1, 2. Coob leej ntau tus xav li cas txog tes haujlwm uas lawv tuav?

COOB LEEJ ntau tus xav tias ib tug neeg muaj suab nto npe yog vim tes haujlwm uas nws tuav. Vim li no, thawj zaug uas tibneeg sib ntsib lawv thiaj kheev nug tias, “Koj ua haujlwm dabtsi?”

² Phau Vajlugkub tau muab ib txhia hu raws lawv tes haujlwm. Phau Vajlugkub muab Mathai hu ua tus “uas sau se,” Ximoos hu ua tus “Kws luam tawv,” Luka hu ua “tus Kws tshuaj.” (Mathai 10:3; Tubtxib Tes Haujlwm 10:6; Khaulauxi 4:14) Phau Vajlugkub kuj muab tej tug hu raws tes haujlwm uas lawv ua rau Yehauvas. Xws li, Vajntxwv Davi, Eliya uas yog tus cev Vajtswv lus, thiab tus tubtxib Povlauj. Cov txivneej no yeej saib lawv tes haujlwm rau nqe heev. Peb txhua tus yeej saib tes haujlwm uas Yehauvas muab rau peb rau nqe ib yam thiab.

3. Ua cas tseem ceeb rau cov laus cob cov hluas los tuav haujlwm? (Saib daim duab ntawm sab no.)

³ Peb nyiam leg haujlwm rau Yehauvas thiab peb saib tes  haujlwm ntawd rau nqe heev. Peb thiaj xav ua tes haujlwm ntawd mus li. Tiamsis thaum peb laus lawd, peb ua tsis tau npaum li thaum peb tseem hluas. (Laj Lim Tswvyim 1:4) Hauv lub koom haum, tsuas pom muaj haujlwm ntau zuj zus tuaj xwb. Yehauvas lub koom haum thiaj tau tsim ntau yam twj koos pis tawj los pab peb tshaj tawm txoj xov zoo rau txhua qhov. Tsis yoojyim rau cov laus los xyaum siv tej twj ntawd. (Luka 5:39) Tsis tas li ntawd xwb, thaum laus lawd lub zog yeej tsis nchav li thaum tseem hluas. (Paj Lug 20:29) Yog li ntawd, zoo uas cov laus pab cob cov hluas kom lawv paub tuav haujlwm hauv Yehauvas lub koom haum.—Nyeem Ntawv Nkauj 71:18.

4. Ua cas ho nyuaj rau ib txhia cob lwm tus los tuav haujlwm? (Saib lub ntsiab me, “ Ua Cas Nyuaj Rau Ib Txhia Cob Lwm Tus.”)

⁴ Tsis yoojyim rau cov kwvtij uas tuav haujlwm hauv lub koom haum faib haujlwm rau cov hluas tuav. Cov laus ib txhia tsis tau xav tso lawv tes haujlwm tseg vim lawv tseem xav tuav tes haujlwm ntawd heev. Mob lawv siab heev vim lawv saib Yehauvas tes haujlwm tshwj xeeb heev. Ib txhia kuj txhawj tias yog lawv tso haujlwm rau cov hluas tuav lawm ces haujlwm yuav mus tsis taus. Tej co kuj tsis muaj sijhawm los cob cov hluas thiab. Txawm li ntawd los, cov hluas yuav tsum ua siab ntev yog tias cov laus tsis tau faib haujlwm rau lawv tuav.

5. Hauv zaj no peb yuav kawm txog cov lus nug twg?

⁵ Ua cas ho tseem ceeb ua luaj rau cov laus cob kom cov hluas paub tuav haujlwm? Lawv yuav cob cov hluas li cas? (2 Timaute 2:2) Vim li cas cov hluas yuav tsum txo hwjchim ua li cov laus hais thiab? Cia peb xub kawm txog Vajntxwv Davi tus qauv seb nws tau pab nws tus tub Xalaumoo li cas, Xalaumoo thiaj paub ua Yehauvas tes haujlwm.

6. (1) Vajntxwv Davi xav ua dabtsi? (2) Yehauvas puas pom zoo Davi ua li ntawd?

