Mathais Sau 1:1-25
1 Phau ntawv no piav txog Yexus Khetos* lub neej.* Yexus Khetos yog Daviv xeeb ntxwv, Daviv yog Anplahas xeeb ntxwv.
2 Anplahas yog Ixaj txiv.*Ixaj yog Yakhauj txiv.Yakhauj yog Yudas thiab nws cov kwv tij txiv.
3 Yudas yog Pheles thiab Xelas txiv. Nkawd niam yog Thamas.Pheles yog Heloos txiv.Heloos yog Las txiv.
4 Las yog Aminadas txiv.Aminadas yog Nasoos txiv.Nasoos yog Xamoos txiv.
5 Xamoos yog Npau-as txiv. Npau-as niam yog Lahaj.Npau-as yog Aunpes txiv. Aunpes niam yog Luv.Aunpes yog Yexis txiv.
6 Yexis yog Vaj Ntxwv Daviv txiv.Daviv yog Xalaumoos txiv. Xalaumoos niam yog Ulias tus poj niam.
7 Xalaumoos yog Lehaunpau-as txiv.Lehaunpau-as yog Anpiyas txiv.Anpiyas yog Axas txiv.
8 Axas yog Yehausafas txiv.Yehausafas yog Yehaulas txiv.Yehaulas yog Uxiyas txiv.
9 Uxiyas yog Yauthas txiv.Yauthas yog Ahas txiv.Ahas yog Hexekhiyas txiv.
10 Hexekhiyas yog Manaxes txiv.Manaxes yog Amoos txiv.Amoos yog Yauxiyas txiv.
11 Yauxiyas yog Yekhaunias* thiab nws cov kwv tij txiv. Lawv yug rau lub caij* uas cov Yudais raug kuav mus rau Npanpiloos.
12 Yekhaunias yog Sethi-ees txiv. Sethi-ees yug tom qab raug kuav mus rau Npanpiloos.Sethi-ees yog Xelunpanpees txiv.
13 Xelunpanpees yog Anpi-us txiv.Anpi-us yog Eli-akhees txiv.Eli-akhees yog Axos txiv.
14 Axos yog Xadaus txiv.Xadaus yog Akhis txiv.Akhis yog Eli-us txiv.
15 Eli-us yog Ele-axas txiv.Ele-axas yog Mathees txiv.Mathees yog Yakhauj txiv.
16 Yakhauj yog Yauxej txiv. Yauxej yog tus yuav Maivliag ua poj niam. Maivliag yug Yexus tus uas sawv daws hu ua Khetos.
17 Yog li ntawd, suav txij Anplahas los txog rau Daviv muaj 14 tiam. Suav txij Daviv los txog thaum cov Yudais raug kuav mus rau Npanpiloos muaj 14 tiam. Suav txij thaum raug kuav mus rau Npanpiloos los txog tus Khetos muaj 14 tiam.
18 Yexus Khetos los yug hauv ntiaj teb li no. Lub sij hawm uas Yauxej tseem qhaib Maivliag mas lub hwj huam dawb huv* ua rau Maivliag xeeb tub.
19 Tiam sis Yauxej* yog ib tug neeg ncaj ncees nws tsis xav kom Maivliag poob ntsej muag. Nws thiaj npaj siab muab Maivliag tso* twj ywm tseg.
20 Tom qab Yauxej muab tej no xav tas lawm, nws ua npau suav pom Vajtswv Yehauvas* ib tug tub txib saum ntuj los hais rau nws tias, “Yauxej,* tsis txhob poob siab, cia li mus coj Maivliag los tsev los ua koj tus poj niam.* Yog lub hwj huam dawb huv ua rau nws xeeb tub xwb.
21 Nws yuav yug ib tug tub. Koj yuav tsum muab tus tub ntawd hu ua Yexus* rau qhov nws yuav cawm tib neeg dim lawv lub txim.”
22 Tag nrho tej no muaj tiav raws nkaus li Vajtswv Yehauvas* tau hais rau tus uas cev Nws lus lawm tias,
23 “Saib maj! Ib tug nkauj xwb yuav xeeb tub. Nws yuav yug ib tug tub thiab luag yuav muab nws hu ua Emanu-ees.” Lub npe ntawd txhais tias “Vajtswv nrog nraim peb.”
24 Thaum Yauxej tsim dheev los nws txawm mus coj Maivliag los tsev los ua nws tus poj niam* raws li Vajtswv Yehauvas* tus tub txib saum ntuj tau hais lawd.
25 Tiam sis Yauxej tsis nrog Maivliag pw ua niam txiv mus txog thaum yug tau tus me tub ntawd. Thaum yug tau lawd, Yauxej muab nws tis npe hu ua Yexus.
Cov taw ntawv
^ Los sis “Yexus uas yog tus Mexiyas.” Khetos thiab Mexiyas txhais tias “raug xaiv.”
^ Los sis “caj ces.”
^ Hauv tshooj no lo lus “txiv” kuj yog hais rau yawg, yawg koob, thiab yawg suab.
^ Yekhaunias kuj hu ua Yehauyakhees los sis Khaunias.
^ Lub caij no yog ua ntej cov Yudais raug kuav mus rau Npanpiloos.
^ Los sis “Vajtswv lub hwj chim.”
^ Lus Kilis yog “nws tus txiv Yauxej.” Raws li Yudais kev cai, thaum sib qhaib ces yeej suav tau tias yog txij nkawm lawm.
^ Los sis “nrauj.” Raws li Yudais kev cai, txawm sib qhaib xwb los yuav tsum nrauj thiaj tso tau.
^ Nov yog thawj zaug uas Vajtswv lub npe, Yehauvas, tshwm hauv cov Nqe Vajlugkub Kilis. Tshwm txog 237 zaus. Mus saib Cov Lus Txhais.
^ Lus Kilis yog “Yauxej uas yog Daviv tus xeeb ntxwv.”
^ Lus Kilis yog “coj koj tus poj niam Maivliag los tsev.”
^ Lub npe Henplais hu ua Yesuas los sis Yausuas uas txhais tias “Yehauvas yog tus cawm dim.”
^ Mus saib Cov Lus Txhais.
^ Lus Kilis yog “coj nws tus poj niam Maivliag los tsev.”
^ Mus saib Cov Lus Txhais.
