Mathais Sau 12:1-50
-
Yexus yog “tus Tswv uas kav hnub Xanpataus” (1-8)
-
Yexus kho tus yawg qhuav tes (9-14)
-
Tus tub txib uas Vajtswv hlub (15-21)
-
Yexus siv lub hwj huam dawb huv ntiab dab (22-30)
-
Lub txim uas Vajtswv zam tsis tau (31-32)
-
Saib cov txiv ces koj yeej paub tsob ntoo (33-37)
-
Qhov txuj ci uas tau muaj rau Yaunas (38-42)
-
Thaum tus dab rov los (43-45)
-
Yexus niam thiab nws cov kwv (46-50)
12 Muaj ib hnub Xanpataus, Yexus thiab nws cov thwj tim hla ib daim teb mog.* Cov thwj tim tshaib plab, lawv thiaj zaws hnab mog los tev noj.
2 Thaum cov Falixais pom li ntawd, lawv hais rau Yexus tias, “Saib maj! Koj cov thwj tim ua tej uas txwv tsis pub ua rau hnub Xanpataus.”
3 Yexus teb lawv tias, “Nej tsis tau nyeem txog Daviv lod? Muaj ib zaug Daviv thiab nws cov kwv luag tshaib plab.
4 Nws thiaj mus rau hauv Vajtswv lub tsev* thiab muab cov ncuav uas fij rau Vajtswv lawd los rau lawv noj. Yog yam uas cov pov thawj thiaj muaj cai noj xwb los sad?
5 Nej tsis tau nyeem Mauxes Txoj Kev Cai lod? Hnub Xanpataus cov pov thawj hauv lub tuam tsev yeej ua hauj lwm tas zog los twb tsis txhaum.
6 Kuv qhia rau nej tias muaj ib tug uas tseem ceeb dua lub tuam tsev nyob ntawm no.
7 Vajtswv Txoj Lus twb hais tias, ‘Kuv tsis xav kom nej tua tsiaj fij rau kuv tiam sis kuv xav kom nej muaj lub siab hlub* luag.’ Yog nej to taub nqe no ces nej twb tsis liam txim rau cov uas tsis tau ua txhaum.
8 Vim neeg Leej Tub yog tus Tswv uas kav hnub Xanpataus.”
9 Tom qab ntawd, Yexus mus rau hauv lub tsev pe hawm.
10 Muaj ib tug yawg qhuav tes kuj tuaj rau hauv thiab. Cov Falixais thiaj nug Yexus tias, “Kho mob rau hnub Xanpataus puas txhaum?” Lawv txhob txwm nug Yexus kom tau kev liam nws.
11 Nws thiaj teb lawv tias, “Hnub Xanpataus yog nej leej twg muaj ib tug yaj poob hauv qhov, nws tseem yuav tsis mus muab rho tawm thiab lod?
12 Tib neeg tseem muaj nqis dua tej yaj! Yog leej twg ua ib yam zoo rau hnub Xanpataus yeej tsis txhaum.”
13 Ces Yexus hais rau tus yawg qhuav tes tias, “Cia li xyab hlo koj txhais npab.” Thaum nws xyab hlo, nws txhais tes txawm zoo kiag li sab tod lawm.
14 Cov Falixais txawm tawm mus tuav tswv yim seb yuav ua li cas thiaj tua tau Yexus.
15 Thaum Yexus paub li no, nws cia li sawv kev mus rau lwm qhov lawm. Muaj neeg coob coob raws nws qab, nws kho lawv tej mob zoo huv si.
16 Tiam sis nws txwv tsis pub lawv qhia rau leej twg paub txog nws li,
17 kom muaj tiav raws li Vajtswv tau hais rau Yaxayas tus uas cev Nws lus tias,
18 “Tus no yog kuv tus tub txib uas kuv xaiv tseg. Kuv hlub nws heev. Nws ua haum kuv siab. Kuv yuav pub kuv lub hwj huam rau nws thiab nws yuav qhia ib tsoom neeg kom coj ncaj raws li kuv lub siab nyiam.