⁶ Davi raug tsim txom hnyav heev tau ntau xyoo, nws thiaj khiav mus nyob tsis muaj chaw. Thaum nws sawv ua vajntxwv lawd, nws mam li tau vaj tse zoo nyob. Davi thiaj xav ua ib lub tuam tsev kom zoo nkauj heev rau Yehauvas. Nws hais rau Nathas tus uas cev Vajtswv lus tias: “Koj sim saib, kuv nyob hauv lub tsev uas xuas ntoo ciab ua, hos [Yehauvas] lub phij xab sib cog lus nyob hauv lub tsev ntaub xwb.” Nathas teb Davi tias: “Koj cia li mus ua txhua yam uas koj lub siab xav ua, rau qhov Vajtswv nrog nraim koj.” Tiamsis Yehauvas puas pom zoo li ntawd thiab? Tsis pom. Yehauvas hais kom Nathas qhia rau Davi li no: “Koj tsis txhob ua lub tuam tsev rau kuv nyob.” Yehauvas kuj cog lus tias nws yuav nrog nraim Davi mus li, thiab Davi ib tug tub mam li ua lub tuam tsev rau Nws. Davi xav li cas txog tej no xwb?—1 Vaj Keeb Kwm 17:1-4, 8, 11, 12; 29:1.

7. Davi tau ua li cas xwb thaum nws paub tias Yehauvas tsis kam nws ua lub tuam tsev?

⁷ Thaum Yehauvas tsis kam Davi ua lub tuam tsev, tej zaum nws yuav tu siab heev. Txawm li ntawd los, Davi yeej txhawb kom nws tus tub Xalaumoo ua tau lub tuam tsev. Davi nrhiav neeg ua haujlwm thiab npaj tej twj, tej ntoo, tej nyiaj tej kub, tej tooj tej hlau huvsi los rau Xalaumoo. Davi yeej tsis khib tias Xalaumoo yog tus ua lub tuam tsev. Tom qab no, tau muab lub tuam tsev ntawd hu ua Xalaumoo lub tuam tsev lawm tiag. Davi tsuas muaj txhawb Xalaumoo xwb. Nws tau hais  li no rau nws tus tub: “Kuv tus metub, nimno thov [Yehauvas] nrog nraim koj nyob, xwv koj thiaj li ua tau [Yehauvas] uas yog koj tus Vajtswv lub tuam tsev tiav raws li nws twb hais tseg txog koj.”—1 Vaj Keeb Kwm 22:11, 14-16.

8. (1) Davi xav li cas txog Xalaumoo xwb? (2) Davi puas txhawb Xalaumoo tes haujlwm?

⁸ Nyeem 1 Vaj Keeb Kwm 22:5. Tes haujlwm ua lub tuam tsev yeej tsis yoojyim. Davi hais tias yuav tsum ua kom lub tuam tsev “loj thiab zoo nkauj kawg.” Yog li ntawd, tej zaum Davi yeej txhawj tsam Xalaumoo tsis tau paub saib xyuas tes haujlwm ntawd, vim Xalaumoo “tseem yau thiab tsis tau txawj ua haujlwm.” Txawm li ntawd los, Davi tso siab plhuav tias Yehauvas mam li pab Xalaumoo. Davi thiaj npaj txhua yam tiav log rau Xalaumoo.

9. Ua cas tsim nyog cov laus zoo siab thaum lawv cob haujlwm rau cov hluas ua? Muab ua lus piv txwv.

⁹ Cov kwvtij laus yuav tsum tsis txhob tu siab thaum lawv yuav tau faib haujlwm rau cov hluas tuav. Nco ntsoov tias qhov tseem ceeb tshaj yog Yehauvas tes haujlwm. Yog cov laus cob cov hluas ces Yehauvas tes haujlwm yeej yuav tiav xwb. Muab xav li no: Thaum koj tseem yau, koj txiv yog tus tsav tsheb xwb. Koj tsuas saib nws tsav thiab nws yog tus qhia koj tias yuav tsav li cas. Thaum koj tiav hluas lawm, koj mam li mus xeem daim ntawv tsav tsheb thiab mam xyaum tsav. Txawm koj paub tsav lawm los, koj txiv tseem qhia koj qees thiab tej zaum neb kuj sib hloo tsav. Tiamsis thaum koj txiv laus lawd, koj yog tus  tsav tsheb lawm xwb. Koj txiv puas chim rau koj? Nws yeej tsis chim, nws tsuas zoo siab tias zaum no koj pab tau nws lawm xwb. Cov kwvtij laus kuj zoo ib yam li leej txiv ntawd thiab. Lawv zoo siab heev thaum lawv pab tau cov hluas los tuav haujlwm hauv Yehauvas lub koom haum.

