Tub Txib Tes Hauj Lwm 14:1-28
14 Thaum Povlauj thiab Npananpas mus txog Ikhaunias, nkawd mus rau hauv cov Yudais lub tsev pe hawm. Nkawd qhia tau zoo heev mas cov Yudais thiab cov Kilis coob leej los ntseeg.
2 Tiam sis cov Yudais uas tsis ntseeg tshum thiab ntxias kom lwm haiv neeg tawm tsam cov kwv tij.
3 Nkawd thiaj nrog cov kwv tij ntawd nyob ib ntus. Vajtswv Yehauvas* muab hwj chim rau nkawd muaj lub siab tawv qhawv qhia tsis ntshai li. Nws pub nkawd ua tej txuj ci tseem ceeb, ua rau sawv daws xav tsis thoob. Tej no ua tim khawv txog Vajtswv txoj kev hlub nplua mias.
4 Thaum ntawd lub nroog tawg ua ob pab, ib pab tuaj cov Yudais tog, ib pab tuaj cov tub txib tog.
5 Lwm haiv neeg, cov Yudais, thiab lawv tej thawj coj txawm nrhiav kev ua phem rau Povlauj thiab Npananpas thiab xuas pob zeb ntaus nkawd.
6 Tiam sis muaj neeg ceeb toom nkawd ces nkawd thiaj khiav mus rau hauv Likhaunias, Lixathas thiab Dawnpis, thiab mus rau tej zej zog uas nyob ze ntawd.
7 Nkawd tshaj tawm txoj xov zoo tsis tseg rau qhov ntawd.
8 Hauv Lixathas muaj ib tug yawg uas yug los lub cev tsis meej xeeb, nws ib txwm mus tsis taus kev.
9 Nws zaum mloog Povlauj qhia. Povlauj saib ntsoov nws thiab pom tias nws muaj kev ntseeg thiab tso siab tias Vajtswv yeej kho tau nws zoo.
10 Povlauj thiaj hais nrov nrov tias, “Cia li sawv tsees.” Nws txawm sawv tsees tam sid thiab mus taus kev lawm.
11 Thaum cov neeg coob coob pom Povlauj ua tau li no, lawv txawm qw ua lus Likhaunias tias, “Tej tim tswv txia los ua neeg nrog peb nyob lawm lauj!”
12 Lawv thiaj muab Npananpas hu ua Xus thiab muab Povlauj hu ua Hawmes rau qhov Povlauj yog tus qhia ntau.
13 Lub tuam tsev lawv teev Xus nyob ze ntawm rooj loog nkag mus rau hauv nroog. Tus pov thawj uas teev Xus txawm cab nyuj thiab nqa paj ntoos* tuaj rau ntawm rooj loog, kom cov tib neeg muab xyeem rau Povlauj thiab Npananpas.
14 Thaum Npananpas thiab Povlauj* pom tej no, nkawd thiaj dua rhe nkawd ob lub tsho dhia mus rau ntawm cov tib neeg thiab hais tias,
15 “Cov kwv tij’e, nej ua dab tsi li no? Wb yog neeg ib yam li nej thiab xwb! Wb tuaj ntawm no, yog xav tshaj tawm txoj xov zoo rau nej kom nej tso tej yam tsis muaj qab hau no tseg thiab los cuag tus Vajtswv uas muaj sia zees nyob. Nws yog tus tsim lub ntuj lub teb, tej dej hiav txwv thiab ib puas tsav yam hauv lub qab ntuj khwb no.
16 Yav tas los, Vajtswv cia txhua haiv neeg ua ywj siab ywj ntsws.
17 Txawm li ntawd los, Vajtwv yeej ua tim khawv tias nws zoo npaum li cas tiag. Nws niaj hnub tso tshav tso nag los kom tej qoob loo siav raws caij raws nyoog, nej thiaj muaj txaus noj txaus haus thiab muaj kev zoo siab.”
18 Txawm nkawd hais li no los, nkawd cheem yuav luag tsis tau cov tib neeg kom txhob muab tej ntawd xyeem rau nkawd.
19 Tiam sis muaj ib co Yudais tuaj hauv Athi-aus thiab Ikhaunias tuaj ntxias tau cov tib neeg. Lawv txawm xuas pob zeb ntaus Povlauj thiab muab nws cab mus pov sab nraum lub nroog rau qhov lawv xav tias nws tuag lawm.
20 Tiam sis thaum cov thwj tim los vij vog Povlauj, nws cia li tsim los thiab rov mus rau hauv lub nroog. Hnub tom qab ntawd, nws nrog Npananpas mus rau Dawnpis.
21 Nkawd tshaj tawm txoj xov zoo hauv lub nroog ntawd thiab nrhiav tau coob tus thwj tim los ntseeg ces nkawd mam rov mus rau Lixathas, Ikhaunias, thiab Athi-aus.
22 Nkawd txhawb kom cov thwj tim tuav kev ntseeg ruaj nreeg. Nkawd hais tias, “Peb yuav tsum tiv kev txom nyem nyuaj siab ntau yam thiaj mus tau rau hauv Vajtswv lub Nceeg Vaj.”*
23 Tsis tas li ntawd xwb, nkawd tsa ib co los ua txwj laus rau txhua lub koom txoos. Nkawd thov Vajtswv thiab ua kev cai yoo mov thiab muab cov txwj laus ntawd tso rau Vajtswv Yehauvas* tus uas lawv ntseeg saib xyuas.
24 Tom qab ntawd, nkawd sawv kev hla cheeb tsam Pixidias mus rau lub xeev Pafilias.
25 Thaum nkawd tshaj tawm hauv lub nroog Pawkas tas lawm, nkawd txawm mus rau nram lub nroog Athalias.
26 Dhau ntawd, nkawd nce nkoj rov mus rau lub nroog Athi-aus uas yav nram ntej cov kwv tij thov Vajtswv foom koob hmoov nplua mias rau nkawd mus tshaj tawm txoj xov zoo. Nim no nkawd twb ua tiav tes hauj lwm ntawd lawm.
27 Thaum nkawd mus txog thiab tau nrog lub koom txoos ua ke, nkawd qhia ntau yam uas Vajtswv txib kom nkawd mus ua, thiab qhia tias Vajtswv twb qhib kev rau lwm haiv neeg los ntseeg lawm.
28 Nkawd thiaj nrog cov thwj tim nyob ntev loo.
Cov taw ntawv
^ Mus saib Cov Lus Txhais.
^ Los sis “tej kauj paj.”
^ Lus Kilis yog “ob tug tub txib, Npananpas thiab Povlauj.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Mus saib Cov Lus Txhais.