19 Nws yuav tsis tsa ncauj nrog luag sib cav sib ceg thiab yuav tsis muaj leej twg hnov nws lub suab nrov tom tej tshav puam.
20 Tus tauj deg uas lov lawm los nws yuav tsis muab tu, thiab tus teeb xeeb uas cig pluj pliv los nws yuav tsis muab tua mus txog thaum nws coj kev ncaj ncees los rau txhua qhov.
21 Txhua haiv neeg yuav vam khom nws.”*
22 Muaj neeg coj ib tug yawg raug dab uas dig muag thiab hais tsis tau lus tuaj cuag Yexus mas Yexus kho nws zoo, nws thiaj pom kev thiab hais tau lus lawm.
23 Cov neeg coob coob ntawd xav tsis thoob li. Lawv txawm hais zom zaws tias, “Ntshe tus no yog Daviv tus Xeeb Ntxwv kaj?”
24 Thaum cov Falixais hnov li ntawd lawv hais tias, “Yuav tsum yog Npexenpus* uas yog dab tus thawj pub hwj chim rau nws ntiab dab xwb.”
25 Yexus paub tej uas lawv hais ntawd, nws thiaj hais rau lawv tias, “Txhua lub teb chaws uas rov sib tawm tsam yuav puas tsuaj mus, txhua lub nroog thiab txhua tsev neeg uas tsis koom siab yuav tawg ri sua.
26 Ib yam li ntawd, yog Xatas rov ntiab Xatas ces kuj yog nws rov rhuav nws tes hauj lwm. Nws txoj kev kav puas yuav ruaj khov?
27 Tsis tas li ntawd, yog Npexenpus pub hwj chim rau kuv ntiab dab ces leej twg ho pub hwj chim rau nej cov thwj tim ntiab dab thiab? Nej cov thwj tim tes hauj lwm twb qhia tias nej hais tsis yog lawm.
28 Yog Vajtswv lub hwj huam ua rau kuv ntiab tau dab ces qhia tias Vajtswv txoj kev kav* twb los txog lawm, tiam sis nej tsis paub.
29 Yog tus tswv tsev muaj zog heev, leej twg yuav txeem tau mus rau hauv nws lub tsev mus lws nws tej cuab txhiaj cuab tam? Yuav tsum muab nws khi ua ntej tso mam txeem tau mus rau hauv.
30 Tus uas tsis kam tuaj kuv tog yeej tawm tsam kuv thiab tus uas tsis kam mus coj neeg los cuag kuv, tseem yuav ua rau neeg khiav ntawm kuv mus.
31 “Twb yog vim li ntawd, kuv thiaj hais rau nej tias, Vajtswv yeej zam tau txhua yam kev txhaum uas neeg ua. Txawm yog thuam tej yam dawb huv los nws kuj zam tau thiab. Tiam sis tus uas txhob txwm thuam lub hwj huam dawb huv, Vajtswv yeej yuav zam tsis tau.
32 Piv txwv tias, tus uas thuam neeg Leej Tub los Vajtswv zam tau. Tiam sis tus uas txhob txwm thuam lub hwj huam dawb huv, Vajtswv yeej zam tsis tau li, tsis hais tiam no los sis tiam tom ntej.
33 “Yog koj ua zoo tu tsob ntoo ces yuav txi tau cov txiv zoo, yog koj tsis ua zoo tu ces yuav txi tau cov txiv phem. Yog koj saib cov txiv koj yeej paub tias tsob ntoo zoo li cas.
34 Cov niag noob nab, nej lub niag siab phem es nej yuav ua li cas hais tau lus zoo? Vim lub siab xav li cas, lub ncauj hais tawm li ntawd.
35 Tus neeg zoo xav ntsoov txog yam zoo hauv nruab siab, nws thiaj hais tawm yam zoo xwb. Tiam sis tus neeg phem xav ntsoov txog yam phem hauv nruab siab, nws thiaj hais tawm tej yam phem.
36 Kuv qhia rau nej tias thaum txog Hnub Txiav Txim, txhua tus uas hais lus tsis muaj qab hau yuav tau ris tej uas lawv hais.