10. Mauxe xav li cas txog nws tes haujlwm?

¹⁰ Peb yuav tsum ceev faj txhob khib cov uas tau txais ib tes haujlwm tshiab. Cia peb xyaum Mauxe tus qauv. Thaum Mauxe hnov tias muaj 2 tug txivneej kuj tseem cev Vajtswv lus, nws puas khib nkawd? Nws tsis khib. (Nyeem Xwm Txheej Taug Kev 11:24-29.) Yausua xav txwv nkawd, tiamsis Mauxe hais tias: “Koj mob siab vim yog saib rau kuv lov? Kuv xav kom [Yehauvas] haiv neeg txhua tus cev Vajtswv lus thiab xav kom [Yehauvas] tso [lub hwj huam] rau saum lawv.” Mauxe paub tias Yehauvas yog tus coj tes haujlwm no xwb. Nws tsis xav kom nws ib leeg thiaj yog tus tuav haujlwm, tiamsis nws xav kom Yehauvas cov tub qhe txhua tus tau tuav haujlwm rau Yehauvas thiab. Ua li peb ne? Peb puas zoo siab thaum peb pom lwm tus txais ib tes haujlwm tshiab?

11. Ib tug kwvtij laus tau hais li cas txog qhov uas nws tso haujlwm rau ib tug hluas tuav?

¹¹ Muaj ntau tus kwvtij laus siv zog ua haujlwm rau Yehauvas tau ntau xyoo. Lawv tau cob cov hluas ntau tus los tuav haujlwm. Muaj ib tug kwvtij hu ua Peter [phij·tawj] tau ua li ntawd. Nws ua haujlwm puv ntoob rau Yehauvas tau 74 xyoos. Nws ua haujlwm hauv Npe-ee tau 35 xyoos nyob rau sab Yus Luv. Tau ntau xyoo, nws kuj yog tus saib xyuas chav Service Department hauv Npe-ee uas saib xyuas kev tshaj tawm. Tiamsis thaum kawg ib tug kwvtij hluas zog hu ua Paul [phos] tau tuav tes haujlwm ntawd lawm. Peter tseem yog tus uas cob Paul thiab. Peter puas tu siab tias nws tsis tau ua nws tes haujlwm li qub lawm? Nws tsis tu. Nws tseem hais tias: “Kuv zoo siab kawg li tias muaj cov kwvtij uas lub koom haum tau cob los tuav tej haujlwm tseem ceeb. Lawv yeej paub tuav tej haujlwm ntawd zoo heev.”

12. Lehaunpau-as tus qauv qhia li cas rau peb?

¹² Thaum Xalaumoo tus tub Lehaunpau-as sawv ua vajntxwv, nws mus thov cov laus pab nrog nws ntaus tswvyim. Tiamsis nws tsis yuav li lawv hais. Nws ho yeem mloog cov hluas uas yog nws ib phaum hais. Thaum kawg nws thiaj ua tau ntau yam yuam kev. (2 Vaj Keeb Kwm 10:6-11, 19) Lehaunpau-as tus qauv qhia peb li cas? Peb yuav tsum nrog cov laus thiab  cov uas paub tab ntaus tswvyim. Kuj tsis yog kom cov hluas yuav tsum ua txhua yam li cov laus tau ua. Tiamsis lawv yuav tsum yuav cov laus lub tswvyim thiab. Tsim nyog cov hluas hwm cov laus thiab txhob xav tias cov laus tsav tsis tau tswvyim rau lawv.

13. Cov hluas yuav nrog cov laus ua haujlwm ua ke li cas?

¹³ Tej thaud cov hluas kuj tau los hloov cov laus chaw ua tus saib xyuas hauv lub koom haum. Txawm li ntawd los, cov hluas yuav tsum tau mus nrhiav kev pab ntawm cov laus thiab. Zoo li Peter thiab Paul nkawd tus qauv. Txawm Paul tau hloov Peter chaw ua tus saib xyuas ib chav Npe-ee lawm los, tej thaud Paul tseem mus thov Peter pab nws. Paul hais tias: “Kuv kuj txhawb kom sawvdaws mus cuag Peter thaum lawv xav tau kev pab thiab.”

14. Timaute thiab Povlauj tso tau tus qauv zoo li cas rau peb xyaum?

¹⁴ Timaute yau tus tubtxib Povlauj lawm hov ntau. Txawm li ntawd los, nkawd ua haujlwm ua ke tau ntau xyoo. (Nyeem Filipi 2:20-22.) Povlauj hais rau cov Khaulee txog Timaute li no: “Kuv thiaj txib Timaute uas yog tus tub uas kuv hlub hauv tus Tswv thiab yog tus uas kuv tso siab tau tuaj cuag nej pab kom nej nco txog kuv lub neej hauv Khetos ib yam li uas kuv qhia rau hauv txhua pawg ntseeg.” (1 Khaulee 4:17) Peb pom tseeb tias Povlauj thiab Timaute nkawd txawj sib hlub sib pab heev. Povlauj ua tib zoo cob qhia kom Timaute txawj tuav haujlwm. Timaute kuj kawm tau zoo heev. Povlauj ncawg Timaute heev thiab nws tso siab tias Timaute yuav saib xyuas pawg ntseeg hauv Khaulee zoo heev. Cov txwj laus xyaum tau tus tubtxib Povlauj tus qauv, es cob kom cov hluas paub tuav haujlwm saib xyuas lub koom txoos.

