tau hais tseg. (Tes Haujlwm 3:21) Txoj kev txhim kho no yuav pib rau thaum Khetos ua Vaj Ntxwv thiab yuav xaus rau thaum Khetos Kav 1,000 Xyoo tag.
a Nyob rau xyoo 1919, thiaj li tau txhim kho txoj kev ntseeg tseeb li tau hais hauv Exekees 37:1-14 thiab Tshwmsim 11:7-12. Exekees tau faj lem txog qhov uas tag nrho cov xaiv tseg tau ua cev qhev rau kev ntseeg cuav tau ntev loo tiam sis tom qab ntawd yuav txhim kho txoj kev ntseeg tseeb. Nyob hauv Tshwmsim tham txog ib pawg kwv tij uas yog cov xaiv tseg tau raug kaw ib ntus tiam sis yuav rov qab los ua Yehauvas tes hauj lwm dua. Xyoo 1919, kuj muab lawv tsa ua “tus qhev ncaj thiab ntse.”—Mathais 24:45; mus saib phau Pure Worship of Jehovah—Restored At Last!, sab 118 ua lus Askiv.
