Tub Txib Tes Hauj Lwm 17:1-34
17 Zaum no lawv mus dhau Afipolis thiab Apaulaunias mus rau Thexalaunikas. Nyob hauv Thexalaunikas, cov Yudais muaj ib lub tsev pe hawm.
2 Povlauj thiaj mus rau hauv raws li nws ib txwm mus. Nws ua tib zoo piav Vajtswv Txoj Lus rau lawv kom lawv nkag siab. Nws ua li no tau peb hnub Xanpataus.
3 Nws muab tej nqe hauv Vajtswv Txoj Lus los piav rau lawv mloog tias tus Khetos yuav tsum raug tsim txom thiab tuag es sawv hauv qhov tuag rov los. Nws hais tias, “Yexus yog tus Khetos, nws yog tus uas kuv tshaj tawm rau nej no ntag.”
4 Lawv ib txhia thiaj los ntseeg thiab los koom nrog Povlauj thiab Xilas. Muaj ib co neeg Kilis coob heev uas pe hawm Vajtswv thiab ib co poj niam uas muaj meej mom kuj los ntseeg thiab.
5 Tiam sis cov Yudais khib heev, lawv thiaj nrhiav ib co neeg tsis tsim txiaj uas tuaj nyob dawb tom tshav puam los ua ib pab tsim kev kub ntxhov rau lub nroog. Lawv txeem kiag mus rau hauv Yaxoos tsev, mus nrhiav Povlauj thiab Xilas los rau pab neeg coob coob ntawd.
6 Thaum lawv nrhiav tsis tau nkawd, lawv thiaj ntes kiag Yaxoos thiab cov kwv tij ib txhia cab mus cuag cov tswv nroog thiab hais tias, “Cov txiv neej uas tsim kev kub ntxhov rau txhua qhov kuj tuaj txog hauv lub nroog no lawm thiab,
7 Yaxoos tseem tos txais lawv los so hauv nws tsev thiab. Tag nrho cov neeg no tawm tsam Xixas txoj kev cai rau qhov lawv hais tias muaj dua ib tug vaj ntxwv hu ua Yexus.”
8 Thaum lawv hnov dheev tej no, cov neeg coob coob thiab cov tswv nroog ntxhov siab heev.
9 Thaum lawv muab Yaxoos nplua tas ces cov nom tswv mam tso lawv mus.
10 Thaum tsaus ntuj zuag, cov kwv tij txawm xa Povlauj thiab Xilas mus rau Npelias lawm. Thaum mus txog chaw, nkawd ncaj qha mus rau ntawm cov Yudais lub tsev pe hawm.
11 Cov uas nyob hauv Npelias yooj yim qhia dua cov uas nyob hauv Thexalaunikas, rau qhov lawv kub siab lug txais yuav txoj xov zoo thiab lawv niaj hnub tshawb nrhiav Vajtswv Txoj Lus seb puas muaj raws li lawv tau kawm tiag.
12 Thaum kawg lawv coob tus thiaj los ntseeg. Muaj coob tus poj niam Kilis uas paub tab thiab cov txiv neej ib txhia kuj los ntseeg thiab.
13 Thaum cov Yudais hauv Thexalaunikas hnov tias Povlauj mus tshaj tawm Vajtswv txoj lus hauv Npelias thiab, lawv txawm tuaj tshum kom cov tib neeg ntxhov.
14 Cov kwv tij thiaj xa Povlauj mus rau ntawm qhov chaw nres nkoj tam sid, tiam sis tseg Xilas thiab Timautes nkawd nyob.
15 Cov uas nrog Povlauj ua ke xa nws mus txog Athees xwb, rau qhov Povlauj txib kom lawv rov mus hais Xilas thiab Timautes nkawd tuaj cuag nws sai sai.
16 Thaum Povlauj nyob tos nkawd hauv Athees, nws pom tias lub nroog ntawd muaj mlom puv ntia txhua txhia qhov chaw mas ua rau nws meem txom.
17 Nws txawm ua tib zoo piav Vajtswv Txoj Lus rau cov Yudais hauv lub tsev pe hawm thiab lwm cov uas tuaj pe hawm Vajtswv kom lawv nkag siab. Nws kuj niaj hnub mus qhia cov tib neeg uas tuaj tom tej tshav puam thiab.
18 Tiam sis cov xib hwb hauv pab Epekulus* thiab pab Xatau-is* txawm nrog Povlauj sib cam. Muaj ib co hais tias, “Tus niag neeg ntau ncauj no tuaj qhia peb txog dab tsi?” Lwm cov hais tias, “Zoo li nws tuaj qhia txog lwm haiv neeg tej dab qhuas sub.” Lawv hais li no rau qhov nws qhia txoj xov zoo txog Yexus thiab qhia tias neeg yuav sawv hauv qhov tuag rov los.