37 Yog li ntawd, yog nej hais lus zoo ces Vajtswv yuav suav tias nej yog neeg ncaj ncees. Tiam sis yog nej hais lus phem ces Vajtswv yuav txiav txim rau nej.”
38 Cov xib hwb* thiab cov Falixais thiaj teb Yexus tias, “Xib Hwb, peb xav pom koj ua txuj ci peb thiaj paub tias Vajtswv txib koj los tiag.”
39 Yexus teb lawv tias, “Tiam neeg lim hiam uas tsis muab siab npuab Vajtswv, nej xav pom txuj ci kawg tiam sis nej yuav pom qhov txuj ci uas tau muaj rau Yaunas tus uas cev Vajtswv lus xwb.
40 Yaunas nyob hauv ntses lub plab peb hnub peb hmos li cas, neeg Leej Tub yuav nyob hauv nruab a peb hnub peb hmos ib yam li ntawd.
41 Thaum txog Hnub Txiav Txim, cov Ninaves yuav nrog tiam neeg no sawv hauv qhov tuag rov los. Cov Ninaves yuav phua cai rau tiam neeg no. Tos lawv phua cai los twb yog thaum lawv hnov Yaunas qhia, lawv txawm hloov dua siab tshiab. Kuv qhia rau nej tias tseem muaj ib tug loj dua Yaunas nyob ntawm no.
42 Thaum txog Hnub Txiav Txim, tus poj vaj uas nyob nram qab teb yuav nrog tiam neeg no sawv hauv qhov tuag rov los. Nws yuav phua cai rau tiam neeg no. Tos nws phua cai los, nws tuaj puag nram qab teb tuaj mloog Xalaumoos tej tswv yim. Kuv qhia rau nej tias tseem muaj ib tug loj dua Xalaumoos nyob ntawm no thiab.
43 “Thaum dab* tawm hauv ib tug neeg mus, tus dab ncig mus ncig los tom teb chaws moj sab qhua tiam sis nrhiav tsis tau chaw nyob.
44 Tus dab txawm hais tias, ‘Kuv mam rov mus rau tus neeg uas kuv tawm tuaj.’ Thaum nws rov los txog, ua ciav tus neeg ntawd zoo li lub tsev uas twb muab cheb tu du lug tiam sis khoob ntshuv cia xwb.
45 Tus dab thiaj mus coj tau xya tus dab uas tseem tsiv tshaj nws los nyob hauv tus neeg ntawd. Thaum kawg, tus neeg ntawd lub neej haj yam phem tshaj thaum chiv thawj. Tiam neeg no zoo li tus neeg ntawd ntag.”
46 Thaum Yexus tseem qhia cov neeg coob coob, nws niam thiab nws cov kwv tuaj sawv sab nraud xav nrog nws tham.
47 Ib tug thiaj los hais rau Yexus tias, “Koj niam thiab koj cov kwv nyob sab nraud xav nrog koj tham.”
48 Yexus thiaj teb nws tias, “Leej twg yog kuv niam? Leej twg yog kuv cov kwv?”
49 Ces nws txawm taw tes rau nws cov thwj tim thiab hais tias, “Cov no yog kuv niam thiab kuv cov kwv ntag.
50 Tus uas coj raws li kuv Leej Txiv saum ntuj lub siab nyiam thiaj yog kuv tus kwv tij, kuv tus muam, thiab kuv niam.”
Cov taw ntawv
^ Mog los sis qeb yog ib hom qoob uas cov neeg nyob teb chaws Ixayees muab ua ncuav noj.
^ Uas yog lub tsev ntaub.
^ Lus Kilis yog “khuv leej.”
^ Lus Kilis yog “nws lub npe.”
^ Npexenpus yog ib lub npe meej mom rau Xatas uas yog dab tus thawj.
^ Lus Kilis yog “lub Nceeg Vaj.” Mus saib Cov Lus Txhais.
^ Los sis “cov xib hwb qhia Vajtswv kev cai.” Mus saib Cov Lus Txhais.
^ Lus Kilis yog “ib tug dab tsis huv.” Mus saib lo lus “dab” hauv Cov Lus Txhais.