15. Loos 12:3-5 pab kom peb nrog lub koom haum hloov li cas?

¹⁵ Peb nyob rau ib lub caij uas tshwj xeeb heev. Yehauvas lub koom haum feem hauv ntiajteb no huam vam coob zuj zus tuaj lawm. Yog li ntawd, ntau tsav ntau yam hauv lub koom haum thiaj hloov zuj zus lawm thiab. Tej zaum tsis yoojyim rau peb hloov nrog lub koom haum. Yog peb txo hwjchim thiab nco ntsoov tias tej no yuav pab kom txoj xov zoo txog lub Nceeg Vaj nrov ncha thoob ntiajteb xwb ces peb yuav zoo siab hlo hloov thiab. Yog peb nrog lub koom haum hloov ces sawvdaws yuav koom tau ib lub siab. Povlauj hais rau cov Khixatia hauv Loos li no: “Kuv hais rau nej txhua tus . . . tias, nej tsis txhob xav tias nej tus kheej loj dhau li uas tsim nyog xav.” Nws piav tias lub cev tej tes taw nyias muaj nyias haujlwm. Yog li ntawd, hauv lub koom txoos nyias kuj muaj nyias haujlwm ib yam li ntawd thiab.—Loos 12:3-5.

16. Cov Khixatia yuav coj li cas lub koom haum thiaj koom tau ib lub siab?

¹⁶ Yehauvas cov tibneeg txhua tus yeej xav txhawb Vajtswv lub Nceeg Vaj. Yog Vajtswv lub koom haum hais kom lawv ua ib yam dabtsi, lawv yeej zoo siab hlo ua. Cov laus yeej cob tau cov hluas los tuav  haujlwm. Cov hluas los yuav tsum zoo siab hlo tuav haujlwm hauv lub koom txoos thiab. Tiamsis thaum cov hluas tuav haujlwm, lawv yuav tau txo hwjchim thiab hwm cov laus. Cov kwvtij uas muaj pojniam yeej zoo siab kawg li tias lawv cov pojniam nrog nraim lawv, txawm tias tej haujlwm hauv lub koom haum hloov tas zog. Thov kom cov pojniam yeej meem txhawb lawv cov txiv ib yam li Plixila tau txhawb nws tus txiv Akhila.—Tubtxib Tes Haujlwm 18:2.

17. Yexus cob nws cov thwjtim los ua tes haujlwm twg?

¹⁷ Yexus txo hwjchim heev nws thiaj zoo siab hlo cob lwm tus los tuav nws tes haujlwm. Yexus paub tias yuav tsum muaj lwm tus los ua nws tes haujlwm ntxiv mus. Txawm nws cov thwjtim yog neeg txhaum xwb los, nws paub tias lawv yuav tshaj tawm txoj xov zoo deb tshaj nws. (Yauhas 14:12) Vim nws cob lawv zoo heev, txoj xov zoo thiaj nrov ncha mus rau ntau lub tebchaws.—Khaulauxi 1:23.

18. (1) Peb puas yuav muaj haujlwm ua hauv lub qab ntuj tshiab? (2) Peb ua tes haujlwm twg tamsim no?

¹⁸ Tom qab Yexus tuag lawd, Yehauvas tau tsa nws sawv rov los. Yehauvas muab haujlwm ntxiv rau Yexus tuav thiab muab nws tsa ua tus “siab dhau txhua tus timtswv uas kav thiab tej hwjchim . . . thiab tej uas txawj tswjhwm huvsi.” (Efexau 1:19-21) Yog peb muab siab npuab Yehauvas tiag, txawm peb tuag ua ntej Amakedoo lawm los, Vajtswv yuav tsa peb sawv rov qab los. Peb yuav muaj haujlwm ntau heev ua hauv lub qab ntuj tshiab. Tamsim no peb muaj tes haujlwm tshwj xeeb uas yog tshaj tawm txoj xov zoo thiab coj neeg los ua Yexus cov thwjtim. Yog li ntawd, txawm peb laus peb hluas los, cia peb txhua tus “ua tus Tswv tes haujlwm puv npo txhua lub sijhawm.”—1 Khaulee 15:58.