19 Lawv thiaj coj nws mus rau saum Alepakas* thiab hais tias, “Thov koj piav ntxiv txog tej kev cai tshiab uas koj qhia ntawd.
20 Koj qhia tej yam txawv ua luaj, peb tsis tau hnov dua li. Peb xav paub seb tej ntawd yog li cas tiag.”
21 Thaum cov neeg Athees thiab lwm haiv neeg uas tuaj rau ntawd tau nyob dawb, lawv tsuas mloog luag piav txog tej zaj tshiab thiab qhia tej zaj tshiab rau lwm tus xwb.
22 Povlauj thiaj sawv tab meeg sawv daws saum Alepakas* thiab hais tias,
“Cov neeg Athees’e, kuv pom tias txhua yam uas nej ua qhia tias nej hwm nej tej dab qhuas* heev dua lwm pab lwm pawg.
23 Thaum kuv ncig mus ua tib zoo saib tej uas nej teev hawm, kuv pom ib lub thaj txaug tias, ‘Teeb rau tus vaj tswv uas peb tsis paub.’ Tus uas nej tsis paub es nej pe hawm ntawd yog tus uas kuv tab tom qhia rau nej ntag.
24 Tus Vajtswv uas tsim lub qab ntuj khwb thiab ib puas tsav yam uas nyob rau hauv, twb yog tus Tswv uas kav lub ntuj lub teb. Yog li ntawd, nws tsis nyob hauv tej tuam tsev uas neeg txhais tes ua.
25 Tsis tas leej twg yuav thiaj nws cuag li nws vam khom tib neeg, rau qhov nws twb yog tus rau siav rau pa rau txhua leej txhua tus thiab ib puas tsav yam.
26 Nws tsim txhua haiv neeg hauv qab ntuj no tawm hauv ib tug txiv neej los xwb. Nws teem caij teem nyoog rau txhua yam thiab tu ciam dej ciam av rau neeg nyob.
27 Nws ua li no kom neeg los nrhiav Vajtswv. Yog neeg kub siab nrhiav nws, lawv yeej nrhiav tau, rau qhov Vajtswv nyob tsis deb ntawm peb txhua tus.
28 Twb yog muaj Vajtswv peb thiaj txawj mus txawj los, muaj txoj sia nyob li no. Nej cov neeg txawj hais lus paj huam los ib txhia kuj hais tias, ‘Peb yog nws tej tub ki thiab.’
29 “Yog li ntawd, peb twb yog Vajtswv tej tub ki ces tsis tsim nyog peb xav tias Vajtswv zoo li tej mlom nyiaj, mlom kub, mlom pob zeb uas neeg xav hauv nruab siab thiab muab txaug tawm los.
30 Yav tas los tib neeg coj li no vim lawv tsis paub, Vajtswv thiaj tsis suav txim rau lawv. Tiam sis nim no nws tshaj tawm rau ib tsoom neeg uas nyob txhua qhov tias lawv yuav tsum hloov dua siab tshiab.
31 Rau qhov nws twb teem ib hnub cia rau tus uas nws tsa los txiav txim ncaj ncees rau ib tsoom neeg thoob ntiaj teb. Vajtswv twb tsa tus ntawd sawv hauv qhov tuag rov los lawm, kom neeg tso siab tias hnub ntawd yeej yuav los tiag.”
32 Thaum cov neeg hnov Povlauj qhia tias cov tuag yuav sawv rov los, ib txhia thuam nws tiam sis lwm cov ho hais tias, “Peb xav mloog zaj no ntxiv.”
33 Povlauj thiaj mus rau lwm qhov,
34 tiam sis ho muaj ib txhia caum nws thiab los ntseeg. Cov ntawd yog Di-aunixias uas yog ib tug txiav txim ntawm lub Alepakas,* thiab ib tug poj niam hu ua Damalis. Kuj muaj dua lwm cov los ntseeg thiab.
Cov taw ntawv
^ Pab uas caum tus yawg kawm txuj ci hu ua Epekulus ntseeg tias neeg yuav tsum ua neej ywj siab kom txaus nkaus.
^ Pab uas caum tus yawg kawm txuj ci hu ua Xinos ntseeg tias neeg yuav tsum txawj xav, tsis txhob ntshai tsam raug mob raug nkeeg, thiab tsis txhob ntshaw kev zoo siab.
^ Yog ib lub roob uas nyob hauv Athees thaum ub. Lub rooj txiav txim qib siab kuj tuaj sab laj rau saud thiab.
^ Yog ib lub roob uas nyob hauv Athees thaum ub. Lub rooj txiav txim qib siab kuj tuaj sab laj rau saud thiab.
^ Los sis “ntshai nej tej vajtswv.”
^ Yog ib lub roob uas nyob hauv Athees thaum ub. Lub rooj txiav txim qib siab kuj tuaj sab laj rau saud thiab.
